ಅವಸರಕ್ಕೆ ಬೆಲೆ ತೆತ್ತ ಯಶಸ್ವಿ ಜೈಸ್ವಾಲ್

ದೆಹಲಿಯಲ್ಲಿ ನಡೆಯುತ್ತಿರುವ ವೆಸ್ಟ್ ಇಂಡೀಸ್​ ವಿರುದ್ಧದ 2ನೇ ಟೆಸ್ಟ್ ಪಂದ್ಯದ ಮೊದಲ ಇನಿಂಗ್ಸ್​ನಲ್ಲಿ ಭರ್ಜರಿ ಶತಕ ಸಿಡಿಸಿದ್ದ ಯಶಸ್ವಿ ಜೈಸ್ವಾಲ್ ದ್ವಿತೀಯ ದಿನದಾಟದ ಆರಂಭದಲ್ಲೇ ವಿಕೆಟ್ ಒಪ್ಪಿಸಿದ್ದಾರೆ. ಅದು ಸಹ ರನೌಟ್ ಆಗುವ ಮೂಲಕ ಎಂಬುದೇ ಅಚ್ಚರಿ.

ಈ ಪಂದ್ಯದಲ್ಲಿ ಆರಂಭಿಕನಾಗಿ ಕಣಕ್ಕಿಳಿದ ಯಶಸ್ವಿ ಜೈಸ್ವಾಲ್ ಮೊದಲ ದಿನದಾಟದಲ್ಲಿ 173 ರನ್ ಪೇರಿಸಿದ್ದರು. ಇದಾಗ್ಯೂ ವೆಸ್ಟ್ ಇಂಡೀಸ್ ಬೌಲರ್​ಗಳಿಗೆ ಅವರ ವಿಕೆಟ್ ಪಡೆಯಲು ಸಾಧ್ಯವಾಗಿರಲಿಲ್ಲ.

ಅತ್ತ 173 ರನ್​ಗಳೊಂದಿಗೆ ದ್ವಿತೀಯ ದಿನದಾಟವನ್ನು ಆರಂಭಿಸಿದ್ದ ಜೈಸ್ವಾಲ್ ಕಡೆಯಿಂದ ದ್ವಿಶತಕವನ್ನು ನಿರೀಕ್ಷಿಸಲಾಗಿತ್ತು. ಆದರೆ ದ್ವಿತೀಯ ದಿನದಾಟದ 2ನೇ ಓವರ್​ನಲ್ಲೇ ಜೈಸ್ವಾಲ್ ತಮ್ಮ ವಿಕೆಟ್ ಕೈಚೆಲ್ಲಿದ್ದಾರೆ.

ಜೇಡನ್ ಸೀಲ್ಸ್ ಎಸೆದ ಈ ಓವರ್​ನ 2ನೇ ಎಸೆತದಲ್ಲಿ ಜೈಸ್ವಾಲ್ ಮಿಡ್ ಆಫ್​ನತ್ತ ಬಾರಿಸಿ ರನ್ ಕದಿಯಲು ಯತ್ನಿಸಿದ್ದರು. ಆದರೆ ನಾನ್ ಸ್ಟ್ರೈಕ್​ನಿಂದ ಶುಭ್​ಮನ್ ಗಿಲ್ ರನ್​ ನಿರಾಕರಿಸಿದರೂ ಅದನ್ನು ಗಮನಿಸದೇ ಯಶಸ್ವಿ ಜೈಸ್ವಾಲ್ ಪಿಚ್​ನ ಅರ್ಧಭಾಗವನ್ನು ದಾಟಿದ್ದರು.

ಆ ಬಳಿಕ ತಿರುಗಿ ಓಡಿದರೂ, ಅಷ್ಟರಲ್ಲಾಗಲೇ ಚೆಂಡು ವಿಕೆಟ್ ಕೀಪರ್ ಕೈ ಸೇರಿತು. ಪರಿಣಾಮ 175 ರನ್​ಗಳಿಸಿ ಯಶಸ್ವಿ ಜೈಸ್ವಾಲ್ ರನೌಟ್ ಆಗಿ ಪೆವಿಲಿಯನ್ ಕಡೆ ಭಾರದ ಹೆಜ್ಜೆಯಾಗಿದರು. ಇದೀಗ ಅವಸರದಲ್ಲಿ ವಿಕೆಟ್ ಕೈ ಚೆಲ್ಲಿದ ಜೈಸ್ವಾಲ್ ಅವರ ರನೌಟ್ ವಿಡಿಯೋ ವೈರಲ್ ಆಗಿದೆ.

ಇನ್ನು ಈ ಪಂದ್ಯದಲ್ಲಿ ಮೊದಲ ಇನಿಂಗ್ಸ್ ಆಡುತ್ತಿರುವ ಟೀಮ್ ಇಂಡಿಯಾ 102 ಓವರ್​ಗಳ ಮುಕ್ತಾಯದ ವೇಳೆಗೆ 3 ವಿಕೆಟ್ ಕಳೆದುಕೊಂಡು 379 ರನ್ ಕಲೆಹಾಕಿದೆ. ಸದ್ಯ ಕ್ರೀಸ್​ನಲ್ಲಿ ಶುಭ್​ಮನ್ ಗಿಲ್ ಹಾಗೂ ನಿತೀಶ್ ಕುಮಾರ್ ರೆಡ್ಡಿ ಬ್ಯಾಟಿಂಗ್ ಮಾಡುತ್ತಿದ್ದಾರೆ.