ರೆಗ್ಯುಲರ್ ಬ್ಯಾಂಕಿಂಗ್ ಲೈಸೆನ್ಸ್ ಪಡೆಯಲು ಅರ್ಹ ಸ್ಮಾಲ್ ಫೈನಾನ್ಸ್ ಬ್ಯಾಂಕ್​ಗಳಿಗೆ ಆರ್​ಬಿಐ ಆಹ್ವಾನ

ನವದೆಹಲಿ, ಏಪ್ರಿಲ್ 28: ರೆಗ್ಯುಲರ್ ಬ್ಯಾಂಕ್ ಅಥವಾ ಸಾರ್ವತ್ರಿಕ ಬ್ಯಾಂಕ್ ಆಗಿ ಬದಲಾಗಲು ಸ್ಮಾಲ್ ಫೈನಾನ್ಸ್ ಬ್ಯಾಂಕ್​ಗಳಿಂದ (small finance bank) ಆರ್​ಬಿಐ ಅರ್ಜಿ ಆಹ್ವಾನಿಸಿದೆ. ಒಂದಷ್ಟು ಮಾನದಂಡಗಳಿಗೆ ತಾಳೆಯಾದರೆ ಈ ಸಣ್ಣ ಬ್ಯಾಂಕುಗಳು ರೆಗ್ಯುಲರ್ ಬ್ಯಾಂಕಿಂಗ್ ಲೈಸೆನ್ಸ್ ಪಡೆಯಬಹುದು. ನಿವ್ವಳ ಮೌಲ್ಯ ಕನಿಷ್ಠ ಒಂದು ಸಾವಿರ ಕೋಟಿ ರೂ ಇರುವುದು ಈ ಪ್ರಮುಖ ಮಾನದಂಡಗಳಲ್ಲಿ ಒಂದು. ಭಾರತದಲ್ಲಿ 10ಕ್ಕೂ ಹೆಚ್ಚು ಸ್ಮಾಲ್ ಫೈನಾನ್ಸ್ ಬ್ಯಾಂಕುಗಳಿವೆ. ಉಜ್ಜೀವನ್ ಸ್ಮಾಲ್ ಫೈನಾನ್ಸ್ ಬ್ಯಾಂಕ್, ಎಯು ಸ್ಮಾಲ್ ಫೈನಾನ್ಸ್ ಬ್ಯಾಂಕ್, ಈಕ್ವಿಟಾಸ್ ಸ್ಮಾಲ್ ಫೈನಾನ್ಸ್ ಬ್ಯಾಂಕ್ ಮೊದಲಾದವು ಇವೆ.

ರೆಗ್ಯುಲರ್ ಬ್ಯಾಂಕ್ ಆಗಲು ಸ್ಮಾಲ್ ಫೈನಾನ್ಸ್ ಬ್ಯಾಂಕ್​ಗಳಿಗೆ ನಿಗದಿ ಮಾಡಲಾಗಿರುವ ಪ್ರಮುಖ ಮಾನದಂಡಗಳಿವು…

• ಸ್ಮಾಲ್ ಫೈನಾನ್ಸ್ ಬ್ಯಾಂಕು ಅಧಿಕೃತ ಷೇರು ವಿನಿಮಯ ಕೇಂದ್ರ ಅಥವಾ ಸ್ಟಾಕ್ ಎಕ್ಸ್​ಚೇಂಜ್​ನಲ್ಲಿ ಲಿಸ್ಟ್ ಆಗಿರಬೇಕು. ಅಂದರೆ ಬಿಎಸ್​ಇ ಅಥವಾ ಎನ್​ಎಸ್​ಇಯಲ್ಲಿ ಲಿಸ್ಟ್ ಆಗಿರಬೇಕು
• ಹಿಂದಿನ ತ್ರೈಮಾಸಿಕ ಅವಧಿಯಲ್ಲಿ ಅದರ ನಿವ್ವಳ ಮೌಲ್ಯ 1,000 ಕೋಟಿ ರೂನಷ್ಟಾದರೂ ಇರಬೇಕು.
• ಕಳೆದ ಎರಡು ಹಣಕಾಸು ವರ್ಷದಲ್ಲಿ ಸ್ಮಾಲ್ ಫೈನಾನ್ಸ್ ಬ್ಯಾಂಕ್​ನ ಒಟ್ಟು ಅನುತ್ಪಾದಕ ಆಸ್ತಿ ಅಥವಾ ಜಿಎನ್​ಪಿಎ ಶೇ. 3 ಮೀರಿರಬಾರದು. ನಿವ್ವಳ ಎನ್​ಪಿಎ ಶೇ. 1ಕ್ಕಿಂತ ಕಡಿಮೆ ಇರಬೇಕು.
• ಕನಿಷ್ಠ ಐದು ವರ್ಷವಾದರೂ ಸಮಾಧಾನಕರ ಸಾಧನೆ ಹೊಂದಿರಬೇಕು.
• ನಷ್ಟ ಭರಿಸುವಷ್ಟು ಸಾಮರ್ಥ್ಯವನ್ನು ಬಿಂಬಿಸುವಂತಹ ಸಿಆರ್​ಎಆರ್ ಅಥವಾ ಸಿಎಆರ್ (ಕ್ಯಾಪಿಟಲ್ ಅಡಿಕ್ವೆಸಿ ರೇಶಿಯೋ) ಸಮರ್ಪಕವಾಗಿರಬೇಕು.

ಇದನ್ನೂ ಓದಿ: ಭಾರತದಲ್ಲಿ ಗೃಹಸಾಲ ದುಂದು ವೆಚ್ಚವಾಗುತ್ತಿದೆ, ನಿಯಂತ್ರಣ ಮಾಡಲು ಬ್ಯಾಂಕ್​​ಗಳಿಗೆ ಆರ್​​ಬಿಐ ಎಚ್ಚರಿಕೆ

ಇನ್ನು, ಷೇರುಪಾಲುದಾರಿಕೆಯ ವಿಧಾನದ ಬಗ್ಗೆ ಆರ್​ಬಿಐನಲ್ಲಿ ಒಂದು ನಿಯಮ ಇದೆ. ಸ್ಮಾಲ್ ಫೈನಾನ್ಸ್ ಬ್ಯಾಂಕ್​ವೊಂದು ರೆಗ್ಯುಲರ್ ಬ್ಯಾಂಕ್ ಆಗಿ ಪರಿವರ್ತನೆ ಆಗುವಾಗ ಅದಕ್ಕೆ ಹೊಸ ಪ್ರೊಮೋಟರ್ಸ್ ಸೇರ್ಪಡೆಯಾಗುವಂತಿಲ್ಲ. ಅಥವಾ ಇರುವ ಪ್ರೊಮೋಟರ್ಸ್​ನಲ್ಲಿ ಬದಲಾವಣೆ ಮಾಡುವಂತಿಲ್ಲ.

ಇಲ್ಲಿ ಪ್ರೊಮೋಟರ್ಸ್ ಎಂದರೆ ಕಂಪನಿಯ ಸಂಸ್ಥಾಪಕ ವರ್ಗಕ್ಕೆ ಸೇರಿದವರು. ಅಂದರೆ ಮಾಲೀಕರಾಗಿರಬಹುದು. ಸ್ಮಾಲ್ ಫೈನಾನ್ಸ್ ಬ್ಯಾಂಕ್​ನಲ್ಲಿ ನಿರ್ದಿಷ್ಟ ಪ್ರೊಮೋಟರ್ಸ್ ಇರಲೇಬೇಕೆಂದು ಕಡ್ಡಾಯ ಏನಿರುವುದಿಲ್ಲ.

2019ರಲ್ಲೇ ಸ್ಮಾಲ್ ಫೈನಾನ್ಸ್ ಬ್ಯಾಂಕ್​ಗಳಿಗೆ ಯೂನಿವರ್ಸಲ್ ಬ್ಯಾಂಕ್ ಆಗಿ ಪರಿವರ್ತನೆಯಾಗಲು ದಾರಿ ತೆರೆಯಲಾಗಿತ್ತು. ಅದಕ್ಕೆ ಬೇಕಾದ ಮಾನದಂಡಗಳಿಗೆ ಬದ್ಧವಾಗಲು ಕಾಲಾವಕಾಶವನ್ನೂ ಕೊಡಲಾಗಿದೆ. ಈಗ ಅರ್ಹ ಎಸ್​ಎಫ್​ಬಿಗಳು ರೆಗ್ಯುಲರ್ ಬ್ಯಾಂಕ್ ಆಗಿ ಅರ್ಜಿ ಹಾಕಬಹುದಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ