Airtel: ಏರ್ಟೆಲ್ ಬ್ಯುಸಿನೆಸ್ ಸಿಇಒ ಅಜಯ್ ಚಿಟ್ಕಾರ ರಾಜೀನಾಮೆ; ನಾಯಕತ್ವ ಮೂರು ಪಾಲು
Airtel Business CEO Ajay Chitkara Resigns: ಕಳೆದ 23 ವರ್ಷಗಳಿಂದ ಏರ್ಟೆಲ್ನಲ್ಲಿ ಕೆಲಸ ಮಾಡುತ್ತಿದ್ದ ಹಾಗೂ ಅಲ್ಲಿ ಏರ್ಟೆಲ್ ಬ್ಯುಸಿನೆಸ್ನ ಸಿಇಒ ಆಗಿದ್ದ ಅಜಯ್ ಚಿಟ್ಕಾರ ರಾಜೀನಾಮೆ ನೀಡಿದ್ದಾರೆ. ಇದರ ಬೆನ್ನಲ್ಲೇ ಏರ್ಟೆಲ್ ಬ್ಯುಸಿನೆಸ್ ಅನ್ನು ಮೂರು ಭಾಗಗಳಾಗಿ ವಿಂಗಡಿಸಲಾಗಿದೆ.
ನವದೆಹಲಿ: ದೇಶದ ಪ್ರಮುಖ ಟೆಲಿಕಾಂ ಕಂಪನಿ ಭಾರ್ತಿ ಏರ್ಟೆಲ್ನ ವ್ಯವಹಾರ ವಿಭಾಗವಾದ ಏರ್ಟೆಲ್ ಬ್ಯುಸಿನೆಸ್ನ ಸಿಇಒ ಅಜಯ್ ಚಿಟ್ಕಾರ (Ajay Chitkara) ರಾಜೀನಾಮೆ ನೀಡಿರುವ ಸಂಗತಿ ಬೆಳಕಿಗೆ ಬಂದಿದೆ. ಅಜಯ್ ಚಿಟ್ಕಾರ ರಾಜೀನಾಮೆ ಕೊಟ್ಟಿರುವುದಾಗಿ ಭಾರ್ತಿ ಏರ್ಟೆಲ್ ಸಂಸ್ಥೆ ಷೇರುಪೇಟೆ ವಿನಿಮಯ ಕೇಂದ್ರಕ್ಕೆ ಸಲ್ಲಿಸಿದ ಫೈಲಿಂಗ್ನಲ್ಲಿ ತಿಳಿಸಿದೆ. ಅಜಯ್ ಚಿಟ್ಕಾರ ರಾಜೀನಾಮೆ ಬಳಿಕ ಏರ್ಟೆಲ್ ಬ್ಯುಸಿನೆಸ್ (Airtel Business) ಅನ್ನು ಮೂರು ವಿಭಾಗಗಳಾಗಿ ಮಾಡಿ ನಾಯಕತ್ವದ ಮರುರಚನೆ ಮಾಡಿರುವುದು ತಿಳಿದುಬಂದಿದೆ.
ಏರ್ಟೆಲ್ ಬ್ಯುಸಿನೆಸ್ ಅನ್ನು ಗ್ಲೋಬಲ್ ಬ್ಯುಸಿನೆಸ್, ಡೊಮೆಸ್ಟಿಕ್ ಬ್ಯುಸಿನೆಸ್ ಮತ್ತು ಎನ್ಎಕ್ಸ್ಟ್ರಾ (Nxtra) ಡಾಟಾ ಸೆಂಟರ್ ಎಂದು ಮೂರು ಭಾಗವಾಗಿ ವಿಭಜಿಸಲಾಗಿದೆ. ಜಾಗತಿಕ ಬ್ಯುಸಿನೆಸ್ಗೆ ವಾಣಿ ವೆಂಕಟೇಶ್ ಮುಖ್ಯಸ್ಥೆಯಾಗಿದ್ದಾರೆ. ದೇಶೀಯ ವ್ಯವಹಾರ ವಿಭಾಗವನ್ನು ಗಣೇಶ್ ಲಕ್ಷ್ಮೀನಾರಾಯಣನ್ ಮುನ್ನಡೆಸಲಿದ್ದಾರೆ. ಎನ್ಎಕ್ಸ್ಟ್ರಾ ಡಾಟಾ ಸೆಂಟರ್ಗೆ ಆಶೀಶ್ ಅರೋರಾ ನಾಯಕತ್ವ ವಹಿಸಲಿದ್ದಾರೆ ಎಂದು ರೆಗ್ಯುಲೇಟರಿ ಫೈಲಿಂಗ್ನಲ್ಲಿ ಭಾರ್ತಿ ಏರ್ಟೆಲ್ ತಿಳಿಸಿದೆ.
ಇದನ್ನೂ ಓದಿ: India Russia Payment Issue: ಭಾರತ ರಷ್ಯಾ ಮಧ್ಯೆ ಚೀನಾ ಕಾಟ; ಪಾಕಿಸ್ತಾನಕ್ಕೆ ಸುಗ್ಗಿ; ಇದು ವಿಧಿ ಆಟವಾ?
‘ಏರ್ಟೆಲ್ ಬ್ಯುಸಿನೆಸ್ ವೃದ್ಧಿಗಾಗಿ ವಾಣಿ, ಗಣೇಶ್ ಮತ್ತು ಆಶೀಶ್ ಜೊತೆ ಸೇರಿ ಕೆಲಸ ಮಾಡಲು ಎದಿರುನೋಡುತ್ತಿದ್ದೇನೆ. ಅಜಯ್ ಅವರ ಕೊಡುಗೆಯನ್ನು ಸ್ಮರಿಸಲು ಬಯಸುತ್ತೇನೆ. 23 ವರ್ಷಗಳ ಸುದೀರ್ಘ ಅವಧಿಯಲ್ಲಿ ಅಜಯ್ ಅವರು ಬಹಳ ಪ್ರಮುಖ ಪಾತ್ರ ವಹಿಸಿದ್ದಾರೆ. ಏರ್ಟೆಲ್ ಬ್ಯುಸಿನೆಸ್ ಅನ್ನು ಒಂದು ಪ್ರಬಲ ಘಟಕವಾಗಿ ರೂಪಿಸಿದ್ದಾರೆ. ಅವರ ಭವಿಷ್ಯದ ಕಾರ್ಯಗಳಿಗೆ ನನ್ನ ಶುಭ ಹಾರೈಕೆ ಇರುತ್ತದೆ’ ಎಂದು ಭಾರ್ತಿ ಏರ್ಟೆಲ್ನ ಸಿಇಒ ಮತ್ತು ಎಂಡಿ ಗೋಪಾಲ್ ವಿಟ್ಟಲ್ ಹೇಳಿಕೆ ನೀಡಿದ್ದಾರೆ.
ರಾಜೀನಾಮೆ ನೀಡಿರುವ ಅಜಯ್ ಚಿಟ್ಕಾರ ಅವರು 2023 ಆಗಸ್ಟ್ ತಿಂಗಳ ಮೂರನೇ ವಾರದವರೆಗೂ ಕಂಪನಿಯಲ್ಲಿ ಕಾರ್ಯನಿರ್ವಹಿಸಲಿದ್ದಾರೆ ಎಂದು ಹೇಳಲಾಗಿದೆ. ಆದರೆ, ಅವರು ಬೇರೆ ಯಾವ ಸಂಸ್ಥೆಗೆ ಹೋಗಲಿದ್ದಾರೆ ಎಂಬ ಮಾಹಿತಿ ಸದ್ಯಕ್ಕೆ ಲಭ್ಯವಾಗಿಲ್ಲ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ