ಜಿಎಸ್​ಟಿ ದರಗಳಲ್ಲಿ ಬದಲಾವಣೆ; ಯಾವುವು ಅಗ್ಗ, ಯಾವುವು ದುಬಾರಿ, ಇಲ್ಲಿದೆ ಪಟ್ಟಿ

ನವದೆಹಲಿ, ಡಿಸೆಂಬರ್ 22: ರಾಜಸ್ಥಾನದ ಜೈಸಲ್ಮೇರ್​ನಲ್ಲಿ ಶನಿವಾರ (ಡಿ. 21) ನಡೆದ 55ನೇ ಜಿಎಸ್​ಟಿ ಕೌನ್ಸಿಲ್ ಸಭೆಯಲ್ಲಿ ಕೆಲ ಮಹತ್ವದ ಶಿಫಾರಸುಗಳನ್ನು ಮಾಡಲಾಗಿದೆ. ಜಿಎಸ್​ಟಿ ತೆರಿಗೆ ವ್ಯವಸ್ಥೆಯಲ್ಲಿ ಒಂದಷ್ಟು ಸರಳೀಕರಣ, ಒಂದಷ್ಟು ಹೊರೆ ಇಳಿಕೆ ಇತ್ಯಾದಿ ಕ್ರಮಕ್ಕೆ ಆದ್ಯತೆ ನೀಡಲಾಗಿದೆ. ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ನೇತೃತ್ವದಲ್ಲಿ ನಡೆದ ಈ ಸಭೆಯಲ್ಲಿ ಕೈಗೊಳ್ಳಲಾದ ಕೆಲ ನಿರ್ಧಾರಗಳು ಹಾಗು ತೆರಿಗೆ ವ್ಯತ್ಯಯದಿಂದ ಆಗಬಹುದಾದ ವಿವಿಧ ವಸ್ತುಗಳ ಬೆಲೆ ಏರಿಳಿತಗಳ ವಿವರ ಇಲ್ಲಿದೆ….

55ನೇ ಜಿಎಸ್​ಟಿ ಕೌನ್ಸಿಲ್ ಸಭೆಯಲ್ಲಿ ಮಾಡಲಾದ ಪ್ರಮುಖ ಶಿಫಾರಸುಗಳು

• ಬ್ಯಾಂಕು ಹಾಗೂ ಎನ್​ಬಿಎಫ್​ಸಿಗಳು ಸಾಲದ ಗ್ರಾಹಕರಿಗೆ ವಿಧಿಸುವ ದಂಡದ ಹಣಕ್ಕೆ ಜಿಎಸ್​ಟಿ ವಿಧಿಸಬಹುದು.
• ಪೌಷ್ಟಿಕಾಂಶ ಲೇಪಿತ ಅಕ್ಕಿಯ ಮೇಲಿನ ಜಿಎಸ್​ಟಿ ದರ ಶೇ. 5ಕ್ಕೆ ಇಳಿಕೆ
• ಜೀನ್ ಥೆರಪಿಗೆ ಜಿಎಸ್​ಟಿಯಿಂದ ವಿನಾಯಿತಿ
• ಅಂತಾರಾಷ್ಟ್ರೀಯ ಅಣು ಶಕ್ತಿ ಸಂಸ್ಥೆಯ (ಐಎಇಎ) ಪರಿಶೀಲನಾ ತಂಡದಿಂದ ಆಮದು ಮಾಡಿಕೊಳ್ಳಲಾಗುವ ಎಲ್ಲಾ ಉಪಕರಣಗಳು ಹಾಗೂ ಬಳಕೆಯೋಗ್ಯ ವಸ್ತುಗಳ ಸ್ಯಾಂಪಲ್​ಗಳಿಗೆ ಐಜಿಎಸ್​ಟಿಯಿಂದ ವಿನಾಯಿತಿ ನೀಡಬಹುದು.
• ಎಲ್ಲಾ ಹಳೆಯ ಹಾಗೂ ಬಳಸಿದ ವಾಹನಗಳ ಮಾರಾಟದಲ್ಲಿ ಇರುವ ಶೇ. 12ರ ಜಿಎಸ್​ಟಿ ದರವನ್ನು ಶೇ. 18ಕ್ಕೆ ಏರಿಸಬಹುದು. ಇದರಲ್ಲಿ ಎಲೆಕ್ಟ್ರಿಕ್ ವಾಹನಗಳೂ ಒಳಗೊಳ್ಳುತ್ತವೆ.
• ಶೇ. 50ರಷ್ಟು ಫ್ಲೈ ಆ್ಯಷ್ ಹೊಂದಿರುವ ಎಸಿಸಿ ಕಾಂಕ್ರೀಟ್ ಬ್ಲಾಕ್​ಗಳು ಹೆಚ್​​ಎಸ್ 6815 ಕೆಟಗರಿಗೆ ಸೇರಲಿದ್ದು, ಅವುಗಳಿಗೆ ಶೇ. 12ರಷ್ಟು ಜಿಎಸ್​ಟಿ ಇರುತ್ತದೆ.

ಇದನ್ನೂ ಓದಿ: ಸಣ್ಣ ಸಂಸ್ಥೆಗಳಿಗೆ ಸರಳೀಕೃತ ಜಿಎಸ್​ಟಿ ನೊಂದಣಿ; ಟ್ರೈನಿಂಗ್ ಪಾರ್ಟರ್ಸ್​ಗೆ ವಿನಾಯಿತಿ ಸೇರಿದಂತೆ ವಿವಿಧ ಕ್ರಮಗಳ ಘೋಷಣೆ

• ಕೃಷಿಕರು ಸರಬರಾಜು ಮಾಡುವ ಪೆಪ್ಪರ್ ಮತ್ತು ರೈಸಿನ್​ಗಳಿಗೆ ಜಿಎಸ್​ಟಿ ಇರುವುದಿಲ್ಲ.
• 25 ಕಿಲೋ ಅಥವಾ 25 ಲೀಟರ್​ಗಿಂತ ಕಡಿಮೆ ತೂಕದ ವಸ್ತುಗಳನ್ನು ಹೊಂದಿರುವ ಪ್ಯಾಕೆಟ್ ಅನ್ನು ಪ್ರೀ-ಪ್ಯಾಕೇಜ್ಡ್ ಮತ್ತು ಲೇಬಲ್ಡ್ ಎಂದು ಪರಿಗಣಿಸುವುದು.
• ಉಪ್ಪು ಮತ್ತು ಮಸಲೆಯುಕ್ತವಾದ ಮತ್ತು ತಿನ್ನಲು ಸಿದ್ಧವಾಗಿರುವ ಪಾಪ್​ಕಾರ್ನ್ ಅನ್ನು ಪ್ರೀ-ಪ್ಯಾಕೇಜಿಂಗ್ ಇಲ್ಲದೇ ಮಾರಿದರೆ ಶೇ. 5ರಷ್ಟು ಮಾತ್ರವೇ ಜಿಎಸ್​ಟಿ ಇರುತ್ತದೆ. ಪ್ರೀ-ಪ್ಯಾಕೇಜಿಂಗ್ ಆಗಿ ಅದನ್ನು ಮಾರಿದರೆ ಶೇ. 12ರಷ್ಟು ಜಿಎಸ್​ಟಿ ಇರುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ