ITR filing: ಐಟಿಆರ್ ಸಲ್ಲಿಸಿದ ನಂತರವೂ ನಿಮಗೆ ದಂಡ ವಿಧಿಸಬಹುದು; ಹೇಗೆ ಮತ್ತು ರಿಟರ್ನ್ಸ್ ಇ-ಪರಿಶೀಲನೆ ನಡೆಸುವ ಹಂತಗಳು ಇಲ್ಲಿವೆ
ತೆರಿಗೆದಾರರು ಸಲ್ಲಿಸಿದ ಐಟಿಆರ್ ಫೈಲಿಂಗ್ ಅನ್ನು ಇ-ಪರಿಶೀಲನೆ ನಡೆಸದಿದ್ದರೆ 5ಸಾವಿರ ರೂಪಾಯಿವರೆಗೆ ದಂಡ ವಿಧಿಸಲಾಗುತ್ತದೆ. ಇ-ಪರಿಶೀಲನೆಯನ್ನು ಆಧಾರ್ ಒಟಿಪಿ, ನೆಟ್ ಬ್ಯಾಂಕಿಂಗ್, ಡಿಎಸ್ಸಿ, ಬ್ಯಾಂಕ್ ಎಟಿಎಂ ಮೂಲಕ ನಡೆಸಬಹುದು.
ಹಣಕಾಸು ವರ್ಷ 2021-22 (AY 2022-23) ಗಾಗಿ ಆದಾಯ ತೆರಿಗೆ ರಿಟರ್ನ್ಸ್ ಸಲ್ಲಿಸಲು ಜುಲೈ 31 ಕೊನೆಯ ದಿನಾಂಕವಾಗಿತ್ತು. ಅದರಂತೆ ಅನೇಕ ತೆರಿಗೆದಾರರು ಡೆಡ್ಲೈನ್ಗೂ ಮುನ್ನ ತಮ್ಮ ರಿಟರ್ನ್‌ಗಳನ್ನು ಸಲ್ಲಿಸಿದ್ದಾರೆ. ತಡವಾಗಿ ಸಲ್ಲಿಸಿದ್ದರೆ ಅಂತಹವರಿಗೆ 5ಸಾವಿರ ರೂಪಾಯಿ ವರೆಗೆ ದಂಡ ವಿಧಿಸಲಾಗುತ್ತದೆ. ಇನ್ನು, ಆದಾಯ ತೆರಿಗೆ ಇಲಾಖೆಯು ಸುತ್ತೋಲೆಯೊಂದರನ್ನು ಹೊರಡಿಸಿದ್ದು, ಇದರದಲ್ಲಿ ಆದಾಯ ತೆರಿಗೆ ರಿಟರ್ನ್ಸ್ ಇ-ಪರಿಶೀಲನೆಯ ಸಮಯದ ಮಿತಿಯನ್ನು ಕಡಿಮೆ ಮಾಡಿರುವುದನ್ನು ಸ್ಪಷ್ಟವಾಗಿ ಉಲ್ಲೇಖಿಸಿದೆ. ಈ ನಿಯಮ ಆಗಸ್ಟ್ 1ರಿಂದಲೇ ಜಾರಿಗೆ ಬಂದಿದೆ. ಹಾಗಾದರೆ ಎಷ್ಟು ದಿನದ ಒಳಗಾಗಿ ನೀವು ಇ-ಪರಿಶೀಲನೆ ನಡೆಸಬಹುದು? ಇಲ್ಲಿದೆ ನೋಡಿ ಮಾಹಿತಿ.
ಕೇಂದ್ರೀಯ ನೇರ ತೆರಿಗೆಗಳ ಮಂಡಳಿಯು 2022ರ ಜುಲೈ 29 ರಂದು ಸುತ್ತೋಲೆಯನ್ನು ಬಿಡುಗಡೆ ಮಾಡಿತ್ತು. ಇದರಲ್ಲಿ ಆಗಸ್ಟ್ 1ರ ನಂತರ ಐಟಿಆರ್ ಫೈಲರ್‌ಗಳು ಪರಿಶೀಲನೆಗಾಗಿ 30 ದಿನಗಳನ್ನು ಮಾತ್ರ ಹೊಂದಿರುತ್ತಾರೆ. ನಿಗದಿತ ದಿನಾಂಕದೊಳಗೆ ರಿಟರ್ನ್ಸ್ ಸಲ್ಲಿಸದವರು ಅಥವಾ ಡೆಡ್ಲೈನ್ ಮುಕ್ತಾಯದ ನಂತರ ಸಲ್ಲಿಸಿದವರಿಗೆ 30ದಿನಗಳ ಅವಕಾಶ ಮಾತ್ರ ಇರುತ್ತದೆ. ಐಟಿಆರ್ ಫೈಲಿಂಗ್ ಡೆಡ್ಲೈನ್ ಜುಲೈ 31 ರ ಒಳಗಾಗಿ ಸಲ್ಲಿಸಿದ್ದರೆ ಅಂತಹ ತೆರಿಗೆದಾರರಿಗೆ ಇ-ಪರಿಶೀಲಿಸಲು 120 ದಿನಗಳವರೆಗೆ ಅವಕಾಶ ನೀಡಲಾಗಿದೆ.
2022–23ರ ಮೌಲ್ಯಮಾಪನ ವರ್ಷಕ್ಕೆ 5.83 ಕೋಟಿ ತೆರಿಗೆದಾರರು ಜುಲೈ 31ರ ಗಡುವಿನಂತೆ ತಮ್ಮ ಐಟಿಆರ್ ಅನ್ನು ಸಲ್ಲಿಸಿದ್ದಾರೆ. ಆದ್ದರಿಂದ ಅವರು ತಮ್ಮ ರಿಟರ್ನ್‌ಗಳನ್ನು ಇ-ಪರಿಶೀಲಿಸಲು ಅಕ್ಟೋಬರ್‌ವರೆಗೆ ಸಮಯವಕಾಶವನ್ನು ಹೊಂದಿದ್ದಾರೆ. ಆದಾಗ್ಯೂ, ತಡವಾಗಿ ರಿಟರ್ನ್ಸ್ ಸಲ್ಲಿಸುವವರಿಗೆ ಕೇವಲ ಒಂದು ತಿಂಗಳು ಮಾತ್ರ ಅವಕಾಶ ಇರುತ್ತದೆ.
30 ದಿನಗಳ ಅವಧಿ ಮುಗಿದ ನಂತರ ತೆರಿಗೆದಾರರು ಐಟಿಆರ್ ಅನ್ನು ಪರಿಶೀಲಿಸಿದರೆ ಆದಾಯ ತೆರಿಗೆ ರಿಟರ್ನ್ ಅನ್ನು ಒದಗಿಸಿದ ದಿನಾಂಕವಾಗಿ ಪರಿಶೀಲನೆಯ ದಿನಾಂಕವನ್ನು ಗಣನೆಗೆ ತೆಗೆದುಕೊಳ್ಳಲಾಗುತ್ತದೆ ಎಂದು ಸಿಬಿಡಿಟಿ ತನ್ನ ಸುತ್ತೋಲೆಯಲ್ಲಿ ಸ್ಪಷ್ಟವಾಗಿ ತಿಳಿಸಿದೆ.
ನಿಗದಿತ ಅವಧಿಯ ನಂತರ ಫಾರ್ಮ್ ITR-V ಅನ್ನು ಸಲ್ಲಿಸಿದರೆ ITR-V ಅನ್ನು ಭರ್ತಿ ಮಾಡಿದ ರಿಟರ್ನ್ ಅನ್ನು ಎಂದಿಗೂ ಸಲ್ಲಿಸಲಾಗಿಲ್ಲ ಎಂದು ಭಾವಿಸಲಾಗುತ್ತದೆ ಮತ್ತು ಮೌಲ್ಯಮಾಪಕರು ವಿದ್ಯುನ್ಮಾನವಾಗಿ ಡೇಟಾವನ್ನು ಮರುಪ್ರಸಾರ ಮಾಡಬೇಕಾಗುತ್ತದೆ. ಮಾತ್ರವಲ್ಲದೆ ಹೊಸ ಫಾರ್ಮ್ ITR -V ಅನ್ನು 30 ದಿನಗಳಲ್ಲಿ ಸಲ್ಲಿಸುವ ಮೂಲಕ ಅನುಸರಿಸಬೇಕಾಗುತ್ತದೆ. ಇದಲ್ಲದೆ, ತಡವಾಗಿ ರಿಟರ್ನ್ ಸಲ್ಲಿಸಿದ್ದಕ್ಕೆ ದಂಡವನ್ನೂ ತೆರಬೇಕಾಗುತ್ತದೆ. ಅಂದರೆ ತೆರಿಗೆದಾರರು 5,000 ರೂಪಾಯಿವರೆಗೆ ದಂಡವನ್ನು ಪಾವತಿಸಬೇಕಾಗುತ್ತದೆ ಎಂದು ಸುತ್ತೋಲೆಯಲ್ಲಿ ಸೂಚಿಸಲಾಗಿದೆ.
- www.incometax.gov.in ನಲ್ಲಿ ನಿಮ್ಮ ಇ-ಫೈಲಿಂಗ್ ಖಾತೆಗೆ ಲಾಗ್ ಇನ್ ಮಾಡಿ. ಇ-ಫೈಲ್ ಟ್ಯಾಬ್ ಅಡಿಯಲ್ಲಿ Income Tax Returns > e-Verify Return ಆಯ್ಕೆಮಾಡಿ.
- ಆಧಾರ್ ಮೂಲಕ ನಿಮ್ಮ ಐಟಿಆರ್ ಇ-ಪರಿಶೀಲನೆಗಾಗಿ, ನಿಮ್ಮ ಮೊಬೈಲ್ ಸಂಖ್ಯೆಯನ್ನು ಆಧಾರ್‌ಗೆ ಲಿಂಕ್ ಮಾಡಲಾಗಿದೆಯೇ ಎಂದು ಖಚಿತಪಡಿಸಿಕೊಳ್ಳಿ. ಅಲ್ಲದೆ, ನಿಮ್ಮ ಪ್ಯಾನ್ ಅನ್ನು ನಿಮ್ಮ ಆಧಾರ್ ಸಂಖ್ಯೆಯೊಂದಿಗೆ ಲಿಂಕ್ ಮಾಡಲಾಗಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಿ.
- ಆಧಾರ್ ಒಟಿಪಿ ಇಲ್ಲದಿದ್ದರೆ ಇ-ಪರಿಶೀಲನೆ ರಿಟರ್ನ್ ಪುಟದ ಅಡಿಯಲ್ಲಿ ‘ಆಧಾರ್‌ನೊಂದಿಗೆ ನೋಂದಾಯಿಸಲಾದ ಮೊಬೈಲ್ ಸಂಖ್ಯೆಯಲ್ಲಿ OTP ಬಳಸಿಕೊಂಡು ಇ-ಪರಿಶೀಲಿಸಲು ನಾನು ಬಯಸುತ್ತೇನೆ ಎಂಬುದನ್ನು ಆಯ್ಕೆ ಮಾಡಿ.
- ನಿಮ್ಮ ಪರದೆಯ ಮೇಲೆ ಪಾಪ್-ಅಪ್ ಕಾಣಿಸುತ್ತದೆ. ‘ನನ್ನ ಆಧಾರ್ ವಿವರಗಳನ್ನು ಮೌಲ್ಯೀಕರಿಸಲು ನಾನು ಒಪ್ಪುತ್ತೇನೆ’ ಎಂದು ಹೇಳುವ ಟಿಕ್ ಬಾಕ್ಸ್ ಅನ್ನು ನೀವು ಆಯ್ಕೆ ಮಾಡಬೇಕಾಗುತ್ತದೆ ಮತ್ತು ‘ಆಧಾರ್ OTP ರಚಿಸಿ’ ಬಟನ್ ಕ್ಲಿಕ್ ಮಾಡಿ.
- ನಿಮ್ಮ ನೋಂದಾಯಿತ ಮೊಬೈಲ್ ಸಂಖ್ಯೆಗೆ 6-ಅಂಕಿಯ OTP ಯೊಂದಿಗೆ SMS ಕಳುಹಿಸಲಾಗುತ್ತದೆ.
- OTP ಅನ್ನು ನಮೂದಿಸಿ ಮತ್ತು ‘Submit’ ಬಟನ್ ಕ್ಲಿಕ್ ಮಾಡಿ. ಯಶಸ್ವಿಯಾಗಿ ಸಲ್ಲಿಸಿದ ನಂತರ, ನಿಮ್ಮ ITR ಅನ್ನು ಪರಿಶೀಲಿಸಲಾಗುತ್ತದೆ. OTP 15 ನಿಮಿಷಗಳವರೆಗೆ ಮಾತ್ರ ಮಾನ್ಯವಾಗಿರುತ್ತದೆ.
- ಆಧಾರ್ ಒಟಿಪಿ ಈಗಾಗಲೇ ಇದ್ದರೆ ‘ಆಧಾರ್‌ನೊಂದಿಗೆ ನೋಂದಾಯಿಸಲಾದ ಮೊಬೈಲ್ ಸಂಖ್ಯೆಯಲ್ಲಿ ನಾನು ಈಗಾಗಲೇ OTP ಹೊಂದಿದ್ದೇನೆ’ ಎಂಬ ಆಯ್ಕೆಯನ್ನು ನೀವು ಆಯ್ಕೆ ಮಾಡಬಹುದು.
- ಕೆಳಗೆ OTP ನಮೂದಿಸಿ ಮತ್ತು ‘ಮುಂದುವರಿಸಿ’ ಬಟನ್ ಮೇಲೆ ಕ್ಲಿಕ್ ಮಾಡಿ. OTP ಅನ್ನು ಯಶಸ್ವಿಯಾಗಿ ಪರಿಶೀಲಿಸಿದರೆ, ಇದು ಇ-ಪರಿಶೀಲನೆ ಪ್ರಕ್ರಿಯೆಯನ್ನು ಪೂರ್ಣಗೊಳಿಸುತ್ತದೆ.
ಇವಿಸಿ ಮೂಲಕ ಇ-ಪರಿಶೀಲನೆ ಹೇಗೆ?
ನೀವು ನೆಟ್ ಬ್ಯಾಂಕಿಂಗ್ ಸೌಲಭ್ಯದ ಮೂಲಕ ಇ-ಪರಿಶೀಲನೆ ಮಾಡಲು ಬಯಸಿದರೆ ನಿಮ್ಮ ಬ್ಯಾಂಕ್ ಖಾತೆಯ ನೆಟ್ ಬ್ಯಾಂಕಿಂಗ್ ಸೌಲಭ್ಯವನ್ನು ನೀವು ಹೊಂದಿರಬೇಕು. ಹೇಗೆ ಪರಿಶೀಲನೆ ಮಾಡುವುದು? ಪರಿಶೀಲಿಸುವ ಹಂತಗಳು ಈ ಕೆಳಗಿನಂತಿವೆ:
- ‘ಇ-ವೆರಿಫೈ’ ಪುಟದಲ್ಲಿ, ನೀವು ‘ಥ್ರೂ ನೆಟ್ ಬ್ಯಾಂಕಿಂಗ್’ ಅನ್ನು ಆಯ್ಕೆ ಮಾಡಿ ಮತ್ತು ‘ಮುಂದುವರಿಸಿ’ ಬಟನ್ ಅನ್ನು ಕ್ಲಿಕ್ ಮಾಡಿ.
- ಮುಂದಿನ ಹಂತದಲ್ಲಿ, ನಿಮ್ಮ ಐಟಿಆರ್ ಪರಿಶೀಲಿಸಲು ನೀವು ಬಯಸುವ ಬ್ಯಾಂಕ್ ಅನ್ನು ನೀವು ಆಯ್ಕೆ ಮಾಡಿ ‘ಮುಂದುವರಿಸಿ’ ಬಟನ್ ಕ್ಲಿಕ್ ಮಾಡಿ.
- ಹಕ್ಕು ನಿರಾಕರಣೆ ಓದಿ ಮತ್ತು ‘ಮುಂದುವರಿಸಿ’ ಬಟನ್ ಕ್ಲಿಕ್ ಮಾಡಿ.
- ಮುಂದೆ, ನಿಮ್ಮ ಬ್ಯಾಂಕ್ ಖಾತೆಯ ನೆಟ್ ಬ್ಯಾಂಕಿಂಗ್‌ಗೆ ಲಾಗ್ ಇನ್ ಮಾಡಲು ಇದು ನಿಮ್ಮನ್ನು ಮರುನಿರ್ದೇಶಿಸುತ್ತದೆ. ನಿಮ್ಮ ಬ್ಯಾಂಕ್‌ನ ನೆಟ್ ಬ್ಯಾಂಕಿಂಗ್ ವೆಬ್‌ಸೈಟ್‌ನಿಂದ ಇ-ಫೈಲಿಂಗ್ ಖಾತೆಗೆ ಲಾಗ್ ಇನ್ ಮಾಡಲು ಸಂಬಂಧಿಸಿದ ಲಿಂಕ್ ಅನ್ನು ಕ್ಲಿಕ್ ಮಾಡಿ.
- ನಿಮ್ಮನ್ನು ಮತ್ತೆ ಇ-ಫೈಲಿಂಗ್ ಪೋರ್ಟಲ್‌ಗೆ ಮರುನಿರ್ದೇಶಿಸಲಾಗುತ್ತದೆ. ಸಂಬಂಧಿತ ಐಟಿಆರ್ ಫಾರ್ಮ್‌ಗೆ ಹೋಗಿ ಮತ್ತು ‘e-verify’ ಅನ್ನು ಕ್ಲಿಕ್ ಮಾಡಿ ಮತ್ತು ನಿಮ್ಮ ತೆರಿಗೆ ರಿಟರ್ನ್ ಅನ್ನು ಯಶಸ್ವಿಯಾಗಿ ಇ-ಪರಿಶೀಲಿಸಲಾಗುತ್ತದೆ.
ನೀವು ಬ್ಯಾಂಕ್ ಖಾತೆ ಮೂಲಕ ಇ-ಪರಿಶೀಲನೆ ಮಾಡಲು ಬಯಸಿದರೆ ಈ ಕೆಳಗಿನ ಹಂತಗಳನ್ನು ಪಾಲಿಸಿ:
- ಬ್ಯಾಂಕ್ ಖಾತೆಯ ಮೂಲಕ ಪರಿಶೀಲಿಸಲು ಮತ್ತು ಇವಿಸಿ ಅನ್ನು ರಚಿಸಲು ನೀವು ಪೂರ್ವನಿಯೋಜಿತ ಬ್ಯಾಂಕ್ ಖಾತೆಯನ್ನು ಹೊಂದಿರಬೇಕು. ಆದಾಯ ತೆರಿಗೆ ಮರುಪಾವತಿಯನ್ನು ಸ್ವೀಕರಿಸಲು ಬ್ಯಾಂಕ್ ಖಾತೆಯ ಪೂರ್ವ ದೃಢೀಕರಣವು ಅತ್ಯಗತ್ಯವಾಗಿರುತ್ತದೆ.
- ನಿಮ್ಮ ಮೊಬೈಲ್ ಸಂಖ್ಯೆ ಮತ್ತು ನಿಮ್ಮ ಪೂರ್ವಾರ್ಜಿತ ಮತ್ತು ಇವಿಸಿ ಸಕ್ರಿಯಗೊಳಿಸಿದ ಬ್ಯಾಂಕ್ ಖಾತೆಯೊಂದಿಗೆ ನೋಂದಾಯಿಸಲಾದ ಇಮೇಲ್ ಐಡಿಗೆ ಕಳುಹಿಸಲಾಗುತ್ತದೆ.
- ಸ್ವೀಕರಿಸಿದ ಇವಿಸಿ ನಮೂದಿಸಿ ‘e-verify’ ಬಟನ್ ಮೇಲೆ ಕ್ಲಿಕ್ ಮಾಡಿ.
ನೀವು ಡಿಮ್ಯಾಟ್ ಖಾತೆಯ ಮೂಲಕ ಇ-ಪರಿಶೀಲನೆ ಮಾಡಲು ಬಯಸಿದರೆ ಈ ಕೆಳಗಿನ ಹಂತಗಳನ್ನು ಪಾಲಿಸಿ:
- ಬ್ಯಾಂಕ್ ಖಾತೆಯ ಮೂಲಕ ಇ-ಪರಿಶೀಲನೆ ನಡೆಸಿದಂತೆ ಡಿಮ್ಯಾಟ್ ಖಾತೆಯ ಮೂಲಕ ಐಟಿಆರ್ ಅನ್ನು ಪರಿಶೀಲಿಸಬಹುದು.
- ವ್ಯತ್ಯಾಸವೆಂದರೆ ಇವಿಸಿ ಅನ್ನು ರಚಿಸಲಾಗುತ್ತದೆ ಮತ್ತು ನಿಮ್ಮ ಮೊಬೈಲ್ ಸಂಖ್ಯೆ ಮತ್ತು ಇಮೇಲ್ ಐಡಿಗೆ ನಿಮ್ಮ ಚಾಲ್ತಿಯಲ್ಲಿರುವ ಮತ್ತು EVC-ಸಕ್ರಿಯಗೊಳಿಸಿದ ಡಿಮ್ಯಾಟ್ ಖಾತೆಯೊಂದಿಗೆ ನೋಂದಾಯಿಸಲಾಗುತ್ತದೆ. EVC ಅನ್ನು ನಮೂದಿಸಿ ಮತ್ತು ‘e-Verify’ ಬಟನ್ ಅನ್ನು ಕ್ಲಿಕ್ ಮಾಡಿ.
ನೀವು ಬ್ಯಾಂಕ್ ಎಟಿಎಂ ಮೂಲಕ ಇ-ಪರಿಶೀಲನೆ ಮಾಡಲು ಬಯಸಿದರೆ ಈ ಕೆಳಗಿನ ಹಂತಗಳನ್ನು ಪಾಲಿಸಿ:
- ಕೆನರಾ ಬ್ಯಾಂಕ್, ಆಕ್ಸಿಸ್ ಬ್ಯಾಂಕ್, ಸೆಂಟ್ರಲ್ ಬ್ಯಾಂಕ್ ಆಫ್ ಇಂಡಿಯಾ, ಎಸ್‌ಬಿಐ, ಐಸಿಐಸಿಐ ಬ್ಯಾಂಕ್, ಐಡಿಬಿಐ ಬ್ಯಾಂಕ್ ಮತ್ತು ಕೋಟಕ್ ಮಹೀಂದ್ರಾ ಬ್ಯಾಂಕ್‌ಗಳ ಮೂಲಕ ಮಾತ್ರ ಲಭ್ಯವಿದೆ.
- ನಿಮ್ಮ ಎಟಿಎಂ ಪಿನ್ ಅನ್ನು ನಮೂದಿಸಿ ಮತ್ತು ಆದಾಯ ತೆರಿಗೆ ರಿಟರ್ನ್ ಫೈಲಿಂಗ್‌ಗಾಗಿ ‘ಇವಿಸಿ ರಚಿಸಿ’ ಆಯ್ಕೆಮಾಡಿ.
- ಇ-ಫೈಲಿಂಗ್ ಪೋರ್ಟಲ್‌ನಲ್ಲಿ ನೋಂದಾಯಿಸಲಾದ ನಿಮ್ಮ ಮೊಬೈಲ್ ಸಂಖ್ಯೆ ಮತ್ತು ಇಮೇಲ್ ಐಡಿಗೆ ಇವಿಸಿ ಕಳುಹಿಸಲಾಗುತ್ತದೆ. ಮುಖ್ಯವಾದ ಅಂಶವೆಂದರೆ ನಿಮ್ಮ ಪ್ಯಾನ್ ಅನ್ನು ಬ್ಯಾಂಕ್‌ನಲ್ಲಿ ನೋಂದಾಯಿಸಿರಬೇಕು.
- ನಿಮ್ಮ ಖಾತೆಗೆ ಲಾಗ್ ಇನ್ ಮಾಡಿ ಮತ್ತು ಇ-ಪರಿಶೀಲನೆ ಪುಟದ ಅಡಿಯಲ್ಲಿ ‘ನಾನು ಈಗಾಗಲೇ ಎಲೆಕ್ಟ್ರಾನಿಕ್ ಪರಿಶೀಲನೆ ಕೋಡ್ (EVC) ಅನ್ನು ಹೊಂದಿದ್ದೇನೆ’ ಆಯ್ಕೆಮಾಡಿ. ಈಗ ಇವಿಟಿ ಕೋಡ್ ನಮೂದಿಸಿ e-verify ಕ್ಲಿಕ್ ಮಾಡಿ.
ನೀವು ಡಿಜಿಟಲ್ ಸಿಗ್ನೇಚರ್ ಸರ್ಟಿಫಿಕೇಟ್ (DSC) ಬಳಸಿಕೊಂಡು ಇ-ಪರಿಶೀಲನೆ ಮಾಡಲು ಬಯಸಿದರೆ ಈ ಕೆಳಗಿನ ಹಂತಗಳನ್ನು ಪಾಲಿಸಿ:
- ಇ-ಪರಿಶೀಲನೆ ಪುಟದಲ್ಲಿ ‘I would like to e-verify using Digital Signature Certificate (DSC)’ ಆಯ್ಕೆ ಮಾಡಿ.
- DSCನೊಂದಿಗೆ ಪರಿಶೀಲಿಸು ಪುಟದಲ್ಲಿ ‘download emsigner utility ಕ್ಲಿಕ್ ಮಾಡಿ
- ನೀವು emsigner ಯುಟಿಲಿಟಿಯನ್ನು ಡೌನ್‌ಲೋಡ್ ಮಾಡಿ ಮತ್ತು ಇನ್‌ಸ್ಟಾಲ್ ಮಾಡಿದ ನಂತರ ಮತ್ತೊಮ್ಮೆ ಇ-ಫೈಲಿಂಗ್ ಪುಟಕ್ಕೆ ಬನ್ನಿ. ಡಿಜಿಟಲ್ ಸಿಗ್ನೇಚರ್ ಪುಟದೊಂದಿಗೆ ಪರಿಶೀಲನೆಯಲ್ಲಿ ‘ನಾನು emsigner ಯುಟಿಲಿಟಿಯನ್ನು ಡೌನ್‌ಲೋಡ್ ಮಾಡಿದ್ದೇನೆ ಮತ್ತು ಸ್ಥಾಪಿಸಿದ್ದೇನೆ’ ಆಯ್ಕೆಯನ್ನು ಆರಿಸಿ ಮತ್ತು ‘ಮುಂದುವರಿಸಿ’ ಬಟನ್ ಕ್ಲಿಕ್ ಮಾಡಿ.
- ಮುಂದಿನ ಪರದೆಯಲ್ಲಿ ‘provider’ ಮತ್ತು ‘certificate’ ಆಯ್ಕೆಮಾಡಿ, ಮತ್ತು ಪಾಸ್‌ವರ್ಡ್ ನಮೂದಿಸಿ. ಮುಂದೆ, ‘Sign’ ಬಟನ್ ಮೇಲೆ ಕ್ಲಿಕ್ ಮಾಡಿ.
- ನಿಮ್ಮ ಇಮೇಲ್ ಐಡಿ ಮತ್ತು ಇ-ಫೈಲಿಂಗ್ ಪೋರ್ಟಲ್‌ನಲ್ಲಿ ನೋಂದಾಯಿಸಲಾದ ಮೊಬೈಲ್ ಸಂಖ್ಯೆಗೆ ಇ-ಪರಿಶೀಲನೆ ಪೂರ್ಣಗೊಂಡಿರುವುದನ್ನು ದೃಢೀಕರಿಸುವ ಸಂದೇಶವನ್ನು ನೀವು ಸ್ವೀಕರಿಸುತ್ತೀರಿ.
ಮತ್ತಷ್ಟು ವಾಣಿಜ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 1:30 pm, Fri, 12 August 22