ವಿಪ್ರೋದಲ್ಲಿ ಥಿಯೆರಿ ಡೆಲಾಪೋರ್ಟೆ ನಿರ್ಗಮನ; ನೂತನ ಸಿಇಒ ಶ್ರೀನಿವಾಸ್ ಪಾಲಿಯಾ ಯಾರು?
New Wipro CEO and MD Srinivas Pallia: ನಾಲ್ಕು ವರ್ಷಗಳಿಂದ ವಿಪ್ರೋ ಸಿಇಒ ಮತ್ತು ಎಂಡಿ ಆಗಿದ್ದ ಥಿಯೆರಿ ಡೆಲಾಪೋರ್ಟೆ ನಿರ್ಗಮಿಸಿದ್ದಾರೆ. ಅವರ ಸ್ಥಾನಕ್ಕೆ ಶ್ರೀನಿವಾಸ್ ಪಾಲಿಯಾ ಅವರನ್ನು ವಿಪ್ರೋ ನೇಮಕ ಮಾಡಿದೆ. ಶ್ರೀನಿವಾಸ್ ಅವರು ಬೆಂಗಳೂರಿನ ಐಐಎಸ್ಸಿಯಲ್ಲಿ ಓದಿದವರು. ಮೂರು ದಶಕಗಳಿಂದ ವಿಪ್ರೋದಲ್ಲೇ ಕೆಲಸ ಮಾಡುತ್ತಿದ್ದಾರೆ. ಹಲವು ಹಿರಿಯ ಹುದ್ದೆಗಳನ್ನು ನಿಭಾಯಿಸಿದ್ದಾರೆ. ವಿಪ್ರೋದ ಛೇರ್ಮನ್ ರಿಷದ್ ಪ್ರೇಮ್ಜಿ ಅವರಿಗೆ ರಿಪೋರ್ಟ್ ಮಾಡಲಿರುವ ನೂತನ ಸಿಇಒ ಅವರು ಅಮೆರಿಕದ ನ್ಯೂಜೆರ್ಸಿಯಲ್ಲಿರುವ ಕಚೇರಿಯಿಂದ ಕೆಲಸ ಮಾಡಲಿದ್ದಾರೆ.
Updated on:Apr 07, 2024 | 11:25 AM
ನವದೆಹಲಿ, ಏಪ್ರಿಲ್ 7: ವಿಪ್ರೋ ಸಂಸ್ಥೆಯ ಉನ್ನತ ಮಟ್ಟದಲ್ಲಿ ಮಹತ್ವದ ಬದಲಾವಣೆ ಆಗಿದೆ. ಸಿಇಒ ಮತ್ತು ಎಂಡಿ ಆಗಿದ್ದ ಥಿಯೆರಿ ಡೆಲಾಪೋರ್ಟೆ (Thierry Delaporte) ನಿರ್ಗಮಿಸಿದ್ದು, ಅವರ ಸ್ಥಾನಕ್ಕೆ ಶ್ರೀನಿವಾಸ್ ಪಾಲಿಯಾ (Srinivas Pallia) ಅವರನ್ನು ನೇಮಕ ಮಾಡಲಾಗಿದೆ. ವಿಪ್ರೋದಲ್ಲೇ ಸಾಕಷ್ಟು ವರ್ಷಗಳಿಂದ ಕೆಲಸ ಮಾಡುತ್ತಿರುವ ಶ್ರೀನಿವಾಸ್ ಅವರು ಅಮೆರಿಕದ ನ್ಯೂಜೆರ್ಸಿಯಲ್ಲಿದ್ದುಕೊಂಡು ಸಿಇಒ ಸ್ಥಾನ ನಿಭಾಯಿಸಲಿದ್ದಾರೆ. ವಿಪ್ರೋ ಛೇರ್ಮನ್ ಆಗಿರುವ ರಿಷದ್ ಪ್ರೇಮ್ಜಿ ಅವರಿಗೆ ಹೊಸ ಸಿಇಒ ರಿಪೋರ್ಟ್ ಮಾಡಲಿದ್ದಾರೆ.
ಏಪ್ರಿಲ್ 19ರಂದು ವಿಪ್ರೋದ ನಾಲ್ಕನೇ ತ್ರೈಮಾಸಿಕದ ಹಾಗೂ ಇಡೀ ಆರ್ಥಿಕ ವರ್ಷದ ಹಣಕಾಸು ವರದಿ ಬಿಡುಗಡೆ ಆಗಲಿದೆ. ಅದಕ್ಕಿಂತ ಕೆಲ ದಿನಗಳ ಮೊದಲು ಸಂಸ್ಥೆಯ ಉನ್ನತ ಮಟ್ಟದಲ್ಲಿ ಈ ಬದಲಾವಣೆ ಆಗಿದೆ.
ಐಟಿ ಸರ್ವಿಸ್ ಕಂಪನಿಯಾಗಿರುವ ವಿಪ್ರೋ ಇತ್ತೀಚಿನ ಕೆಲ ವರ್ಷಗಳಿಂದ ವಿವಿಧ ಸಮಸ್ಯೆಗಳನ್ನು ಎದುರಿಸುತ್ತಿದೆ. ಬೇರೆ ಐಟಿ ಕಂಪನಿಗಳಿಗೆ ಹೋಲಿಸಿದರೆ ವಿಪ್ರೋದ ಬಿಸಿನೆಸ್ ಕಡಿಮೆ ಆಗುತ್ತಿದೆ. ಗಾಯದ ಮೇಲೆ ಬರೆ ಹಾಕಿದಂತೆ ಹಿರಿಯ ಹುದ್ದೆ ಮಟ್ಟದಲ್ಲಿ ಸಾಕಷ್ಟು ನಿರ್ಗಮನಗಳಾಗುತ್ತಿವೆ. ಎಕ್ಸಿಕ್ಯೂಟಿವ್ ಮಟ್ಟದ ಹುದ್ದೆಗಳನ್ನು ಹೊಂದಿದವರು ಪ್ರತಿಸ್ಪರ್ಧಿ ಕಂಪನಿಗಳತ್ತ ಮುಖ ಮಾಡುತ್ತಿರುವುದು ಇತ್ತೀಚೆಗೆ ಹೆಚ್ಚಾಗಿದೆ. ಈ ವಿಚಾರದಲ್ಲಿ ಎದುರಾಳಿ ಕಂಪನಿಗಳ ವಿರುದ್ಧ ವಿಪ್ರೋ ಕೇಸ್ ದಾಖಲಿಸುವ ಮಟ್ಟಕ್ಕೆ ಇದು ಹೋಗಿದೆ.
ಇದನ್ನೂ ಓದಿ: ಭಾರತದ ಫಾರೆಕ್ಸ್ ರಿಸರ್ವ್ಸ್ 645 ಬಿಲಿಯನ್ ಡಾಲರ್ಗೆ ಏರಿಕೆ; ಸಾರ್ವಕಾಲಿಕ ಗರಿಷ್ಠ ಮಟ್ಟ
ಈಗ ಸಿಇಒ ಸ್ಥಾನದಿಂದ ಹೊರಹೋಗಿರುವ ಥಿಯೆರಿ ಡೆಲಾಪೋರ್ಟೆ ಕಳೆದ ನಾಲ್ಕು ವರ್ಷಗಳಿಂದ ಆ ಹುದ್ದೆಯಲ್ಲಿರುವವರು. ಅವರು ಬೇರೆ ಐಟಿ ಕಂಪನಿ ಸೇರುತ್ತಿಲ್ಲ. ತಮ್ಮ ವೈಯಕ್ತಿಕ ಅಭಿಲಾಷೆಗಳ ಕಡೆಗೆ ವಾಲಿದ್ದಾರೆ.
ಶ್ರೀನಿವಾಸ್ ಪಾಲಿಯಾ ಹಳೆಯ ವಿಪ್ರೋ ಹುಲಿ
ಶ್ರೀನಿವಾಸ್ ಪಾಲಿಯಾ ಎಂಜಿನಿಯರ್ ಆಗಿದ್ದು, ಬೆಂಗಳೂರಿನ ಐಐಎಸ್ಸಿಯಲ್ಲಿ ಮ್ಯಾನೇಜ್ಮೆಂಟ್ ಸ್ಟಡೀಸ್ನಲ್ಲಿ ಮಾಸ್ಟರ್ಸ್ ಮಾಡಿದ್ದಾರೆ. ಹಾರ್ವರ್ಡ್ನಲ್ಲಿ ಬಿಸಿನೆಸ್ ಉನ್ನತ ವ್ಯಾಸಂಗ ಮಾಡಿದ್ದಾರೆ.
ಇದನ್ನೂ ಓದಿ: ಮಾಲ್ಡೀವ್ಸ್ನಲ್ಲಿ ಭಾರತ ವಿರೋಧಿ ಸರ್ಕಾರ ಇದ್ದರೂ ಆ ದೇಶಕ್ಕೆ ಅವಶ್ಯಕ ವಸ್ತುಗಳ ಸರಬರಾಜು ಹೆಚ್ಚಿಸಲು ಭಾರತ ಸಮ್ಮತಿ
1992ರಲ್ಲಿ ವಿಪ್ರೋ ಸೇರಿದವರು. ಮೂರು ದಶಕಗಳ ಕಾಲದಿಂದ ವಿಪ್ರೋದಲ್ಲಿದ್ದಾರೆ. ವಿವಿಧ ಸ್ತರಗಳಿಂದ ಮೇಲೇರಿದವರು. ವಿಪ್ರೋ ಎಕ್ಸಿಕ್ಯೂಟಿವ್ ಬೋರ್ಡ್ ಸದಸ್ಯರಾಗಿರುವ ಅವರು ವಿಪ್ರೋ ಕನ್ಸೂಮರ್ ಬಿಸಿನೆಸ್ ಯೂನಿಟ್ನ ಅಧ್ಯಕ್ಷ ಸ್ಥಾನ, ವಿಪ್ರೋ ಬಿಸಿನೆಸ್ ಅಪ್ಲಿಕೇಶನ್ ಸರ್ವಿಸಸ್ನ ಗ್ಲೋಬಲ್ ಹೆಡ್ ಇತ್ಯಾದಿ ಸ್ಥಾನಗಳನ್ನು ನಿಭಾಯಿಸಿದ್ದಾರೆ. ವಿಪ್ರೋದ ಅಮೆರಿಕಾಸ್1 ವಿಭಾಗಕ್ಕೆ ಸಿಇಒ ಕೂಡ ಆಗಿದ್ದರು.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 11:23 am, Sun, 7 April 24
