Indus: ಆಂಡ್ರಾಯ್ಡ್ ಮಾರುಕಟ್ಟೆಗೆ ಭಾರತದ್ದೇ ಇಂಡಸ್ ಆ್ಯಪ್ಸ್ಟೋರ್ ಲಗ್ಗೆ; ದೇಶೀಯ ಮೊಬೈಲ್ ಬ್ರ್ಯಾಂಡ್ ಅಭಿವೃದ್ಧಿಗೆ ಸರ್ಕಾರ ಆಸಕ್ತಿ
PhonePe Releases Indus Appstore: ಗೂಗಲ್ನ ಪ್ಲೇಸ್ಟೋರ್ಗೆ ಸ್ಪರ್ಧೆ ಒಡ್ಡಬಲ್ಲಂತಹ ಮತ್ತು ದೇಶೀಯವಾಗಿ ನಿರ್ಮಿತವಾದ ಇಂಡಸ್ ಆ್ಯಪ್ಸ್ಟೋರ್ ಅನ್ನು ಫೋನ್ಪೆ ಅನಾವರಣಗೊಳಿಸಿದೆ. 2025ರ ಏಪ್ರಿಲ್ 1ರವರೆಗೂ ಈ ಪ್ಲೇಸ್ಟೋರ್ನಲ್ಲಿ ಆ್ಯಪ್ ಲಿಸ್ಟಿಂಗ್ಗೆ ಯಾವುದೇ ಶುಲ್ಕ ನೀಡುವಂತಿಲ್ಲ. ಸ್ಯಾಮ್ಸುಂಗ್, ಆ್ಯಪಲ್ ಇತ್ಯಾದಿಯಂತೆ ಭಾರತದ್ದೇ ಒಂದು ಮೊಬೈಲ್ ಫೋನ್ ಬ್ರ್ಯಾಂಡ್ ಅನ್ನು ಸ್ಥಾಪಿಸಲು ಸರ್ಕಾರ ಆಸಕ್ತಿ ತೋರಿದೆ.
Updated on: Feb 22, 2024 | 6:14 PM
ನವದೆಹಲಿ, ಫೆಬ್ರುವರಿ 22: ಗೂಗಲ್ನ ಪ್ಲೇ ಸ್ಟೋರ್ ಮತ್ತು ಆ್ಯಪಲ್ನ ಆಪ್ಸ್ಟೋರ್ ಪ್ರಾಬಲ್ಯ ಇರುವ ಮೊಬೈಲ್ ಆ್ಯಪ್ಗಳ ಮಾರುಕಟ್ಟೆಸ್ಥಳಕ್ಕೆ ಈಗ ಇಂಡಸ್ ಆ್ಯಪ್ಸ್ಟೋರ್ (Indus Appstore) ಲಗ್ಗೆ ಇಟ್ಟಿದೆ. ಭಾರತದ ನಂಬರ್ ಒನ್ ಯುಪಿಐ ಆ್ಯಪ್ ಎನಿಸಿರುವ ಫೋನ್ಪೇ (PhonePe) ಇದೀಗ ಇಂಡಸ್ ಆ್ಯಪ್ಸ್ಟೋರ್ ಅನ್ನು ಅನಾವರಣಗೊಳಿಸಿದೆ. ಆಂಡ್ರಾಯ್ಡ್ ಆ್ಯಪ್ಗಳಿಗೆ ಪ್ಲಾಟ್ಫಾರ್ಮ್ ಆಗಿರುವ ಇಂಡಸ್ ಆ್ಯಪ್ಸ್ಟೋರ್ ಅನ್ನು ಸಂಪೂರ್ಣ ದೇಶೀಯವಾಗಿಯೇ ನಿರ್ಮಿಸಲಾಗಿದೆ. ಭಾರತೀಯ ಗ್ರಾಹಕರನ್ನು ಗಮನದಲ್ಲಿಟ್ಟುಕೊಂಡು ರಚಿಸಲಾಗಿರುವ ಈ ಆ್ಯಪ್ ಸ್ಟೋರ್ನಲ್ಲಿ 12 ಭಾರತೀಯ ಭಾಷೆಗಳಲ್ಲಿ 2,00,000ಕ್ಕೂ ಹೆಚ್ಚು ಆ್ಯಪ್ ಮತ್ತು ಗೇಮ್ಗಳಿವೆ.
ಈ ಮಾರುಕಟ್ಟೆಯಲ್ಲಿ ಆರಂಭಿಕ ಹೆಜ್ಜೆಯನ್ನು ಎಚ್ಚರಿಕೆಯಿಂದ ಇಡಲಾಗಿದೆ. ಆ್ಯಪ್ ಡೆವಲಪರುಗಳು ಈ ಸ್ಟೋರ್ನಲ್ಲಿ ತಮ್ಮ ಆ್ಯಪ್ಗಳನ್ನು ಲಿಸ್ಟ್ ಮಾಡಲು ಯಾವುದೇ ಶುಲ್ಕ ಕಟ್ಟುವ ಅವಶ್ಯಕತೆ ಇಲ್ಲ. ಈ ವಿನಾಯಿತಿ ಒಂದು ವರ್ಷ ಇರುತ್ತದೆ. 2025ರ ಏಪ್ರಿಲ್ 1ರವರೆಗೂ ಲಿಸ್ಟಿಂಗ್ ಉಚಿತವಾಗಿರುತ್ತದೆ. ಹಾಗೆಯೇ, ಥರ್ಡ್ ಪಾರ್ಟಿ ಪಾವತಿ ಅವಕಾಶ ಕೊಡಲಾಗುತ್ತದೆ.
ಇದನ್ನೂ ಓದಿ: ನಲವತ್ತಕ್ಕೂ ಹೆಚ್ಚು ಕಂಪನಿಗಳ ಒಡೆಯರಾಗಿದ್ದಾರೆ ಫ್ಲಿಪ್ಕಾರ್ಟ್ನ ಮಾಜಿ ಉದ್ಯೋಗಿಗಳು
ಭಾರತದ್ದೇ ಸ್ವಂತ ಮೊಬೈಲ್ ಫೋನ್ ಬ್ರ್ಯಾಂಡ್ಗೆ ಸರ್ಕಾರದ ಚಿಂತನೆ
ಭಾರತದಲ್ಲಿ ಈಗ ಸಾಕಷ್ಟು ಮೊಬೈಲ್ ಫೋನ್ಗಳ ಉತ್ಪಾದನೆ ಕಾರ್ಯ ನಡೆಯುತ್ತಿದೆ. ಬಹಳಷ್ಟು ಬಿಡಿಭಾಗಗಳೂ ಕೂಡ ಭಾರತದಲ್ಲಿ ಈಗ ತಯಾರಾಗುತ್ತಿವೆ. ಈ ಯಶಸ್ಸಿನ ಉಮೇದಿನಲ್ಲಿ ಭಾರತದ್ದೇ ಮೊಬೈಲ್ ಫೋನ್ ಬ್ರ್ಯಾಂಡ್ ಅಭಿವೃದ್ಧಿಪಡಿಸಲು ಸರ್ಕಾರ ಆಸಕ್ತಿ ತೋರಿದೆ. ಫೋನ್ಪೇ ವತಿಯಿಂದ ಇಂಡಸ್ ಆ್ಯಪ್ಸ್ಟೋರ್ನ ಬಿಡುಗಡೆ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದ ಕೇಂದ್ರ ಐಟಿ ಮತ್ತು ಎಲೆಕ್ಟ್ರಾನಿಕ್ಸ್ ಸಚಿವ ಅಶ್ವಿನಿ ವೈಷ್ಣವ್ ಅವರು ದೇಶೀಯ ಮೊಬೈಲ್ ಬ್ರ್ಯಾಂಡ್ ತಯಾರಿಸುವ ಸುಳಿವು ನೀಡಿದ್ದಾರೆ.
‘ಭಾರತೀಯ ಮೊಬೈಲ್ ಫೋನ್ ಬ್ರ್ಯಾಂಡ್ ಅನ್ನು ಅಭಿವೃದ್ಧಿಪಡಿಸುವ ನಿಟ್ಟಿನಲ್ಲಿ ಕೆಲಸ ಮಾಡುತ್ತೇವೆ. ಈ ದೇಶದಲ್ಲಿ ಸಮಗ್ರ ಮೊಬೈಲ್ ಇಕೋಸಿಸ್ಟಂ ನಿರ್ಮಿಸುವುದು ನಮ್ಮ ಗುರಿ. ದೊಡ್ಡ ಮಟ್ಟದಲ್ಲಿ ಮೊಬೈಲ್ ತಯಾರಿಕೆಯಲ್ಲಿ ನಮಗೆ ಸಿಕ್ಕಿರುವ ಆರಂಭಿಕ ಯಶಸ್ಸಿನಿಂದಾಗಿ ಉದ್ಯಮದ ಆತ್ಮವಿಶ್ವಾಸ ಹೆಚ್ಚಾಗಿದೆ. ಈ ಮೊಬೈಲ್ ಉತ್ಪಾದನೆಯ ವ್ಯವಸ್ಥೆಯಲ್ಲಿರುವ ಪಾಲುದಾರರು ಭಾರತಕ್ಕೆ ಬರಲು ಬಯಸಿದ್ದಾರೆ. ಮುಂದಿನ ಐದು ವರ್ಷದಲ್ಲಿ ಈ ಪ್ರಯಾಣ ಪೂರ್ಣಗೊಳ್ಳುತ್ತದೆ,’ ಎಂದು ಸಚಿವ ಎ ವೈಷ್ಣವ್ ಹೇಳಿದ್ದಾರೆ.
ಇದನ್ನೂ ಓದಿ: ಬೈಜುಸ್ ಸಿಇಒಗೆ ಲುಕ್ ಔಟ್ ಸರ್ಕುಲಾರ್ ನೋಟೀಸ್ ಹೊರಡಿಸಲು ಇಡಿ ಯತ್ನ
ಇದೇ ವೇಳೆ, ಬಹಳ ಶೀಘ್ರದಲ್ಲೇ ಎರಡರಿಂದ ಮೂರು ಸೆಮಿಕಂಡಕ್ಟರ್ ಚಿಪ್ ಘಟಕಗಳಿಗೆ ಸರ್ಕಾರ ಅನುಮೋದನೆ ಕೊಡಲಿದೆ. ಮುಂದಿನ ಐದು ವರ್ಷದಲ್ಲಿ ಮೂರ್ನಾಲ್ಕು ಉಚ್ಚ ಗುಣಮಟ್ಟದ ಬೃಹತ್ ಫ್ಯಾಬ್ರಿಕೇಶನ್ ಯೂನಿಟ್ಗಳನ್ನು ಸ್ಥಾಪಿಸಲು ಉದ್ದೇಶಿಸಿದೆ. ಒಂದಾದರೂ ಉತ್ಪನ್ನ ಕ್ಷೇತ್ರದಲ್ಲಿ ಭಾರತ ಮುಂಚೂಣಿಗೆ ಬರಲು ಬಯಸಿದೆ ಎಂದು ಕೇಂದ್ರ ಎಲೆಕ್ಟ್ರಾನಿಕ್ಸ್ ಸಚಿವರು ವಿವರಿಸಿದ್ಧಾರೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
