ಡಿಸೆಂಬರ್​ನಲ್ಲಿ ಬಡ್ಡಿ ಇಳಿಕೆ ಸಾಧ್ಯತೆ; ಈಗಲೇ ಎಫ್​ಡಿ ಇಡಲು ತ್ವರೆ ಮಾಡಿ

ನವದೆಹಲಿ, ಅಕ್ಟೋಬರ್ 9: ಆರ್​ಬಿಐನ ಹಣಕಾಸು ನೀತಿಯಲ್ಲಿ ಮಾರ್ಪಾಡು ಮಾಡಲಾಗಿರುವುದು ಬಡ್ಡಿದರ ಇಳಿಕೆಯ ಸುಳಿವು ನೀಡುತ್ತಿದೆ. ಡಿಸೆಂಬರ್​ನಲ್ಲಿ ಆರ್​ಬಿಐ ಬಡ್ಡಿದರಗಳನ್ನು ಇಳಿಸುವ ಸಾಧ್ಯತೆ ದಟ್ಟವಾಗಿದೆ. ಸದ್ಯ ಫಿಕ್ಸೆಡ್ ಡೆಪಾಸಿಟ್ ದರ ಅಧಿಕ ಮಟ್ಟದಲ್ಲಿದೆ. ಈ ಎರಡು ತಿಂಗಳ ಒಳಗೆ ಫಿಕ್ಸೆಡ್ ಇಡುವುದು ಜಾಣತನ ಎನ್ನುತ್ತಾರೆ ತಜ್ಞರು.

ಹೆಚ್ಚೂಕಡಿಮೆ ಎರಡು ವರ್ಷದಿಂದ ಆರ್​ಬಿಐ ಬಡ್ಡಿದರ ಪರಿಷ್ಕರಣೆ ಮಾಡಿಲ್ಲ. ಶೇ. 6.5ರಷ್ಟು ರಿಪೋ ದರ ಇದೆ. ಹಣದುಬ್ಬರ ನಿಯಂತ್ರಣಕ್ಕೆ ತರಲು ಆರ್​ಬಿಐ ಶೇ. 4ರಷ್ಟಿದ್ದ ಬಡ್ಡಿದರವನ್ನು ಕ್ರಮೇಣವಾಗಿ ಹೆಚ್ಚಿಸುತ್ತಾ ಹೋಗಿ ಶೇ. 6.5ಕ್ಕೆ ತಂದಿದೆ. ಭಾರತದಲ್ಲಿ ಮಾತ್ರವಲ್ಲ ಜಾಗತಿಕವಾಗಿಯೂ ಹಣದುಬ್ಬರದ ಕಾರಣಕ್ಕೆ ಹಲವು ದೇಶಗಳ ಸೆಂಟ್ರಲ್ ಬ್ಯಾಂಕುಗಳು ಬಡ್ಡಿದರ ಹೆಚ್ಚಿಸಿದ್ದವು. ಈಗ ಪ್ರಮುಖ ದೇಶಗಳಲ್ಲಿ ಬಡ್ಡಿಕಡಿತದ ಟ್ರೆಂಡ್ ಶುರುವಾಗಿದೆ.

ಇದನ್ನೂ ಓದಿ: ಆದಾಯ ತೆರಿಗೆ ಕಾಯ್ದೆಯಲ್ಲಿ ಅಮೂಲಾಗ್ರ ಪರಿಷ್ಕರಣೆಗೆ ಸರ್ಕಾರ ನಿರ್ಧಾರ; ಪೋರ್ಟಲ್​ನಲ್ಲಿ ಸಾರ್ವಜನಿಕರ ಅಭಿಪ್ರಾಯಕ್ಕೂ ಅವಕಾಶ

ಅಮೆರಿಕದ ಫೆಡರಲ್ ರಿಸರ್ವ್ ಸೆಪ್ಟೆಂಬರ್​ನಲ್ಲಿ 50 ಮೂಲಾಂಕಗಳಷ್ಟು ಬಡ್ಡಿದರ ಕಡಿಮೆಗೊಳಿಸಿದೆ. ಮುಂದಿನ ದಿನಗಳಲ್ಲಿ ಇನ್ನಷ್ಟು ದರ ಕಡಿತಗೊಳಿಸುವುದಾಗಿ ಅಲ್ಲಿನ ಸೆಂಟ್ರಲ್ ಬ್ಯಾಂಕ್ ಸುಳಿವು ನೀಡಿದೆ. ಭಾರತದ ಮೇಲೆ ದಟ್ಟವಾಗಿ ಪ್ರಭಾವ ಬೀರಬಲ್ಲ ಅಮೆರಿಕದಲ್ಲಿ ಬಡ್ಡಿದರ ವ್ಯತ್ಯಯವಾದರೆ ಭಾರತವೂ ಸ್ಪಂದಿಸುವುದು ಅನಿವಾರ್ಯ. ಈ ಕಾರಣಕ್ಕೆ ಆರ್​ಬಿಐ ರಿಪೋ ದರ ಇಳಿಕೆಯನ್ನು ತಡೆದಿಟ್ಟುಕೊಳ್ಳುವುದು ಕಷ್ಟವಾಗುತ್ತದೆ. ಡಿಸೆಂಬರ್​ನಲ್ಲಿ ದರ ಕಡಿತ ಅನಿವಾರ್ಯವಾಗಬಹುದು. ಹೀಗಾಗಿ, ಅಕ್ಟೋಬರ್ ತಿಂಗಳ ಎಂಪಿಸಿ ಸಭೆಯಲ್ಲಿ ಆರ್​ಬಿಐನ ಹಣಕಾಸು ನೀತಿಯನ್ನು ನ್ಯೂಟ್ರಲ್​ಗೆ ಬದಲಾಯಿಸಲಾಗಿದೆ.

ಅಧಿಕ ಮಟ್ಟದಲ್ಲಿದೆ ಎಫ್​ಡಿ ದರಗಳು…

ಸದ್ಯ ದೇಶದ ಪ್ರಮುಖ ಬ್ಯಾಂಕುಗಳಲ್ಲಿ ಠೇವಣಿ ದರಗಳು ಶೇ. 8ರವರೆಗೂ ಇದೆ. ಸಹಕಾರಿ ಬ್ಯಾಂಕುಗಳಲ್ಲಿ ಇದು ಶೇ. 9.5ರವರೆಗೂ ಇದೆ. ಎಸ್​ಬಿಐ, ಎಚ್​ಡಿಎಫ್​ಸಿ, ಎಕ್ಸಿಸ್ ಇತ್ಯಾದಿ ಬ್ಯಾಂಕುಗಳು ಶೇ. 7.5ರ ಆಸುಪಾಸಿನ ದರದಲ್ಲಿ ಬಡ್ಡಿಯನ್ನು ನೀಡುತ್ತವೆ.

ಇದನ್ನೂ ಓದಿ: ಬಳಕೆಯಲ್ಲಿ ಇಲ್ಲದೆ ನಿಷ್ಕ್ರಿಯಗೊಂಡ ಬ್ಯಾಂಕ್ ಖಾತೆಗಳನ್ನು ಮತ್ತೆ ಸಕ್ರಿಯಗೊಳಿಸುವ ಕ್ರಮ

ಡಿಸೆಂಬರ್​ನಲ್ಲಿ ಒಮ್ಮೆ ಮಾತ್ರವೇ ದರ ಕಡಿತ ಆಗಬಹುದು ಎಂದಿಲ್ಲ. ಅಲ್ಲಿಂದ ಬಡ್ಡಿ ಇಳಿಕೆಯ ಪರ್ವ ಶುರುವಾಗಬಹುದು. ಹೀಗಾಗಿ, ಸದ್ಯ ಅಧಿಕ ಬಡ್ಡಿ ನೀಡುತ್ತಿರುವ ಫಿಕ್ಸೆಡ್ ಡೆಪಾಸಿಟ್​ಗೆ ನಿಮ್ಮ ಹಣ ಲಾಕ್ ಮಾಡುವುದು ಉತ್ತಮ ಕ್ರಮ.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ