Repo Rate: ಆರ್​ಬಿಐ ರೆಪೋ ದರ ಶೇ 4 ಹಾಗೂ ರಿವರ್ಸ್ ರೆಪೋ ದರ ಶೇ 3.35ರಲ್ಲಿ ಮುಂದುವರಿಕೆ

ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದ (Reserve Bank Of India) ಗವರ್ನರ್ ಆದ ಶಕ್ತಿಕಾಂತ ದಾಸ್ (Shaktikanta Das) ಶುಕ್ರವಾರ ಹಣಕಾಸು ನೀತಿಯನ್ನು ಪ್ರಕಟಿಸಿದ್ದು, ರೆಪೋದರವನ್ನು ಶೇ 4ರಲ್ಲಿ ಹಾಗೂ ರಿವರ್ಸ್​ ರೆಪೋ ದರವನ್ನು ಶೇ 3.35ರಲ್ಲಿ ಮತ್ತು ಬ್ಯಾಂಕ್​ ದರವನ್ನು ಶೇ 4.25ರಲ್ಲಿ ಮುಂದುವರಿಸಲು ನಿರ್ಧಾರ ಮಾಡಿದ್ದಾರೆ. ಆರ್​ಬಿಐನಿಂದ ವಾಣಿಜ್ಯ ಬ್ಯಾಂಕ್​ಗಳಿಗೆ ನೀಡುವ ಸಾಲದ ಮೇಲೆ ಪಡೆಯುವಂಥ ಬಡ್ಡಿ ದರವನ್ನು ರೆಪೋದರ ಎನ್ನಲಾಗುತ್ತದೆ. ಇನ್ನು ವಾಣಿಜ್ಯ ಬ್ಯಾಂಕ್​ಗಳು ಆರ್​ಬಿಐ ಬಳಿ ಇಡುವ ಹಣಕ್ಕೆ ನೀಡುವ ಬಡ್ಡಿಗೆ ರಿವರ್ಸ್​ ರೆಪೋ ದರ ಎನ್ನಲಾಗುತ್ತದೆ. ಈಗ ಇವೆರಡರಲ್ಲೂ ಯಾವುದೇ ಬದಲಾವಣಣೆ ಮಾಡದೆ ಹಾಗೇ ಉಳಿಸಿಕೊಂಡಿರುವುದರಿಂದ ಭವಿಷ್ಯದಲ್ಲಿ ಆರ್ಥಿಕ ಸ್ಥಿತಿ ನೋಡಿಕೊಂಡು ಏರಿಕೆಯನ್ನೋ ಇಳಿಕೆಯನ್ನೋ ಮಾಡುವುದಕ್ಕೆ ಅವಕಾಶ ಇರುತ್ತದೆ. ಅದನ್ನು “Accomdative Stance” ಎನ್ನಲಾಗುತ್ತದೆ. ಬಡ್ಡಿ ದರದಲ್ಲಿ ಯಾವುದೇ ಬದಲಾವಣೆ ಆಗುವುದಿಲ್ಲ ಎಂಬ ನಿರೀಕ್ಷೆಯೇ ವ್ಯಾಪಕವಾಗಿತ್ತು. ಈಗ ಅದಕ್ಕೆ ಪೂರಕವಾಗಿಯೇ ಪ್ರಕಟಣೆ ಬಂದಿದೆ.

ಕೊವಿಡ್-19 ಬಿಕ್ಕಟ್ಟಿನಿಂದ ಸಂಕಷ್ಟಕ್ಕೆ ಸಿಲುಕಿರುವ ಆರ್ಥಿಕತೆಗೆ ಬೆಂಬಲ ನೀಡುವ ಸಲುವ Accomdative Stance ಮುಂದುವರಿಸುವುದಾಗಿ ಹಣಕಾಸು ನೀತಿ ಸಮಿತಿ (Monetary Policy Committee)ಯಿಂದ ತಿಳಿಸಲಾಗಿದೆ. ಇನ್ನು ಆರ್​ಬಿಐನಿಂದ ಸರ್ಕಾರಿ ಸೆಕ್ಯೂರಿಟಿಗಳ ಮಾರಾಟ GSAP ಆಗಸ್ಟ್​ 12 ಮತ್ತು 28ರಂದು ಆಯೋಜಿಸಲಾಗುವುದು. ಇದು ಯಶಸ್ವಿ ಆಗುವ ನಿರೀಕ್ಷೆ ಇದೆ ಎನ್ನಲಾಗಿದೆ. 2021-22ರ ಹಣಕಾಸು ವರ್ಷಕ್ಕೆ ಗ್ರಾಹಕ ದರ ಹಣದುಬ್ಬರವನ್ನು ಶೇ 5.7ಕ್ಕೆ ಅಂದಾಜು ಮಾಡಲಾಗಿದೆ. ಇನ್ನು ಜಿಡಿಪಿಯನ್ನು ಶೇ 9.5ಕ್ಕೆ ಅಂದಾಜಿಸಲಾಗಿದೆ.

ರಿಸರ್ವ್ ಬ್ಯಾಂಕ್ ಗವರ್ನರ್​ ತಿಳಿಸಿದಂತೆ, ನಿರೀಕ್ಷೆಯಂತೆಯೇ ಆರ್ಥಿಕ ಚಟುವಟಿಕೆಯಲ್ಲಿ ಚೇತರಿಕೆ ಕಾಣಿಸಿಕೊಂಡಿದೆ. ಮೇ ತಿಂಗಳಲ್ಲಿ ಅಚ್ಚರಿ ರೀತಿಯಲ್ಲಿ ಗ್ರಾಹಕ ದರ ಸೂಚ್ಯಂಕವು ಮೇಲ್ಮಟ್ಟದಲ್ಲಿತ್ತು. ಆಹಾರ ಪದಾರ್ಥಗಳ ಬೆಲೆಯಲ್ಲಿ ಹೆಚ್ಚಿನ ಏರಿಳಿತ ಕಂಡಿದ್ದರಿಂದ ಜುಲೈನಲ್ಲಿ ಖಾದ್ಯ ತೈಲ, ಬೇಳೆಕಾಳುಗಳಲ್ಲಿ ಬದಲಾವಣೆಗೆ ಕಾರಣ ಆಗಿದೆ. ಸರಾಸರಿ ಬೇಡಿಕೆ ಬಾಹ್ಯವಾಗಿ ನೋಡಿದಾಗ ಚೇತರಿಕೆ ಕಾಣಿಸಿಕೊಳ್ಳುತ್ತಿದೆ. ಹಲವು ವಲಯಗಳಲ್ಲಿ ಪೂರೈಕೆ ಮತ್ತ ಬೇಡಿಕೆ ಮತ್ತೆ ಯಥಾ ಸ್ಥಿತಿಗೆ ಬರಲು ಇನ್ನೂ ಹೆಚ್ಚಿನದನ್ನು ಮಾಡಬೇಕು ಎಂದು ಶಕ್ತಿಕಾಂತ ದಾಸ್ ಹೇಳಿದ್ದಾರೆ.

ಇದನ್ನೂ ಓದಿ: Unclaimed Deposits: ಬ್ಯಾಂಕ್​ಗಳು, ಇನ್ಷೂರೆನ್ಸ್​ ಕಂಪೆನಿಗಳಲ್ಲಿ ಇರುವ ಜನರ ಅನ್​ಕ್ಲೇಮ್ಡ್​ ಮೊತ್ತ 49 ಸಾವಿರ ಕೋಟಿ ರೂಪಾಯಿ

(RBI Keep Repo Rate At 4 Percent And Reverse Repo Rate At 3.35 Percent Unchanged)

Published On - 10:23 am, Fri, 6 August 21