Loan Write Offs: 2022-23ರಲ್ಲಿ 2 ಲಕ್ಷಕೋಟಿ ರೂ ಕೆಟ್ಟ ಸಾಲ ಹೊರಗಿಟ್ಟ ಬ್ಯಾಂಕುಗಳು; 3 ವರ್ಷದಲ್ಲಿ ಎನ್​ಪಿಎ ವಸೂಲಾಗಿರುವುದೆಷ್ಟು?

ನವದೆಹಲಿ, ಜುಲೈ 24: ಭಾರತೀಯ ಬ್ಯಾಂಕುಗಳು 2022-23ರ ಹಣಕಾಸು ವರ್ಷದಲ್ಲಿ ರೈಟ್ ಆಫ್ ಮಾಡಿದ ಕೆಟ್ಟ ಸಾಲಗಳ ಪ್ರಮಾಣ 2.09 ಲಕ್ಷಕೋಟಿ ರೂ ಎಂದು ಮಾಧ್ಯಮಗಳಲ್ಲಿ ವರದಿಯಾಗಿದೆ. ಮಾಹಿತಿ ಹಕ್ಕು ಕಾಯ್ದೆ ಅಡಿ ಆರ್​ಬಿಐ ನೀಡಿದ ಮಾಹಿತಿ ಪ್ರಕಾರ ಕಳೆದ 5 ವರ್ಷದಲ್ಲಿ ಬ್ಯಾಂಕುಗಳು 10.57 ಲಕ್ಷ ಕೋಟಿ ರೂನಷ್ಟು ಅನುತ್ಪಾದಕ ಸಾಲಗಳನ್ನು ಪ್ರತ್ಯೇಕ ಇಟ್ಟಿವೆ ಎಂದು ಇಂಡಿಯನ್ ಎಕ್ಸ್​ಪ್ರೆಸ್ ವರದಿ ಮಾಡಿದೆ.

2020-21ರ ಹಣಕಾಸು ವರ್ಷದಲ್ಲಿ ಬ್ಯಾಂಕುಗಳು ರೈಟ್ ಆಫ್ ಮಾಡಿದ ಎನ್​ಪಿಎ ಮೊತ್ತ 2,02,781 ಕೋಟಿ ರೂ ಇತ್ತು. 2021-22ರ ಹಣಕಾಸು ವರ್ಷದಲ್ಲಿ ಈ ಕೆಟ್ಟ ಸಾಲಗಳ ಮೊತ್ತ 1,74,966 ಕೋಟಿ ರೂ ಇತ್ತು. ಈಗ ಅದು 2,09,144 ಕೋಟಿ ರೂ ಆಗಿದೆ.

ಲೋನ್ ರೈಟ್ ಆಫ್ ಆದರೆ ಸಾಲ ಕೈಬಿಟ್ಟಂತಲ್ಲ…

ಬ್ಯಾಂಕುಗಳ ಪ್ರಕಾರ ಎನ್​ಪಿಎ ಎಂದರೆ ಅನುತ್ಪಾದಕ ಸಾಲ. ಅಂದರೆ ಸಾಲ ಮರುಪಾವತಿಯಾಗದೇ ಇರುವಂತಹವು. ಯಾವುದೇ ಸಾಲ 90 ದಿನಗಳವರೆಗೆ ಅಸಲು ಅಥವಾ ಬಡ್ಡಿ ಪಾವತಿಯಾಗದೇ ಇದ್ದರೆ ಅದನ್ನು ಎನ್​ಪಿಎ ಎಂದು ಪರಿಗಣಿಸಲಾಗುತ್ತದೆ. ಇವುಗಳನ್ನು ಬ್ಯಾಂಕ್​ನ ಅಸೆಟ್ ಬುಕ್​ನಿಂದ ಹೊರಗಿಡಲಾಗುತ್ತದೆ. ಬ್ಯಾಂಕಿನ ಆರೋಗ್ಯ ಉತ್ತಮವಾಗಿರುವುದನ್ನು ಬಿಂಬಿಸಲು ಕೈಗೊಳ್ಳುವ ಕ್ರಮ ಇದು. ಇಂಥ ಸಾಲವನ್ನು ಬ್ಯಾಂಕ್​ನ ಆದಾಯ ಪಟ್ಟಿಯಿಂದ ಪ್ರತ್ಯೇಕಗೊಳಿಸಿ, ನಷ್ಟ ಎಂದು ತೋರಿಸಲಾಗುತ್ತದೆ. ಇದನ್ನೇ ರೈಟ್ ಆಫ್ ಎಂದು ಕರೆಯುವುದು. ಒಟ್ಟಿನಲ್ಲಿ ಇವು ಅಕೌಂಟಿಂಗ್ ಲೆಕ್ಕಾಚಾರ ಮಾತ್ರ. ಹಾಗೆಯೇ, ಎನ್​ಪಿಎ ಅನ್ನು ರೈಟ್ ಆಫ್ ಮಾಡುವುದರಿಂದ ಬ್ಯಾಂಕುಗಳಿಗೆ ತೆರಿಗೆ ಹೊರೆಯೂ ಕಡಿಮೆ ಆಗುತ್ತದೆ.

ಇದನ್ನೂ ಓದಿ: Income Tax Day 2023: ಸಿಪಾಯಿ ದಂಗೆಯಿಂದಾದ ನಷ್ಟಕ್ಕೆ ಪರಿಹಾರವಾಗಿ ಬ್ರಿಟಿಷರು ಜಾರಿಗೊಳಿಸಿದ್ದರು ಆದಾಯ ತೆರಿಗೆ

ಹೀಗೆ ರೈಟ್ ಆಫ್ ಆದ ಸಾಲವನ್ನು ಬ್ಯಾಂಕುಗಳು ಹಾಗೇ ಕೈಬಿಡುವುದಿಲ್ಲ. ಈ ಅನುತ್ಪಾದಕ ಸಾಲವನ್ನು ಬ್ಯಾಂಕುಗಳು ವಸೂಲಿ ಮಾಡಲು ಯತ್ನಿಸಬಹುದು. ಆದರೆ, ಇಂಥ ಎನ್​ಪಿಎಗಳಲ್ಲಿ ಹೆಚ್ಚಿನವು ಅಸುರಕ್ಷಿತ ಸಾಲ ಹಾಗೂ ಸುಳ್ಳು ದಾಖಲೆಗಳನ್ನು ಕೊಟ್ಟು ಪಡೆದ ಸಾಲವೇ ಆಗಿರುತ್ತವೆ. ಕುತೂಹಲ ಎಂದರೆ ಕಳೆದ 3 ವರ್ಷದಲ್ಲಿ ಬ್ಯಾಂಕುಗಳು ರೈಟ್ ಆಫ್ ಮಾಡಿದ ಒಟ್ಟು ಎನ್​ಪಿಎ ಸಾಲದ ಮೊತ್ತ 5,86,891 ಕೋಟಿ ರೂ ಆಗಿದೆ. ಈ ಪೈಕಿ 2020-21ರಲ್ಲಿ 30,104 ಕೋಟಿ ರೂ; 2021-22ರಲ್ಲಿ 33,534 ಕೋಟಿ ರೂ ಹಾಗು 2022-23ರಲ್ಲಿ 45,548 ಕೋಟಿ ರೂ ಮಾತ್ರ ಬ್ಯಾಂಕುಗಳು ವಸೂಲಿ ಮಾಡಿವೆ. ಅಂದರೆ 5.87 ಲಕ್ಷ ಕೋಟಿ ರೂ ಎನ್​ಪಿಎ ಸಾಲದ ಪೈಕಿ ಬ್ಯಾಂಕುಗಳು ವಸೂಲಿ ಮಾಡಿರುವುದು 1.09 ಲಕ್ಷ ಕೋಟಿ ರೂ ಮಾತ್ರ. ಅಂದರೆ ಶೇ. 80ಕ್ಕಿಂತಲೂ ಹೆಚ್ಚು ಎನ್​ಪಿಎಗಳು ಇನ್ನೂ ವಸೂಲಾಗದೇ ಹಾಗೇ ಇವೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ