CNG ಎಂದರೇನು? ಕಾರಿನಲ್ಲಿ ಅದು ಹೇಗೆ ಕೆಲಸ ಮಾಡುತ್ತದೆ, ಪ್ರಯೋಜನ-ಅನುಕೂಲಗಳೇನು?

ಪೆಟ್ರೋಲ್ (Petrol) ಮತ್ತು ಡೀಸೆಲ್ ಬೆಲೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಇತ್ತೀಚಿನ ವರ್ಷಗಳಲ್ಲಿ ಸಿಎನ್​ಜಿ ಕಾರುಗಳ ಜನಪ್ರಿಯತೆ ಹೆಚ್ಚಾಗಿದೆ. ಹಿಂದೆ ಮುಖ್ಯವಾಗಿ ಟ್ಯಾಕ್ಸಿಗಳಲ್ಲಿ ಕಾಣಿಸುತ್ತಿದ್ದ ಸಿಎನ್​ಜಿ, ಈಗ ಸಾಮಾನ್ಯ ಪ್ರಯಾಣಿಕ ಕಾರುಗಳಲ್ಲೂ ಪ್ರಮುಖ ಇಂಧನ ಆಯ್ಕೆಯಾಗಿದೆ. ಹಲವು ಕಾರು ತಯಾರಿಕಾ ಕಂಪನಿಗಳು ಫ್ಯಾಕ್ಟರಿಯಿಂದಲೇ ಸಿಎನ್​ಜಿ ಕಿಟ್ ಅಳವಡಿಸಿದ ಕಾರುಗಳನ್ನು ಮಾರಾಟ ಮಾಡುತ್ತಿವೆ. ಹಾಗಾದರೆ ಸಿಎನ್​ಜಿ ಎಂದರೇನು? ಅದು ಕಾರಿನಲ್ಲಿ ಹೇಗೆ ಕೆಲಸ ಮಾಡುತ್ತದೆ? ಇದರ ಪ್ರಯೋಜನಗಳು ಮತ್ತು ಅನಾನುಕೂಲಗಳೇನು?.

ಸಿಎನ್​ಜಿ ಎಂದರೇನು?

ಸಿಎನ್​ಜಿ ಎಂದರೆ Compressed Natural Gas, ಅಂದರೆ ಸಂಕುಚಿತ ನೈಸರ್ಗಿಕ ಅನಿಲ. ಇದು ಮುಖ್ಯವಾಗಿ ಮೀಥೇನ್ ಅನಿಲದಿಂದ ಕೂಡಿರುತ್ತದೆ. ಇದರಲ್ಲಿರುವ ಮೀಥೇನ್ ಪ್ರಮಾಣ ಸಾಮಾನ್ಯವಾಗಿ ಶೇ.85ರಿಂದ ಶೇ.98ರವರೆಗೆ ಇರಬಹುದು. ಇದರ ಜೊತೆಗೆ ಎಥೇನ್, ಬ್ಯುಟೇನ್, ನೈಟ್ರೋಜನ್ ಮತ್ತು ಕಾರ್ಬನ್ ಡೈಆಕ್ಸೈಡ್‌ನಂತಹ ಇತರ ಅನಿಲಗಳೂ ಅಲ್ಪ ಪ್ರಮಾಣದಲ್ಲಿರುತ್ತವೆ.

ನೈಸರ್ಗಿಕ ಅನಿಲವನ್ನು ಸಾಮಾನ್ಯ ಸ್ಥಿತಿಯಲ್ಲಿ ಕಾರಿನ ಟ್ಯಾಂಕ್‌ನಲ್ಲಿ ಸಂಗ್ರಹಿಸಲು ತುಂಬಾ ದೊಡ್ಡ ಜಾಗ ಬೇಕಾಗುತ್ತದೆ. ಹೀಗಾಗಿ ಅದನ್ನು ಸುಮಾರು 200ರಿಂದ 250 ಬಾರ್‌ಗಳಷ್ಟು ಹೆಚ್ಚಿನ ಒತ್ತಡದಲ್ಲಿ ಸಂಕುಚಿತ ಮಾಡಲಾಗುತ್ತದೆ. ಇದರಿಂದ ಅನಿಲದ ಪರಿಮಾಣ ಗಣನೀಯವಾಗಿ ಕಡಿಮೆಯಾಗುತ್ತದೆ ಮತ್ತು ಕಾರಿನಲ್ಲಿರುವ ವಿಶೇಷ ಸಿಲಿಂಡರ್‌ನಲ್ಲಿ ಸಂಗ್ರಹಿಸಲು ಸಾಧ್ಯವಾಗುತ್ತದೆ.

ಸಿಎನ್​ಜಿ ಕಾರಿನಲ್ಲಿ ಹೇಗೆ ಕೆಲಸ ಮಾಡುತ್ತದೆ?

ಕಾರಿನಲ್ಲಿರುವ ಸಿಎನ್​ಜಿ ಸಿಲಿಂಡರ್‌ನಲ್ಲಿ ಹೆಚ್ಚಿನ ಒತ್ತಡದಲ್ಲಿ ಅನಿಲವನ್ನು ಸಂಗ್ರಹಿಸಲಾಗುತ್ತದೆ. ಇಂಧನ ವ್ಯವಸ್ಥೆಯ ಮೂಲಕ ಈ ಅನಿಲವನ್ನು ಎಂಜಿನ್‌ಗೆ ಕಳುಹಿಸಲಾಗುತ್ತದೆ. ಅಲ್ಲಿ ಗಾಳಿಯೊಂದಿಗೆ ಬೆರೆಸಿ ದಹನ ಪ್ರಕ್ರಿಯೆ ನಡೆಯುತ್ತದೆ. ಇದರಿಂದ ಉತ್ಪತ್ತಿಯಾಗುವ ಶಕ್ತಿಯನ್ನು ಕಾರನ್ನು ಚಲಿಸಲು ಬಳಸಲಾಗುತ್ತದೆ.

ಭಾರತಕ್ಕೆ ಸಿಎನ್​ಜಿ ಮುಖ್ಯವಾಗಿ ದೇಶೀಯ ನೈಸರ್ಗಿಕ ಅನಿಲ ಉತ್ಪಾದನೆ ಮತ್ತು ಆಮದು ಮಾಡಿಕೊಳ್ಳುವ LNG ಮೂಲಕ ದೊರೆಯುತ್ತದೆ. ಕೆಲವು ಕಡೆ ಆಹಾರ ತ್ಯಾಜ್ಯ, ಕೊಳಚೆ ಮತ್ತು ಗೋಮಯದಿಂದ Bio-CNG ಕೂಡ ಉತ್ಪಾದಿಸಲಾಗುತ್ತದೆ.

BMW i5 LWB: 669 ಕಿ.ಮೀ. ರೇಂಜ್ ನೀಡುವ ಹೊಸ ಎಲೆಕ್ಟ್ರಿಕ್ ಕಾರು ಬಿಡುಗಡೆ ಮಾಡಿದ ಬಿಎಂಡಬ್ಲ್ಯು; ಬೆಲೆ ₹79.60 ಲಕ್ಷ

ಸಿಎನ್​ಜಿ ಕಾರುಗಳು ಸುರಕ್ಷಿತವೇ?

ಫ್ಯಾಕ್ಟರಿಯಿಂದಲೇ ಅಳವಡಿಸಲಾದ ಸಿಎನ್​ಜಿ ವ್ಯವಸ್ಥೆಗಳನ್ನು ಸುರಕ್ಷತಾ ಮಾನದಂಡಗಳಿಗೆ ಅನುಗುಣವಾಗಿ ವಿನ್ಯಾಸಗೊಳಿಸಲಾಗಿರುತ್ತದೆ. ಸಿಎನ್​ಜಿ ಸಿಲಿಂಡರ್‌ಗಳು ಹೆಚ್ಚಿನ ಒತ್ತಡವನ್ನು ತಡೆದುಕೊಳ್ಳುವಂತೆ ತಯಾರಾಗಿರುತ್ತವೆ. ಅವುಗಳಲ್ಲಿ ಒತ್ತಡ ನಿಯಂತ್ರಣ ಮತ್ತು ಅಗತ್ಯವಿದ್ದಾಗ ಅನಿಲದ ಹರಿವನ್ನು ನಿಲ್ಲಿಸುವ ವ್ಯವಸ್ಥೆಗಳೂ ಇರುತ್ತವೆ.

ಮೀಥೇನ್ ಗಾಳಿಗಿಂತ ಹಗುರವಾಗಿರುವುದರಿಂದ ಸೋರಿಕೆ ಸಂಭವಿಸಿದರೆ ಅದು ಮೇಲಕ್ಕೆ ಹರಡುವ ಗುಣ ಹೊಂದಿದೆ. ಮೀಥೇನ್‌ಗೆ ಸ್ವಾಭಾವಿಕವಾಗಿ ವಾಸನೆ ಇರುವುದಿಲ್ಲ. ಸೋರಿಕೆಯನ್ನು ಸುಲಭವಾಗಿ ಗುರುತಿಸಲು ವಿಶೇಷ ವಾಸನೆಯ ರಾಸಾಯನಿಕವನ್ನು ಸೇರಿಸಲಾಗುತ್ತದೆ.

ಸಿಎನ್​ಜಿ ಬಳಸುವುದರಿಂದ ಏನು ಪ್ರಯೋಜನ?

ಸಿಎನ್​ಜಿ ಕಾರಿನ ಪ್ರಮುಖ ಆಕರ್ಷಣೆ ಕಡಿಮೆ ಚಾಲನಾ ವೆಚ್ಚ. ವರದಿಯ ಪ್ರಕಾರ, ಪೆಟ್ರೋಲ್ ಮತ್ತು ಡೀಸೆಲ್‌ಗೆ ಹೋಲಿಸಿದರೆ ಸಿಎನ್​ಜಿ ಕಾರಿನ ಪ್ರತಿ ಕಿಲೋಮೀಟರ್ ಚಾಲನಾ ವೆಚ್ಚ ಸುಮಾರು 30ರಿಂದ 50 ಪ್ರತಿಶತದಷ್ಟು ಕಡಿಮೆಯಾಗಬಹುದು. ಇದರ ದಹನದಿಂದ ಕೆಲವು ಮಾಲಿನ್ಯಕಾರಕಗಳ ಹೊರಸೂಸುವಿಕೆಯೂ ಕಡಿಮೆ ಇರುತ್ತದೆ.

ಸಿಎನ್​ಜಿ ಕಾರಿನ ಅನಾನುಕೂಲಗಳೇನು?

ಸಿಎನ್​ಜಿ ಕಾರುಗಳಿಗೆ ಕೆಲವು ಮಿತಿಗಳೂ ಇವೆ. ಪೆಟ್ರೋಲ್‌ಗೆ ಹೋಲಿಸಿದರೆ ಸಿಎನ್​ಜಿ ಮೋಡ್‌ನಲ್ಲಿ ಕಾರಿನ ಪಿಕಪ್ ಮತ್ತು ಶಕ್ತಿಯಲ್ಲಿ ಸ್ವಲ್ಪ ವ್ಯತ್ಯಾಸ ಕಂಡುಬರಬಹುದು. ಸಿಲಿಂಡರ್‌ನಲ್ಲಿ ಸಂಗ್ರಹಿಸಬಹುದಾದ ಇಂಧನದ ಪ್ರಮಾಣ ಸೀಮಿತವಾಗಿರುವುದರಿಂದ ಕೆಲವು ಕಾರುಗಳಲ್ಲಿ ಪೆಟ್ರೋಲ್‌ಗೆ ಹೋಲಿಸಿದರೆ ಒಟ್ಟಾರೆ ಚಾಲನಾ ವ್ಯಾಪ್ತಿಯೂ ಕಡಿಮೆಯಾಗಬಹುದು. ಇದರ ಜೊತೆಗೆ ಎಲ್ಲ ಪ್ರದೇಶಗಳಲ್ಲೂ ಸಿಎನ್​ಜಿ ಪಂಪ್‌ಗಳು ಸುಲಭವಾಗಿ ಸಿಗುವುದಿಲ್ಲ. ಜನಸಂದಣಿ ಇರುವ ಪ್ರದೇಶಗಳಲ್ಲಿ ಸಿಎನ್​ಜಿ ತುಂಬಿಸಲು ಕಾಯುವ ಸಮಯವೂ ಹೆಚ್ಚಾಗಬಹುದು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ