Post Office Schemes: ಪೋಸ್ಟ್ ಆಫೀಸ್ ಸ್ಕೀಮ್ಗಳ ಬಗ್ಗೆ ಕುತೂಹಲವಾ? ಇಲ್ಲಿದೆ ವಿವಿಧ ಯೋಜನೆಗಳು, ಬಡ್ಡಿ ದರಗಳ ವಿವರ
PO Savings Tools: ಹಲವು ಅಂಚೆ ಕಚೇರಿ ಯೋಜನೆಗಳು ಜನಪ್ರಿಯವಾಗಿವೆ. ಉಳಿತಾಯಕ್ಕೆ, ಹೂಡಿಕೆಗೆ ಮತ್ತು ನಿವೃತ್ತಿಗೂ ಕೂಡ ಹೇಳಿಮಾಡಿಸಿದ ಕೆಲ ಸ್ಕೀಮ್ಗಳನ್ನು ಪೋಸ್ಟ್ ಆಫೀಸ್ ಮೂಲಕ ನಡೆಸಲಾಗುತ್ತಿದೆ. ಕೆವಿಪಿ, ಎಸ್ಎಸ್ಸಿ, ಪೋಸ್ಟ್ ಆಫೀಸ್ ಟಿಡಿ, ಎಸ್ಸಿಎಸ್ಎಸ್ ಇತ್ಯಾದಿ ಇವೆ.
ಭಾರತದ ಅಂಚೆ ಕಚೇರಿ (India Post) ವ್ಯವಸ್ಥೆ ಅದು ಕಂಡಿರುವ ಪರಿವರ್ತನೆ ಬಗ್ಗೆ ಯೂನಿವರ್ಸಲ್ ಪೋಸ್ಟಲ್ ಯೂನಿಯನ್ (Universal Postal Union) ಮುಖ್ಯಸ್ಥರು ಮೆಚ್ಚುಗೆ ವ್ಯಕ್ತಪಡಿಸಿ, ಅದು ವಿಶ್ವದ ಇತರ ದೇಶಗಳ ಅಂಚೆ ಕಚೇರಿಗಳಿಗೆ ಮಾದರಿಯಾಗಿದೆ ಎಂದು ಹೇಳಿದ್ದಾರೆ. ಇಮೇಲ್ ಬಂದ ಬಳಿಕ ಸಾಕಷ್ಟು ವ್ಯವಹಾರ ಕುಸಿತ ಕಾಣಲಿದ್ದ ಪೋಸ್ಟ್ ಆಫೀಸ್ ವ್ಯವಸ್ಥೆಗೆ ಸರ್ಕಾರ ಹೊಸ ಹೊಣೆಗಾರಿಕೆಗಳನ್ನು ಕೊಟ್ಟು ಪರಿವರ್ತನೆ ಮಾಡಿದೆ. ಇವತ್ತು ಅಂಚೆ ಕಚೇರಿಯಲ್ಲಿ ವಿವಿಧ ಉಳಿತಾಯ ಯೋಜನೆಗಳು ಚಾಲ್ತಿಯಲ್ಲಿವೆ. ಅಂಚೆ ಕಚೇರಿಗಳ ಮುಂದೆ ಸಾಕಷ್ಟು ಜನರು ಜಮಾಯಿಸಿರುವುದನ್ನು ನೀವು ನೋಡಿರಬಹುದು. ಅದರ ಜನಾಕರ್ಷಣೆಗೆ ಉಳಿತಾಯ ಯೋಜನೆಗಳೇ (Savings Schemes) ಕಾರಣ. ಅಂಚೆ ಕಚೇರಿಯೇ ಎಕ್ಸ್ಕ್ಲೂಸಿವ್ ಆಗಿ ರೂಪಿಸಿರುವ ಆರೇಳು ಪ್ರಮುಖ ಸೇವಿಂಗ್ ಮತ್ತು ಇನ್ವೆಸ್ಟ್ಮೆಂಟ್ ಸ್ಕೀಮ್ಗಳಿವೆ. ಕೇಂದ್ರ ಹಣಕಾಸ ಸಚಿವಾಲಯದ ಭಾಗವಾಗಿರುವ ನ್ಯಾಷನಲ್ ಸೇವಿಂಗ್ಸ್ ಇನ್ಸ್ಟಿಟ್ಯೂಟ್ ಸಂಸ್ಥೆ ಮತ್ತು ಇಂಡಿಯಾ ಪೋಸ್ಟ್ ಸಹಭಾಗಿತ್ವದಲ್ಲಿ ಈ ಯೋಜನೆಗಳನ್ನು ನಡೆಸುತ್ತದೆ. ಇವುಗಳ ಲಾಭ ಏನು ಎಂಬ ಕುರಿತು ಒಂದಷ್ಟು ವಿವರ ಇಲ್ಲಿದೆ…
ಪೋಸ್ಟ್ ಆಫೀಸ್ ಸೇವಿಂಗ್ಸ್ ಅಕೌಂಟ್
ಬ್ಯಾಂಕ್ ಅಕೌಂಟ್ನಂತೆ ಅಂಚೆ ಕಚೇರಿಯಲ್ಲೂ ಸೇವಿಂಗ್ಸ್ ಅಕೌಂಟ್ ತೆರೆಯಬಹುದು. ಹಾಗೇ ಸುಮ್ಮನೆ ಈ ಖಾತೆಯಲ್ಲಿ ಹಣ ಇರಿಸಿದರೆ ವರ್ಷಕ್ಕೆ ಶೇ. 4ರಷ್ಟು ಬಡ್ಡಿ ಸಿಗುತ್ತದೆ. ಈ ಬಡ್ಡಿಗೆ ತೆರಿಗೆ ಕಡಿತವೂ ಇರುತ್ತದೆ.
ಪೋಸ್ಟ್ ಆಫೀಸ್ ಆರ್ಡಿ
ಬ್ಯಾಂಕ್ಗಳಲ್ಲಂತೆ ಅಂಚೆ ಕಚೇರಿಗಳಲ್ಲೂ ಆರ್ಡಿ ತೆರೆಯಬಹುದು. ಐದು ವರ್ಷದ ಅರ್ಡಿಗೆ ಶೇ. 6.5ರ ವಾರ್ಷಿಕ ದರದಲ್ಲಿ ಬಡ್ಡಿ ಜಮೆ ಆಗುತ್ತದೆ. ವರ್ಷಕ್ಕೆ ಒಮ್ಮೆ ಬಡ್ಡಿ ಜಮೆ ಆಗುತ್ತಾ ಹೋಗುತ್ತದೆ.
ಇದನ್ನೂ ಓದಿ: LIC Kanyadan Scheme: ಎಲ್ಐಸಿ ಕನ್ಯಾದಾನ್ ಪಾಲಿಸಿ: ಹೆಣ್ಮಕ್ಕಳ ಓದು ಮತ್ತು ಮದುವೆ ಖರ್ಚಿಗೆ ಉತ್ತಮ ಸ್ಕೀಮ್
ಅಂಚೆ ಕಚೇರಿ ಟೈಮ್ ಡೆಪಾಸಿಟ್ ಅಕೌಂಟ್
ಬ್ಯಾಂಕ್ನಲ್ಲಿರುವ ಎಫ್ಡಿಯಂತೆ ಪೋಸ್ಟ್ ಆಫೀಸ್ನ ಎಸ್ಬಿ ಖಾತೆಯಿಂದ ಟರ್ಮ್ ಡೆಪಾಸಿಟ್ ಪ್ಲಾನ್ಗಳಿವೆ. 1ರಿಂದ 5 ವರ್ಷದ ವಿವಿಧ ಅವಧಿ ಠೇವಣಿಗೆ ಶೇ. 6.9ರಿಂದ ಶೇ. 7.5 ರವರೆಗೂ ವಾರ್ಷಿಕ ಬಡ್ಡಿ ಇದೆ. ಐದು ವರ್ಷದ ಠೇವಣಿಗೆ ಗರಿಷ್ಠ ಬಡ್ಡಿ ಸಿಗುತ್ತದೆ.
ಅಂಚೆ ಕಚೇರಿ ಮಾಸಿಕ ಆದಾಯ ಯೋಜನೆ ಖಾತೆ (MIS ಸ್ಕೀಮ್)
ಇದು ನಿಮ್ಮ ಹೂಡಿಕೆಯ ಆಧಾರದ ಮೇಲೆ ಮಾಸಿಕವಾಗಿ ಆದಾಯ ತಂದುಕೊಡುವ ಯೋಜನೆ. ಇದರಲ್ಲಿ ನೀವು ಇರಿಸುವ ಠೇವಣಿ ಹಣಕ್ಕೆ ವಾರ್ಷಿಕ 7.40ರ ದರದಲ್ಲಿ ಬಡ್ಡಿ ಸಿಗುತ್ತದೆ. ಬಡ್ಡಿ ಹಣವನ್ನು ಪ್ರತೀ ತಿಂಗಳು ಹಿಂಪಡೆಯಬಹುದು. ಈ ಮೂಲಕ ಮಾಸಿಕ ಆದಾಯ ಸೃಷ್ಟಿಸಿಕೊಳ್ಳಬಹುದು.
ಸೀನಿಯರ್ ಸಿಟಿಜನ್ ಸೇವಿಂಗ್ಸ್ ಸ್ಕೀಮ್ (ಎಸ್ಸಿಎಸ್ಎಸ್)
ಇದು ಪಿಂಚಣಿ ಕೊಡುವ ನಿವೃತ್ತಿ ಯೋಜನೆ. ಇದಕ್ಕೆ ವಾರ್ಷಿಕ ಬಡ್ಡಿ ದರ ಸದ್ಯ ಶೇ. 8.2ರಷ್ಟು ಇದೆ.
ಪಬ್ಲಿಕ್ ಪ್ರಾವಿಡೆಂಟ್ ಫಂಡ್ (ಪಿಪಿಎಫ್)
ಇದು ಬಹಳ ಜನಪ್ರಿಯವಾಗಿರುವ ಹೂಡಿಕೆ ಯೋಜನೆ. ಇದಕ್ಕೆ ಸಿಗುವ ವಾರ್ಷಿಕ ಬಡ್ಡಿ ದರ ಶೇ. 7.1ರಷ್ಟಿದೆ. ಬಡ್ಡಿಗೆ ಯಾವ ತೆರಿಗೆ ಕಡಿತವೂ ಇರುವುದಿಲ್ಲ. ಜೊತೆಗೆ, ಸೆಕ್ಷನ್ 80ಸಿ ಅಡಿಯಲ್ಲಿ ವರ್ಷಕ್ಕೆ 1.5 ಲಕ್ಷ ರೂವರೆಗೂ ಟ್ಯಾಕ್ಸ್ ಡಿಡಕ್ಷನ್ಗೆ ಈ ಹೂಡಿಕೆಯನ್ನು ಬಳಸಬಹುದು. ಪಿಪಿಎಫ್ ಯೋಜನೆ 15 ವರ್ಷದ ಅವಧಿಯದ್ದಾಗಿರುತ್ತದೆ.
ನ್ಯಾಷನಲ್ ಸೇವಿಂಗ್ಸ್ ಸರ್ಟಿಫಿಕೇಟ್ (ಎನ್ಎಸ್ಸಿ)
ಎನ್ಎಸ್ಸಿ ಸ್ಕೀಮ್ನಲ್ಲಿ ನೀವು ಐದು ವರ್ಷ ಕಾಲ ಠೇವಣಿ ಇಡಬಹುದು. ವರ್ಷಕ್ಕೆ ಶೇ. 7.7ರಷ್ಟು ಬಡ್ಡಿ ಸಿಗುಗ್ತದೆ.
ಕಿಸಾನ್ ವಿಕಾಸ್ ಪತ್ರ (ಕೆವಿಪಿ)
ಇದು ಬಹಳ ಸುರಕ್ಷಿತವಾಗಿರುವ ಸೇವಿಂಗ್ ಸ್ಕೀಮ್. ಕಿಸಾನ್ ವಿಕಾಸ್ ಪತ್ರದ ಹೂಡಿಕೆಗೆ ವರ್ಷಕ್ಕೆ ಶೇ. 7ರಷ್ಟು ಬಡ್ಡಿ ನಿಗದಿ ಮಾಡಲಾಗಿದೆ. ಕೆವಿಪಿ ಕೂಡ ಬಹಳ ಜನಪ್ರಿಯವಾಗಿರುವ ಸ್ಕೀಮ್.
ಸುಕನ್ಯ ಸಮೃದ್ಧಿ ಯೋಜನೆ (ಎಸ್ಎಸ್ಎ)
ಇದು 10 ವರ್ಷದೊಳಗಿನ ವಯಸ್ಸಿನ ಬಾಲಕಿಯರ ಹೆಸರಿನಲ್ಲಿ ಪಡೆಯಬಹುದಾದ ಯೋಜನೆ. ಹೆಣ್ಮಗುವಿನ ಓದು ಮತ್ತು ವಿವಾಹಕ್ಕೆ ಸಹಾಯವಾಗಲೆಂದು ಇದನ್ನು ರೂಪಿಸಲಾಗಿದೆ. ಇದಕ್ಕೆ ಬಡ್ಡಿ ದರ ಶೇ. 8ರಷ್ಟಿದೆ. ವರ್ಷಕ್ಕೊಮ್ಮೆ ಬಡ್ಡಿ ಹಣವನ್ನು ಠೇವಣಿ ಮೊತ್ತಕ್ಕೆ ಜಮೆಯಾಗುತ್ತದೆ.
ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
