ಹೊಸ ಇಪಿಎಫ್ಒ ಆಟೊ ಸೆಟಲ್ಮೆಂಟ್ ನಿಯಮ; ಸುಲಭವಾಗಿ ಹಣ ಹಿಂಪಡೆಯಿರಿ
EPFO new auto-settlement rules: ಇಪಿಎಫ್ಒ 2020ರಲ್ಲಿ ಪರಿಚಯಿಸಿದ್ದ ಪಿಎಫ್ ಆಟೊ ಮೋಡ್ ಸೆಟಲ್ಮೆಂಟ್ ಸೌಲಭ್ಯವನ್ನು ಇನ್ನಷ್ಟು ಹೆಚ್ಚಿಸಲಾಗಿದೆ. 1952ರ ಇಪಿಎಫ್ ಸ್ಕೀಮ್ನ 68ಬಿ, 68ಜೆ ಮತ್ತು 68ಕೆ ಪ್ಯಾರಾ ಅಡಿಯಲ್ಲಿ ಸಲ್ಲಿಸಲಾಗುವ ಕ್ಲೇಮ್ ಅನ್ನು ಯಾಂತ್ರಿಕವಾಗಿ ಸೆಟ್ಲ್ ಮಾಡಲಾಗುತ್ತದೆ. 50,000 ರೂವರೆಗೂ ಇದ್ದ ಇದರ ಮಿತಿಯನ್ನು ಒಂದು ಲಕ್ಷ ರೂವರೆಗೂ ಹೆಚ್ಚಿಸಲಾಗಿದೆ. ಮನೆ ಖರೀದಿ, ಮನೆ ನಿರ್ಮಾಣ, ಮದುವೆ, ಶಿಕ್ಷಣ, ಆಸ್ಪತ್ರೆ ವೆಚ್ಚ ಈ ಕಾರಣಗಳಿಗೆ ಒಂದು ಲಕ್ಷ ರೂವರೆಗೂ ಇಪಿಎಫ್ ಹಣ ಪಡೆಯುವುದು ಸುಲಭ. ಯಾವ ಅಧಿಕಾರಿಯ ಮಧ್ಯಪ್ರವೇಶ ಇಲ್ಲದೇ ಆಟೋ ಆಗಿ ಕ್ಲೇಮ್ ಸೆಟ್ಲ್ ಆಗುತ್ತದೆ.
Updated on: May 15, 2024 | 11:05 AM
ನವದೆಹಲಿ, ಮೇ 15: ಇಪಿಎಫ್ಒ ಸಂಸ್ಥೆ ತನ್ನ ಇಪಿಎಫ್ ಸದಸ್ಯರ ಅನುಕೂಲಕ್ಕಾಗಿ ಆಟೊ ಮೋಡ್ ಸೆಟಲ್ಮೆಂಟ್ ಸೌಲಭ್ಯವನ್ನು (Auto-mode Settlement facility) ಕೆಲ ವರ್ಷಗಳ ಹಿಂದೆ ಪರಿಚಯಿಸಿತ್ತು. ಇದರಲ್ಲಿ ಸುಲಭವಾಗಿ ಇಪಿಎಫ್ ಖಾತೆಯಿಂದ ಮುಂಗಡ ಹಣವನ್ನು ಹಿಂಪಡೆಯಬಹುದಾಗಿದೆ. 1952ರ ಇಪಿಎಫ್ ಸ್ಕೀಮ್ನ 68ಜೆ, 68ಕೆ ಮತ್ತು 68ಬಿ ಪ್ಯಾರಾ ಅಡಿಯಲ್ಲಿ ಸಲ್ಲಿಸಲಾಗುವ ಕ್ಲೇಮ್ಗಳನ್ನು ಸ್ವಯಂಚಾಲಿತವಾಗಿ ಸೆಟಲ್ ಮಾಡಲಾಗುತ್ತದೆ. ಅಂದರೆ ಇಪಿಎಫ್ಒನ ಅಧಿಕಾರಿಗಳ ಅನುಮೋದನೆಯ ಅಗತ್ಯ ಇರುವುದಿಲ್ಲ. ಎಲ್ಲವೂ ಯಾಂತ್ರಿಕವಾಗಿ ಪ್ರಕ್ರಿಯೆ ಮುಕ್ತಾಯವಾಗುತ್ತದೆ. ಈಗ ಇಂತಹ ಆಟೊ ಸೆಟಲ್ಮೆಂಟ್ ಸೌಲಭ್ಯದಲ್ಲಿ ಹಿಂಪಡೆಯಲಾಗುವ ಹಣದ ಮಿತಿಯನ್ನು ಎರಡು ಪಟ್ಟು ಹೆಚ್ಚಿಸಲಾಗಿದೆ. ಇಪಿಎಫ್ ಹಣಕ್ಕಾಗಿ ಸಲ್ಲಿಸಲಾದ ಕ್ಲೈಮ್ಗಳಲ್ಲಿ ಹೆಚ್ಚಿನವು ತಿರಸ್ಕೃತಗೊಳ್ಳುತ್ತಿವೆ ಎಂಬಂತಹ ವರದಿಗಳು ಬರುತ್ತಿರುವ ಹಿನ್ನೆಲೆಯಲ್ಲಿ ಈ ಬೆಳವಣಿಗೆ ಗಮನ ಸೆಳೆದಿದೆ.
ಇಪಿಎಫ್ ಸ್ಕೀಮ್ನ ಪ್ಯಾರಾ 68ಬಿ ಮತ್ತು 68ಕೆ ಏನು ಹೇಳುತ್ತೆ?
- ಪ್ಯಾರಾ 68ಬಿ ಯಲ್ಲಿ ಮನೆ ಅಥವಾ ನಿವೇಶನ ಖರೀದಿಸಲು; ಅಥವಾ ಮನೆ ಕಟ್ಟಲು ಹಣ ಹಿಂಪಡೆಯಬಹುದು.
- ಪ್ಯಾರಾ 68ಕೆ ಅಡಿಯಲ್ಲಿ ಮದುವೆ, ಉನ್ನತ ಶಿಕ್ಷಣಕ್ಕೆ ಇಪಿಎಫ್ ಅಡ್ವಾನ್ಸ್ ಹಣ ಹಿಂಪಡೆಯಬಹುದು.
- ಪ್ಯಾರಾ 68ಜೆ ಅಡಿಯಲ್ಲಿ ನಿರ್ದಿಷ್ಟ ಕಾಯಿಲೆಗಳಿಂದ ಬಳಲುತ್ತಿದ್ದು ಚಿಕಿತ್ಸೆಗೆ ಹಣ ಹಿಂಪಡೆಯಬಹುದು.
ಇದನ್ನೂ ಓದಿ: ಇಪಿಎಫ್ಒ ಹೊಸ ಆದೇಶ: ವೈದ್ಯಕೀಯ ಚಿಕಿತ್ಸೆಗೆ 1 ಲಕ್ಷ ರೂವರೆಗೆ ಪಿಎಫ್ ಹಣ ಪಡೆಯುವ ಅವಕಾಶ
ಅಡ್ವಾನ್ಸ್ ಹಿಂಪಡೆಯುವ ಹಣದ ಮಿತಿ ಎರಡು ಪಟ್ಟು ಹೆಚ್ಚಳ
1952ರ ಇಪಿಎಫ್ ಸ್ಕೀಮ್ನ ಮೇಲಿನ ಮೂರು ಪ್ಯಾರಾಗಳಾದ 68ಬಿ, 68ಜೆ ಮತ್ತು 68ಕೆ ಅಡಿಯಲ್ಲಿ ಸಲ್ಲಿಸಲಾಗುವ ಕ್ಲೇಮ್ಗಳನ್ನು ಆಟೊ ಸೆಟ್ಲ್ ಮಾಡಲಾಗುತ್ತದೆ. ಈವರೆಗೆ ಇದಕ್ಕೆ 50,000 ರೂ ಮಿತಿ ಇತ್ತು. ಈಗ ಅದನ್ನು ಒಂದು ಲಕ್ಷ ರುಪಾಯಿಗೆ ಹೆಚ್ಚಿಸಲಾಗಿದೆ. ಅಂದರೆ ಒಂದು ಲಕ್ಷ ರೂವರೆಗಿನ ಹಣಕ್ಕೆ ಕ್ಲೇಮ್ ಮಾಡಿದರೆ ಅದು ಅಧಿಕಾರಿಯ ಮಧ್ಯಪ್ರವೇಶ ಇಲ್ಲದೇ ಯಾಂತ್ರಿಕವಾಗಿ ಸೆಟ್ಲ್ ಆಗುತ್ತದೆ.
ಪ್ಯಾರಾ 68ಕೆ ಪ್ರಕಾರ ಮದುವೆ ಎಂದರೆ ಇಪಿಎಫ್ ಸದಸ್ಯರ ಮದುವೆಯೇ ಎಂದಲ್ಲ, ಕುಟುಂಬದಲ್ಲಿ ಮಕ್ಕಳು, ಸಹೋದರ, ಸಹೋದರಿಯವರ ಮದುವೆ ನಡೆಯುವುದಿದ್ದರೆ ಅದಕ್ಕೂ ಪಿಎಫ್ ಹಣ ಹಿಂಪಡೆಯಲು ಸಾಧ್ಯ.
ಇದನ್ನೂ ಓದಿ: ಇಪಿಎಫ್ ಖಾತೆ ವಿಲೀನಗೊಳಿಸಬಹುದು, ಆದರೆ ಎರಡು ಯುಎಎನ್ ಸಂಖ್ಯೆ ಸೇರಿಸಲು ಸಾಧ್ಯವಾ? ಇಲ್ಲಿದೆ ಕ್ರಮ
ಗಮನಿಸಬೇಕಾದ ಸಂಗತಿ ಎಂದರೆ, ಈ ಮೇಲಿನ ಕಾರಣಗಳಿಗೆ ನೀವು ಪಿಎಫ್ ಹಣ ಕ್ಲೇಮ್ ಮಾಡುವುದಿದ್ದರೆ ಸಂಬಂಧಿತ ದೃಢೀಕರಣ ದಾಖಲೆಗಳನ್ನು ಕೊಡಬೇಕಾಗುತ್ತದೆ. ಉದಾಹರಣೆಗೆ, ಉನ್ನತ ಶಿಕ್ಷಣಕ್ಕೆ ಹಣ ಪಡೆಯುವುದಿದ್ದರೆ ಶಿಕ್ಷಣ ಸಂಸ್ಥೆಯಿಂದ ಕೋರ್ಸ್ನ ಅಂದಾಜು ವೆಚ್ಚದ ಪ್ರಮಾಣಪತ್ರ ಪಡೆದು ಅದರ ಫೋಟೋಕಾಪಿಯನ್ನು ಅಪ್ಲೋಡ್ ಮಾಡಬೇಕಾಗುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
