India Foreign Exchange Reserve: ಭಾರತದ ವಿದೇಶೀ ವಿನಿಮಯ ಮೀಸಲು 9.646 ಶತಕೋಟಿ ಯುಎಸ್ಡಿ ಕುಸಿತ
ಭಾರತದ ವಿದೇಶೀ ವಿನಿಮಯ ಮೀಸಲು 9.646 ಬಿಲಿಯನ್ ಯುಎಸ್ಡಿ ಕಡಿಮೆಯಾಗಿ 622.75 ಬಿಲಿಯನ್ ಯುಎಸ್ಡಿ ತಲುಪಿದೆ. ಈ ಬಗ್ಗೆ ಇನ್ನಷ್ಟು ವಿವರಣೆ ಇಲ್ಲಿದೆ.
Updated on: Mar 18, 2022 | 8:46 PM
ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದ (Reserve Bank Of India) ಇತ್ತೀಚಿನ ಮಾಹಿತಿ ಪ್ರಕಾರ, ಮಾರ್ಚ್ 11, 2022ಕ್ಕೆ ಕೊನೆಗೊಂಡ ವಾರದಲ್ಲಿ ಭಾರತದ ವಿದೇಶೀ ವಿನಿಮಯ ಮೀಸಲು (Foreign Exchange Reserve) 9.646 ಶತಕೋಟಿ ಯುಎಸ್ಡಿಯಿಂದ 622.275 ಶತಕೋಟಿ ಯುಎಸ್ಡಿಗೆ ಕುಸಿತ ಕಂಡಿದೆ. ಮಾರ್ಚ್ 4ಕ್ಕೆ ಕೊನೆಗೊಂಡ ಹಿಂದಿನ ವಾರದಲ್ಲಿ ಮೀಸಲು ಯುಎಸ್ಡಿ 394 ಮಿಲಿಯನ್ ಏರಿಕೆಯಾಗಿ, ಯುಎಸ್ಡಿ 631.92 ಶತಕೋಟಿಗೆ ತಲುಪಿತ್ತು. ಸೆಪ್ಟೆಂಬರ್ 3, 2021ಕ್ಕೆ ಕೊನೆಗೊಂಡ ವಾರದಲ್ಲಿ ಇದು ಯುಎಸ್ಡಿ 642.453 ಶತಕೋಟಿ ತಲುಪಿ, ಜೀವಮಾನದ ಗರಿಷ್ಠ ಮಟ್ಟವನ್ನು ಮುಟ್ಟಿತು. ವರದಿಯ ವಾರದಲ್ಲಿ, ಒಟ್ಟಾರೆ ಮೀಸಲುಗಳ ಪ್ರಮುಖ ಅಂಶವಾದ ವಿದೇಶೀ ಕರೆನ್ಸಿ ಆಸ್ತಿಗಳ (ಎಫ್ಸಿಎ) ಕುಸಿತದಿಂದಾಗಿ ಮೀಸಲು ಪ್ರಮಾಣವು ಕುಸಿದಿದೆ ಎಂದು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (ಆರ್ಬಿಐ) ಶುಕ್ರವಾರ ಬಿಡುಗಡೆ ಮಾಡಿದ ಸಾಪ್ತಾಹಿಕ ಅಂಕಿ-ಅಂಶಗಳು ತೋರಿಸಿವೆ.
ಮಾರ್ಚ್ 11ಕ್ಕೆ ಕೊನೆಗೊಂಡ ವಾರದಲ್ಲಿ ಎಫ್ಸಿಎ ಯುಎಸ್ಡಿ 11.108 ಶತಕೋಟಿ ಕುಸಿದು, ಯುಎಸ್ಡಿ 554.359 ಶತಕೋಟಿಗೆ ಇಳಿದಿದೆ. ಡಾಲರ್ ಪರಿಭಾಷೆಯಲ್ಲಿ ತಿಳಿಸುವುದಾದರೆ, ವಿದೇಶಿ ಕರೆನ್ಸಿ ಸ್ವತ್ತುಗಳು ವಿದೇಶಿ ವಿನಿಮಯ ಮೀಸಲುಗಳಲ್ಲಿ ಹೊಂದಿರುವ ಯುರೋ, ಪೌಂಡ್ ಮತ್ತು ಯೆನ್ನಂತಹ ಅಮೆರಿಕದ್ದಲ್ಲದ ಘಟಕಗಳ ಹೆಚ್ಚಳ ಅಥವಾ ಸವಕಳಿಯ ಪರಿಣಾಮವನ್ನು ಒಳಗೊಂಡಿದೆ.
ವರದಿಯ ವಾರದಲ್ಲಿ ಚಿನ್ನದ ಸಂಗ್ರಹವು ಯುಎಸ್ಡಿ 1.522 ಶತಕೋಟಿ ಜಾಸ್ತಿಯಾಗಿ, ಯುಎಸ್ಡಿ 43.842 ಶತಕೋಟಿಗೆ ಏರಿದೆ ಎಂದು ಅಂಕಿಅಂಶಗಳು ತೋರಿಸಿವೆ. ಅಂತಾರಾಷ್ಟ್ರೀಯ ಹಣಕಾಸು ನಿಧಿಯ (IMF) ವಿಶೇಷ ಡ್ರಾಯಿಂಗ್ ಹಕ್ಕುಗಳು (SDRs) ಯುಎಸ್ಡಿ 53 ದಶಲಕ್ಷ ಇಳಿಕೆಯಿಂದ ಯುಎಸ್ಡಿ 18.928 ಶತಕೋಟಿಗೆ ಇಳಿದಿದೆ ಎಂದು ಆರ್ಬಿಐ ಹೇಳಿದೆ. ವರದಿಯ ವಾರದಲ್ಲಿ ಐಎಂಎಫ್ನೊಂದಿಗೆ ದೇಶದ ಮೀಸಲು ಸ್ಥಾನವು ಯುಎಸ್ಡಿ 7 ದಶಲಕ್ಷ ಕುಸಿತದಿಂದ ಯುಎಸ್ಡಿ 5.146 ಶತಕೋಟಿಗೆ ಇಳಿದಿದೆ ಎಂದು ಡೇಟಾ ತೋರಿಸಿದೆ.
ಇದನ್ನೂ ಓದಿ: GDP: ದೇಶವು ಶೇಕಡಾ 15ರಷ್ಟು ಉತ್ಪಾದನೆಯನ್ನು ಶಾಶ್ವತವಾಗಿ ಕಳೆದುಕೊಂಡಿದೆ ಎಂದ ಆರ್ಬಿಐ ಡೆಪ್ಯೂಟಿ ಗವರ್ನರ್
