ಕೊನೆಯ 11 ಎಸೆತಗಳಲ್ಲಿ 7 ಸಿಕ್ಸರ್‌, 2 ಬೌಂಡರಿ ಬಾರಿಸಿದ ಸಮೀರ್ ರಿಜ್ವಿ; ವಿಡಿಯೋ ನೋಡಿ

ಯುಪಿ ಪ್ರೀಮಿಯರ್ ಲೀಗ್ 2025 ರಲ್ಲಿ ಸಮೀರ್ ರಿಜ್ವಿ ಅವರ ಬ್ಯಾಟ್ ಅಬ್ಬರಿಸುತ್ತಿದೆ. ಈ ಲೀಗ್​ನಲ್ಲಿ ಕಾನ್ಪುರ್ ಸೂಪರ್‌ಸ್ಟಾರ್ಸ್ ತಂಡದ ನಾಯಕತ್ವವಹಿಸಿಕೊಂಡಿರುವ ಸಮೀರ್ ಮತ್ತೊಮ್ಮೆ ಸಿಕ್ಸರ್ ಮತ್ತು ಬೌಂಡರಿಗಳ ಮಳೆಗರೆದರು. ಇಂದು ನಡೆದ ಲಕ್ನೋ ಫಾಲ್ಕನ್ಸ್ ತಂಡದ ವಿರುದ್ಧದ ಪಂದ್ಯದಲ್ಲಿ ಸಮೀರ್ ರಿಜ್ವಿ ಕೇವಲ 32 ಎಸೆತಗಳಲ್ಲಿ ಅಜೇಯ 76 ರನ್ ಗಳಿಸಿ ತಂಡಕ್ಕೆ 8 ವಿಕೆಟ್‌ಗಳ ಗೆಲುವು ತಂದುಕೊಟ್ಟರು. 163 ರನ್‌ಗಳ ಗುರಿಯನ್ನು ಬೆನ್ನಟ್ಟಿದ ಕಾನ್ಪುರ್ ತಂಡವು ಸಮೀರ್ ಅವರ ಸಿಡಿಲಬ್ಬರದ ಬ್ಯಾಟಿಂಗ್​ನಿಂದಾಗಿ ಕೇವಲ 15.4 ಓವರ್‌ಗಳಲ್ಲಿ ಗುರಿ ತಲುಪಿತು.

11 ಎಸೆತಗಳಲ್ಲಿ 7 ಸಿಕ್ಸರ್

ಸಮೀರ್ ರಿಜ್ವಿ ಬ್ಯಾಟಿಂಗ್‌ಗೆ ಬಂದಾಗ ನಿಧಾನವಾಗಿ ಆಟ ಆರಂಭಿಸಿದರು. ಹೀಗಾಗಿ ಮೊದಲ 15 ಎಸೆತಗಳಲ್ಲಿ ಕೇವಲ 12 ರನ್ ಗಳಿಸಿದರು, ಆದರೆ ನಂತರ ಲಕ್ನೋದ ಬೌಲರ್‌ಗಳ ಮೆಲೆ ಪ್ರಹಾರ ಶುರು ಮಾಡಿದ ಸಮೀರ್ ರಿಜ್ವಿ ಮುಂದಿನ 17 ಎಸೆತಗಳಲ್ಲಿ 9 ಸಿಕ್ಸರ್‌ಗಳನ್ನು ಬಾರಿಸಿದರು. ದೊಡ್ಡ ವಿಷಯವೆಂದರೆ ಅವರು ಕೊನೆಯ 11 ಎಸೆತಗಳಲ್ಲಿ 7 ಸಿಕ್ಸರ್‌ಗಳು ಮತ್ತು 2 ಬೌಂಡರಿಗಳನ್ನು ಬಾರಿಸಿದರು. ಸಮೀರ್ ರಿಜ್ವಿ ಕೊನೆಯವರೆಗೂ ಅಜೇಯರಾಗಿ ಉಳಿದು ತಮ್ಮ ತಂಡಕ್ಕೆ ಗೆಲುವು ತಂದುಕೊಟ್ಟ ನಂತರವೇ ಮರಳಿದರು.