ಏಪ್ರಿಲ್ನಲ್ಲಿ ದಾಖಲೆ ಜಿಎಸ್ಟಿ ಸಂಗ್ರಹ; ತಮಿಳುನಾಡನ್ನು ಮೀರಿಸಿದ ಉತ್ತರಪ್ರದೇಶ; ಕರ್ನಾಟಕದಲ್ಲಿ ಸಂಗ್ರಹವಾದ ತೆರಿಗೆ ಇಷ್ಟು
GST collection in April: 2024ರ ಎಪ್ರಿಲ್ ತಿಂಗಳಲ್ಲಿ 2.10 ಲಕ್ಷ ಕೋಟಿ ರೂ ನಷ್ಟು ಜಿಎಸ್ಟಿ ತೆರಿಗೆ ಸಂಗ್ರಹ ಆಗಿದೆ. ಹಣಕಾಸು ಸಚಿವಾಲಯ ಮೇ 1ರಂದು ಬಿಡುಗಡೆ ಮಾಡಿದ ದತ್ತಾಂಶದ ಪ್ರಕಾರ ಮಾಸಿಕ ಜಿಎಸ್ಟಿ ಸಂಗ್ರಹ 2 ಲಕ್ಷ ಕೋಟಿ ರೂ ಮೈಲಿಗಲ್ಲು ಮುಟ್ಟಿದ್ದು ಇದೇ ಮೊದಲು. ಕರ್ನಾಟಕದಲ್ಲಿ ತೆರಿಗೆ ಸಂಗ್ರಹ 15,000 ಕೋಟಿ ರೂ ಗಡಿ ದಾಟಿ ಹೋಗಿದೆ. ಉತ್ತರಪ್ರದೇಶದಲ್ಲಿ ತಮಿಳುನಾಡಿಗಿಂತಲೂ ಹೆಚ್ಚು ಜಿಎಸ್ಟಿ ಸಂಗ್ರಹವಾಗಿದೆ. ಆರು ರಾಜ್ಯಗಳು ಈ ಬಾರಿ 12,000 ಕೋಟಿ ರೂಗಿಂತ ಹೆಚ್ಚು ತೆರಿಗೆ ಸಂಗ್ರಹಿಸಿರುವುದು ವಿಶೇಷ.
ನವದೆಹಲಿ, ಮೇ 1: ಏಪ್ರಿಲ್ ತಿಂಗಳಲ್ಲಿ 2.10 ಲಕ್ಷ ಕೋಟಿ ರೂನಷ್ಟು ಜಿಎಸ್ಟಿ ತೆರಿಗೆ ಸಂಗ್ರಹವಾಗಿದೆ (GST collection) ಎಂದು ಕೇಂದ್ರ ಹಣಕಾಸು ಸಚಿವಾಲಯ ಇಂದು ಬುಧವಾರ ಮಾಹಿತಿ ಬಿಡುಗಡೆ ಮಾಡಿದೆ. ಜಿಎಸ್ಟಿ ಸಂಗ್ರಹ ಇದೇ ಮೊದಲ ಬಾರಿಗೆ 2 ಲಕ್ಷ ಕೋಟಿ ರೂ ಮೈಲಿಗಲ್ಲು ಮುಟ್ಟಿ ಸಾರ್ವಕಾಲಿಕ ದಾಖಲೆ ಬರೆದಿದೆ. ಆರ್ಥಿಕ ಬೆಳವಣಿಗೆ ಮತ್ತು ಆಡಳಿತ ಕ್ಷಮತೆ ಹೆಚ್ಚಾಗಿರುವುದಕ್ಕೆ ಇಷ್ಟೊಂದು ತೆರಿಗೆ ಸಂಗ್ರಹ ಏರಿಕೆಯು ಕನ್ನಡಿ ಹಿಡಿದಿದೆ. ಹರ್ಯಾಣ ಮತ್ತು ಉತ್ತರಪ್ರದೇಶ ರಾಜ್ಯಗಳು ಮೊದಲ ಬಾರಿಗೆ ಒಂದು ತಿಂಗಳ ತೆರಿಗೆ ಸಂಗ್ರಹ 12,000 ಕೋಟಿ ರೂ ಮೈಲಿಗಲ್ಲು ಮುಟ್ಟಿವೆ. ಕರ್ನಾಟಕದ ತೆರಿಗೆ ಸಂಗ್ರಹ 15,000 ಕೋಟಿ ರೂ ಗಡಿ ದಾಟಿ ಹೋಗಿದೆ. ಆರು ರಾಜ್ಯಗಳು ತಲಾ 12,000 ಕೋಟಿ ರೂ ತೆರಿಗೆ ಸಂಗ್ರಹ ಮಾಡಿರುವುದು ಇದೇ ಮೊದಲಾಗಿದೆ. ಉತ್ತರಪ್ರದೇಶದ ಜಿಎಸ್ಟಿ ಸಂಗ್ರಹ ತಮಿಳುನಾಡಿಗಿಂತಲೂ ಹೆಚ್ಚಿದೆ.
2024ರ ಏಪ್ರಿಲ್ ತಿಂಗಳ ಜಿಎಸ್ಟಿ ಸಂಗ್ರಹ ವಿವರ
ಒಟ್ಟು ಜಿಎಸ್ಟಿ ಸಂಗ್ರಹ: 2.10 ಲಕ್ಷ ಕೋಟಿ ರೂ
- ಸಿಜಿಎಸ್ಟಿ: 43,846 ಕೋಟಿ ರೂ
- ಎಸ್ಜಿಎಸ್ಟಿ: 53,538 ಕೋಟಿ ರೂ
- ಐಜಿಎಸ್ಟಿ: 99,623 ಕೋಟಿ ರೂ
- ಸೆಸ್: 13,260 ಕೋಟಿ ರೂ
ಸಿಜಿಎಸ್ಟಿ ಎಂಬುದು ಕೇಂದ್ರಕ್ಕೆ ಸಂದಾಯವಾಗುವ ತೆರಿಗೆ ಪಾಲು. ಎಸ್ಜಿಎಸ್ಟಿ ಎಂಬುದು ರಾಜ್ಯ ಸರ್ಕಾರಗಳಿಗೆ ಹೋಗುವಂಥದ್ದು. ಐಜಿಎಸ್ಟಿ ಎಂಬುದು ಒಂದು ರಾಜ್ಯದಲ್ಲಿರುವ ಸಂಸ್ಥೆ ಬೇರೆ ರಾಜ್ಯದ ಇನ್ನೊಂದು ಸಂಸ್ಥೆ ಜೊತೆ ವ್ಯವಹರಿಸುವಾಗ ನೀಡುವ ತೆರಿಗೆ ಆಗಿರುತ್ತದೆ. ಈ ಐಜಿಎಸ್ಟಿಯ ಹಣದಲ್ಲಿ ಕೇಂದ್ರ ಮತ್ತು ಸಂಬಂಧಿತ ರಾಜ್ಯ ಸರ್ಕಾರಗಳು ಪಾಲು ಪಡೆಯುತ್ತವೆ.
ಇದನ್ನೂ ಓದಿ: ಕಾರ್ಮಿಕರ ದಿನದಂದು ಷೇರುಪೇಟೆಗೆ ರಜೆಯಾ? ಮೇ ತಿಂಗಳಲ್ಲಿ ಯಾವ್ಯಾವ ದಿನ ಇದೆ ರಜೆ? ಇಲ್ಲಿದೆ ಪಟ್ಟಿ
ಎಪ್ರಿಲ್ ತಿಂಗಳಲ್ಲಿ ಐಜಿಎಸ್ಟಿ ಸಂಗ್ರಹವಾಗಿರುವುದು 99,623 ಕೋಟಿ ರೂ. ಇದರಲ್ಲಿ ಸಿಜಿಎಸ್ಟಿ ಖಾತೆಗೆ 50,307 ಕೋಟಿ ರೂ ಅನ್ನು ಹಂಚಲಾಗಿದೆ. ಎಸ್ಜಿಎಸ್ಟಿ ಖಾತೆಗೆ 41,600 ಕೋಟಿ ರೂ ಕೊಡಲಾಗಿದೆ. ಅಂತಿಮವಾಗಿ ಸಿಜಿಎಸ್ಟಿ ಮೊತ್ತ 94,153 ಕೋಟಿ ರೂ ಅದರೆ, ಎಸ್ಜಿಎಸ್ಟಿ ಮೊತ್ತ 95,138 ಕೋಟಿ ರೂ ಅಗಿದೆ.
ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಎಕ್ಸ್ ಪೋಸ್ಟ್
👉 #GST revenue collection for April 2024 highest ever at Rs 2.10 lakh crore
👉 #GST collections breach landmark milestone of ₹2 lakh crore
👉 Gross Revenue Records 12.4% y-o-y growth
👉 Net Revenue (after refunds) stood at ₹1.92 lakh crore; 17.1% y-o-y growth https://t.co/aSUkhMyMLr
— Nirmala Sitharaman (Modi Ka Parivar) (@nsitharaman) May 1, 2024
ಏಪ್ರಿಲ್ ತಿಂಗಳಲ್ಲಿ ಹೆಚ್ಚು ಜಿಎಸ್ಟಿ ಸಂಗ್ರಹ ಕಂಡಿರುವ ರಾಜ್ಯಗಳಿವು
- ಮಹಾರಾಷ್ಟ್ರ: 37,671 ಕೋಟಿ ರೂ
- ಕರ್ನಾಟಕ: 15,978 ಕೋಟಿ ರೂ
- ಗುಜರಾತ್: 13,301 ಕೋಟಿ ರೂ
- ಉತ್ತರಪ್ರದೇಶ: 12,290 ಕೋಟಿ ರೂ
- ತಮಿಳುನಾಡು: 12,210 ಕೋಟಿ ರೂ
- ಹರ್ಯಾಣ: 12,168 ಕೋಟಿ ರೂ
- ಪಶ್ಚಿಮ ಬಂಗಾಳ: 7,293 ಕೋಟಿ ರೂ
- ತೆಲಂಗಾಣ: 6,236 ಕೋಟಿ ರೂ
- ಒಡಿಶಾ: 5,902 ಕೋಟಿ ರೂ
- ರಾಜಸ್ಥಾನ: 5,558 ಕೋಟಿ ರೂ
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ