ಆಭರಣಕ್ಕೆ ಮೇಕಿಂಗ್ ಚಾರ್ಜಸ್, ವೇಸ್ಟೇಜ್ ಚಾರ್ಜಸ್ ಲೆಕ್ಕಾಚಾರ ಹೇಗಿರುತ್ತೆ? ಒಡವೆ ಖರೀದಿಸುವ ಮುನ್ನ ಈ ಸಂಗತಿ ತಿಳಿದಿರಿ

ಚಿನ್ನ ಒಡವೆ ಖರೀದಿಸುವಾಗ ನೀವು ಜಿಎಸ್​ಟಿ ಜೊತೆಗೆ ಮೇಕಿಂಗ್ ಚಾರ್ಜಸ್, ವೇಸ್ಟೇಜ್ ಚಾರ್ಜಸ್ ಇತ್ಯಾದಿ ಪದಗಳನ್ನು ಕೇಳಿರಬಹುದು. ಗ್ರಾಮ್​ಗೆ 6,700 ರೂ ಬೆಲೆ ಇದೆ ಎಂದು ಭಾವಿಸಿ ನೀವು ಒಡವೆ ಅಂಗಡಿಗೆ ಹೋಗಿ 10 ಗ್ರಾಮ್ ಆಭರವಣವೊಂದರ ಬೆಲೆ ನೋಡಿದರೆ ಅದು 72,000 ರೂ ಮೇಲ್ಪಟ್ಟು ಇರುತ್ತದೆ. ಜಿಎಸ್​ಟಿ ಸೇರಿಸಿದರೂ ಇಷ್ಟೊಂದು ಬೆಲೆ ಆಗಲ್ವಲ್ಲ ಎಂದು ನಿಮಗೆ ಗೊಂದಲವಾಗಬಹುದು. ಇಲ್ಲಿ ಈ ಒಡವೆಗೆ ಮೇಕಿಂಗ್ ಚಾರ್ಜಸ್ ಅಥವಾ ವೇಸ್ಟೇಜ್ ಚಾರ್ಜಸ್ ಅಥವಾ ಎರಡೂ ಚಾರ್ಜಸ್ ಹಾಕಿರಬಹುದು.

ಮೇಕಿಂಗ್ ಚಾರ್ಜಸ್ ಏನು?

ಯಾವುದೇ ಆಭರಣಕ್ಕಾದರೂ ಆಕರ್ಷಕವಾಗಿ ಕಾಣಲು ವಿವಿಧ ವಿನ್ಯಾಸಗಳನ್ನು ಮಾಡಲಾಗಿರುತ್ತದೆ. ಸೂಕ್ಷ್ಮ ಕೆತ್ತನೆ ಕೆಲಸಗಳನ್ನು ಮಾಡಲಾಗುತ್ತದೆ. ಸಾದಾ ಚಿನ್ನವನ್ನು ಒಡವೆಯಾಗಿ ಮಾಡಲು ಸಮಯ ಮತ್ತು ಶ್ರಮ ಇಡಿಯುತ್ತದೆ. ಇದರ ವೆಚ್ಚವೇ ಮೇಕಿಂಗ್ ಚಾರ್ಜಸ್ ಆಗಿರುತ್ತದೆ. ಒಡವೆಯ ವಿನ್ಯಾಸದ ಮೇಲೆ ಈ ಶುಲ್ಕ ಎಷ್ಟೆಂಬುದು ನಿರ್ಧಾರ ಆಗುತ್ತದೆ. ಹೆಚ್ಚಿನ ಕೆತ್ತನೆ ಕೆಲಸ ಇದ್ದರೆ ಮೇಕಿಂಗ್ ಚಾರ್ಜಸ್ ಹೆಚ್ಚಿರುತ್ತದೆ.

ವೇಸ್ಟೇಜ್ ಚಾರ್ಜಸ್

ನೀವು 15 ಗ್ರಾಮ್​ನ ಮತ್ತು ನಿರ್ದಿಷ್ಟ ವಿನ್ಯಾಸದ ಸರಕ್ಕೆ ಆರ್ಡರ್ ಕೊಟ್ಟಿರುತ್ತೀರಿ. ಈ ಒಡವೆ ತಯಾರಿಸಲು ಚಿನ್ನದ ಗಟ್ಟಿಯನ್ನು ಕರಗಿಸಿ, ಅದಕ್ಕೆ ನಿರ್ದಿಷ್ಟ ಆಕಾರ ಕೊಡುವ ಕೆಲಸ ಮಾಡಲಾಗುತ್ತದೆ. ಈ ಪ್ರಕ್ರಿಯೆಯಲ್ಲಿ ಒಂದಷ್ಟು ಚಿನ್ನ ನಷ್ಟವಾಗಿ ಹೋಗುತ್ತದೆ. ನಿಮ್ಮ 15 ಗ್ರಾಮ್​ನ ಚಿನ್ನದ ಸರವನ್ನು ತಯಾರಿಸಲು ಒಡವೆ ಅಂಗಡಿಯವರು 15.30 ಗ್ರಾಮ್ ಚಿನ್ನವನ್ನು ಬಳಸಿರಬಹುದು. 300 ಮಿಲಿಗ್ರಾಮ್​ನಷ್ಟು ಚಿನ್ನದ ನಷ್ಟವನ್ನು ವೇಸ್ಟೇಜ್ ಚಾರ್ಜಸ್ ಮೂಲಕ ಗ್ರಾಹಕರಿಂದ ಪಡೆಯಲಾಗುತ್ತದೆ.

ಇದನ್ನೂ ಓದಿ: ತೀರುತ್ತಿಲ್ಲ ಸೆಂಟ್ರಲ್ ಬ್ಯಾಂಕ್​ಗಳ ಚಿನ್ನದ ದಾಹ; ಈ ವರ್ಷ ಬೆಲೆ ಬಹಳ ಹೆಚ್ಚಾಗುವ ಭೀತಿ

ಮೇಕಿಂಗ್ ಚಾರ್ಜ್, ವೇಸ್ಟೇಜ್ ಚಾರ್ಜ್ ಕಡಿಮೆ ಮಾಡಲು…

ನಿಮ್ಮ ಒಡವೆಯ ವಿನ್ಯಾಸ ಹೆಚ್ಚು ಸಂಕೀರ್ಣವಾಗಿದ್ದಷ್ಟೂ ಮೇಕಿಂಗ್ ಚಾರ್ಜ್ ಅಥವಾ ವೇಸ್ಟೇಜ್ ಚಾರ್ಜ್ ಸಹಜವಾಗಿ ಹೆಚ್ಚಾಗುತ್ತದೆ. ಆದ್ದರಿಂದ ಸಾಧ್ಯವಾದಷ್ಟೂ ಸರಳ ಡಿಸೈನ್ ಇರುವ ಒಡವೆಯನ್ನು ಆರಿಸಿಕೊಳ್ಳಿ.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ