Byju’s: ಬೈಜುಸ್ಗೆ ನಿಲ್ಲದ ಸಂಕಷ್ಟ; ಕಂಪನಿಯ ಲೆಕ್ಕಪತ್ರ ಪರಿಶೀಲನೆಗೆ ಕೇಂದ್ರದಿಂದ ಆದೇಶ
Centre Order To Inspect Byju's Account Books: ಎರಡು ಹಣಕಾಸು ವರ್ಷದ ಬೈಜೂಸ್ ವರದಿಗಳನ್ನು ಪರಿಶೀಲಿಸಿದ ಬೆನ್ನಲ್ಲೇ ಈಗ ಅದರ ಅಕೌಂಟ್ ಬುಕ್ ಇನ್ಸ್ಪೆಕ್ಷನ್ಗೆ ಕೇಂದ್ರ ಕಾರ್ಪೊರೇಟ್ ಸಚಿವಾಲಯ ಆದೇಶಿಸಿದೆ.
ನವದೆಹಲಿ: ಶಿಕ್ಷಣ ಕ್ಷೇತ್ರದ ಸ್ಟಾರ್ಟಪ್ ಬೈಜುಸ್ ಸಂಸ್ಥೆಯ ಅಕೌಂಟ್ ಬುಕ್ಗಳ (Books of Account) ಪರಿಶೀಲನೆಗೆ ಕೇಂದ್ರ ಕಾರ್ಪೊರೇಟ್ ವ್ಯವಹಾರಗಳ ಸಚಿವಾಲಯ ಆದೇಶ ಹೊರಡಿಸಿರುವುದು ತಿಳಿದುಬಂದಿದೆ. ಬ್ಲೂಮ್ಬರ್ಗ್ ನ್ಯೂಸ್ನಲ್ಲಿ ಪ್ರಕಟವಾಗಿರುವ ವರದಿ ಪ್ರಕಾರ 6 ವಾರದೊಳಗೆ ವರದಿ ಸಲ್ಲಿಸಲು ಸೂಚಿಸಲಾಗಿದೆ. ಬೈಜುಸ್ನ ಆಡಿಟರ್ ಹಾಗು ಮೂವರು ಬೋರ್ಡ್ ಸದಸ್ಯರು ಕಳೆದ ತಿಂಗಳು ನಿರ್ಗಮಿಸಿದ ಬೆನ್ನಲ್ಲೇ ಈ ಬೆಳವಣಿಗೆ ಆಗಿದೆ. ಅಕೌಂಟ್ ಬುಕ್ಗಳ ಪರಿಶೀಲನೆಗೆ ಆದೇಶಿಸುವ ಮುನ್ನ ಬೈಜೂಸ್ನ ಹಣಕಾಸು ವರದಿಗಳನ್ನು ಪರಿಶೀಲನೆಗೆ ಒಳಪಡಿಸಲಾಗಿತ್ತು. ಸಿಎ ಇನ್ಸ್ಟಿಟ್ಯೂಟ್ನ ಎಫ್ಆರ್ಆರ್ಬಿ (FRRB- Financial Reporting Review Board) ವಿಭಾಗದ ಅಧಿಕಾರಿಗಳು 2019-20 ಹಾಗೂ 2020-21ರ ಹಣಕಾಸು ವರ್ಷಗಳಲ್ಲಿನ ಬೈಜೂಸ್ ವರದಿಗಳನ್ನು ಪರಿಶೀಲನೆ ನಡೆಸಿದ್ದರು. ಅದರಲ್ಲಿ ಸಂಶಯ ಬರುವಂತಹ ಸಂಗತಿಗಳು ಬೆಳಕಿಗೆ ಬಂದ ಹಿನ್ನೆಲೆಯಲ್ಲಿ ಅಕೌಂಟ್ ಬುಕ್ಗಳನ್ನು ಪರಿಶೀಲಿಸಲು ಕಾರ್ಪೊರೇಟ್ ವ್ಯವಹಾರಗಳ ಸಚಿವಾಲಯ ಆದೇಶಿಸಿದೆ ಎಂದು ಹೇಳಲಾಗಿದೆ.
ಜುಲೈ 8ರಂದು ದಿ ಹಿಂದೂ ಬ್ಯುಸಿನೆಸ್ಲೈನ್ ಪತ್ರಿಕೆಯಲ್ಲಿ ಪ್ರಕಟವಾದ ವರದಿ ಪ್ರಕಾರ ಕೇಂದ್ರ ಕಾರ್ಪೊರೇಟ್ ವ್ಯವಹಾರಗಳ ಸಚಿವಾಲಯದ (Corporate Affairs Ministry) ಅಡಿಗೆ ಬರುವ ಎಸ್ಎಫ್ಐಒ (SFIO- Serious Fraud Investigating Office) ಬೈಜೂಸ್ ವಿರುದ್ಧ ತನಿಖೆ ಆರಂಭಿಸಿದೆ ಎಂದಿತ್ತು.
ಇದನ್ನೂ ಓದಿ: Strict Action: ಔಷಧ ಗುಣಮಟ್ಟದಲ್ಲಿ ರಾಜಿ ಇಲ್ಲ; ಕಳಪೆ ಔಷಧ ತಯಾರಿಸುವವರ ವಿರುದ್ಧ ಕಠಿಣ ಕ್ರಮಕ್ಕೆ ಮುಂದಾದ ಕೇಂದ್ರ ಸರ್ಕಾರ
ಎಸ್ಎಫ್ಐಒ ಎಂಬುದು ಗಂಭೀರ ವಂಚನೆ ಪ್ರಕರಣಗಳ ತನಿಖೆ ನಡೆಸುವ ಸಂಸ್ಥೆಯಾಗಿದೆ. ಆದರೆ, ಎಸ್ಎಫ್ಐಒದಿಂದ ತನಿಖೆ ನಡೆಯುತ್ತಿರುವ ವಿಚಾರವನ್ನು ಬೈಜೂಸ್ ತಳ್ಳಿಹಾಕಿದೆ. ತನಗೆ ಎಸ್ಎಫ್ಐಒದಿಂದ ಇಲ್ಲಿಯವರೆಗೆ ಯಾವ ಸಂವಹನವೂ ಬಂದಿಲ್ಲ ಎಂದು ಬೈಜೂಸ್ ಹೇಳಿದ್ದಾಗಿ ಲೈವ್ ಮಿಂಟ್ ವರದಿ ಮಾಡಿದೆ. ಬ್ಲೂಮ್ಬರ್ಗ್ ವರದಿ ಪ್ರಕಾರ ಬೈಜೂಸ್ನ ಅಕೌಂಟ್ ಬುಕ್ ಪರಿಶೀಲನೆ ವೇಳೆ ಗಂಭೀರ ಸಂಗತಿ ಕಂಡುಬಂದರೆ ಎಸ್ಎಫ್ಐಒಗೆ ತನಿಖೆ ವಹಿಸುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ.
ಕೆಲ ದಿನಗಳ ಹಿಂದೆ ಬೈಜೂಸ್ ಮಂಡಳಿಯಿಂದ ಮೂವರು ನಿರ್ದೇಶಕರಾದ ಜಿವಿ ರವಿಶಂಕರ್, ರಸೆಲ್ ಡ್ರೇಸೆನ್ಸ್ಟಾಕ್, ವಿವಿಯನ್ ವು ಅವರು ಹೊರಹೋಗಿದ್ದಾರೆ. ಬೈಜೂಸ್ ಸಂಸ್ಥಾಪಕ ಬೈಜು ರವೀಂದ್ರನ್ ಜೊತೆ ಭಿನ್ನಾಭಿಪ್ರಾಯದ ಕಾರಣಕ್ಕೆ ಅವರು ನಿರ್ಗಮಿಸಿದರೆನ್ನಲಾಗಿದೆ. ಕುತೂಹಲ ಎಂದರೆ ಅದೇ ದಿನ ಬೈಜೂಸ್ನ ಆಡಿಟರ್ ಕೂಡ ಹೊರಬಿದ್ದಿದ್ದರು.
ಇವೆಲ್ಲ ಬೆಳವಣಿಗೆಯಿಂದ ಕಾರ್ಪೊರೇಟ್ ಆಡಳಿತದ ಕಾನೂನು ತೊಡಕು ಉಂಟಾಗುವುದನ್ನು ತಪ್ಪಿಸಲು ಬೈಜೂಸ್ ಸಂಸ್ಥೆ ಬೋರ್ಡ್ ಅಡ್ವೈಸರಿ ಕಮಿಟಿ (ಬಿಎಸಿ) ಸ್ಥಾಪಿಸಲು ನಿರ್ಧರಿಸಿದೆ. ಬೈಜೂಸ್ನ ಮಂಡಳಿ ಮತ್ತು ಆಡಳಿತದ ರಚನೆ ಹೇಗಿರಬೇಕು ಎಂಬ ಬಗ್ಗೆ ಬಿಎಸಿಯಿಂದ ರವೀಂದ್ರನ್ಗೆ ಸಲಹೆ ನೀಡಲಾಗುವ ನಿರೀಕ್ಷೆ ಇದೆ.
ಇದೆಲ್ಲದರ ಮಧ್ಯೆ ಬೈಜುಸ್ ಸಂಸ್ಥೆ ಅಮೆರಿಕದಲ್ಲಿ ಎರಡು ಕೋರ್ಟ್ಗಳಲ್ಲಿ ಪ್ರಕರಣ ಎದುರಿಸುತ್ತಿದೆ. ಕಳೆದ ವರ್ಷ ಬೈಜೂಸ್ಗೆ ಸೇರಿದ ವಿವಿಧ ಸ್ಥಳಗಳಲ್ಲಿ ಇಡಿ ರೇಡ್ಗಳು ನಡೆದಿದ್ದವು. 2020-21ರ ಹಣಕಾಸು ವರ್ಷದಲ್ಲಿ ಬೈಜುಸ್ ಹಣಕಾಸು ಲೆಕ್ಕ ಪ್ರಕಟಿಸಿಲ್ಲ. ಅದರ ಅಕೌಂಟನ್ನು ಆಡಿಟ್ ಮಾಡಲಾಗಿಲ್ಲ ಎಂಬುದು ಇಡಿ ಆರೋಪ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
