EPF rate: ಆರ್​ಬಿಐ ದರ ಕಡಿಮೆಗೊಳಿಸಿದ್ದರಿಂದ ಇಪಿಎಫ್​ಒ ಬಡ್ಡಿಯೂ ಕಡಿಮೆ ಆಗುತ್ತಾ? ಈ ವರ್ಷಕ್ಕೆ ಎಷ್ಟಿರಬಹುದು ಬಡ್ಡಿದರ? ಇಲ್ಲಿದೆ ಡೀಟೇಲ್ಸ್

ನವದೆಹಲಿ, ಫೆಬ್ರುವರಿ 13: ಆರ್​ಬಿಐ ಕಳೆದ ವಾರ ಬಡ್ಡಿದರವನ್ನು ಇಳಿಸಿದ ಬಳಿಕ ಬ್ಯಾಂಕಿಂಗ್ ಹಾಗೂ ಇತರ ಕ್ಷೇತ್ರಗಳಲ್ಲಿ ಠೇವಣಿ ದರಗಳು ಮತ್ತು ಸಾಲದ ದರಗಳು ತುಸು ತಗ್ಗುವ ನಿರೀಕ್ಷೆ ಇದೆ. ಹಾಗೆಯೇ, ಸ್ಮಾಲ್ ಫೈನಾನ್ಸ್ ಸ್ಕೀಮ್​ಗಳ ಮೇಲೂ ಇದರ ಪರಿಣಾಮವಾಗಬಹುದು. ಉದ್ಯೋಗಿಗಳ ಇಪಿಎಫ್ ಹಣಕ್ಕೆ ನೀಡಲಾಗುವ ಬಡ್ಡಿಯಲ್ಲಿ ವ್ಯತ್ಯಾಸವಾಗಬಹುದೆ ಎನ್ನುವ ಅನುಮಾನ ಹಲವರಲ್ಲಿ ಹುಟ್ಟಿರಬಹುದು. ಇಪಿಎಫ್​ಒ ಯಾವ ನಿರ್ಧಾರ ತೆಗೆದುಕೊಳ್ಳುತ್ತದೆ ಎಂದು ಖಚಿತವಾಗಿ ಹೇಳಲು ಸಾಧ್ಯವಿಲ್ಲ. ಸದ್ಯ ಇಪಿಎಫ್​ಒ 2023-24ರ ವರ್ಷಕ್ಕೆ ಶೇ. 8.2ರಷ್ಟು ವಾರ್ಷಿಕ ಬಡ್ಡಿ ನೀಡಿದೆ. ಈ ವರ್ಷಕ್ಕೂ (2024-25) ಅಷ್ಟೇ ಬಡ್ಡಿ ನೀಡುವ ಸಾಧ್ಯತೆ ಇದೆ ಎನ್ನಲಾಗಿದೆ.

ದೇಶಾದ್ಯಂತ ಆರೂವರೆ ಕೋಟಿ ಇಪಿಎಫ್ ಖಾತೆಗಳಿವೆ. ಹಿಂದಿನ ಹಣಕಾಸು ವರ್ಷದಲ್ಲಿ (2023-24) ಇಪಿಎಫ್​ಒ ಬಳಿ 13 ಲಕ್ಷ ಕೋಟಿ ರೂ ನಿಧಿ ಇತ್ತು. ಇದಕ್ಕೆ ಶೇ. 8.25ರಷ್ಟು ಬಡ್ಡಿ ಸೇರಿಸಿದೆ. 2024-25ರ ಹಣಕಾಸು ವರ್ಷದಲ್ಲಿ 5 ಕೋಟಿ ಸಂಖ್ಯೆಯಲ್ಲಿ ಕ್ಲೇಮ್​ಗಳನ್ನು ಮಾಡಲಾಗಿದೆ. ಒಟ್ಟು 2.05 ಲಕ್ಷ ಕೋಟಿ ರೂನಷ್ಟು ಹಣವನ್ನು ಸದಸ್ಯರು ಹಿಂಪಡೆದಿದ್ದಾರೆ. 2023-24ಕ್ಕೆ ಹೋಲಿಸಿದರೆ ಈ ಕ್ಲೇಮ್ ಸಂಖ್ಯೆ ತುಸು ಕಡಿಮೆ ಆದರೂ ಹಿಂಪಡೆಯಲಾದ ಹಣದ ಪ್ರಮಾಣ ಹೆಚ್ಚಿದೆ.

ಇದನ್ನೂ ಓದಿ: Income Tax: 75,000 ರೂಗೆ ಟ್ಯಾಕ್ಸ್ ಡಿಡಕ್ಷನ್; 13.70 ಲಕ್ಷ ರೂವರೆಗೂ ತೆರಿಗೆ ಇಲ್ಲ; ಯಾರಿಗಿದೆ ಈ ಅವಕಾಶ? ಇಲ್ಲಿದೆ ಡೀಟೇಲ್ಸ್

ಇಪಿಎಫ್​ಒ ಸಂಸ್ಥೆ ಉದ್ಯೋಗಿಗಳ ಇಪಿಎಫ್ ಖಾತೆಯಲ್ಲಿರುವ ಹಣವನ್ನು ವಿವಿಧ ಡೆಟ್ ಸೆಕ್ಯೂರಿಟಿಗಳು, ಇಟಿಎಫ್ ಇತ್ಯಾದಿ ಕಡೆ ಹೂಡಿಕೆ ಮಾಡುತ್ತವೆ. ಡೆಟ್ ಫಂಡ್​ಗಳಲ್ಲಿ ಅದರ ಹೂಡಿಕೆ ಹೆಚ್ಚಿರುತ್ತದೆ. ಅದರಲ್ಲಿ ಸಿಗುವ ರಿಟರ್ಸ್ ಆಧಾರಿತವಾಗಿ ಇಪಿಎಫ್ ಹಣಕ್ಕೆ ಬಡ್ಡಿಯನ್ನು ನಿಗದಿ ಮಾಡಲಾಗುತ್ತದೆ.

ಇಪಿಎಫ್​ಒ ಸಂಸ್ಥೆ ಸ್ವತಂತ್ರವಾಗಿ ಬಡ್ಡಿದರ ನಿಗದಿ ಮಾಡುವ ಹಾಗಿಲ್ಲ. ಇಪಿಎಫ್​ಒ, ಕೇಂದ್ರೀಯ ಟ್ರಸ್ಟಿ ಮಂಡಳಿ ಮತ್ತು ಕೇಂದ್ರ ಹಾಗು ರಾಜ್ಯ ಸರ್ಕಾರಗಳ ಪ್ರತಿನಿಧಿಗಳು ಮತ್ತಿತರರು ಸೇರಿ ಸಮಾಲೋಚನೆ ನಡೆಸುವುದುಂಟು. ಹೀಗೆ ನಿರ್ಧರಿಸಲಾದ ಬಡ್ಡಿದರವನ್ನು ಸಿಬಿಟಿ ಗಮನಕ್ಕೆ ತರಲಾಗುತ್ತದೆ.

ಇದನ್ನೂ ಓದಿ: ಕೆಲಸ ಬದಲಿಸಿದಾಗ ಹಳೆಯ ಇಪಿಎಫ್ ಹಣ ಹೊಸ ಖಾತೆಗೆ ವರ್ಗಾಯಿಸುವ ಕ್ರಮ

ಸಿಬಿಟಿ ಅನುಮೋದನೆ ಬಳಿಕ ಹಣಕಾಸು ಸಚಿವಾಲಯದ ಒಪ್ಪಿಯೂ ಬೇಕಾಗುತ್ತದೆ. ಇದಾದ ಬಳಿಕ ವರ್ಷದ ದ್ವಿತೀಯಾರ್ಧದಲ್ಲಿ ಇಪಿಎಫ್ ಖಾತೆಗಳಿಗೆ ಬಡ್ಡಿ ಹಣ ಜಮೆ ಆಗುತ್ತದೆ. ಅಂದರೆ, 2024-25ರ ಹಣಕಾಸು ವರ್ಷಕ್ಕೆ ಇಪಿಎಫ್ ಖಾತೆಗಳಲ್ಲಿರುವ ಹಣಕ್ಕೆ 2025ರ ಸೆಪ್ಟೆಂಬರ್ ಬಳಿಕ ಬಡ್ಡಿ ಜಮೆ ಆಗಬಹುದು.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ