ದಕ್ಷಿಣ ಆಫ್ರಿಕಾ ಮಾಜಿ ಅಧ್ಯಕ್ಷನನ್ನು ಜೈಲಿಗೆ ಹಾಕಿದ ಬೆನ್ನಲ್ಲೇ ಭುಗಿಲೆದ್ದ ಹಿಂಸಾಚಾರ; 10 ಮಂದಿ ಸಾವು, 490 ಜನರ ಬಂಧನ

ದಕ್ಷಿಣ ಆಫ್ರಿಕಾದ ಮಾಜಿ ಅಧ್ಯಕ್ಷ ಜಾಕೋಬ್​ ಜುಮಾರನ್ನು ಜೈಲಿಗೆ ಹಾಕಿದ ಬೆನ್ನಲ್ಲೇ ಅವರ ಬೆಂಬಲಿಗರಿಂದ ಗಲಭೆ ಶುರುವಾಗಿದೆ. ಆ ಗಲಭೆಯೀಗ ಹಿಂಸಾತ್ಮಕ ರೂಪಕ್ಕೆ ತಿರುಗಿದೆ. ಈ ಹಿಂಸಾಚಾರದಲ್ಲಿ 10 ಮಂದಿ ಮೃತಪಟ್ಟಿದ್ದಾರೆ. ಸಾರ್ವಜನಿಕ ಹಿಂಸಾಚಾರ ಕಾಯ್ದೆಯಡಿ 490 ಮಂದಿಯನ್ನು ಬಂಧಿಸಲಾಗಿದೆ. ಜಾಕೋಬ್​ ಬಂಧನದಿಂದ ಕ್ರೋಧಗೊಂಡಿರುವ ಅವರ ಬೆಂಬಲಿಗರು ಜೊಹಾನ್ಸ್​ಬರ್ಗ್​​ನಲ್ಲಿರುವ ಶಾಪಿಂಗ್​ ಮಾಲ್​ಗೆ ನುಗ್ಗಿ ದಾಂಧಲೆ ಎಬ್ಬಿಸಿದ್ದಾರೆ. ಪ್ರಮುಖ ರಸ್ತೆಗಳ ಮಧ್ಯೆ ಟೈಯರ್​ಗಳನ್ನು ಸುಡುವ ಮೂಲಕ ದಾರಿಯನ್ನು ಬಂದ್​ ಮಾಡುತ್ತಿದ್ದಾರೆ. ಪ್ರತಿಭಟನಾಕಾರರ ಹಿಂಸೆಯನ್ನು ತಡೆಯಲು ಪೊಲೀಸರು, ದಕ್ಷಿಣ ಆಫ್ರಿಕಾ ಸೇನಾ ಸಿಬ್ಬಂದಿ ಹರಸಾಹಸಪಡುತ್ತಿದ್ದಾರೆ.

ಪ್ರತಿಭಟನಾಕಾರರನ್ನು ಪೊಲೀಸರು ಮತ್ತು ಸೇನಾಸಿಬ್ಬಂದಿ ಖಂಡಿತವಾಗಿ ನಿಯಂತ್ರಿಸುತ್ತಾರೆ. ಯಾರೂ ಹೆದರಬೇಡಿ. ದಕ್ಷಿಣ ಆಫ್ರಿಕಾದಲ್ಲಿ ಶಾಂತಿ ಸ್ಥಾಪನೆಗಾಗಿ ನಾವೆಲ್ಲರೂ ಒಟ್ಟಾಗಿ ಕೆಲಸ ಮಾಡಬೇಕು. ಪೊಲೀಸ್​, ಸೇನಾ ಸಿಬ್ಬಂದಿ ಕಾರ್ಯಕ್ಕೆ ಸಹಕಾರ ನೀಡಬೇಕು ಎಂದು ದಕ್ಷಿಣ ಆಫ್ರಿಕಾ ಅಧ್ಯಕ್ಷ ಸಿರಿಲ್ ರಾಮಾಫೋಸಾ ಸೋಮವಾರ ರಾತ್ರಿ, ರಾಷ್ಟ್ರವನ್ನು ಉದ್ದೇಶಿಸಿ ಮಾತನಾಡುವಾಗ ಭರವಸೆ ನೀಡಿದ್ದಾರೆ. ದಾಂಧಲೆ, ಲೂಟಿ, ಹಿಂಸಾಚಾರದ ಹಲವು ಫೋಟೋ, ವಿಡಿಯೋಗಳು ವೈರಲ್​ ಆಗುತ್ತಿವೆ.

ಜಾಕೋಬ್​ ಜುಮಾ 2009 ರಿಂದ 2018ರವರೆಗೆ ದಕ್ಷಿಣ ಆಫ್ರಿಕಾದ ಅಧ್ಯಕ್ಷರಾಗಿದ್ದರು. ಈ ಅವಧಿಯಲ್ಲಿ ಭ್ರಷ್ಟಾಚಾರ ನಡೆದಿದೆ ಎಂಬ ಆರೋಪ ಎದ್ದಿತ್ತು. ಅದನ್ನು ತನಿಖಾ ಮಾಡುತ್ತಿರುವ ತನಿಖಾ ದಳಕ್ಕೆ ಸಾಕ್ಷ್ಯ ಒದಗಿಸಬೇಕು ಎಂದು ನ್ಯಾಯಾಲಯ ಜಾಕೋಬ್​ಗೆ ಆದೇಶ ನೀಡಿತ್ತು. ಆದರೆ, ಕೋರ್ಟ್​ನ ಆದೇಶನ್ನು ಜಾಕೋಬ್​ ಉಲ್ಲಂಘಿಸಿದ್ದರು. ನ್ಯಾಯಾಲಯದ ಆದೇಶದ ಉಲ್ಲಂಘನೆಗಾಗಿ ಅವರಿಗೆ 15 ತಿಂಗಳ ಜೈಲು ಶಿಕ್ಷೆ ವಿಧಿಸಲಾಗಿದ್ದು, ಕಳೆದವಾರವೇ ಜೈಲಿಗೆ ಹಾಕಲಾಗಿದೆ.

ಕಳೆದವಾರ ಜಾಕೋಬ್​ ಜೈಲಿಗೆ ಸೇರಿದಾಗಿನಿಂದಲೂ ಅವರ ಬೆಂಬಲಿಗರಿಂದ ಗಲಭೆ ನಡೆಯುತ್ತಿದೆ. ಜಾಕೋಬ್​ ಮನೆ ಇರುವ ಕ್ವಾಜುಲು ನಟಾಲ್​​ ಪ್ರಾಂತ್ಯದಲ್ಲಿ ಮೊದಲು ಸಣ್ಣ ಪ್ರಮಾಣದಲ್ಲಿ ಶುರುವಾದ ಪ್ರತಿಭಟನೆ ನಿನ್ನೆಯಿಂದ ತೀವ್ರಗೊಂಡಿದೆ. ಅದೀಗ ದಕ್ಷಿಣ ಆಫ್ರಿಕಾದ ಖ್ಯಾತ ಪ್ರದೇಶವಾದ ಗೌಟೆಂಗ್​, ಜೊಹಾನ್ಸ್​ಬರ್ಗ್​ಗೂ ವ್ಯಾಪಿಸಿದೆ. ಜೊಹಾನ್ಸ್​ಬರ್ಗ್​​ನಲ್ಲಂತೂ ಅನೇಕ ಅಂಗಡಿಗಳು, ಮಾಲ್​​ಗಳನ್ನು ಧ್ವಂಸ ಮಾಡಲಾಗಿದೆ. ಎಲ್ಲ ಸ್ಥಳಗಳಲ್ಲೂ ದಕ್ಷಿಣ ಆಫ್ರಿಕಾದ ರಕ್ಷಣಾ ಪಡೆಗಳನ್ನು ನಿಯೋಜಿಸಲಾಗಿದೆ.

ಇದನ್ನೂ ಓದಿ: Explainer: ಅಸ್ಸಾಂನಲ್ಲಿ ಗೋಮಾಂಸ ಸೇವಿಸದ ಸಮುದಾಯದವರ ಪ್ರದೇಶದಲ್ಲಿ ಗೋಮಾಂಸ ನಿಷೇಧ; ಏನಿದು ಜಾನುವಾರು ಸಂರಕ್ಷಣಾ ಮಸೂದೆ?

10 Dead in Riots Over Jailing of Ex leader Jacob Zuma of South Africa