ಪಾಕಿಸ್ತಾನದ ಶೇಕಡಾ 29 ಮಹಿಳೆಯರು ಮಾತ್ರ ಬ್ಯಾಂಕ್ ಅಕೌಂಟ್ ಹೊಂದಿದ್ದಾರೆ!

ಕರಾಚಿ: 2021ರ ಮಾರ್ಚ್​ ತಿಂಗಳವರೆಗಿನ ಅಂಕಿಸಂಖ್ಯೆಗಳ ಪ್ರಕಾರ ಪಾಕಿಸ್ತಾನದ ಶೇಕಡಾ 29ರಷ್ಟು ಮಹಿಳೆಯರು ಮಾತ್ರ ಬ್ಯಾಂಕ್ ಖಾತೆ ಹೊಂದಿದ್ದಾರೆ. ಇದು ಜಗತ್ತಿನಲ್ಲೇ ಮಹಿಳೆಯರು ಬ್ಯಾಂಕ್ ಅಕೌಂಟ್ ಹೊಂದಿರುವ ದೇಶಗಳ ಪೈಕಿ ಅತ್ಯಂತ ಕಡಿಮೆ ಪ್ರಮಾಣದ್ದಾಗಿದೆ. ಮಹಿಳೆಯರು ಸ್ವಂತ ಬ್ಯಾಂಕ್ ಅಕೌಂಟ್ ಹೊಂದಲು ಎಲ್ಲ ರೀತಿಯಲ್ಲಿ ನಾವು ಶ್ರಮಿಸುತ್ತಿದ್ದೇವೆ ಎಂದು ಸ್ಟೇಟ್ ಬ್ಯಾಂಕ್ ಆಫ್ ಪಾಕಿಸ್ತಾನದ ಗವರ್ನರ್ ಡಾ.ರೇಝಾ ಬಕೀರ್ ಈಗಾಗಲೇ ತಿಳಿಸಿದ್ದಾರೆ.   ಸುಮ್ಮನೆ ಹೋಲಿಸುವುದಿದ್ದರೆ ಭಾರತದ ಶೇಕಡಾ 77ರಷ್ಟು ಮಹಿಳೆಯರು ಸ್ವಂತ ಬ್ಯಾಂಕ್ ಖಾತೆ ಹೊಂದಿದ್ದಾರೆ. 

ಮಹಿಳೆಯರಿಗೆ ಸಮಾಜದ ಎಲ್ಲ ರಂಗಗಳಲ್ಲಿಯೂ ಪುರುಷರಷ್ಟೇ ಸಮಾನ ಸ್ಥಾನಮಾನ ದೊರೆಯಬೇಕು. ದೇಶವೊಂದರ ಅಭಿವೃದ್ಧಿ ಮತ್ತು ಸಾಮಾಜಿಕ ಔನ್ನತ್ಯದಲ್ಲಿ ಮಹಿಳೆಯರ ಕೊಡುಗೆಯನ್ನು ಕಡೆಗಣಿಸಲಾಗದು. ಏಕೆಂದರೆ ಅವರು ಪುರುಷರಷ್ಟೇ ಸಮಾನ. ಆರ್ಥಿಕ ಮತ್ತು ಹಣಕಾಸಿನ ವಿಷಯಗಳಲ್ಲಿ ಮಹಿಳೆಯರು ಮುನ್ನೆಲೆಗೆ ಬಂದಷ್ಟೂ ನೈಜ ಅಭಿವೃದ್ಧಿ ಸಾಧ್ಯವಾಗುತ್ತದೆ. ಹೀಗಾಗಿ ಸಮಾಜದ ಎಲ್ಲ ರಂಗಗಳಲ್ಲಿಯೂ ಲಿಂಗ ತಾರತಮ್ಯ ಕಡಿಮೆಗೊಳಿಸುವತ್ತ ಪಾಕಿಸ್ತಾನ ಹೆಜ್ಜೆ ಹಾಕಲಿದೆ ಎಂದು ಸಹ ಸ್ಟೇಟ್ ಬ್ಯಾಂಕ್ ಆಫ್ ಪಾಕಿಸ್ತಾನದ ಗವರ್ನರ್ ಡಾ.ರೇಝಾ ಬಕೀರ್ ಅಂತರಾಷ್ಟ್ರೀಯ ಮಹಿಳಾ ದಿನಾಚರಣೆಯ ದಿನ ತಿಳಿಸಿದ್ದರು.

ಮಿಲಿಟರಿಯು ಆಡಳಿತದ ಮೇಲೆ ಹತೋಟಿ ಸಾಧಿಸಲು ಅವಕಾಶ ಮಾಡಿಕೊಡುವ ಪ್ರಜಾಪ್ರಭುತ್ವ ವ್ಯವಸ್ಥೆ  ಹೊಂದಿರುವ ನಮ್ಮ ನೆರೆಯ ದೇಶ ಪಾಕಿಸ್ತಾನದಲ್ಲಿಯೂ ಮಹಿಳೆಯರ ಮೇಲಿನ ಹಿಂಸಾಚಾರ ಕಡಿಮೆಯಿಲ್ಲ. ಪುರುಷರು ತಮ್ಮ ಧಾರ್ಮಿಕ ಮೂಲಭೂತವಾದಿ ಧೋರಣೆಯಿಂದ ಉಗ್ರ ಕೃತ್ಯಗಳತ್ತ ಆಸಕ್ತರಾದರೆ ಮಹಿಳೆಯರೇ ಶೋಷಣೆಗೆ ಒಳಗಾಗುವ ಸ್ಥಿತಿ ಇಲ್ಲಿಯದು. ಪಾಕಿಸ್ತಾನದಲ್ಲಿ ದೈಹಿಕ ದೌರ್ಜನ್ಯದಿಂದಾಗಿ ಪ್ರತಿ ವರ್ಷ ಸುಮಾರು 5 ಸಾವಿರ ಮಹಿಳೆಯರು ಮೃತಪಡುತ್ತಾರೆ. ಇಸ್ಲಾಮೇತರ ಧರ್ಮದ ಮಹಿಳೆಯರು ಅಪಹರಣಕ್ಕೊಳಗಾದ ಸುದ್ದಿಗಳು ಈಗಲೂ ಕೇಳಿಬರುತ್ತವೆ. 2017ರಲ್ಲಿ 746 ಮಹಿಳೆಯರು ಕುಟುಂಬದ ಮಾನ ರಕ್ಷಣೆಯ ಹೆಸರಲ್ಲಿ ಕೊಲೆಗೊಳಗಾಗಿದ್ದಾರೆ.

ಇದನ್ನೂ ಓದಿ: 

ಮಹಿಳೆಯರು ವಾಸಿಸಲು ವಿಶ್ವದ ಅತ್ಯಂತ ಅಪಾಯಕಾರಿ ದೇಶಗಳಿವು

ಅಫ್ಘಾನಿಸ್ತಾನದಲ್ಲಿ ಮಹಿಳೆಯರು ಮಂತ್ರಿಗಳಾಗುವಂತಿಲ್ಲ; ಮಕ್ಕಳು ಹೆರುವುದಷ್ಟೇ ಅವರ ಕೆಲಸ: ತಾಲಿಬಾನ್

(Only 29 percent women have bank accounts in Pakistan)

Published On - 4:18 pm, Fri, 10 September 21