Citigroup Layoffs: ಜೆಪಿ ಮಾರ್ಗನ್, ಗೋಲ್ಡ್​ಮನ್ ಸ್ಯಾಕ್ಸ್ ಬಳಿಕ ಈಗ ಸಿಟಿಗ್ರೂಪ್​ನಿಂದಲೂ ನೂರಾರು ಉದ್ಯೋಗಿಗಳು ವಜಾ

ನವದೆಹಲಿ: ಬ್ಯಾಂಕಿಂಗ್ ಕ್ಷೇತ್ರದಲ್ಲೂ ಉದ್ಯೋಗಕಡಿತ (Layoffs) ಪ್ರಕ್ರಿಯೆ ಜೋರಾಗಿ ಸಾಗುತ್ತಿದೆ. ಜೆಪಿ ಮಾರ್ಗನ್ ಚೇಸ್, ಗೋಲ್ಡ್​ಮನ್ ಸ್ಯಾಕ್ಸ್ ಗ್ರೂಪ್ ಮೊದಲಾದ ಕಂಪನಿಗಳು ಸಾವಿರಾರು ಮಂದಿಯನ್ನು ಕೆಲಸದಿಂದ ಕಿತ್ತುಹಾಕಿದ್ದವು. ಇದರ ಬೆನ್ನಲ್ಲೇ ಇದೀಗ ಮತ್ತೊಂದು ಇನ್ವೆಸ್ಟ್​ಮೆಂಟ್ ಬ್ಯಾಂಕರ್ ಸಿಟಿಗ್ರೂಪ್ (Citigroup) ಕೂಡ ಉದ್ಯೋಗಕಡಿತಕ್ಕೆ ಕೈಹಾಕಿದೆ. ಸಿಟಿಗ್ರೂಪ್​ನ ವಿವಿಧ ಸ್ತರಗಳಲ್ಲಿ ನೂರಾರು ಉದ್ಯೋಗಿಗಳು ಕೆಲಸ ಕಳೆದುಕೊಳ್ಳಲಿದ್ದಾರೆ. ಇನ್ವೆಸ್ಟ್​ಮೆಂಟ್ ಬ್ಯಾಂಕಿಂಗ್ ಡಿವಿಶನ್​ನಿಂದಲೇ ಹೆಚ್ಚಿನ ಜನರು ಲೇ ಆಫ್ ಆಗುತ್ತಿದ್ದಾರೆ.

ಸಿಟಿಗ್ರೂಪ್ ಕಂಪನಿಯಲ್ಲಿ ಒಟ್ಟು 2.4 ಲಕ್ಷ ಜನರು ಕೆಲಸ ಮಾಡುತ್ತಿದ್ದಾರೆ. ಹೊರಹೋಗುವ ಸಿಬ್ಬಂದಿ ಸಂಖ್ಯೆ ಶೇ. 1ಕ್ಕಿಂತಲೂ ಕಡಿಮೆ ಎನ್ನಲಾಗಿದೆ. ಉದ್ಯೋಗಕಡಿತಕ್ಕೆ ಸಿಟಿಗ್ರೂಪ್ ಕೈಹಾಕಲು ನಿರ್ದಿಷ್ಟ ಕಾರಣಗಳನ್ನು ತಿಳಿಸಿಲ್ಲ. ನಷ್ಟದ ಕಾರಣಕ್ಕೆ ಈ ಕ್ರಮ ಕೈಗೊಳ್ಳಲಾಗಿದೆಯಾ ಎಂಬುದು ಗೊತ್ತಿಲ್ಲ. ಸಿಟಿಗ್ರೂಪ್ ಹೇಳಿರುವ ಪ್ರಕಾರ ಇದು ಮಾಮೂಲಿಯ ಬಿಸಿನೆಸ್ ಪ್ಲಾನಿಂಗ್​ನ ಒಂದು ಭಾಗ ಅಷ್ಟೇ ಎನ್ನಲಾಗಿದೆ.

ಸಿಟಿಗ್ರೂಪ್ ಕಳೆದ ಕೆಲ ವರ್ಷಗಳಿಂದ ತನ್ನ ಟೆಕ್ನಾಲಜಿ ಡಿವಿಶನ್​ನಲ್ಲಿನ ಇನ್​ಫ್ರಾಸ್ಟ್ರಕ್ಚರ್ ಅನ್ನು ಅಪ್​ಗ್ರೇಡ್ ಮಾಡಿತ್ತು. ಅದಕ್ಕಾಗಿ ಕೋಟ್ಯಂತರ ರೂ ವೆಚ್ಚ ಮಾಡಿದೆ. ಉನ್ನತ ತಂತ್ರಜ್ಞಾನ ಅಳವಡಿಕೆಯಿಂದಾಗಿ ಮ್ಯಾನುಯಲ್ ಕಾರ್ಯನಿರ್ವಹಿಸುವ ಅಗತ್ಯತೆ ಕಡಿಮೆಯಾಗಲಿದೆ. ಹಲವು ಪ್ರಮಾಣದ ಕೆಲಸಗಳು ಯಾಂತ್ರೀಕೃತಗೊಂಡಿವೆ. ಹೀಗಾಗಿ, ಸಿಬ್ಬಂದಿವರ್ಗದ ಕಡಿತಕ್ಕೆ ಕಂಪನಿ ಕೈಹಾಕಿರಬಹುದು ಎಂದೂ ಹೇಳಲಾಗುತ್ತಿದೆ.

ಇದನ್ನೂ ಓದಿ: Ambani: ಅಂಬಾನಿಯಿಂದ ಆಗ ಜಿಯೋ ಕ್ರಾಂತಿ, ಈಗ ಜಿನೋಮ್ ಕ್ರಾಂತಿ; ವಿಶ್ವದಲ್ಲೇ ಅತ್ಯಂತ ಕಡಿಮೆ ಬೆಲೆಯ ಜಿನೋಮ್ ಟೆಸ್ಟಿಂಗ್ ಕಿಟ್

ಸಿಟಿಗ್ರೂಪ್​ಗೆ ಸೇರಿದ ಸಿಟಿಬ್ಯಾಂಕ್ ತನ್ನ ಭಾರತೀಯ ವ್ಯವಹಾರಗಳನ್ನು ಆ್ಯಕ್ಸಿಸ್ ಬ್ಯಾಂಕ್​ಗೆ ಮೊನ್ನೆಯಷ್ಟೇ ಮಾರಲು ಒಪ್ಪಂದ ಮಾಡಿಕೊಂಡಿದೆ. ಇದರ ಬೆನ್ನಲ್ಲೇ ಈಗ ಸಿಟಿಗ್ರೂಪ್​ನ ವಿವಿಧ ವಿಭಾಗಗಳ ಸಿಬ್ಬಂದಿವರ್ಗದ ಉದ್ಯೋಗಕಡಿತ ಮಾಡುತ್ತಿದೆ.

ವಾರದ ಹಿಂದಷ್ಟೇ ಜೆಪಿ ಮಾರ್ಗನ್ ಚೇಸ್ ಅಂಡ್ ಕೋ ಎಂಬ ಮತ್ತೊಂದು ಇನ್ವೆಸ್ಟ್​ಮೆಂಟ್ ಬ್ಯಾಂಕಿಂಗ್ ಸಂಸ್ಥೆ ಕೂಡ ನೂರಾರು ಉದ್ಯೋಗಿಗಳಿಗೆ ಪಿಂಕ್ ಸ್ಲಿಪ್ ಕೊಟ್ಟಿತ್ತು. ಜನವರಿ ತಿಂಗಳಲ್ಲಿ ಗೋಲ್ಡ್​ಮನ್ ಸ್ಯಾಕ್ಸ್ ಗ್ರೂಪ್ ಕಂಪನಿ 3,200 ಮಂದಿಯನ್ನು ಕೆಲಸದಿಂದ ವಜಾಗೊಳಿಸಿತ್ತು. ಅದರ ಭಾರತೀಯ ವಿಭಾಗದಲ್ಲಿ 700-800 ಮಂದಿ ಕೆಲಸ ಕಳೆದುಕೊಂಡಿರುವುದು ತಿಳಿದುಬಂದಿದೆ.

ಹೆಚ್ಚಿನ ವ್ಯವಹಾರಗಳ ಸುದ್ದಿಗೆ ಇಲ್ಲಿ ಕ್ಲಿಕ್ ಮಾಡಿ

Published On - 11:56 am, Fri, 3 March 23