ಸಿಯೆರಾ ಲಿಯೋನ್​ನಲ್ಲಿ ಇಂಧನ ಟ್ಯಾಂಕರ್ ಸ್ಫೋಟಗೊಂಡು 92 ಮಂದಿ ಸಾವು, 30ಕ್ಕೂ ಹೆಚ್ಚು ಮಂದಿ ಬದುಕುವುದು ಅನುಮಾನ

ಇಂಧನ ಟ್ಯಾಂಕರ್​ವೊಂದು ಡಿಕ್ಕಿ ಹೊಡೆದ ನಂತರದಲ್ಲಿ ಸ್ಫೋಟಗೊಂಡು, ಕನಿಷ್ಠ 92 ಮಂದಿ ಸಾವನ್ನಪ್ಪಿದ್ದು, ಇತರ ಹತ್ತಾರು ಮಂದಿ ಗಾಯಗೊಂಡ ಘಟನೆ ಶುಕ್ರವಾರ ಸಿಯೆರಾ ಲಿಯೋನ್​ನ ರಾಜಧಾನಿಯಲ್ಲಿ ಸಂಭವಿಸಿದೆ, ಎಂದು ಅಧಿಕಾರಿಗಳು ಹೇಳಿದ್ದಾರೆ. “92 ಮಂದಿ ಸಾವನ್ನಪ್ಪಿದ್ದಾರೆ ಎಂಬ ಬಗ್ಗೆ ಈ ಬೆಳಗ್ಗೆ ನಮಗೆ ವರದಿ ಬಂದಿದೆ,” ಎಂದು ಉಪಾಧ್ಯಕ್ಷ ಮೊಹ್ಮದ್ ಜುಲ್ದೇ ಜಲ್ಲೋಹ್ ಹೇಳಿದ್ದಾರೆ. ಈ ಸ್ಫೋಟದಲ್ಲಿ ಸಾವಿನ ಸಂಖ್ಯೆ ಇನ್ನಷ್ಟು ಹೆಚ್ಚಾಗುವ ಬಗ್ಗೆ ಅನುಮಾನ ವ್ಯಕ್ತವಾಗಿದೆ. ಗಂಭೀರ ಸ್ವರೂಪದ ಸುಟ್ಟ ಗಾಯಗಳೊಂದಿಗೆ 88ಕ್ಕೂ ಹೆಚ್ಚು ಮಂದಿಯ ಚಿಕಿತ್ಸೆ ನಡೆಯುತ್ತಿದೆ ಎಂದು ಸೇರಿಸಲಾಗಿದೆ. ಶನಿವಾರ ಬೆಳಗ್ಗೆ ಹೊತ್ತಿಗೆ 92 ದೇಹಗಳನ್ನು ತಂದಿರುವುದಾಗಿ ಫ್ರೀಟೌನ್​ನ ಕನೌಟ್ ಆಸ್ಪತ್ರೆಯಲ್ಲಿನ ಶವಾಗಾರದಿಂದ ವರದಿ ಬಂದಿದೆ. ತೀವ್ರವಾಗಿ ಸುಟ್ಟ ಗಾಯಗಳಾಗಿ ಐಸಿಯುದಲ್ಲಿ ಇರುವ ಮೂವತ್ತು ಮಂದಿ ಬದುಕುಳಿವ ಸಾಧ್ಯತೆ ಇಲ್ಲ ಎಂದು ವೈದ್ಯಕೀಯ ಸಿಬ್ಬಂದಿ ತಿಳಿಸಿದ್ದಾರೆ.

ಫ್ರೀಟೌನ್​ನ ಪೂರ್ವಕ್ಕೆ ಇರುವ ಉಪನಗರವಾದ ವೆಲ್ಲಿಂಗ್​ಟನ್​ನಲ್ಲಿ ಟ್ರಕ್​ವೊಂದು ಟ್ಯಾಂಕರ್​ಗೆ ಡಿಕ್ಕಿ ಹೊಡೆದ ಮೇಲೆ ಈ ಸ್ಫೋಟ ಸಂಭವಿಸಿದೆ. ಅಪಘಾತವಾದ ಟ್ಯಾಂಕರ್​ನಿಂದ ತೈಲ ಸಂಗ್ರಹಕ್ಕೆ ಮುಂದಾದ ಜನರು ಸಹ ಈ ಘಟನೆಯಲ್ಲಿ ಸಂತ್ರಸ್ತರಾಗಿದ್ದಾರೆ ಎಂದು ಫೇಸ್​ಬುಕ್ ಪೋಸ್ಟ್​ನಲ್ಲಿ ನಗರದ ಮೇಯರ್ ತಿಳಿಸಿದ್ದಾರೆ. ಬಹಳ ಗಂಭೀರವಾಗಿ ಸುಟ್ಟುಹೋಗಿರುವ ಸಂತ್ರಸ್ತರನ್ನು ಹತ್ತಿರದ ಮಳಿಗೆಗಳು ಮತ್ತು ಮನೆಗಳಲ್ಲಿ ಮಲಗಿಸಲಾಗಿದೆ ಎಂದು ಹೇಳಿದ್ದು, ಈ ಬಗ್ಗೆ ಯಾವುದೇ ಸುದ್ದಿ ಸಂಸ್ಥೆ ಖಚಿತಪಡಿಸಿಲ್ಲ. ಆದರೆ ಸಾಮಾಜಿಕ ಮಾಧ್ಯಮಗಳಲ್ಲಿ ಗಿರಕಿ ಹೊಡೆಯುತ್ತಿರುವ ಫೋಟೋಗಳು, ವಿಡಿಯೋಗಳು ಗಾಬರಿಪಡಿಸುವಂತಿವೆ.

ಈ ಅವಘಡದಲ್ಲಿ ಆಗಿರುವ ಆಸ್ತಿ ಹಾನಿ ಪ್ರಮಾಣವು ಇನ್ನೂ ತಿಳಿದುಬಂದಿಲ್ಲ. ಈ ಬಗ್ಗೆ ಸ್ಥಳೀಯ ಪತ್ರಕರ್ತರೊಬ್ಬರು ಮಾಧ್ಯಮವೊಂದರ ಜತೆಗೆ ಮಾತನಾಡಿ, 100ಕ್ಕೂ ಹೆಚ್ಚು ಜನರು ಈ ಘಟನೆಯಲ್ಲಿ ಗಾಯಗೊಂಡಿದ್ದು, ದೇಶದ ವಿವಿಧ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂದು ಹೇಳಿದ್ದಾರೆ. ಈ ಸ್ಫೋಟ ನಡೆದಾಗ ಹಲವರು ಭಾರೀ ಸಂಚಾರ ದಟ್ಟಣೆಯಲ್ಲಿ ಕೂತಿದ್ದರು ಎಂದು ತಿಳಿಸಲಾಗಿದೆ. ಪ್ರಾಣ ಕಳೆದುಕೊಂಡವರು ಮತ್ತು ಸುಟ್ಟು ಹೋದವರಲ್ಲಿ ವಾಹನದೊಳಗೆ ಇದ್ದವರೇ ಹೆಚ್ಚು ಎನ್ನಲಾಗಿದೆ.

Deeply disturbed by the tragic fires and the horrendous loss of life around the Wellington PMB area. My profound sympathies with families who have lost loved ones and those who have been maimed as a result. My Government will do everything to support affected families. pic.twitter.com/xJRA1UtCJJ

— President Julius Maada Bio (@PresidentBio) November 6, 2021

ಜಗತ್ತಿನ ಅತ್ಯಂತ ಬಡ ದೇಶಗಳಲ್ಲಿ ಒಂದಾದ ಸಿಯೆರಾ ಲಿಯೋನ್​ನಲ್ಲಿ ಈ ಹಿಂದೆ ಕೂಡ ಪೆಟ್ರೋಲ್​ ಟ್ಯಾಂಕರ್​ಗಳನ್ನು ಒಳಗೊಂಡಂತೆ ಅಪಘಾತ ಸಂಭವಿಸಿದೆ. ಆಫ್ರಿಕಾದ ಇತರ ಭಾಗಗಳಲ್ಲೂ ಇದೇ ರೀತಿಯ ಘಟನೆ ಸಂಭವಿಸಿ, ಹಲವರು ಸಾವನ್ನಪ್ಪಿದ್ದಾರೆ.

ಇದನ್ನೂ ಓದಿ: ಉತ್ತರ ಕನ್ನಡ: ಗ್ಯಾಸ್ ಟ್ಯಾಂಕರ್ ಸ್ಫೋಟ; ಸುತ್ತಮುತ್ತ 300-400 ಮೀಟರ್ ವ್ಯಾಪಿಸಿರುವ ಬೆಂಕಿ

Published On - 6:16 pm, Sat, 6 November 21