GST: ಜುಲೈ ತಿಂಗಳಲ್ಲಿ ಜಿಎಸ್ಟಿ ಶೇ. 11ರಷ್ಟು ಹೆಚ್ಚು ಸಂಗ್ರಹ; ಕರ್ನಾಟಕದಲ್ಲಿ ಎಷ್ಟಿದೆ ಕಲೆಕ್ಷನ್?

2023 July, GST Collections: ಭಾರತದಲ್ಲಿ ಐದನೇ ಬಾರಿ ಒಂದು ತಿಂಗಳಲ್ಲಿ ಜಿಎಸ್ಟಿ ಸಂಗ್ರಹ 1.6 ಲಕ್ಷ ಗಡಿ ದಾಟಿದೆ. ಜುಲೈ ತಿಂಗಳಲ್ಲಿ ಒಟ್ಟು 1.65 ಲಕ್ಷ ಜಿಎಸ್ಟಿ ತೆರಿಗೆ ಸಿಕ್ಕಿದೆ. ಇದರಲ್ಲಿ ಕೇಂದ್ರಕ್ಕೆ 69,558 ಕೋಟಿ ರೂ ಸಿಕ್ಕರೆ ರಾಜ್ಯಗಳಿಗೆ 70,811 ಕೋಟಿ ರೂ ಹಂಚಿಕೆಯಾಗಿದೆ. ಜಿಎಸ್ಟಿ ಸಂಗ್ರಹದಲ್ಲಿ ಕರ್ನಾಟಕ 2ನೇ ಸ್ಥಾನದಲ್ಲಿ ಮುಂದುವರಿದಿದೆ.

ಜಿಎಸ್ಟಿ

ಸುಗ್ಗನಹಳ್ಳಿ ವಿಜಯಸಾರಥಿ |
Updated on: Aug 01, 2023 | 5:12 PM

ನವದೆಹಲಿ, ಆಗಸ್ಟ್ 1: ಭಾರತದಲ್ಲಿ ತಿಂಗಳಿಗೆ 1.6 ಲಕ್ಷ ಜಿಎಸ್ಟಿ ಸಂಗ್ರಹ (GST Collection) ಈಗ ಹೊಸ ಕನಿಷ್ಠ ಮಟ್ಟವಾದಂತಿದೆ. ಜುಲೈ ತಿಂಗಳಲ್ಲಿ ದೇಶದೆಲ್ಲೆಡೆ ಸಂಗ್ರಹವಾದ ಜಿಎಸ್ಟಿ ಮೊತ್ತ 1,65,105 ಕೋಟಿ ರೂ ಎಂದು ಸರಕಾರ ಬಿಡುಗಡೆ ಮಾಡಿದ ಇತ್ತೀಚಿನ ಅಂಕಿ ಅಂಶದಲ್ಲಿ ಹೇಳಲಾಗಿದೆ. 2022ರ ಜುಲೈ ತಿಂಗಳಿಗೆ ಹೋಲಿಸಿದರೆ ಈ ಜುಲೈನಲ್ಲಿ ಜಿಎಸ್ಟಿ ಸಂಗ್ರಹ ಶೇ. 11ರಷ್ಟು ಹೆಚ್ಚಾಗಿದೆ. ಜಿಎಸ್ಟಿ ಜಾರಿಗೆ ಬಂದ ಬಳಿಕ ಐದನೇ ಬಾರಿ ಜಿಎಸ್ಟಿ ಸಂಗ್ರಹ 1.6 ಲಕ್ಷ ಕೋಟಿ ಮಟ್ಟಕ್ಕಿಂತ ಮೇಲೆ ಹೋಗಿರುವುದು.

2023ರ ಜುಲೈನಲ್ಲಿ ಜಿಎಸ್ಟಿ ಸಂಗ್ರಹ ವಿವರ

ಒಟ್ಟು ಜಿಎಸ್ಟಿ: 1,65,105 ಕೋಟಿ ರೂ
ಸಿಜಿಎಸ್ಟಿ: 29,773 ಕೋಟಿ ರೂ
ಎಸ್ಜಿಎಸ್ಟಿ: 37,623 ಕೋಟಿ ರೂ
ಐಜಿಎಸ್ಟಿ: 85,930 ಕೋಟಿ ರೂ

ಇದನ್ನೂ ಓದಿ: ITR: ಆದಾಯ ತೆರಿಗೆ ರಿಟರ್ನ್ ಇನ್ನೂ ಎಷ್ಟು ಮಂದಿ ಫೈಲ್ ಮಾಡಿಲ್ಲ? ತಡವಾಗಿ ಸಲ್ಲಿಸಿದವರು ದಂಡ ಎಷ್ಟು ಕಟ್ಟಬೇಕು?

ಸಿಜಿಎಸ್ಟಿ, ಎಸ್ಜಿಎಸ್ಟಿ ಮತ್ತು ಐಜಿಎಸ್ಟಿ ಸೇರಿ ಒಟ್ಟು ಜಿಎಸ್ಟಿ ಸಂಗ್ರಹ ಆಗುತ್ತದೆ. ಇಲ್ಲಿ ಸಿಜಿಎಸ್ಟಿ ಎಂದರೆ ಕೇಂದ್ರಕ್ಕೆ ಸಂದಾಯವಾಗುವ ತೆರಿಗೆಯಾಗಿದೆ. ಎಸ್ಜಿಎಸ್ಟಿ ಎಂಬುದು ರಾಜ್ಯಗಳ ಪಾಲಾಗುವ ತೆರಿಗೆ. ಇನ್ನು, ಐಜಿಎಸ್ಟಿ ಹಣವನ್ನು ಕೇಂದ್ರ ಮತ್ತು ರಾಜ್ಯಗಳ ನಡುವೆ ಹಂಚಿಕೆ ಆಗುತ್ತದೆ.

ಐಜಿಎಸ್ಟಿ ಎಂದರೆ ಒಂದು ರಾಜ್ಯದಿಂದ ಇನ್ನೊಂದು ರಾಜ್ಯದ ಜನರು ಅಥವಾ ಸಂಸ್ಥೆಗಳ ಮಧ್ಯೆ ನಡೆಯುವ ವ್ಯಾಪಾರಕ್ಕೆ ವಿಧಿಸುವ ತೆರಿಗೆಯಾಗಿದೆ. ಜುಲೈ ತಿಂಗಳಲ್ಲಿ ಸಂಗ್ರಹವಾದ ಒಟ್ಟು ಐಜಿಎಸ್ಟಿಯಲ್ಲಿ 39,785 ಕೋಟಿ ರೂ ಹಣವು ಕೇಂದ್ರಕ್ಕೆ ಹೋದರೆ, 33,188 ಕೋಟಿ ರೂ ತೆರಿಗೆ ಹಣ ರಾಜ್ಯಗಳಿಗೆ ಹೋಗಿದೆ.