ಚೀನೀ ಟೆಕ್ಕಿಗಳಿಗೆ ಮಣೆಹಾಕಲು ಭಾರತ ಸಜ್ಜು; ಚೀನೀಯರ ಆಗಮನದಿಂದ ಏನು ಪರಿಣಾಮ? ಇಲ್ಲಿದೆ ಡೀಟೇಲ್ಸ್

ನವದೆಹಲಿ, ಜೂನ್ 17: ಪಿಎಲ್​ಐ ಸ್ಕೀಮ್ ಮೂಲಕ ಬೆಳವಣಿಗೆ ಹೊಂದುತ್ತಿರುವ ಭಾರತದ ತಯಾರಕಾ ವಲಯಕ್ಕೆ (manufacturing industry) ಈಗ ಪ್ರಮುಖ ತೊಡಕಾಗಿರುವುದು ನುರಿತ ತಂತ್ರಜ್ಞರ (tech workers) ಕೊರತೆ. ಕೆಲ ನಿರ್ದಿಷ್ಟ ಉತ್ಪನ್ನಗಳ ತಯಾರಿಕೆಯಲ್ಲಿ ಬಳಕೆಯಾಗುವ ಯಂತ್ರಗಳ ಅಳವಡಿಸುವಿಕೆ, ದುರಸ್ತಿ ಇತ್ಯಾದಿಯಲ್ಲಿ ಭಾರತದಲ್ಲಿ ತಜ್ಞ ಕಾರ್ಮಿಕರ ಕೊರತೆ ಇದೆ ಎನ್ನಲಾಗುತ್ತಿದೆ. ಚೀನಾದಿಂದ ಆಮದು ಮಾಡಿಕೊಳ್ಳುವ ಈ ಯಂತ್ರೋಪಕರಣಗಳ ನಿರ್ವಹಣೆ ಕಷ್ಟಸಾಧ್ಯವಾಗಿದೆ. ಚೀನಾದಿಂದಲೇ ಟೆಕ್ಕಿಗಳು ಬರಬೇಕಾಗುತ್ತದೆ. ಹಾಗೆ ಬಂದು ಹೋಗಲು ವೀಸಾ ಸಮಸ್ಯೆ ಎದುರಾಗಿದೆ. 2020ರಲ್ಲಿ ನಡೆದ ಗಾಲ್ವನ್ ಸಂಘರ್ಷ ಘಟನೆ ಬಳಿಕ ಚೀನಾ ಮತ್ತು ಭಾರತದ ಸಂಬಂಧ ಅಷ್ಟಕಷ್ಟೆ ಎನ್ನುವಂತಾಗಿದೆ. ಚೀನೀ ನಾಗರಿಕರಿಗೆ ಭಾರತಕ್ಕೆ ಬರಲು ಅಷ್ಟು ಸುಲಭಕ್ಕೆ ವೀಸಾ ಸಿಗುವುದಿಲ್ಲ. ಇದು ಈಗ ಭಾರತದ ಮ್ಯಾನುಫ್ಯಾಕ್ಚರಿಂಗ್ ವಲಯಕ್ಕೆ ತುಸು ಸಮಸ್ಯೆಯಾಗಿದೆ. ಇದೀಗ ಸರ್ಕಾರವು ಚೀನೀ ನಾಗರಿಕರಿಗೆ ಭಾರತಕ್ಕೆ ಬರಲು ಅಗತ್ಯ ಇರುವ ವೀಸಾವನ್ನು ಕೊಡುವ ವ್ಯವಸ್ಥೆಯಲ್ಲಿ ಬದಲಾವಣೆ ತರಲು ಯೋಜಿಸುತ್ತಿದೆ. ಇದರಿಂದ ಚೀನೀಯರಿಗೆ ಬೇಗ ವೀಸಾ ಸಿಗಬಹುದು.

ಚೀನೀ ಕಾರ್ಮಿಕರು ಯಾಕೆ ಬೇಕು?

ಭಾರತದ ಎಲೆಕ್ಟ್ರಾನಿಕ್ಸ್ ಉದ್ಯಮ ಚೀನಾದಿಂದ ಹೆಚ್ಚು ಆಮದು ಮಾಡಿಕೊಳ್ಳುತ್ತದೆ. ಚೀನಾ, ತೈವಾನ್ ದೇಶಗಳು ಎಲೆಕ್ಟ್ರಾನಿಕ್ಸ್ ವಲಯದಲ್ಲಿ ಜಾಗತಿಕವಾಗಿ ಮುಂಚೂಣಿಯಲ್ಲಿವೆ. ವಿವಿಧ ಎಲೆಕ್ಟ್ರಾನಿಕ್ಸ್ ಬಿಡಿಭಾಗಗಳು ಹೆಚ್ಚಾಗಿ ಚೀನಾದಲ್ಲಿ ತಯಾರಾಗುತ್ತವೆ. ಭಾರತ ಈಗ ಎಲೆಕ್ಟ್ರಾನಿಕ್ಸ್ ತಯಾರಿಕೆ ಕ್ಷೇತ್ರದಲ್ಲಿ ಸ್ವಾವಂಬನೆ ಸಾಧಿಸಲು ಹೊರಟಿದೆಯಾದರೂ ಹೆಚ್ಚಿನ ಬಿಡಿಭಾಗಗಳು, ಪರಿಕರಗಳನ್ನು ಚೀನಾದಿಂದ ಆಮದು ಮಾಡಿಕೊಳ್ಳುವುದು ಅನಿವಾರ್ಯವಾಗಿದೆ.

ಇದನ್ನೂ ಓದಿ: ಚೀನಾ ಬೆಳವಣಿಗೆಗೆ ಸಹಾಯವಾಗಿದ್ದ ಮೂರಂಶಗಳು ಭಾರತಕ್ಕೆ ತೊಡಕಾಗಿವೆ: ಸಿಇಎ ಅನಂತನಾಗೇಶ್ವರನ್

ಈ ಬಿಡಿಭಾಗಗಳನ್ನು ಭಾರತದಲ್ಲೇ ತಯಾರಿಸುವ ಕೆಲಸ ಆಗುತ್ತಿದೆ. ಅದಕ್ಕೆ ಬೇಕಾದ ಯಂತ್ರೋಪಕರಣಗಳನ್ನು ಚೀನಾದಿಂದ ತರಿಸಲಾಗಿದೆಯಾದರೂ ಅದನ್ನು ನಿರ್ವಹಿಸಲು ಚೀನೀ ತಂತ್ರಜ್ಞರೇ ಬೇಕಾಗುತ್ತದೆ. ಅವರು ಬಂದು ಸ್ಥಳೀಯರಿಗೆ ಈ ಯಂತ್ರೋಪಕರಣ ಬಗ್ಗೆ ತರಬೇತಿ ನೀಡಬೇಕಾಗುತ್ತದೆ. ಅಥವಾ ಯಂತ್ರೋಪಕರಣಗಳ ಸರ್ವಿಸಿಂಗ್, ದುರಸ್ತಿ ಇತ್ಯಾದಿ ಮಾಡಬೇಕಾಗುತ್ತದೆ. ಅದನ್ನು ಮಾಡಲು ಅಲ್ಲಿಂದ ಭಾರತಕ್ಕೆ ಅವರು ಬರಲು ವೀಸಾ ಅಡ್ಡಿಯಾಗುತ್ತಿದೆ.

ಒಂದು ಅಂದಾಜು ಪ್ರಕಾರ 2020ರಲ್ಲಿ ಚೀನಾ ಜೊತೆ ಘರ್ಷಣೆ ಆದಾಗಿನಿಂದ ಭಾರತದ ಎಲೆಕ್ಟ್ರಾನಿಕ್ಸ್ ಉದ್ಯಮಕ್ಕೆ 15 ಬಿಲಿಯನ್ ಡಾಲರ್ ಉತ್ಪಾದನಾ ನಷ್ಟ ಆಗಿದೆ. ಒಂದು ಲಕ್ಷ ಉದ್ಯೋಗ ನಷ್ಟ ಆಗಿದೆ ಎಂದು ಹೇಳಲಾಗುತ್ತಿದೆ.

ಇದನ್ನೂ ಓದಿ: ಅಮೆರಿಕ-ಸೌದಿ ಮಧ್ಯೆ ಇನ್ಮುಂದೆ ಇರಲ್ಲ ಪೆಟ್ರೋಡಾಲರ್; ಚೀನಾ ಕಡೆ ವಾಲುತ್ತಿದೆಯಾ ಗ್ಲೋಬಲ್ ಪವರ್?

ಒಂದು ವರದಿ ಪ್ರಕಾರ ಭಾರತಕ್ಕೆ ಬರಲು ಚೀನೀ ತಂತ್ರಜ್ಞರು ಸಲ್ಲಿಸಿರುವ ವೀಸಾ ಅರ್ಜಿಗಳ ಪೈಕಿ ಸುಮಾರು ನಾಲ್ಕರಿಂದ ಐದು ಸಾವಿರದಷ್ಟು ವೀಸಾ ಅರ್ಜಿಗಳು ಸರ್ಕಾರದ ಅನುಮೋದನೆಗೆ ಕಾಯುತ್ತಿವೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ