ITR: ಹೊಸ ಪೋರ್ಟಲ್​ನಲ್ಲಿ ಐಟಿ ರಿಟರ್ನ್ ಫೈಲ್ ಮಾಡುವುದು ಬಹಳ ಸುಲಭ; ಯಾರೂ ಬೇಕಾದರೂ ಐಟಿಆರ್ ಸಲ್ಲಿಕೆ ಮಾಡುವಷ್ಟು ಸರಳ ಕ್ರಮಗಳು

ಆದಾಯ ತೆರಿಗೆ ರಿಟರ್ನ್ (Income Tax Return) ಸಲ್ಲಿಕೆ ಮಾಡಲು ಇನ್ನೊಂದೇ ದಿನ ಬಾಕಿ ಇದೆ. ಅನಗತ್ಯವಾಗಿ ದಂಡ ಕಟ್ಟುವುದನ್ನು ತಪ್ಪಿಸಲು ಜುಲೈ 31ರೊಳಗೆ ಐಟಿಆರ್ ಫೈಲ್ ಮಾಡಿ. ವಿವಿಧ ಫಾರ್ಮ್​ಗಳಿದ್ದು, ರಿಟರ್ನ್ ಫೈಲಿಂಗ್ ಪ್ರಕ್ರಿಯೆ ಗೋಜಲಾಗಿರಬಹುದು ಎಂದು ನೀವು ಭಾವಿಸಿದ್ದರೆ ಅದು ತಪ್ಪು. ಆದಾಯ ತೆರಿಗೆ ಇಲಾಖೆ ರೂಪಿಸಿರುವ ಹೊಸ ಪೋರ್ಟಲ್​ನಲ್ಲಿ ಈಗ ತೆರಿಗೆ ಪಾವತಿ ಮತ್ತು ಐಟಿಆರ್ ಸಲ್ಲಿಕೆ ಸುಗಮವಾಗಿ ಆಗುತ್ತದೆ. ಹಿಂದೆ ಇದ್ದ ಇನ್ಕಮ್ ಟ್ಯಾಕ್ಸ್ ಇಫೈಲಿಂಗ್ ಪೋರ್ಟಲ್​ನಲ್ಲಿ ಸಾಕಷ್ಟು ಮಾರ್ಪಾಡು ಮಾಡಲಾಗಿದ್ದು, ಅದೀಗ ಹೆಚ್ಚು ಬಳಕೆದಾರ ಸ್ನೇಹಿ (User Friendly) ಎನಿಸಿದೆ. ತೆರಿಗೆಪಾವತಿದಾರರಿಗೆ ನೆರವು, ಪ್ರಶ್ನೋತ್ತರಗಳು, ಬಳಕೆದಾರ ಕೈಪಿಡಿ (User Manual), ಚ್ಯಾಟ್​ಬೋಟ್ ಇತ್ಯಾದಿ ಹೊಸ ಫೀಚರ್​ಗಳನ್ನು ಸೇರಿಸಲಾಗಿದೆ. ಲೈವ್ ಎಜೆಂಟ್ ಸೇವೆಯೂ ಇದರಲ್ಲಿದೆ. ಪೋರ್ಟಲ್​ನ ಮೊಬೈಲ್ ಅವತರಣಿಕೆಯೂ ಬಹುತೇಕ ಈ ಎಲ್ಲಾ ಫೀಚರ್​ಗಳನ್ನು ಒಳಗೊಂಡಿದೆ.

ಇನ್ಕಮ್ ಟ್ಯಾಕ್ಸ್ ಇಫೈಲಿಂಗ್ ಪೋರ್ಟಲ್​ನಲ್ಲಿ ನೊಂದಾಯಿಸಿಕೊಳ್ಳುವುದರಿಂದ ಹಿಡಿದು ತೆರಿಗೆ ರಿಟರ್ನ್ ಸಲ್ಲಿಕೆಯವರೆಗೂ ಕ್ರಮಗಳು ಬಹುತೇಕ ಸರಳವಾಗಿವೆ. ಯಾವುದೇ ಅನುಮಾನ ಇದ್ದರೂ ಸಮಾಧಾನ ಕೊಡಬಲ್ಲ ಚ್ಯಾಟ್​ಬೋಟ್, ಎಫ್​ಎಕ್ಯೂ ಇತ್ಯಾದಿ ಫೀಚರ್​ಗಳಿವೆ.

ಹಂತ 1: ಇನ್ಕಮ್ ಟ್ಯಾಕ್ಸ್ ಪೋರ್ಟಲ್​ನಲ್ಲಿ ರಿಜಿಸ್ಟರ್ ಆಗುವುದು

• ನೀವು ಈವರೆಗೂ ಇನ್ಕಮ್ ಟ್ಯಾಕ್ಸ್ ಪೋರ್ಟಲ್​ನಲ್ಲಿ ನೊಂದಾಯಿಸಿಕೊಂಡಿರದಿದ್ದರೆ ಮೊದಲಿಗೆ ಅದನ್ನು ಮಾಡಬೇಕು. ಅದಕ್ಕೆ ಈ ಕೆಳಗಿನ ಲಿಂಕ್ ಕ್ಲಿಕ್ ಮಾಡಿ: www.incometax.gov.in/iec/foportal
• ಪೋರ್ಟಲ್​ನ ಮೇಲಿನ ಬಲತುದಿಯಲ್ಲಿ ರಿಜಿಸ್ಟರ್ ಬಟನ್ ಮೇಲೆ ಕ್ಲಿಕ್ ಮಾಡಿ
• ಅಲ್ಲಿ ಕೇಳಲಾಗುವಂತೆ ಪ್ಯಾನ್ ನಂಬರ್, ಆಧಾರ್ ನಂಬರ್ ಇತ್ಯಾದಿ ಎಲ್ಲಾ ವಿವರಗಳನ್ನು ತುಂಬಿರಿ. ಕೆಲ ನಿಮಿಷಗಳಲ್ಲಿ ಇದನ್ನು ಮಾಡಿ ಮುಗಿಸಬಹುದು.

ಇದನ್ನೂ ಓದಿ: AIS: ನಿಮ್ಮ ಆದಾಯ, ತೆರಿಗೆಗಳ ಪೂರ್ಣ ವಿವರ ಎಐಎಸ್​ನಲ್ಲಿ; ಐಟಿಆರ್ ಸಲ್ಲಿಸುವ ಮುನ್ನ ಒಮ್ಮೆ ಕಣ್ಣಾಡಿಸಿ

ಹಂತ 2: ಇನ್ಕಮ್ ಟ್ಯಾಕ್ಸ್ ಪೋರ್ಟಲ್​ಗೆ ಲಾಗಿನ್ ಆಗಿ

ನೀವು ಪೋರ್ಟಲ್​ನಲ್ಲಿ ನೊಂದಾವಣಿ ಮಾಡಿದ ಬಳಿಕ ಲಾಗಿನ್ ಆಗಬೇಕು. ಇಲ್ಲಿ ಪ್ಯಾನ್ ಸಂಖ್ಯೆಯೇ ನಿಮ್ಮ ಯೂಸರ್ ಐಡಿ ಆಗಿರುತ್ತದೆ. ಪಾಸ್ವರ್ಡ್ ಸೆಟ್ ಮಾಡಿ, ಲಾಗಿನ್ ಆಗಿ.

ಹಂತ 3: ಇ-ಪೇ ಟ್ಯಾಕ್ಸ್ ಸೆಕ್ಷನ್

ನೀವು ಇನ್ಕಮ್ ಟ್ಯಾಕ್ಸ್ ಪೋರ್ಟಲ್​ಗೆ ಲಾಗಿನ್ ಆದ ಬಳಿಕ ಇ-ಫೈಲ್ ಮೆನುಗೆ ಹೋಗಿ ಅಲ್ಲಿ ಡ್ರಾಪ್ ಡೌನ್ ಮೆನುನಲ್ಲಿರುವ ‘ಇನ್ಕಮ್ ಟ್ಯಾಕ್ಸ್ ರಿಟರ್ನ್’ ಅನ್ನು ಕ್ಲಿಕ್ ಮಾಡಿ. ತೆರಿಗೆ ಸಂಬಂಧಿತ ನಿಮ್ಮ ಚಟುವಟಿಕೆಗಳನ್ನು ಡ್ಯಾಶ್​ಬೋರ್ಡ್​ನಲ್ಲಿ ನೋಡಬಹುದು.

ಹಂತ 4: ಅಸೆಸ್ಮೆಂಟ್ ವರ್ಷ ಮತ್ತು ತೆರಿಗೆ ವಿವರ ಆಯ್ಕೆಮಾಡಿ

• ನೀವು ತೆರಿಗೆ ಪಾವತಿಸಬೇಕಾದ ಅಸೆಸ್ಮೆಂಟ್ ವರ್ಷವನ್ನು ಆಯ್ಕೆ ಮಾಡಿಕೊಳ್ಳಿ. ಅಸೆಸ್ಮೆಂಟ್ ಇಯರ್ ಎಂಬುದು ಒಂದು ಹಣಕಾಸು ವರ್ಷದ ಮುಂದಿನ 12 ತಿಂಗಳ ಅವಧಿ. ಈ ಬಾರಿ ನೀವು ಟ್ಯಾಕ್ಸ್ ಫೈಲ್ ಮಾಡಲಿರುವುದು 2022-23ರ ಹಣಕಾಸು ವರ್ಷಕ್ಕೆ. ಆದರೆ, ಅಸೆಸ್ಮೆಂಟ್ ಇಯರ್ 2023-24 ಆಗುತ್ತದೆ.
• ಅಸೆಸ್ಮೆಂಟ್ ವರ್ಷ ಆಯ್ಕೆ ಮಾಡಿದ ಬಳಿಕ ಪಾವತಿ ವಿಧಾನ ಮತ್ತು ಬ್ಯಾಂಕ್ ಇತ್ಯಾದಿ ವಿವರ ತುಂಬಿರಿ.

ಇದನ್ನೂ ಓದಿ: ITR and Penalty: ಐಟಿಆರ್ ಸಲ್ಲಿಸುವಾಗ ಸುಳ್ಳು ದಾಖಲೆ ತೋರಿಸೀರಿ ಜೋಕೆ..! ಎರಡು ಪಟ್ಟು ದಂಡ ವಸೂಲಿ ಮಾಡುತ್ತೆ ಆದಾಯ ತೆರಿಗೆ ಇಲಾಖೆ

ಹಂತ 5: ವಿವರವನ್ನು ದೃಢಪಡಿಸಿ, ತೆರಿಗೆ ಪಾವತಿಸಿ

• ನೀವು ಭರ್ತಿ ಮಾಡಿದ ವಿವರವನ್ನು ಪರಾಮರ್ಶಿಸಿ. ಎಲ್ಲ ಮಾಹಿತಿ ಸರಿ ಎಂದು ಅನಿಸಿದ ಬಳಿಕ ಸಬ್ಮಿಟ್ ಕ್ಲಿಕ್ ಮಾಡಿ.
• ತೆರಿಗೆ ಕಟ್ಟಬೇಕಾದ್ದು ಇದ್ದರೆ ನಿಮ್ಮ ಬ್ಯಾಂಕ್​ನ ನೆಟ್​ಬ್ಯಾಂಕಿಂಗ್ ಪೇಜ್ ತೆರೆದುಕೊಳ್ಳುತ್ತದೆ. ಹಣ ಪಾವತಿಸಿದ ಬಳಿಕ ಸ್ವೀಕೃತಿಯನ್ನು (ರೆಸಿಪ್ಟ್) ಡೌನ್​ಲೋಡ್ ಮಾಡಿಟ್ಟುಕೊಳ್ಳಬಹುದು.

ಬಹುತೇಕ ಎಲ್ಲಾ ಪ್ರಕ್ರಿಯೆಗಳೂ ಸರಳವಾಗಿವೆ. ಆದರೆ, ತೆರಿಗೆ ವಿವರ ದಾಖಲಿಸುವಾಗ ಎಚ್ಚರ ಇರಲಿ. ಅದರಲ್ಲೂ ಹೊಸ ಆಸ್ತಿಪಾಸ್ತಿ ಖರೀದಿ ಮಾಡಿದ್ದರೆ, ದಿಢೀರ್ ಹೆಚ್ಚುವರಿ ಆದಾಯ ಸಿಕ್ಕಿದ್ದರೆ, ಇಂಥ ಸಂದರ್ಭಗಳಲ್ಲಿ ನಿಮಗೆ ಗೊಂದಲಗಳಿದ್ದರೆ ಸಿಎ ಇತ್ಯಾದಿ ಅಧಿಕೃತ ತೆರಿಗೆ ವೃತ್ತಿಪರರನ್ನು ಸಂಪರ್ಕಿಸಿ ಸಹಾಯ ಪಡೆದುಕೊಳ್ಳುವುದು ಉತ್ತಮ.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ