Kurlon Limited: ಕರ್ನಾಟಕದ ಪ್ರತಿಸ್ಪರ್ಧಿ ಕಂಪನಿ ಕರ್ಲಾನ್ ಖರೀದಿಗೆ ಮುಂದಾದ ಶೀಲಾ ಫೋಮ್; 2000 ಕೋಟಿ ರೂ. ಡೀಲ್

ಬೆಂಗಳೂರು: ದೇಶದ ಅತಿದೊಡ್ಡ ಹಾಸಿಗೆ ತಯಾರಿಕಾ ಕಂಪನಿ ಶಿಲಾ ಫೋಮ್ (Sheela Foam) ಲಿಮಿಟೆಡ್ ಈಗ ಪ್ರತಿಸ್ಪರ್ಧಿ ಕಂಪನಿ ಕರ್ನಾಟಕ ಮೂಲದ ಕರ್ಲಾನ್ (Kurlon Limited) ಖರೀದಿಗೆ ಮುಂದಾಗಿದೆ. ಸುಮಾರು 2,000 ಕೋಟಿ ರೂ.ಗೆ ಖರೀದಿ ಮಾಡಲಿದೆ ಎಂದು ವರದಿಯಾಗಿದೆ. ಒಪ್ಪಂದ ಪೂರ್ಣಗೊಂಡಲ್ಲಿ ಹಾಸಿಗೆ ಮಾರಾಟ ಕ್ಷೇತ್ರದಲ್ಲಿ ಶೀಲಾ ಫೋಮ್ ಶೇಕಡಾ 35ರಿಂದ 40ರಷ್ಟು ಮಾರುಕಟ್ಟೆ ಪಾಲನ್ನು ತನ್ನದಾಗಿಸಿಕೊಳ್ಳಲಿದೆ ಎಂದು ಖಚಿತ ಮೂಲಗಳನ್ನು ಉಲ್ಲೇಖಿಸಿ ಮಾಧ್ಯಮವೊಂದು ವರದಿ ಮಾಡಿದೆ. ಈ ವಿಚಾರವಾಗಿ ಶೀಲಾ ಫೋಮ್ ತಕ್ಷಣಕ್ಕೆ ಪ್ರತಿಕ್ರಿಯೆ ನೀಡಿಲ್ಲ.

ಹಾಸಿಗೆ ತಯಾರಿ ಮತ್ತು ಮಾರಾಟ ಕ್ಷೇತ್ರದಲ್ಲಿ ಹೆಸರುವಾಸಿಯಾಗಿರುವ ಶೀಲಾ ಫೋಮ್ ‘ಸ್ಲೀಫ್ ವೆಲ್’ ಬ್ರ್ಯಾಂಡ್​​ನಲ್ಲಿ ಹಾಸಿಗೆ ಮಾರಾಟ ಮಾಡುತ್ತಿದೆ. ಗಾಜಿಯಾಬಾದ್ ಮೂಲದ ಈ ಕಂಪನಿ ಸದ್ಯ ಹಾಸಿಗೆ ಮಾರಾಟ ಕ್ಷೇತ್ರದಲ್ಲಿ ಶೇಕಡಾ 25ರಷ್ಟು ಮಾರುಕಟ್ಟೆ ಪಾಲು ಹೊಂದಿದೆ ಎಂದು ‘ಐಸಿಐಸಿಐ ಸೆಕ್ಯುರಿಟೀಸ್’ ತಿಳಿಸಿದೆ. ಕರ್ಲಾನ್ ಖರೀದಿ ಒಪ್ಪಂದ ಕುರಿತ ವರದಿ ಪ್ರಕಟಗೊಂಡ ಬೆನ್ನಲ್ಲೇ ಶೀಲಾ ಫೋಮ್ ಷೇರು ಮೌಲ್ಯದಲ್ಲಿ ಶೇಕಡಾ 5ರ ವೃದ್ಧಿ ದಾಖಲಾಗಿದೆ.

ಇದನ್ನೂ ಓದಿ: Budget 2023: ಕೇಂದ್ರ ಬಜೆಟ್​​ನಲ್ಲಿ ತೆರಿಗೆದಾರರು ನಿರೀಕ್ಷಿಸಬಹುದಾದ್ದು ಏನು? ಇಲ್ಲಿದೆ ವಿವರ

ಕರ್ಲಾನ್ ಅಧಿಕಾರ ಹಸ್ತಾಂತರಕ್ಕೆ ಎದುರು ನೋಡುತ್ತಿರುವುದಾಗಿ ಕಂಪನಿಯ ವ್ಯವಸ್ಥಾಪಕ ನಿರ್ದೇಶಕ ಸುಧಾಕರ್ ಪೈ ಇತ್ತೀಚೆಗೆ ಸುಳಿವು ನೀಡಿದ್ದರು. ಇದರ ಬೆನ್ನಲ್ಲೇ ಶೀಲಾ ಫೋಮ್ ಖರೀದಿ ಮಾಡಲಿದೆ ಎಂಬ ವರದಿಯಾಗಿದೆ. 2020ನೇ ಹಣಕಾಸು ವರ್ಷದಲ್ಲಿ ಕರ್ಲಾನ್ 760.9 ದಶಲಕ್ಷ ರೂಪಾಯಿ ಲಾಭ ಗಳಿಸಿತ್ತು. 2022ರಲ್ಲಿ ಲಾಭದ ಪ್ರಮಾಣ 179.7 ದಶಲಕ್ಷ ರೂಪಾಯಿಗೆ ಕುಸಿದಿದೆ. ಕರ್ನಾಟಕದಲ್ಲಿ 1962ರಲ್ಲಿ ಆರಂಭವಾಗಿದ್ದ ಕರ್ಲಾನ್ ಲಿಮಿಟೆಟಡ್ ಕರ್ಲಾನ್ ಬ್ರ್ಯಾಂಡ್​​ನಲ್ಲಿ ಹಾಸಿಗೆಗಳನ್ನು ಮಾರಾಟ ಮಾಡುತ್ತಿದೆ. ಸದ್ಯ ದೇಶದಾದ್ಯಂತ 9 ಘಟಕಗಳು ಹಾಗೂ 72 ಶಾಖೆಗಳನ್ನು ಒಳಗೊಂಡಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ