ಮ್ಯೂಚುವಲ್ ಫಂಡ್ ಹೂಡಿಕೆದಾರರು ನಾಮಿನಿ ಹೆಸರಿಸಲು ಡೆಡ್ಲೈನ್ ಜನವರಿ 1ಕ್ಕೆ ವಿಸ್ತರಣೆ
Mutual Fund Account Nominee Rules: ಮ್ಯೂಚುವಲ್ ಫಂಡ್ ಅಕೌಂಟ್ಗಳಿಗೆ ನಾಮಿನಿ ಹೆಸರನ್ನು ನಮೂದಿಸಬೇಕು ಇಲ್ಲ, ನಾಮಿನಿ ಹೆಸರಿಸುವುದಿಲ್ಲ ಎಂದು ಘೋಷಣೆ ಸಲ್ಲಿಸಬೇಕು ಎಂದು ಹೂಡಿಕೆದಾರರಿಗೆ ಎಸ್ಸೆಮ್ಮೆಸ್ ಅಥವಾ ಇಮೇಲ್ ಮೂಲಕ ಸಂವಹನ ಮಾಡಿ ತಿಳಿಸಬೇಕು ಎಂದು ಎಎಂಸಿ ಮತ್ತು ಆರ್ಟಿಎಗಳಿಗೆ ಸೆಬಿ ತಿಳಿಸಿದೆ. ನಾಮಿನಿ ಹೆಸರಿಸಲು ಸೆಪ್ಟೆಂಬರ್ 30ಕ್ಕೆ ಇದ್ದ ಡೆಡ್ಲೈನ್ ಅನ್ನು ಜನವರಿ 1ರವರೆಗೂ ವಿಸ್ತರಿಸಲಾಗಿದೆ.
Updated on: Sep 28, 2023 | 10:25 AM
ಬೆಂಗಳೂರು, ಸೆಪ್ಟೆಂಬರ್ 28: ಮ್ಯುಚುವಲ್ ಫಂಡ್ ಖಾತೆ ಹೊಂದಿರುವವರು ನಾಮಿನಿ ನಮೂದಿಸಲು ಸೆಪ್ಟೆಂಬರ್ 30ಕ್ಕೆ ಇದ್ದ ಡೆಡ್ಲೈನ್ ಅನ್ನು ಸೆಬಿ (SEBI- Securities and Exchange Board of India) ಜನವರಿಗೆ 1ರವರೆಗೆ ವಿಸ್ತರಿಸಿದೆ. ಜನವರಿ 1ರೊಳಗೆ ನಾಮಿನಿ ಯಾರೆಂದು ತಿಳಿಸಬೇಕು. ಅಥವಾ ನಾಮಿನಿ ಹೆಸರಿಸದೇ ಇರಲು ನಿರ್ಧರಿಸಿದವರು ಅದನ್ನು ಸ್ಪಷ್ಟಪಡಿಸುವ ಡಿಕ್ಲೆರೇಶನ್ ಫಾರ್ಮ್ ಅನ್ನು ಸಲ್ಲಿಸಬೇಕು. ಒಂದು ವೇಳೆ, ಮ್ಯುಚುವಲ್ ಫಂಡ್ ಖಾತೆದಾರರು ಈ ಕ್ರಮ ಅನುಸರಿಸದಿದ್ದರೆ ಅವರ ಫೋಲಿಯೋಗಳನ್ನು (ಹೂಡಿಕೆ) ಸ್ಥಗಿತಗೊಳಿಸಲಾಗುವುದು ಎಂದು ಷೇರು ಮಾರುಕಟ್ಟೆ ನಿಯಂತ್ರಣ ಪ್ರಾಧಿಕಾರವಾದ ಸೆಬಿ ತಿಳಿಸಿದೆ.
‘ಮಾರುಕಟ್ಟೆ ಸಹಭಾಗಿಗಳ ಅಭಿಪ್ರಾಯದ ಮೇರೆಗೆ ಫೋಲಿಯೋಗಳನ್ನು ಫ್ರೀಜ್ ಮಾಡುವ ಕ್ರಮವನ್ನು 2023ರ ಸೆಪ್ಟೆಂಬರ್ 30ರ ಬದಲು 2024ರ ಜನವರಿ 1ರಿಂದ ಜಾರಿಗೊಳಿಸಲು ನಿರ್ಧರಿಸಲಾಗಿದೆ’ ಎಂದು ಸೆಬಿ ತನ್ನ ಸುತ್ತೋಲೆಯಲ್ಲಿ ಎಚ್ಚರಿಕೆ ನೀಡಿದೆ.
ಇದನ್ನೂ ಓದಿ: ಡೀಮ್ಯಾಟ್ ಅಕೌಂಟ್ ಇಲ್ಲದೇ ಮ್ಯೂಚುವಲ್ ಫಂಡ್ನಲ್ಲಿ ಹೂಡಿಕೆ ಸಾಧ್ಯವಾ? ಫೋಲಿಯೋ ಮೂಲಕ ಇನ್ವೆಸ್ಟ್ ಮಾಡಬಹುದಾ?
ಮ್ಯುಚುವಲ್ ಫಂಡ್ಗಳನ್ನು ನಿರ್ವಹಿಸುವ ಅಸೆಟ್ ಮ್ಯಾನೇಜ್ಮೆಂಟ್ ಕಂಪನಿಗಳು (ಎಎಂಸಿ) ಮತ್ತು ಆರ್ಟಿಎಗಳು ತಮ್ಮಲ್ಲಿನ ಹೂಡಿಕೆದಾರರಿಗೆ ನಾಮಿನೇಶನ್ ವಿಚಾರವಾಗಿ ಎಚ್ಚರಿಸಬೇಕು ಎಂದೂ ಸೆಬಿ ಹೇಳಿದೆ. ಮ್ಯೂಚುವಲ್ ಫಂಡ್ ಅಕೌಂಟ್ಗಳಿಗೆ ನಾಮಿನಿ ಹೆಸರನ್ನು ನಮೂದಿಸಬೇಕು ಇಲ್ಲ, ನಾಮಿನಿ ಹೆಸರಿಸುವುದಿಲ್ಲ ಎಂದು ಘೋಷಣೆ ಸಲ್ಲಿಸಬೇಕು ಎಂದು ಹೂಡಿಕೆದಾರರಿಗೆ ಎಸ್ಸೆಮ್ಮೆಸ್ ಅಥವಾ ಇಮೇಲ್ ಮೂಲಕ ಸಂವಹನ ಮಾಡಿ ತಿಳಿಸಬೇಕು ಎಂದು ಎಎಂಸಿ ಮತ್ತು ಆರ್ಟಿಎಗಳಿಗೆ ಸೆಬಿ ತಿಳಿಸಿದೆ.
ಈ ಹಿಂದೆ ಹಲವು ಮ್ಯೂಚುವಲ್ ಫಂಡ್ಗಳು ನಾಮಿನಿ ಇಲ್ಲದೆಯೇ ಫೋಲಿಯೋ ಅಕೌಂಟ್ಗಳನ್ನು ತೆರೆದಿದ್ದವು. ಹಾಗೆಯೇ, ಜಂಟಿಯಾಗಿ ಮ್ಯುಚುವಲ್ ಫಂಡ್ ಖಾತೆ ತೆರೆದಿದ್ದವರಲ್ಲೂ ಬಹಳ ಮಂದಿ ನಾಮಿನಿ ಹೆಸರಿಸಿಲ್ಲ. ಹೀಗಾಗಿ, ಸೆಬಿ ಈಗ ನಾಮಿನಿ ವಿಚಾರವನ್ನು ಕಡ್ಡಾಯಗೊಳಿಸಿದೆ.
ಇದನ್ನೂ ಓದಿ: ರೆಕರಿಂಗ್ ಡೆಪಾಸಿಟ್, ಬಹಳ ಸರಳ ಹಾಗೂ ಸುರಕ್ಷಿತ ಸ್ಕೀಮ್; ವರ್ಷಕ್ಕೆ ಶೇ. 8ಕ್ಕಿಂತಲೂ ಹೆಚ್ಚು ಬಡ್ಡಿ ಕೊಡಬಲ್ಲುದು ಆರ್ಡಿ
ಯಾಕೆ ಬೇಕು ನಾಮಿನಿ?
ಒಂದು ಖಾತೆಗೆ ನಾಮಿನಿ ಎಂದರೆ ಆ ಖಾತೆಯ ಹಣಕ್ಕೆ ವಾರಸುದಾರರಾಗಿರುತ್ತಾರೆ. ಬ್ಯಾಂಕ್ ಖಾತೆಯಾಗಲೀ, ಎಲ್ಐಸಿಯಾಗಲೀ, ಪಿಎಫ್ ಆಗಲೀ ಯಾವುದೇ ಹಣಕಾಸು ಯೋಜನೆಯಾಗಲೀ ಅದಕ್ಕೆ ನಾಮಿನಿ ಹೆಸರಿಸಬೇಕು. ಖಾತೆದಾರರು ಅಕಾಲಿಕವಾಗಿ ಮೃತಪಟ್ಟಾಗ ಆ ಖಾತೆಯ ಹಣ ಯಾರಿಗೆ ಹೋಗಬೇಕು ಎಂಬುದನ್ನು ನಾಮಿನಿ ಹೆಸರಿಸುವ ಮೂಲಕ ಮುಂಚಿತವಾಗಿ ತಿಳಿಸಿರಬೇಕು. ಇಲ್ಲದಿದ್ದರೆ ಆ ಹಣ ಯಾರಿಗೂ ಹೋಗದೇ ಉಳಿದುಬಿಡುತ್ತದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
