SBI FD Scheme: ಎಸ್​ಬಿಐ ವೀ ಕೇರ್, ಹಣ ಡಬಲ್ ಮಾಡಬಲ್ಲ ಸರ್ಕಾರಿ ಬ್ಯಾಂಕ್ ಎಫ್​ಡಿ ಸ್ಕೀಮ್

ಉಳಿತಾಯ ಯೋಜನೆಗಳ (Savings schemes) ಪೈಕಿ ಜನರು ಹೆಚ್ಚಾಗಿ ಬಳಸುವುದು ನಿಶ್ಚಿತ ಠೇವಣಿ ಅಥವಾ ಅವಧಿ ಠೇವಣಿ ಸ್ಕೀಮ್​ಗಳನ್ನು. ಬಹಳ ಸುಲಭವಾಗಿ ಇವುಗಳನ್ನು ಆರಂಭಿಸಬಹುದು. ವಾರ್ಷಿಕ ಬಡ್ಡಿಯೂ ಉತ್ತಮ. ಎಫ್​ಡಿ ವಿಚಾರಕ್ಕೆ ಬಂದರೆ ಸಹಕಾರಿ ಬ್ಯಾಂಕುಗಳು ಮತ್ತು ಖಾಸಗಿ ಕಮರ್ಷಿಯಲ್ ಬ್ಯಾಂಕುಗಳು ಹೆಚ್ಚು ಬಡ್ಡಿ ತರುತ್ತವೆ ಎಂಬ ಭಾವನೆ ಇದೆ. ಆದರೆ, ಸರ್ಕಾರಿ ಸ್ವಾಮ್ಯದ ಅಗ್ರಗಣ್ಯ ಬ್ಯಾಂಕ್ ಎನಿಸಿದ ಎಸ್​ಬಿಐನಲ್ಲಿ ಎಫ್​ಡಿ ದರಗಳು ಉತ್ತಮ ಇವೆ. ಅಮೃತ್ ಕಳಶ್, ವೀ ಕೇರ್ (SBI We Care) ಇತ್ಯಾದಿ ಕೆಲ ವಿಶೇಷ ಠೇವಣಿ ಯೋಜನೆಗಳನ್ನು ಎಸ್​ಬಿಐ ಆಫರ್ ಮಾಡುತ್ತಿದೆ. ಎಸ್​ಬಿಐನ ವೀ ಕೇರ್ ಸ್ಕೀಮ್ ಒಳ್ಳೆಯ ರಿಟರ್ನ್ ಕೊಡಬಲ್ಲುದು.

ಕೋವಿಡ್ ಸಂದರ್ಭದಲ್ಲಿ ಎಸ್​ಬಿಐ ವೀ ಕೇರ್ ಫಿಕ್ಸೆಡ್ ಡೆಪಾಸಿಟ್ ಅನ್ನು ಮೊದಲ ಬಾರಿಗೆ ತಂದಿತು. ಮಾರುಕಟ್ಟೆಯ ಬೆಸ್ಟ್ ಇಂಟರೆಸ್ಟ್ ರೇಟ್ ಆಫರ್ ಮಾಡಿತು. ಇದೀಗ ಈ ಸ್ಕೀಮ್ ಅನ್ನು 2023ರ ಸೆಪ್ಟಂಬರ್ 30ರವರೆಗೂ ವಿಸ್ತರಿಸಿದೆ. ಎಲ್ಲಾ ಗ್ರಾಹಕರಿಗೂ ಈ ಸ್ಕೀಮ್ ಲಭ್ಯ ಇಲ್ಲ. ಹಿರಿಯ ನಾಗರಿಕರಿಗೆ ಮಾತ್ರ ಈ ಪ್ಲಾನ್​ನಲ್ಲಿ ಅವಕಾಶ ಇದೆ.

ಇದನ್ನೂ ಓದಿ: Post Office Schemes: ಪೋಸ್ಟ್ ಆಫೀಸ್ ಸ್ಕೀಮ್​ಗಳ ಬಗ್ಗೆ ಕುತೂಹಲವಾ? ಇಲ್ಲಿದೆ ವಿವಿಧ ಯೋಜನೆಗಳು, ಬಡ್ಡಿ ದರಗಳ ವಿವರ

ಶೇ. 7.5ರವರೆಗೂ ಬಡ್ಡಿ ಕೊಡುತ್ತದೆ ಎಸ್​ಬಿಐ ವೀಕೇರ್

ಎಸ್​ಬಿಐನ ವೀ ಕೇರ್ ಫಿಕ್ಸೆಡ್ ಡೆಪಾಸಿಟ್ ಸ್ಕೀಮ್​ನಲ್ಲಿ ಎಲ್ಲಾ ಗ್ರಾಹಕರು 7 ದಿನಗಳಿಂದ ಹಿಡಿದು 10 ವರ್ಷಗಳವರೆಗೆ ವಿವಿಧ ಅವಧಿಗೆ ಠೇವಣಿಗಳನ್ನು ಇರಿಸಬಹುದು. ಹಿರಿಯ ನಾಗರಿಕರಿಗ ಶೇ. 3.5ರಿಂದ ಶೇ. 7.50ರವರೆಗೂ ಬಡ್ಡಿ ಸಿಗುತ್ತದೆ. 5ರಿಂದ 10 ವರ್ಷದ ಅವಧಿಗೆ ಶೇ. 7.5ರಷ್ಟು ಬಡ್ಡಿ ಸಿಗುತ್ತದೆ.

ಎಷ್ಟು ವರ್ಷಕ್ಕೆ ಹಣ ದ್ವಿಗುಣಗೊಳ್ಳುತ್ತದೆ?

ವೀಕೇರ್ ಎಫ್​ಡಿ ಸ್ಕೀಮ್​ನಲ್ಲಿ 10 ವರ್ಷಕ್ಕೆ 1 ಲಕ್ಷ ರೂ ಠೇವಣಿ ಇರಿಸಿದರೆ ಬಡ್ಡಿಯ ಮೊತ್ತ 1,10,235 ರೂ ಆಗುತ್ತದೆ. ಕೊನೆಯಲ್ಲಿ ನಿಮಗೆ 2,10,235 ರೂ ಸಿಗುತ್ತದೆ. 10 ವರ್ಷದಲ್ಲಿ ಹಣ ಡಬಲ್ ಆಗಿರುತ್ತದೆ.

ಇದನ್ನೂ ಓದಿ: LIC Kanyadan Scheme: ಎಲ್​ಐಸಿ ಕನ್ಯಾದಾನ್ ಪಾಲಿಸಿ: ಹೆಣ್ಮಕ್ಕಳ ಓದು ಮತ್ತು ಮದುವೆ ಖರ್ಚಿಗೆ ಉತ್ತಮ ಸ್ಕೀಮ್

ಎಸ್​ಬಿಐನ ಸರ್ವೋತ್ತಮ್​ನಲ್ಲಿ ಬಡ್ಡಿ ಇನ್ನೂ ಹೆಚ್ಚು

ಎಸ್​ಬಿಐನಲ್ಲಿ ಮೂರು ವಿಶೇಷ ಎಫ್​ಡಿ ಸ್ಕೀಮ್​ಗಳಿವೆ. ಅಮೃತ್ ಕಳಶ್, ಸರ್ವೋತ್ತಮ್ ಮತ್ತು ವೀ ಕೇರ್. ಈ ಪೈಕಿ ಎಸ್​ಬಿಐ ಸರ್ವೋತ್ತಮ್ ಎಫ್​ಡಿ ಸ್ಕೀಮ್​ನಲ್ಲಿ ಹಿರಿಯ ನಾಗರಿಕರಿಗೆ ಶೇ. 7.9ರವರೆಗೂ ವಾರ್ಷಿಕ ಬಡ್ಡಿ ಸಿಗುತ್ತದೆ. ಅಮೃತ್ ಕಳಶ್ ಸ್ಕೀಮ್​ನಲ್ಲಿ ಶೇ. 7.6ರವರೆಗೂ ಬಡ್ಡಿ ಸಿಗುತ್ತದೆ.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ