​ಮೈಸೂರು: ಟಿ ನರಸೀಪುರದಲ್ಲಿ ಪಟಾಕಿ ಶಬ್ದದಿಂದ ಹೃದಯಾಘಾತವಾಗಿ 6 ವರ್ಷದ ಡಾಬರ್​ಮನ್​​​​ ನಾಯಿ ಸಾವು

ಮೈಸೂರು, ನವೆಂಬರ್ 11: ಮೈಸೂರು ಜಿಲ್ಲೆಯ ಟಿ.ನರಸೀಪುರದಲ್ಲಿ ನಡೆದ ಅಹಿತಕರ ಘಟನೆಯಲ್ಲಿ, ಪಟಾಕಿ ಶಬ್ದಕ್ಕೆ ಹೆದರಿ ಆರು ವರ್ಷದ ಡಾಬರ್‌ಮನ್ ತಳಿಯ ನಾಯಿಯೊಂದು ಹೃದಯಾಘಾತದಿಂದ ಮೃತಪಟ್ಟಿದೆ. ತ್ರಿವೇಣಿ ನಗರದ ಬಿ.ಆರ್. ರಾಘವೇಂದ್ರ ಸ್ವಾಮಿ ಅವರಿಗೆ ಸೇರಿದ ಈ ಶ್ವಾನವು, ಪಕ್ಕದ ಮನೆಯವರು ಸಿಡಿಸಿದ ಪಟಾಕಿಗಳ ತೀವ್ರ ಸದ್ದಿನಿಂದ ತೀವ್ರ ಆಘಾತಕ್ಕೊಳಗಾಗಿದೆ. ನಾಯಿಗಳು ಅತ್ಯಂತ ಸೂಕ್ಷ್ಮ ಶ್ರವಣ ಶಕ್ತಿಯನ್ನು ಹೊಂದಿದ್ದು, ಪಟಾಕಿಗಳಂತಹ ಅನಿರೀಕ್ಷಿತ ಮತ್ತು ತೀವ್ರ ಶಬ್ದಗಳಿಗೆ ಬಹಳ ಸುಲಭವಾಗಿ ಗಾಬರಿಗೊಳ್ಳುತ್ತವೆ. ಇದು ಅವುಗಳಲ್ಲಿ ತೀವ್ರ ಆತಂಕ, ಭೀತಿ ಮತ್ತು ಒತ್ತಡಕ್ಕೆ ಕಾರಣವಾಗಬಹುದು. ಸದ್ಯ, ಮೃತಪಟ್ಟ ಡಾಬರ್‌ಮನ್ ನಾಯಿಗೆ ಕುಟುಂಬಸ್ಥರು ಅಂತ್ಯಕ್ರಿಯೆಯನ್ನು ನೆರವೇರಿಸಿದ್ದಾರೆ.

ಸಾಕುಪ್ರಾಣಿಗಳು ಪಟಾಕಿಗಳ ಸದ್ದಿಗೆ ಹೆದರಿ ಓಡಿಹೋಗುವುದು, ಅಡಗಿಕೊಳ್ಳುವುದು ಅಥವಾ ಆಹಾರ ಸೇವಿಸದೆ ಇರುವುದು ಸಾಮಾನ್ಯವಾಗಿದೆ. ಹೆಚ್ಚು ಸಾಕು ಪ್ರಾಣಿಗಳು ಇರುವ ಪ್ರದೇಶಗಳಲ್ಲಿ ಪಟಾಕಿ ಸಿಡಿಸುವುದನ್ನು ಆದಷ್ಟು ಕಡಿಮೆಗೊಳಿಸುವುದು ಅಥವಾ ಸಂಪೂರ್ಣವಾಗಿ ನಿಲ್ಲಿಸುವುದು ಸೂಕ್ತ ಎಂಬ ಅಭಿಪ್ರಾಯ ಸ್ಥಳೀಯರಿಂದ ವ್ಯಕ್ತವಾಗಿದೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ