HDFC Bank Fixed Deposits: ಫಿಕ್ಸೆಡ್​ ಡೆಪಾಸಿಟ್​ಗಳ ಮೇಲಿನ ಬಡ್ಡಿ ದರ ಪರಿಷ್ಕರಣೆ ಮಾಡಿದ ಎಚ್​ಡಿಎಫ್​ಸಿ ಬ್ಯಾಂಕ್

ಎಚ್‌ಡಿಎಫ್‌ಸಿ ಬ್ಯಾಂಕ್ (HDFC Bank) ಗ್ರಾಹಕರಿಗೆ ನಿಶ್ಚಿತ ಠೇವಣಿ (ಎಫ್‌ಡಿ) ಮೇಲೆ ನೀಡುವ ಬಡ್ಡಿದರಗಳನ್ನು ಹೆಚ್ಚಿಸಿದೆ. ರಾಷ್ಟ್ರೀಯ ಮತ್ತು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಹಣದುಬ್ಬರದ ಟ್ರೆಂಡ್​ಗಳ ಹಿನ್ನೆಲೆಯಲ್ಲಿ ಬ್ಯಾಂಕ್ ಈ ನಿರ್ಧಾರವನ್ನು ತೆಗೆದುಕೊಂಡಿರಬಹುದು. ಡಿಸೆಂಬರ್ 1ರಿಂದ ಪ್ರಾರಂಭ ಆಗುವಂತೆ ಎಫ್​.ಡಿ/ಗಳ ಮೇಲೆ ಹೆಚ್ಚಿದ ಬಡ್ಡಿದರಗಳು ಅನ್ವಯ ಆಗುತ್ತವೆ. ಎಚ್​ಡಿಎಫ್​ಸಿ ಬ್ಯಾಂಕ್ ಅನೇಕ ಅವಧಿಗಳಲ್ಲಿ ನಿಶ್ಚಿತ ಠೇವಣಿಗಳ ಮೇಲೆ 10 ಬೇಸಿಸ್​ ಪಾಯಿಂಟ್​ಗಳವರೆಗೆ ದರಗಳನ್ನು ಹೆಚ್ಚಿಸಿದೆ. ಉದಾಹರಣೆಗೆ, ಗ್ರಾಹಕರು ಈಗ 36 ತಿಂಗಳ ಮುಕ್ತಾಯದ ಅವಧಿಯೊಂದಿಗೆ ಠೇವಣಿಗಳ ಮೇಲೆ ಶೇಕಡಾ 6.10 ಬಡ್ಡಿದರವನ್ನು ಪಡೆಯುತ್ತಾರೆ. ಈ ಹಿಂದೆ, ಹೂಡಿಕೆದಾರರು ಅಂತಹ ಎಫ್‌ಡಿಗಳ ಮೇಲೆ ಶೇಕಡಾ 6.05 ಬಡ್ಡಿಯನ್ನು ಪಡೆಯುತ್ತಿದ್ದರು.

60 ತಿಂಗಳ ಅವಧಿಯ ನಿಶ್ಚಿತ ಠೇವಣಿಗಳಿಗೆ, ಹೂಡಿಕೆದಾರರು ಶೇಕಡಾ 6.5ರ ದರದಲ್ಲಿ ಬಡ್ಡಿಯನ್ನು ಸ್ವೀಕರಿಸುತ್ತಾರೆ. ಬ್ಯಾಂಕ್ ತನ್ನ ನಿಶ್ಚಿತ ಠೇವಣಿ ಗ್ರಾಹಕರಿಗೆ ಈ ಹಿಂದೆ ಶೇ 6.4ರ ಬಡ್ಡಿದರ ನೀಡುತ್ತಿತ್ತು. ಅಲ್ಲದೆ, ಖಾಸಗಿ ಬ್ಯಾಂಕ್​ನೊಂದಿಗೆ ನಿಶ್ಚಿತ ಠೇವಣಿ ಖಾತೆಗಳನ್ನು ತೆರೆಯುವ ಹಿರಿಯ ನಾಗರಿಕರಿಗೆ 25 ಬೇಸಿಸ್ ಪಾಯಿಂಟ್‌ಗಳ ಹೆಚ್ಚುವರಿ ಬಡ್ಡಿದರ ನೀಡುವುದನ್ನು ಮುಂದುವರಿಸುತ್ತದೆ. ಮತ್ತೊಂದೆಡೆ, ಐಸಿಐಸಿಐ ಬ್ಯಾಂಕ್ 7 ದಿನಗಳಿಂದ 10 ವರ್ಷಗಳವರೆಗೆ ನಿಶ್ಚಿತ ಠೇವಣಿಗಳ (ಎಫ್‌ಡಿ) ಬಡ್ಡಿದರಗಳನ್ನು ಪರಿಷ್ಕರಿಸಿದೆ. ಈ ಪರಿಷ್ಕೃತ ಬಡ್ಡಿದರಗಳು ಹೊಸ ಠೇವಣಿಗಳಿಗೆ ಮತ್ತು ಅಸ್ತಿತ್ವದಲ್ಲಿರುವ ಅವಧಿಯ ಠೇವಣಿಗಳ ನವೀಕರಣ ಎರಡಕ್ಕೂ ಅನ್ವಯಿಸುತ್ತವೆ ಎಂದು ಬ್ಯಾಂಕ್ ಹೇಳಿದೆ.

ಐಸಿಐಸಿಐ ಬ್ಯಾಂಕ್ ಕನಿಷ್ಠ ಏಳು ದಿನಗಳ ಅವಧಿಯೊಂದಿಗೆ ಎಫ್​.ಡಿ. ಹೂಡಿಕೆಗಳನ್ನು ನೀಡುತ್ತದೆ. ಖಾತೆ ತೆರೆದ ಏಳು ದಿನಗಳಿಗಿಂತ ಕಡಿಮೆ ಅವಧಿಯಲ್ಲಿ ಹಿಂಪಡೆಯಲಾದ ಠೇವಣಿಗಳ ಮೇಲೆ ಗ್ರಾಹಕರು ಯಾವುದೇ ಬಡ್ಡಿಯನ್ನು ಪಡೆಯುವುದಿಲ್ಲ. ಎನ್‌ಆರ್‌ಇ ಖಾತೆಗಳಿಗೆ (ಎನ್‌ಆರ್‌ಐಗಳು ತೆರೆದಿರುವ ಎಫ್‌ಡಿ ಖಾತೆಗಳು) ಕನಿಷ್ಠ ಅವಧಿ ಒಂದು ವರ್ಷ, ಅಂದರೆ ಹೂಡಿಕೆದಾರರು 1 ವರ್ಷದ ಮೊದಲು ಮೊತ್ತವನ್ನು ಹಿಂಪಡೆದರೆ, ನಂತರ ಅವರು ತಮ್ಮ ಹೂಡಿಕೆಯ ಮೇಲೆ ಯಾವುದೇ ಬಡ್ಡಿಯನ್ನು ಪಡೆಯುವುದಿಲ್ಲ.

ಇದನ್ನೂ ಓದಿ: Personal Finance: ಹಣದ ಎಮರ್ಜೆನ್ಸಿ ಇದ್ದಲ್ಲಿ ಎಫ್​ಡಿ ಮೇಲೆ ಸಾಲ ತೆಗೆದುಕೊಳ್ಳೋದಾ ಅಥವಾ ಎಫ್​ಡಿ ಮುರಿಸೋದಾ?