Fiscal Deficit: ಏಪ್ರಿಲ್ನಿಂದ ಜುಲೈ ಮಧ್ಯೆ ಕೇಂದ್ರ ಸರ್ಕಾರದ ವಿತ್ತೀಯ ಕೊರತೆ 3.2 ಲಕ್ಷ ಕೋಟಿ ರೂಪಾಯಿ
2021-22 ಆರ್ಥಿಕ ವರ್ಷದ ಏಪ್ರಿಲ್ನಿಂದ ಜುಲೈ ಮಧ್ಯೆ ಕೇಂದ್ರ ಸರ್ಕಾರದ ವಿತ್ತೀಯ ಕೊರತೆ ಮೊತ್ತವು 3.2 ಲಕ್ಷ ಕೋಟಿ ರೂಪಾಯಿ ಆಗಿದೆ.
ನವದೆಹಲಿ: 2021-22ರ ಹಣಕಾಸು ವರ್ಷದ ಮೊದಲ ನಾಲ್ಕು ತಿಂಗಳಾದ ಏಪ್ರಿಲ್ನಿಂದ ಜುಲೈನಲ್ಲಿ ಆದಾಯ ಏರಿಕೆಯ ಹೊರತಾಗಿಯೂ ಭಾರತದ ವಿತ್ತೀಯ ಕೊರತೆಯು (ಆದಾಯ ಮತ್ತು ಖರ್ಚಿನ ಮಧ್ಯದ ವ್ಯತ್ಯಾಸ) ರೂ. 3.21 ಲಕ್ಷ ಕೋಟಿಗಳಷ್ಟಿತ್ತು ($ 43.98 ಶತಕೋಟಿ) ಅಥವಾ ಇಡೀ ವರ್ಷದ ಬಜೆಟ್ ಗುರಿಯ ಶೇ 21.3ರಷ್ಟಿತ್ತು ಎಂದು ಸರ್ಕಾರಿ ಅಂಕಿ- ಅಂಶಗಳಿಂದ ಮಂಗಳವಾರ ತಿಳಿದುಬಂದಿದೆ. ಕಳೆದ ವರ್ಷದ ಇದೇ ಅವಧಿಯಲ್ಲಿ ಕೇಂದ್ರ ಸರ್ಕಾರದ ವಿತ್ತೀಯ ಕೊರತೆಯು 8.2 ಲಕ್ಷ ಕೋಟಿ ರೂಪಾಯಿ ಆಗಿದ್ದು, ಪೂರ್ತಿ ವರ್ಷದ ಗುರಿಯನ್ನೂ ದಾಟಿತ್ತು. ಕಂಟ್ರೋಲರ್ ಜನರಲ್ ಆಫ್ ಅಕೌಂಟ್ಸ್ ಮಂಗಳವಾರ ಬಿಡುಗಡೆ ಮಾಡಿದ ಅಧಿಕೃತ ದತ್ತಾಂಶದ ಪ್ರಕಾರ, ಏಪ್ರಿಲ್ನಿಂದ ಜುಲೈ ಅವಧಿಗೆ 2 ಲಕ್ಷ ಕೋಟಿ ರೂಪಾಯಿ ಅಥವಾ ಬಜೆಟ್ ಅಂದಾಜಿನ ಶೇ 18ರಷ್ಟಿತ್ತು. ಕಳೆದ ವರ್ಷದ ಇದೇ ಅವಧಿಗೆ 7.1 ಲಕ್ಷ ಕೋಟಿ ಅಥವಾ ಬಜೆಟ್ ಅಂದಾಜಿನ ಶೇ 117ರಷ್ಟಿತ್ತು.
ಹಣಕಾಸು ವರ್ಷದ ಮೊದಲ ನಾಲ್ಕು ತಿಂಗಳಲ್ಲಿ ಕೇಂದ್ರದ ಸಗಟು ತೆರಿಗೆ ಆದಾಯವು 6.9 ಲಕ್ಷ ಕೋಟಿ ರೂಪಾಯಿ (ನಿವ್ವಳ 5.29 ಲಕ್ಷ ಕೋಟಿ ರೂ.) ಉತ್ತಮ ಆದಾಯ ತೆರಿಗೆ ಹಾಗೂ ಜಿಎಸ್ಟಿ ಸಂಗ್ರಹದಿಂದ ಬಂದಿದೆ. ಉದ್ಯಮಗಳು ತಮ್ಮ ಮೊದಲು ಮುಂಗಡ ತೆರಿಗೆ ಕಂತನ್ನು ಜೂನ್ನಲ್ಲಿ ಸಂದಾಯ ಮಾಡುತ್ತವೆ. ಇಡೀ ವರ್ಷದಲ್ಲಿ ಎಷ್ಟು ತೆರಿಗೆ ಬರಬಹುದು ಎಂಬುದರ ಅಂದಾಜು ಮಾಡಿದ ನಂತರವೇ ಹೀಗೆ ಕಟ್ಟಲಾಗುತ್ತದೆ. ಕಂಟ್ರೋಲರ್ ಅಂಡ್ ಆಡಿಟರ್ ಜನರಲ್ ಡೇಟಾ ಪ್ರಕಾರವಾಗಿ, ಈ ಹಣಕಾಸು ವರ್ಷದಲ್ಲಿ ಮೊದಲ ನಾಲ್ಕು ತಿಂಗಳಲ್ಲಿ ಆಗಿರುವ ಬಂಡವಾಳ ವೆಚ್ಚ 1.28 ಲಕ್ಷ ಕೋಟಿ ರೂಪಾಯಿ. 1 ವರ್ಷದ ಹಿಂದೆ ಇದೇ ಅವಧಿಯಲ್ಲಿ 1.11 ಲಕ್ಷ ಕೋಟಿ ರೂಪಾಯಿ ಆಗಿತ್ತು. ತಜ್ಞರು ಹೇಳುವಂತೆ, ಕೇಂದ್ರ ಸರ್ಕಾರದಿಂದ ಪೂರ್ತಿ ವರ್ಷದ ತೆರಿಗೆ ಸಂಗ್ರಹ ಗುರಿಯನ್ನು ಮುಟ್ಟಬಹುದು. ಆದರೆ ಬಂಡವಾಳ ಹಿಂತೆಗೆತ ಗುರಿಯನ್ನು ತಲುಪುವುದು ಸವಾಲು.
ಈ ವರೆಗೆ 8371 ಕೋಟಿ ರೂಪಾಯಿ ಸ್ವೀಕೃತಿ ಆಗಿದೆ. ಆದರೆ ಬಂಡವಾಳ ಹಿಂತೆಗೆತದ ಗುರಿ ಇರುವುದು 1.75 ಲಕ್ಷ ಕೋಟಿ ರೂಪಾಯಿ. ಬಹಳ ದೊಡ್ಡ ಮಾರ್ಜಿನ್ನಲ್ಲಿ ನಮ್ಮ ಗುರಿ ತಪ್ಪಬಹುದು. ಇದರಿಂದ ಭಾರತ ಸರ್ಕಾರದ ವಿತ್ತೀಯ ಕೊರತೆಯು FY22rರ ಬಜೆಟ್ ಅಂದಾಜಿಗಿಂತ ಹೆಚ್ಚಾಗಲಿದೆ. ಇದಕ್ಕಿಂತ ಹೆಚ್ಚಾಗಿ, ಇತರ ಮುಖ್ಯ ಹಣಕಾಸು ಉತ್ತೇಜನಾ ಕ್ರಮಗಳನ್ನು ಏನಾದರೂ ಘೋಷಣೆ ಮಾಡಿದಲ್ಲಿ ಅಥವಾ ಈಗ ಕೊರೊನಾ ಲಸಿಕೆಗಾಗಿ ಮೀಸಲಿಟ್ಟ ಬಜೆಟ್ 350 ಬಿಲಿಯನ್ ರೂಪಾಯಿ ದಾಟಿದಲ್ಲಿ ವಿತ್ತೀಯ ಕೊರತೆ ಮತ್ತೂ ಹೆಚ್ಚಾಗುತ್ತದೆ ಎಂದು ರೇಟಿಂಗ್ ಏಜೆನ್ಸಿ ICRA ಲಿಮಿಟೆಡ್ನ ಮುಖ್ಯ ಅರ್ಥಶಾಸ್ತ್ರಜ್ಞ ಅದಿತಿ ನಯ್ಯರ್ ಅಭಿಪ್ರಾಯ ಪಟ್ಟಿದ್ದಾರೆ.
ಇದನ್ನೂ ಓದಿ: 6 ಲಕ್ಷ ಕೋಟಿ ರೂ. ಮೌಲ್ಯದ ಆಸ್ತಿ ಮಾರಾಟಕ್ಕೆ ನಿರ್ಧಾರ; ವಿತ್ತೀಯ ಕೊರತೆ ನೀಗಿಸಲು ಕೇಂದ್ರ ಚಿಂತನೆ
(Central Government Fiscal Deficit For FY22 Between April To July Amounted To Rs 3.2 Trillion)