ಹೊಸ ಇನ್ಕಮ್ ಟ್ಯಾಕ್ಸ್ ಕಾಯ್ದೆ; 2 ಐಟಿಆರ್ಗಳನ್ನು ಸಲ್ಲಿಸಬೇಕಾ ಎನ್ನುವ ಗೊಂದಲ ಕೆಲವರಲ್ಲಿ; ಇಲಾಖೆ ಸ್ಪಷ್ಟನೆ ಇದು
Income Tax Rules 2026: ಹೊಸ ಆದಾಯ ತೆರಿಗೆ ಕಾಯ್ದೆ ಜಾರಿಗೆ ಬಂದಿರುವುದರಿಂದ, ತೆರಿಗೆದಾರರಲ್ಲಿ ಮೂಡಿರುವ ಗೊಂದಲವೊಂದಕ್ಕೆ ಇಲಾಖೆ ಸ್ಪಷ್ಟನೆ ನೀಡಿದೆ. ‘ತೆರಿಗೆದಾರರು ಒಂದೇ ಆದಾಯಕ್ಕೆ ಎರಡು ಬಾರಿ ಐಟಿಆರ್ (ITR) ಸಲ್ಲಿಸಬೇಕಾಗಿಲ್ಲ’ ಎಂದು ಇಲಾಖೆ ಸ್ಪಷ್ಟಪಡಿಸಿದೆ. ಈ ವರ್ಷದ (2026-27) ಆದಾಯಕ್ಕೆ 2027ರ ಏಪ್ರಿಲ್ ನಂತರ ಟ್ಯಾಕ್ಸ್ ರಿಟರ್ನ್ಸ್ ಫೈಲ್ ಮಾಡುತ್ತೇವೆ. ಆಗ 2026-27 ಟ್ಯಾಕ್ಸ್ ಇಯರ್ ಅಡಿಯಲ್ಲಿ ಐಟಿಆರ್ ಫೈಲ್ ಮಾಡಬೇಕು.
ನವದೆಹಲಿ, ಜುಲೈ 2: ಕೇಂದ್ರ ಸರ್ಕಾರವು ಹಳೆಯ ‘ಆದಾಯ ತೆರಿಗೆ ಕಾಯ್ದೆ 1961’ರ ಬದಲಿಗೆ ಹೊಸ ‘ಆದಾಯ ತೆರಿಗೆ ಕಾಯ್ದೆ 2025’ ಅನ್ನು ಜಾರಿಗೆ ತಂದಿದೆ. ಈ ಹೊಸ ಕಾಯ್ದೆಯಲ್ಲಿ ಈ ಹಿಂದೆ ಇದ್ದ “ಅಸ್ಸೆಸ್‌ಮೆಂಟ್ ಇಯರ್” (Assessment Year – AY) ಮತ್ತು “ಪ್ರಿವಿಯಸ್ ಇಯರ್” (Previous Year) ಎಂಬ ಪದಗಳನ್ನು ತೆಗೆದುಹಾಕಿ, ಅದರ ಬದಲಿಗೆ ಕೇವಲ “ಟ್ಯಾಕ್ಸ್ ಇಯರ್” (Tax Year) ಎಂಬ ಒಂದೇ ಪದವನ್ನು ಬಳಸಲು ನಿರ್ಧರಿಸಲಾಗಿದೆ. ಈ ನಿಯಮವು ಏಪ್ರಿಲ್ 1 ರಿಂದ ಜಾರಿಗೆ ಬಂದಿರುವುದರಿಂದ, ಹಲವು ತೆರಿಗೆದಾರರಲ್ಲಿ “ನಾವು ಅಸ್ಸೆಸ್‌ಮೆಂಟ್ ಇಯರ್ 2026-27 ಮತ್ತು ಟ್ಯಾಕ್ಸ್ ಇಯರ್ 2026-27 ಎರಡಕ್ಕೂ ಪ್ರತ್ಯೇಕವಾಗಿ ಐಟಿಆರ್ ಸಲ್ಲಿಸಬೇಕೇ?” ಎಂಬ ಗೊಂದಲ ಮೂಡಿರಬಹುದು. ಈ ಗೊಂದಲವನ್ನು ಪರಿಹರಿಸಿರುವ ಇಲಾಖೆ, ತೆರಿಗೆದಾರರು ಯಾವುದೇ ಕಾರಣಕ್ಕೂ ಎರಡು ಐಟಿಆರ್ ಸಲ್ಲಿಸುವ ಅಗತ್ಯವಿಲ್ಲ ಎಂದು ಹೇಳಿದೆ.
ಒಂದೇ ಒಂದು ಐಟಿಆರ್ ಸಾಕು
ನೀವು ಏಪ್ರಿಲ್ 1, 2025 ರಿಂದ ಮಾರ್ಚ್ 31, 2026 ರ ಅವಧಿಯಲ್ಲಿ (ಹಣಕಾಸು ವರ್ಷ 2025-26) ಗಳಿಸಿದ ಆದಾಯಕ್ಕೆ ಕೇವಲ ಒಂದು ಐಟಿಆರ್ ಮಾತ್ರ ಸಲ್ಲಿಸಬೇಕು. ಈ ಆದಾಯವು ಹೊಸ ಕಾಯ್ದೆ ಜಾರಿಗೆ ಬರುವ ಮುನ್ನ ಗಳಿಸಿದ್ದಾಗಿರುವುದರಿಂದ, ಇದಕ್ಕೆ ಹಳೆಯ ‘ಆದಾಯ ತೆರಿಗೆ ಕಾಯ್ದೆ 1961’ರ ನಿಯಮಗಳೇ ಅನ್ವಯಿಸುತ್ತವೆ. ಇದನ್ನು ಅಸ್ಸೆಸ್‌ಮೆಂಟ್ ಇಯರ್ (AY) 2026-27 ಅಡಿಯಲ್ಲೇ ದಾಖಲಿಸಬೇಕು.
ಇದನ್ನೂ ಓದಿ: ಕಡ್ಡಾಯ ಪಿಎಫ್ ಕಡಿತ 1,800 ರೂಗೆ ಸೀಮಿತ; ಹಣ ಹಿಂಪಡೆಯುವಿಕೆ ನಿಯಮಗಳಲ್ಲಿ ಬದಲಾವಣೆ ಗಮನಿಸಿ
“ಟ್ಯಾಕ್ಸ್ ಇಯರ್” ನಿಯಮ ಯಾವಾಗ ಅನ್ವಯವಾಗುತ್ತದೆ?
ಹೊಸ “ಟ್ಯಾಕ್ಸ್ ಇಯರ್” ನಿಯಮವು ಏಪ್ರಿಲ್ 1, 2026 ರಿಂದ ಗಳಿಸುವ ಆದಾಯಕ್ಕೆ ಮಾತ್ರ ಅನ್ವಯವಾಗುತ್ತದೆ. ಇದರ ಅಡಿಯಲ್ಲಿ ಮೊದಲ ಐಟಿಆರ್ ಅನ್ನು ಮಾರ್ಚ್ 31, 2027 ರ ನಂತರವಷ್ಟೇ ಸಲ್ಲಿಸಬೇಕಾಗುತ್ತದೆ.
ಯಾವಾಗ ಯಾವುದನ್ನು ಆಯ್ದುಕೊಳ್ಳಬೇಕು?
- 1 ಏಪ್ರಿಲ್ 2025 – 31 ಮಾರ್ಚ್ 2026 ಅವಧಿಯದ್ದಾದರೆ ಅಸ್ಸೆಸ್‌ಮೆಂಟ್ ಇಯರ್ (AY) 2026-27 ಅನ್ನು ಆಯ್ದುಕೊಳ್ಳಬೇಕು.
- 1 ಏಪ್ರಿಲ್ 2026 – 31 ಮಾರ್ಚ್ 2027 ಅವಧಿಯದ್ದಾದರೆ ಟ್ಯಾಕ್ಸ್ ಇಯರ್ (Tax Year) 2026-27 ಅನ್ನು ಆಯ್ದುಕೊಳ್ಳಬೇಕು.
ನೀವು ಪ್ರಸಕ್ತ ವರ್ಷದಲ್ಲಿ (1 ಏಪ್ರಿಲ್ 2026 ರ ನಂತರ) ಗಳಿಸುತ್ತಿರುವ ಆದಾಯಕ್ಕೆ ಪಾವತಿಸಬೇಕಾದ ಮುಂಗಡ ತೆರಿಗೆ (Advance Tax) ಜವಾಬ್ದಾರಿಗಳು ಮಾತ್ರ ಈಗಾಗಲೇ ಹೊಸ ‘ಆದಾಯ ತೆರಿಗೆ ಕಾಯ್ದೆ 2025’ ರ ಅಡಿಯಲ್ಲೇ ನಿರ್ವಹಿಸಲ್ಪಡುತ್ತಿವೆ.
ಇದನ್ನೂ ಓದಿ: mAadhaar ನಿರ್ಗಮನ, ಹೊಸ ಆಧಾರ್ ಆ್ಯಪ್ ಆಗಮನ; ನೂತನ ಆ್ಯಪ್ನಲ್ಲಿನ ವಿಶೇಷತೆಗಳೇನು?
ಸರಳವಾಗಿ ಹೇಳುವುದಾದರೆ, ಪ್ರಸಕ್ತ ಐಟಿಆರ್ ಸಲ್ಲಿಕೆ ಅವಧಿಯಲ್ಲಿ ನೀವು ಎಂದಿನಂತೆ ಕೇವಲ ಒಂದು ರಿಟರ್ನ್ (AY 2026-27) ಸಲ್ಲಿಸಿದರೆ ಸಾಕು. ಹೊಸ ಕಾನೂನಿನ ಹೆಸರು ಬದಲಾವಣೆಯಿಂದಾಗಿ ಹೆಚ್ಚುವರಿ ರಿಟರ್ನ್ ಸಲ್ಲಿಸುವ ಯಾವುದೇ ನಿಯಮವಿಲ್ಲ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ