ಕೇಂದ್ರದಿಂದ ರಾಜ್ಯಗಳಿಗೆ ಜನವರಿಯಲ್ಲಿ 1,73,030 ಕೋಟಿ ರೂ ಜಿಎಸ್ಟಿ ಹಣ ಹಂಚಿಕೆ; ಕರ್ನಾಟಕಕ್ಕೆ ಸಿಕ್ಕಿದ್ದು 6,310 ಕೋಟಿ ರೂ
Tax devolution to states: ಡಿಸೆಂಬರ್ನಲ್ಲಿ ರಾಜ್ಯಗಳಿಗೆ 89,086 ಕೋಟಿ ರೂ ಜಿಎಸ್ಟಿ ಹಣ ಹಂಚಿಕೆ ಮಾಡಿದ್ದ ಕೇಂದ್ರವು ಜನವರಿಯಲ್ಲಿ 1,73,030 ಕೋಟಿ ರೂ ನೀಡಿದೆ. ಉತ್ತರಪ್ರದೇಶಕ್ಕೆ ಅತ್ಯಧಿಕ 31,039 ಕೋಟಿ ರೂ ನೀಡಿದೆ. ಕರ್ನಾಟಕಕ್ಕೆ 6,310 ಕೋಟಿ ರೂ ಸಿಕ್ಕಿದೆ. 15ನೇ ಹಣಕಾಸು ಆಯೋಗದ ಶಿಫಾರಸು ಪ್ರಕಾರ ಒಟ್ಟಾರೆ ಜಿಎಸ್ಟಿ ಸಂಗ್ರಹದಲ್ಲಿ ಶೇ. 41ರಷ್ಟು ಹಣವನ್ನು ರಾಜ್ಯಗಳಿಗೆ 14 ಕಂತುಗಳಲ್ಲಿ ಹಂಚಿಕೆ ಮಾಡಲಾಗುತ್ತದೆ.
Updated on: Jan 10, 2025 | 4:32 PM
ನವದೆಹಲಿ, ಜನವರಿ 10: ಕೇಂದ್ರ ಸರ್ಕಾರ ಜನವರಿ ತಿಂಗಳಿಗೆ 1,73,030 ಕೋಟಿ ರೂ ಜಿಎಸ್ಟಿ ಹಣವನ್ನು ರಾಜ್ಯ ಸರ್ಕಾರಗಳಿಗೆ ಹಂಚಿಕೆ ಮಾಡಿದೆ. ಇದು ಒಟ್ಟು ಜಿಎಸ್ಟಿ ಸಂಗ್ರಹದಲ್ಲಿ ರಾಜ್ಯ ಸರ್ಕಾರಗಳ ಪಾಲಿನ ಒಂದು ಭಾಗ ಮಾತ್ರ. ಡಿಸೆಂಬರ್ ತಿಂಗಳಲ್ಲಿ 89,086 ಕೋಟಿ ರೂ ಜಿಎಸ್ಟಿ ಹಣವನ್ನು ರಾಜ್ಯ ಸರ್ಕಾರಗಳಿಗೆ ಹಂಚಿಕೆ ಮಾಡಲಾಗಿತ್ತು. ಈ ತಿಂಗಳು ಹಂಚಿಕೆ ಹಣ ಎರಡು ಪಟ್ಟು ಹೆಚ್ಚಾಗಿದೆ. ರಾಜ್ಯ ಸರ್ಕಾರಗಳಿಗೆ ಬಂಡವಾಳ ವೆಚ್ಚ ಅಧಿಕಗೊಳಿಸಲು ಸಹಾಯಕವಾಗಿ ಹೆಚ್ಚಿನ ತೆರಿಗೆ ಹಣ ನೀಡಲಾಗಿದೆ. ಅಭಿವೃದ್ಧಿ ಕಾರ್ಯಗಳು ಮತ್ತು ಕಲ್ಯಾಣ ಯೋಜನೆಗಳ ವೆಚ್ಚಕ್ಕೆ ಈ ಹಣ ವಿನಿಯೋಗಿಸುವ ಉದ್ದೇಶ ಇದೆ.
ಈ ತಿಂಗಳು ರಾಜ್ಯಗಳಿಗೆ ನೀಡಿರುವ ಜಿಎಸ್ಟಿ ಹಂಚಿಕೆಯಲ್ಲಿ ಅತಿಹೆಚ್ಚು ಪಾಲು ಉತ್ತರಪ್ರದೇಶಕ್ಕೆ ಸಿಕ್ಕಿದೆ. ದೇಶದ ಈ ಅತಿದೊಡ್ಡ ರಾಜ್ಯಕ್ಕೆ 31,039 ಕೋಟಿ ರೂ ಸಿಕ್ಕಿದೆ. ಬಿಹಾರಕ್ಕೆ 17,403 ಕೋಟಿ ರೂ ಸಿಕ್ಕಿದೆ. ಮಧ್ಯಪ್ರದೇಶ, ರಾಜಸ್ಥಾನ, ಮಹಾರಾಷ್ಟ್ರ ಮತ್ತು ಪಶ್ಚಿಮ ಬಂಗಾಳ ರಾಜ್ಯಗಳಿಗೆ 10,000 ಕೋಟಿ ರೂಗಿಂತಲೂ ಅಧಿಕ ಜಿಎಸ್ಟಿ ಪಾಲು ನೀಡಲಾಗಿದೆ. ಕರ್ನಾಟಕಕ್ಕೆ ಸಿಕ್ಕಿರುವುದು 6,310 ಕೋಟಿ ರೂ ಮಾತ್ರವೇ. ಗುಜರಾತ್ಗೆ ಕರ್ನಾಟಕಕ್ಕಿಂತಲೂ ಕಡಿಮೆ ಹಣ ಸಿಕ್ಕಿದೆ.
15ನೇ ಹಣಕಾಸು ಆಯೋಗವು ಜಿಎಸ್ಟಿ ತೆರಿಗೆ ಹಣವನ್ನು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳಿಗೆ ಹಂಚಿಕೆ ಮಾಡಲು ಸೂತ್ರ ನೀಡಿದೆ. ಅದರ ಪ್ರಕಾರ ಹಂಚಿಕೆ ಮಾಡಲಾಗುತ್ತದೆ. ಶೇ. 41ರಷ್ಟು ಜಿಎಸ್ಟಿ ಹಣವನ್ನು ರಾಜ್ಯಗಳಿಗೆ ಹಂಚಲು ಆಯೋಗ ಶಿಫಾರಸು ಮಾಡಿದೆ. ಈ ಹಣವನ್ನು ವರ್ಷಾದ್ಯಂತ 14 ಕಂತುಗಳಲ್ಲಿ ರಾಜ್ಯಗಳಿಗೆ ಹಂಚಿಕೆ ಮಾಡಲಾಗುತ್ತದೆ.
ಇದನ್ನೂ ಓದಿ: ಪೆಟ್ರೋಲ್ ಪಂಪ್ ಬಿಸಿನೆಸ್ ಹೊಂದಬೇಕಾ? ಆರಂಭಿಕ ಬಂಡವಾಳ, ಲೈಸೆನ್ಸ್, ಲಾಭ ಇತ್ಯಾದಿ ವಿವರ
ಜನವರಿಯಲ್ಲಿ ರಾಜ್ಯಗಳಿಗೆ ಹಂಚಿಕೆ ಮಾಡಲಾದ ಜಿಎಸ್ಟಿ ಹಣದ ವಿವರ
- ಉತ್ತರಪ್ರದೇಶ: 31,039.84 ಕೋಟಿ ರೂ
- ಬಿಹಾರ್: 17,403.36 ಕೋಟಿ ರೂ
- ಮಧ್ಯಪ್ರದೇಶ: 13,582.86 ಕೋಟಿ ರೂ
- ಪಶ್ಚಿಮ ಬಂಗಾಳ: 13,017.06 ಕೋಟಿ ರೂ
- ಮಹಾರಾಷ್ಟ್ರ: 10,930.31 ಕೋಟಿ ರೂ
- ರಾಜಸ್ಥಾನ್: 10,426.78 ಕೋಟಿ ರೂ
- ಒಡಿಶಾ: 7,834.80 ಕೋಟಿ ರೂ
- ತಮಿಳುನಾಡು: 7,057.89 ಕೋಟಿ ರೂ
- ಆಂಧ್ರಪ್ರದೇಶ್: 7,002.52 ಕೋಟಿ ರೂ
- ಕರ್ನಾಟಕ: 6,310.40 ಕೋಟಿ ರೂ
- ಗುಜರಾತ್: 6,017.99 ಕೋಟಿ ರೂ
- ಛತ್ತೀಸ್ಗಡ್: 5,895.13 ಕೋಟಿ ರೂ
- ಜಾರ್ಖಂಡ್: 5,722.10 ಕೋಟಿ ರೂ
- ಅಸ್ಸಾಮ್: 5,412.38 ಕೋಟಿ ರೂ
- ತೆಲಂಗಾಣ: 3,637.09 ಕೋಟಿ ರೂ
- ಕೇರಳ: 3,330.86 ಕೋಟಿ ರೂ
- ಪಂಜಾಬ್: 3,126.65 ಕೋಟಿ ರೂ
- ಅರುಣಾಚಲಪ್ರದೇಶ: 3,040.14 ಕೋಟಿ ರೂ
- ಉತ್ತರಾಖಂಡ್: 1,934.47 ಕೋಟಿ ರೂ
- ಹರ್ಯಾಣ: 1,891.22 ಕೋಟಿ ರೂ
- ಹಿಮಾಚಲಪ್ರದೇಶ: 1,436.16 ಕೋಟಿ ರೂ
- ಮೇಘಾಲಯ: 1,327.13 ಕೋಟಿ ರೂ
- ಮಣಿಪುರ್: 1,238.90 ಕೋಟಿ ರೂ
- ತ್ರಿಪುರಾ: 1,225.04 ಕೋಟಿ ರೂ
- ನಾಗಾಲ್ಯಾಂಡ್: 984.54 ಕೋಟಿ ರೂ
- ಮಿಜೋರಾಂ: 865.15 ಕೋಟಿ ರೂ
- ಸಿಕ್ಕಿಂ: 671.35 ಕೋಟಿ ರೂ
- ಗೋವಾ: 667.91 ಕೋಟಿ ರೂ
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
