ಸಾರ್ವಜನಿಕರ ಷೇರುಪಾಲು ಶೇ. 10ಕ್ಕೆ ಹೆಚ್ಚಿಸಲು ಎಲ್ಐಸಿಗೆ ಸಿಕ್ಕಿತು ಮೂರು ವರ್ಷ ಹೆಚ್ಚುವರಿ ಕಾಲಾವಕಾಶ
SEBI grants additional time for LIC to achieve 10% shareholding: ದೇಶದ ಅತಿದೊಡ್ಡ ಇನ್ಷೂರೆನ್ಸ್ ಸಂಸ್ಥೆಯಾದ ಎಲ್ಐಸಿ ತನ್ನ ಸಾರ್ವಜನಿಕ ಷೇರುಪಾಲನ್ನು ಶೇ. 10ಕ್ಕೆ ಹೆಚ್ಚಿಸಿಕೊಳ್ಳಲು ಇನ್ನೂ ಮೂರು ವರ್ಷ ಹೆಚ್ಚುವರಿ ಕಾಲಾವಕಾಶ ಪಡೆದಿದೆ. 2022ರ ಮೇ ತಿಂಗಳಲ್ಲಿ ಷೇರು ಮಾರುಕಟ್ಟೆಗೆ ಪದಾರ್ಪಣೆ ಮಾಡಿದ ಎಲ್ಐಸಿ ಇದೇ ಮೇ 16ರೊಳಗೆ ತನ್ನ ಸಾರ್ವಜನಿಕ ಷೇರುಪಾಲನ್ನು ಶೇ. 3.5ರಿಂದ ಶೇ. 10ಕ್ಕೆ ಹೆಚ್ಚಿಸಬೇಕಿತ್ತು. ಇನ್ನೂ ಆಗಿಲ್ಲ. ಸೆಬಿ ಈಗ ಗಡುವು ಹೆಚ್ಚಿಸಿದೆ. 2027ರ ಮೇ 16ರೊಳಗೆ ಎಲ್ಐಸಿ ಇನ್ನೂ 41 ಕೋಟಿಗೂ ಹೆಚ್ಚು ಷೇರುಗಳನ್ನು ಮಾರಾಟ ಮಾಡಬೇಕಾಗುತ್ತದೆ.
Updated on: May 15, 2024 | 12:03 PM
ನವದೆಹಲಿ, ಮೇ 15: ಎಲ್ಐಸಿ ಷೇರುಬೆಲೆ ಇವತ್ತು ಬುಧವಾರ ಭರ್ಜರಿಯಾಗಿ ಏರುತ್ತಿದೆ. ಸಾರ್ವಜನಿಕರ ಷೇರುಪಾಲನ್ನು ಶೇ. 10ಕ್ಕೆ ಹೆಚ್ಚಿಸಲು ಎಲ್ಐಸಿಗೆ ಸೆಬಿ 3 ವರ್ಷ ಹೆಚ್ಚುವರಿ ಕಾಲಾವಕಾಶ ಕೊಟ್ಟಿದೆ. ಇದರ ಬೆನ್ನಲ್ಲೇ ದೇಶದ ಅತಿದೊಡ್ಡ ಇನ್ಷೂರೆನ್ಸ್ ಸಂಸ್ಥೆಯ ಷೇರು ಬೇಡಿಕೆ ಪಡೆದಿದೆ. ಸದ್ಯ ಎಲ್ಐಸಿಯಲ್ಲಿ ಸರ್ಕಾರದ ಪಾಲು ಶೆ. 96.5ರಷ್ಟಿದ್ದರೆ, ಸಾರ್ವಜನಿಕರ ಷೇರುಪಾಲು (public shareholding) ಶೇ. 3.5ರಷ್ಟಿದೆ. 1957ರ ಸೆಕ್ಯೂರಿಟೀಸ್ ಕಾಂಟ್ರಾಕ್ಟ್ಸ್ ನಿಯಮಗಳ 19(2)(ಬಿ)(4) ರೂಲ್ ಪ್ರಕಾರ (Securities contracts rules) ಪಬ್ಲಿಕ್ ಶೇರ್ಹೋಲ್ಡಿಂಗ್ ಅನ್ನು ಶೇ. 10ಕ್ಕೆ ಹೆಚ್ಚಿಸಬೇಕಿದೆ. ಲಿಸ್ಟ್ ಆದ ಎರಡು ವರ್ಷದೊಳಗೆ ಈ ಕೆಲಸ ಆಗಬೇಕು. ಎಲ್ಐಸಿ 2022ರ ಮೇ 17ರಂದು ಬಿಎಸ್ಇ ಮತ್ತು ಎನ್ಎಸ್ಇನಲ್ಲಿ ಲಿಸ್ಟ್ ಆಗಿತ್ತು. ಅದರಂತೆ 2024ರ ಮೇ 16ರೊಳಗೆ ಪಬ್ಲಿಕ್ ಶೇರ್ಹೋಲ್ಡಿಂಗ್ ಶೇ. 10 ಆಗಬೇಕಿತ್ತು. ಅದಿನ್ನೂ ಆಗಿಲ್ಲ. ಇದೀಗ 2027ರ ಮೇ 16ರವರೆಗೂ ಎಲ್ಐಸಿಗೆ ಕಾಲಾವಕಾಶ ಕೊಡಲಾಗಿದೆ.
ಎಲ್ಐಸಿ ಭಾರೀ ನಿರೀಕ್ಷೆಯಲ್ಲಿ 2024ರ ಮೇ ತಿಂಗಳಲ್ಲಿ ಐಪಿಒಗೆ ಆಗಮಿಸಿತು. 949 ರೂಗೆ ಷೇರು ಬಿಕರಿಯಾಗಿತ್ತು. ಒಟ್ಟು ಶೇ. 3.5ರಷ್ಟು ಷೇರು, ಅಂದರೆ 22.14 ಕೋಟಿ ಷೇರುಗಳು ಮಾರಾಟವಾದವು. ಆದರೆ, ಐಪಿಒ ಬಳಿಕ ಅದರ ಜಿಎಂಪಿ ಕುಸಿತ ಕಂಡಿತ್ತು. ಅಂತಿಮವಾಗಿ 867.20 ರೂಗೆ ಅದರ ಷೇರುಗಳು ಲಿಸ್ಟ್ ಆದವು. 2023ರ ನವೆಂಬರ್ ತಿಂಗಳಿಂದ ಅದರ ಷೇರಿಗೆ ಬೇಡಿಕೆ ಬಂದಿದೆ. 614 ರೂ ಇದ್ದ ಅದರ ಬೆಲೆ ಇದೀಗ 977 ರೂ ದಾಟಿದೆ. ಒಟ್ಟಾರೆ ಎರಡು ವರ್ಷದಲ್ಲಿ ಎಲ್ಐಸಿ ಷೇರುಬೆಲೆ ಶೇ 18ರಷ್ಟು ಹೆಚ್ಚಾಗಿದೆ. ಹೂಡಿಕೆದಾರರಿಗೆ ಅಷ್ಟೇನೂ ದೊಡ್ಡ ಲಾಭ ತಂದುಕೊಡದೇ ಹೋದರೂ ಮುಂದಿನ ದಿನಗಳಲ್ಲಿ ಅದರ ಷೇರುಬೆಲೆ ಗಣನೀಯವಾಗಿ ಹೆಚ್ಚಬಹುದು ಎಂದು ಹೇಳಲಾಗುತ್ತಿದೆ.
ಎಲ್ಐಸಿ ಒಟ್ಟು 632,49,97,701 (632.50) ಕೋಟಿ ಷೇರುಗಳನ್ನು ಹೊಂದಿದೆ. ಇದರಲ್ಲಿ ಸುಮಾರು 22 ಕೋಟಿಯಷ್ಟು ಷೇರುಗಳು ಸಾರ್ವಜನಿಕರಿಗೆ ಮಾರಾಟವಾಗಿವೆ. ಶೇ. 10ರಷ್ಟು ಷೇರು ಸಾರ್ವಜನಿಕರ ಪಾಲಾಗಬೇಕು ಎಂದರೆ ಇನ್ನೂ 41.11 ಕೋಟಿಗೂ ಹೆಚ್ಚು ಷೇರುಗಳನ್ನು ಎಲ್ಐಸಿ ಬಿಕರಿ ಮಾಡಬೇಕಾಗುತ್ತದೆ.
ಇದನ್ನೂ ಓದಿ: ಹೊಸ ಇಪಿಎಫ್ಒ ಆಟೊ ಸೆಟಲ್ಮೆಂಟ್ ನಿಯಮ; ಸುಲಭವಾಗಿ ಹಣ ಹಿಂಪಡೆಯಿರಿ
ಸೆಬಿ ನಿಯಮ ಪ್ರಕಾರ ಷೇರುಪೇಟೆಯಲ್ಲಿ ಲಿಸ್ಟ್ ಆಗಿರುವ ಒಂದು ಕಂಪನಿಯ ಸಾರ್ವಜನಿಕ ಷೇರುಪಾಲು ಶೇ. 25ರಷ್ಟು ಇರಬೇಕು ಎಂದಿದೆ. ಅಂದರೆ, ಮಾಲೀಕರು ಅಥವಾ ಪ್ರೊಮೋಟರ್ಸ್ ಅಲ್ಲದವರು ಶೇ. 25ರಷ್ಟು ಷೇರು ಮಾಲಕತ್ವ ಹೊಂದಿರಬೇಕು. ಇದರಲ್ಲಿ ಜನಸಾಮಾನ್ಯರಿರುವ ರೀಟೇಲ್ ಹೂಡಿಕೆದಾರರು, ಸಾಂಸ್ಥಿಕ ಹೂಡಿಕೆದಾರರು ಮೊದಲಾದವರು ಸೇರುತ್ತಾರೆ. ಐಪಿಒಗೆ ಬಂದು ಎರಡು ವರ್ಷದಲ್ಲಿ ಸಾರ್ವಜನಿಕ ಷೇರುಪಾಲು ಶೇ. 10ರಷ್ಟಾದರೂ ಇರಬೇಕು. ಬಳಿಕ ಅದನ್ನು ಹೆಚ್ಚಿಸಲು ಅವಕಾಶ ಇರುತ್ತದೆ. ಈಗ ಎಲ್ಐಸಿಗೆ ಸೆಬಿ ಹೆಚ್ಚಿನ ಕಾಲಾವಕಾಶ ಕೊಡುತ್ತಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
