ಭಾರತದ ಫಾರೆಕ್ಸ್ ರಿಸರ್ವ್ಸ್ 645 ಬಿಲಿಯನ್ ಡಾಲರ್ಗೆ ಏರಿಕೆ; ಸಾರ್ವಕಾಲಿಕ ಗರಿಷ್ಠ ಮಟ್ಟ
Forex Reserves of India: ಭಾರತದ ಫಾರೆಕ್ಸ್ ರಿಸರ್ವ್ಸ್ ಸತತ ಆರು ವಾರ ಹೆಚ್ಚಳವಾಗಿದೆ. ಆರ್ಬಿಐ ಏಪ್ರಿಲ್ 5ರಂದು ಬಿಡುಗಡೆ ಮಾಡಿದ ಮಾಹಿತಿ ಪ್ರಕಾರ ಮಾರ್ಚ್ 29ಕ್ಕೆ ಅಂತ್ಯಗೊಂಡ ವಾರದಲ್ಲಿ ಫಾರೆಕ್ಸ್ ರಿಸರ್ವ್ಸ್ ಸಂಪತ್ತು 645.583 ಬಿಲಿಯನ್ ಡಾಲರ್ಗೆ ಏರಿದೆ. ಹಿಂದಿನ ವಾರದಲ್ಲಿ 642 ಬಿಲಿಯನ್ ಡಾಲರ್ನಷ್ಟು ಫಾರೆಕ್ಸ್ ಸಂಪತ್ತು ಇದು. ಈ ಬಾರಿ 2.951 ಬಿಲಿಯನ್ ಡಾಲರ್ನಷ್ಟು ಹೆಚ್ಚಾಗಿದೆ. ಇದು ಸಾರ್ವಕಾಲಿಕ ಗರಿಷ್ಠ ಫಾರೆಕ್ಸ್ ರಿಸರ್ವ್ಸ್ ನಿಧಿಯಾಗಿದೆ.
ನವದೆಹಲಿ, ಏಪ್ರಿಲ್ 7: ಸಾರ್ವಕಾಲಿಕ ಗರಿಷ್ಠ ಮಟ್ಟದಲ್ಲಿರುವ ಭಾರತದ ವಿದೇಶೀ ವಿನಿಮಯ ಮೀಸಲು ನಿಧಿ (Forex Reserves of India) ಇನ್ನಷ್ಟು ಹೆಚ್ಚಾಗಿದೆ. ಮಾರ್ಚ್ 29ಕ್ಕೆ ಅಂತ್ಯಗೊಂಡ ವಾರದಲ್ಲಿ 2.951 ಬಿಲಿಯನ್ ಡಾಲರ್ನಷ್ಟು ಏರಿದೆ. ಭಾರತೀಯ ರಿಸರ್ವ್ ಬ್ಯಾಂಕ್ ಏಪ್ರಿಲ್ 5ರಂದು ಬಿಡುಗಡೆ ಮಾಡಿದ ದತ್ತಾಂಶದ ಪ್ರಕಾರ ಮಾರ್ಚ್ 29ರಂದು ಫಾರೀನ್ ಎಕ್ಸ್ಚೇಂಜ್ ರಿಸರ್ವ್ಸ್ 645.583 ಬಿಲಿಯನ್ ಡಾಲರ್ ಇದೆ. ಹಿಂದಿನ ವಾರದಲ್ಲಿ ಮೀಸಲು ಸಂಪತ್ತು 642.631 ಬಿಲಿಯನ್ ಡಾಲರ್ ಇತ್ತು. ಒಟ್ಟಾರೆ ಸತತ ಆರು ವಾರ ಕಾಲ ಫಾರೆಕ್ಸ್ ರಿಸರ್ವ್ಸ್ ಹೆಚ್ಚಳ ಕಂಡಿದ್ದು, ಹೊಸ ದಾಖಲೆಯ ಮಟ್ಟಕ್ಕೆ ಹೋಗಿದೆ. 2021ರ ಸೆಪ್ಟಂಬರ್ನಲ್ಲಿ ಫಾರೆಕ್ಸ್ ರಿಸರ್ವ್ಸ್ 642 ಬಿಲಿಯನ್ ಡಾಲರ್ಗೆ ಏರಿ ಸಾರ್ವಕಾಲಿಕ ಗರಿಷ್ಠ ಮಟ್ಟ ಎಂಬ ದಾಖಲೆ ನಿರ್ಮಿಸಿತ್ತು. ಈ ವರ್ಷ ಈ ದಾಖಲೆ ಮುರಿಯಲಾಗಿದೆ.
ಹಿಂದಿನ ವಾರದಲ್ಲಿ 140 ಮಿಲಿಯನ್ ಡಾಲರ್ನಷ್ಟು ಮೀಸಲು ನಿಧಿ ಹೆಚ್ಚಾಗಿದ್ದರೂ ಗೋಲ್ಡ್ ರಿಸರ್ವ್ಸ್ ಹೊರತುಪಡಿಸಿ ಉಳಿದ ಸಂಪತ್ತು ಕಡಿಮೆ ಆಗಿತ್ತು. ಈ ಬಾರಿ ಚಿನ್ನದ ಸಂಗ್ರಹದ ಜೊತೆಗೆ ವಿದೇಶೀ ಕರೆನ್ಸಿ ಆಸ್ತಿಗಳ ಸಂಗ್ರಹವೂ ಹೆಚ್ಚಾಗಿದೆ.
ಇದನ್ನೂ ಓದಿ: ಮಾಲ್ಡೀವ್ಸ್ನಲ್ಲಿ ಭಾರತ ವಿರೋಧಿ ಸರ್ಕಾರ ಇದ್ದರೂ ಆ ದೇಶಕ್ಕೆ ಅವಶ್ಯಕ ವಸ್ತುಗಳ ಸರಬರಾಜು ಹೆಚ್ಚಿಸಲು ಭಾರತ ಸಮ್ಮತಿ
ಆರ್ಬಿಐ ದತ್ತಾಂಶದ ಪ್ರಕಾರ ಫಾರೆಕ್ಸ್ ಮೀಸಲು ನಿಧಿಯಲ್ಲಿ ಪ್ರಮುಖ ಭಾಗವಾಗಿರುವ ಫಾರೀನ್ ಕರೆನ್ಸಿ ಆಸ್ತಿ 2.354 ಬಿಲಿಯನ್ ಡಾಲರ್ನಷ್ಟು ಹೆಚ್ಚಾಗಿದೆ. ಚಿನ್ನದ ಮೀಸಲು ನಿಧಿ 673 ಮಿಲಿಯನ್ ಡಾಲರ್ನಷ್ಟು ಏರಿದೆ. ಆದರೆ ಸ್ಪೆಷನ್ ಡ್ರಾಯಿಂಗ್ ರೈಟ್ಸ್ ಮತ್ತು ಐಎಂಎಫ್ನೊಂದಿಗಿನ ನಿಧಿಯಲ್ಲಿ ಇಳಿಕೆ ಆಗಿದೆ. ಎಸ್ಡಿಆರ್ 73 ಮಿಲಿಯನ್ ಡಾಲರ್ನಷ್ಟು ಕಡಿಮೆ ಆದರೆ, ಐಎಂಎಫ್ನೊಂದಿಗಿನ ಮೀಸಲು ನಿಧಿ 2 ಮಿಲಿಯನ್ ಡಾಲರ್ನಷ್ಟು ಇಳಿದಿದೆ
ಭಾರತದ ಫಾರೆಕ್ಸ್ ಮೀಸಲು ನಿಧಿ, ಮಾರ್ಚ್ 29ಕ್ಕೆ
ಒಟ್ಟು ಫಾರೆಕ್ಸ್ ಮೀಸಲು ನಿಧಿ: 645.583 ಬಿಲಿಯನ್ ಡಾಲರ್
- ವಿದೇಶೀ ಕರೆನ್ಸಿ ಆಸ್ತಿ: 570.618 ಬಿಲಿಯನ್ ಡಾಲರ್
- ಚಿನ್ನದ ಮೀಸಲು ಸಂಪತ್ತು: 52.16 ಬಿಲಿಯನ್ ಡಾಲರ್
- ಎಸ್ಡಿಆರ್: 18.145 ಬಿಲಿಯನ್ ಡಾಲರ್
- ಐಎಂಎಫ್ನಲ್ಲಿರುವ ನಿಧಿ: 4.66 ಬಿಲಿಯನ್ ಡಾಲರ್
ಇದನ್ನೂ ಓದಿ: ಕಡಿಮೆ ಸಂಬಳ ಇದ್ದರೆ, ಉದ್ಯೋಗ ಕಳೆದುಕೊಂಡರೆ ಸಿಬಿಲ್ ಸ್ಕೋರ್ ಕಡಿಮೆ ಆಗುತ್ತಾ? ಇಲ್ಲಿದೆ ವಾಸ್ತವಿಕ ಅಂಶಗಳು
ಬೇರೆ ದೇಶಗಳಲ್ಲಿ ಎಷ್ಟಿದೆ ಫಾರೆಕ್ಸ್ ರಿಸರ್ವ್ಸ್ ನಿಧಿ
ಜಾಗತಿಕವಾಗಿ ಅತಿಹೆಚ್ಚು ವಿದೇಶೀ ವಿನಿಮಯ ಮೀಸಲು ನಿಧಿ ಹೊಂದಿದ ದೇಶಗಳಲ್ಲಿ ಭಾರತ 4ನೇ ಸ್ಥಾನದಲ್ಲಿ ಮುಂದುವರಿದಿದೆ. ಚೀನಾ 3,225 ಬಿಲಿಯನ್ ಡಾಲರ್ನಷ್ಟು ಫಾರೆಕ್ಸ್ ಮೀಸಲು ನಿಧಿ ಹೊಂದಿದೆ. ಜಪಾನ್ ಬಳಿಕ 1,290 ಬಿಲಿಯನ್ ಡಾಲರ್, ಸ್ವಿಟ್ಜರ್ಲ್ಯಾಂಡ್ ಬಳಿ 868 ಬಿಲಿಯನ್ ಡಾಲರ್ನಷ್ಟು ಫಾರೆಕ್ಸ್ ರಿಸರ್ವ್ಸ್ ಆಸ್ತಿ ಇದೆ. ಇದಾದ ಬಳಿಕ ನಾಲ್ಕನೇ ಸ್ಥಾನದಲ್ಲಿ ಭಾರತ ಇದೆ. ನಂತರದ ಸ್ಥಾನದಲ್ಲಿ ರಷ್ಯಾ ಇದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
