Microsoft: ಮೈಕ್ರೋಸಾಫ್ಟ್​ ಪ್ರತಿ ಸಿಬ್ಬಂದಿಗೆ 1 ಲಕ್ಷ ರೂ.ಗೂ ಹೆಚ್ಚು ಬೋನಸ್ ಘೋಷಣೆ; ಇದಕ್ಕಾಗಿ 1480 ಕೋಟಿ ರೂ. ವೆಚ್ಚ

ಕೊವಿಡ್- 19 ಕಾರಣಕ್ಕೆ ಈ ವರ್ಷ ಸಾವು- ನೋವುಗಳಿಂದ ಇಡೀ ವಿಶ್ವವೇ ನಲುಗಿದೆ. ಕಳೆದ ಹದಿನೆಂಟು ತಿಂಗಳಲ್ಲಿ ಎಲ್ಲ ಕಡೆಯೂ ಆತಂಕವೇ. ಇಂಥ ಸನ್ನಿವೇಶದಲ್ಲಿ ಮೈಕ್ರೋಸಾಫ್ಟ್​ ಕಂಪೆನಿಯು 1,500 ಯುಎಸ್​ಡಿ (ಅಂದಾಜು 1.12 ಲಕ್ಷ ರೂಪಾಯಿ) ಉಡುಗೊರೆಯನ್ನು ತನ್ನ ಎಲ್ಲ ಉದ್ಯೋಗಿಗಳಿಗಾಗಿ ಘೋಷಣೆ ಮಾಡಿದೆ ಎಂದು ಕಂಪೆನಿಯ ಆಂತರಿಕ ಸುತ್ತೋಲೆಯಿಂದ ತಿಳಿದುಬಂದಿದೆ ಎಂಬುದಾಗಿ ವರ್ಜ್ ವರದಿ ಮಾಡಿದೆ. ಆ ವರದಿಯ ಪ್ರಕಾರ, ಇದು ಒಂದು ಸಲದ ಬೋನಸ್​ ಆಗಿದ್ದು, ವಿಶಿಷ್ಟ ಹಾಗೂ ಸವಾಲಿನ ಆರ್ಥಿಕ ವರ್ಷವನ್ನು ಮೈಕ್ರೋಸಾಫ್ಟ್ ಪೂರ್ತಿ ಮಾಡಿದ ಹಿನ್ನೆಲೆಯಲ್ಲಿ ಈ ನಡೆಗೆ ಮುಂದಾಗಿದೆ. ಮೈಕ್ರೋಸಾಫ್ಟ್ ಕಂಪೆನಿಯ ಚೀಫ್ ಪೀಪಲ್ ಆಫೀಸರ್ ಕಥ್ಲೀನ್ ಹೋಗಾನ್ ಗುರುವಾರದಂದು ಎಲ್ಲ ಸಿಬ್ಬಂದಿಗೆ ಬೋನಸ್ ಘೋಷಣೆ ಮಾಡಿದ್ದಾರೆ.

ವರದಿಯ ಪ್ರಕಾರವಾಗಿ, ಅಮೆರಿಕ ಸೇರಿದಂತೆ ಅಂತರರಾಷ್ಟ್ರೀಯ ಮಟ್ಟದಲ್ಲೂ ಅರ್ಹ ಸಿಬ್ಬಂದಿಗೆ ಈ ಬೋನಸ್ ವಿತರಣೆ ಮಾಡಲಾಗುತ್ತದೆ. ಯಾರು ಕಾರ್ಪೊರೇಟ್ ಉಪಾಧ್ಯಕ್ಷರ ಹುದ್ದೆಗಿಂತ ಕೆಳಗೆ ಇರುತ್ತಾರೋ ಅಂಥವರಿಗೆ, ಅರೆಕಾಲಿಕ ಉದ್ಯೋಗಿಗಳಿಗೂ ಈ ಬೋನಸ್ ಸಿಗಲಿದೆ. ಎಲ್ಲ ಸಿಬ್ಬಂದಿಗೂ ಈ ಬೋನಸ್ ನೀಡುವುದರಿಂದ ಮೈಕ್ರೋಸಾಫ್ಟ್​ಗೆ 20 ಕೋಟಿ ಅಮೆರಿಕನ್ ಡಾಲರ್ ವೆಚ್ಚವಾಗಲಿದೆ. ಭಾರತದ ರೂಪಾಯಿ ಲೆಕ್ಕದಲ್ಲಿ 1480 ಕೋಟಿಗೂ ಹೆಚ್ಚಾಗುತ್ತದೆ. ಮೈಕ್ರೋಸಾಫ್ಟ್​ನಲ್ಲಿ 1.75 ಲಕ್ಷಕ್ಕೂ ಹೆಚ್ಚು ಸಿಬ್ಬಂದಿ ವಿಶ್ವದಾದ್ಯಂತ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಅಂದಹಾಗೆ ಮೈಕ್ರೋಸಾಫ್ಟ್ ಒಡೆತನದಲ್ಲೇ ಲಿಂಕ್ಡ್​ಇನ್, ಗಿಟ್​ಹಬ್ ಮತ್ತು ಝೆನಿಮ್ಯಾಕ್ಸ್​ ಕೂಡ ಇದೆ. ಆದರೆ ಅಲ್ಲಿನ ಸಿಬ್ಬಂದಿಗೆ ಯಾವುದೇ ಬೋನಸ್ ದೊರೆಯುತ್ತಿಲ್ಲ.

ಸಿಎನ್​ಬಿಸಿ ವರದಿ ಹೇಳುವಂತೆ, ಕೊರೊನಾ ಬಿಕ್ಕಟ್ಟಿನ ಸಂದರ್ಭದಲ್ಲಿ ತಮ್ಮ ಸಿಬ್ಬಂದಿಯನ್ನು ಸಂತೋಷವಾಗಿ ಇರಿಸಿಕೊಳ್ಳುವ ಪ್ರಯತ್ನದ ಭಾಗವಾಗಿ ಈ ರೀತಿಯ ಬೋನಸ್ ನೀಡಲಾಗುತ್ತಿದೆ. ಮತ್ತು ಈಗಲೂ ಅದೆಷ್ಟೋ ಮಂದಿ ವರ್ಕ್ ಫ್ರಮ್ ಹೋಮ್ ಮಾಡುತ್ತಿದ್ದು, ಉತ್ಸಾಹದಿಂದ ಕಾರ್ಯ ನಿರ್ವಹಿಸುವುದಕ್ಕೆ ಪ್ರೋತ್ಸಾಹ ನೀಡಿದಂತಾಗುತ್ತದೆ ಎಂದು ಹೀಗೆ ಮಾಡಲಾಗುತ್ತಿದೆ. ಕಚೇರಿಗಳು ಪುನರಾರಂಭ ಆಗುತ್ತಿದ್ದಂತೆ ಅನೇಕರು ಉದ್ಯೋಗ ತ್ಯಜಿಸುವ ಪ್ರವೃತ್ತಿ ಈಚೆಗೆ ಹೆಚ್ಚಾಗಿದೆ. ಫೇಸ್​ಬುಕ್, ಅಮೆಜಾನ್​ನಂಥ ಕಂಪೆನಿಗಳು ಸಹ ಹಣಕಾಸು ಉತ್ತೇಜನಗಳನ್ನು ಘೋಷಣೆ ಮಾಡುತ್ತಿವೆ. ಕಳೆದ ಒಂದು ವರ್ಷಗಳಲ್ಲಿ ಸಿಬ್ಬಂದಿಗೆ ಬೋನಸ್ ಮತ್ತಿತರ ರಿವಾರ್ಡ್​ಗಳನ್ನು ಘೋಷಿಸಿವೆ.

ಇದನ್ನೂ ಓದಿ: Satya Nadella: 53 ವರ್ಷದ ಸತ್ಯ ನಾಡೆಲ್ಲಾಗೆ 143 ಲಕ್ಷ ಕೋಟಿ ಮಾರುಕಟ್ಟೆ ಮೌಲ್ಯದ ಮೈಕ್ರೋಸಾಫ್ಟ್ ಕಂಪೆನಿಯ ನೇತೃತ್ವ

(Tech giant Microsoft announced one time 1500 USD bonus to all employees. Here is the details)