ಸೆಪ್ಟೆಂಬರ್ನಲ್ಲಿ ಹಣದುಬ್ಬರ ಕೇವಲ ಶೇ 1.54; ಎಂಟು ವರ್ಷದಲ್ಲೇ ಅತ್ಯಂತ ಕಡಿಮೆ ಬೆಲೆ ಏರಿಕೆ ಮಟ್ಟ
Retail Inflation in 2025 September decreases to 1.54%: 2025ರ ಸೆಪ್ಟೆಂಬರ್ ತಿಂಗಳಲ್ಲಿ ಸಿಪಿಐ ಆಧಾರಿತ ರೀಟೇಲ್ ಹಣದುಬ್ಬರ ಶೇ. 1.54 ಇದೆ ಎಂದು ರಾಷ್ಟ್ರೀಯ ಸಾಂಖ್ಯಿಕ ಕಚೇರಿ ವರದಿಯಲ್ಲಿ ಹೇಳಿದೆ. ಆಗಸ್ಟ್ ತಿಂಗಳಲ್ಲಿ ಹಣದುಬ್ಬರ ಶೇ. 2.07 ಇತ್ತು. ಸೆಪ್ಟೆಂಬರ್ನಲ್ಲಿ 67 ಮೂಲಾಂಕಗಳಷ್ಟು ಕಡಿಮೆ ಆಗಿದೆ. ಆಹಾರವಸ್ತುಗಳ ಬೆಲೆ ಗಣನೀಯವಾಗಿ ಇಳಿಕೆ ಆಗುತ್ತಿರುವುದು ರೀಟೇಲ್ ಇನ್ಫ್ಲೇಶನ್ ತಗ್ಗಲು ಪ್ರಮುಖ ಕಾರಣವಾಗಿದೆ.
Updated on: Oct 13, 2025 | 5:10 PM
ನವದೆಹಲಿ, ಅಕ್ಟೋಬರ್ 13: ರೀಟೇಲ್ ಹಣದುಬ್ಬರ (Inflation) ಸೆಪ್ಟೆಂಬರ್ನಲ್ಲಿ ಶೇ. 1.54 ಎಂದು ದಾಖಲಾಗಿದೆ. ಇದು ಆರ್ಬಿಐನ ಹಣದುಬ್ಬರ ತಾಳಿಕೆ ಮಿತಿಗಿಂತ ಕೆಳಗೆ ಇದೆ. 2017ರ ಜೂನ್ ನಂತರ ಯಾವುದೇ ತಿಂಗಳಲ್ಲೂ ಇಷ್ಟು ಕಡಿಮೆ ಹಣದುಬ್ಬರ ದಾಖಲಾಗಿರಲಿಲ್ಲ. ಎಂಟು ವರ್ಷಗಳಲ್ಲೇ ಇದು ಅತ್ಯಂತ ಕಡಿಮೆ ಬೆಲೆ ಏರಿಕೆ ಮಟ್ಟವಾಗಿದೆ. ಹಿಂದಿನ ತಿಂಗಳಾದ ಆಗಸ್ಟ್ಗಿಂತ ಬರೋಬ್ಬರಿ 53 ಬೇಸಿಸ್ ಪಾಯಿಂಟ್ಗಳಷ್ಟು ಹಣದುಬ್ಬರ ಸೆಪ್ಟೆಂಬರ್ನಲ್ಲಿ ತಗ್ಗಿದೆ.
ಆಗಸ್ಟ್ನಲ್ಲಿ ಹಣದುಬ್ಬರ ಶೇ. 2.07 ಇತ್ತು. ಸೆಪ್ಟೆಂಬರ್ನಲ್ಲಿ ಇನ್ಫ್ಲೇಶನ್ ಶೇ. 2ರ ಗಡಿಗಿಂತ ಕೆಳಗೆ ಇಳಿಯಬಹುದು ಎಂದು ಹೆಚ್ಚಿನ ಆರ್ಥಿಕ ತಜ್ಞರು ನಿರೀಕ್ಷಿಸಿದ್ದರು. ಆದರೆ, ಅವರ ನಿರೀಕ್ಷೆಗಿಂತ ಹೆಚ್ಚಿನ ಮಟ್ಟದಲ್ಲಿ ಹಣದುಬ್ಬರ ತಗ್ಗಿರುವುದು ಗಮನಾರ್ಹ.
ಇದನ್ನೂ ಓದಿ: ದೇಶದ ಆರ್ಥಿಕ ಗಾತ್ರಕ್ಕೆ ಸಮನಾಗಿದೆ ಭಾರತೀಯರ ಬಳಿ ಇರುವ ಚಿನ್ನದ ಮೌಲ್ಯ
2022ರಲ್ಲಿ ಶೇ. 7ಕ್ಕಿಂತಲೂ ಹೆಚ್ಚಿನ ಮಟ್ಟದ ಹಣದುಬ್ಬರ ಸ್ಥಿತಿ ಇತ್ತು. ಆರ್ಬಿಐನ ರಿಪೋ ದರ ಏರಿಕೆ ಪರಿಣಾಮ, ಅನುಕೂಲಕರ ಹವಾಮಾನ, ಉತ್ತಮ ಕೃಷಿ ಫಸಲು ಇತ್ಯಾದಿ ಕಾರಣಗಳಿಂದ ಹಣದುಬ್ಬರ ಸತತವಾಗಿ ಕಡಿಮೆಗೊಳ್ಳುತ್ತಾ ಬಂದಿದೆ. ಹಣದುಬ್ಬರವನ್ನು ಶೇ. 4ಕ್ಕೆ ಕಟ್ಟಿ ನಿಲ್ಲಿಸಬೇಕೆಂದು ಸರ್ಕಾರವು ಆರ್ಬಿಐಗೆ ನಿರ್ದೇಶನ ನೀಡಿದೆ. ಈ ನಿಟ್ಟಿನಲ್ಲಿ ಆರ್ಬಿಐ ಬಹುತೇಕ ಯಶಸ್ವಿಯಾಗಿದೆ. ತನ್ನ ಗುರಿ ಈಡೇರಿಕೆಗೆ ಆರ್ಬಿಐ ಶೇ. 2ರಿಂದ 6 ಅನ್ನು ಹಣದುಬ್ಬರದ ತಾಳಿಕೆ ಮಿತಿಯಾಗಿ ನಿಗದಿ ಮಾಡಿದೆ. ಹಲವು ತಿಂಗಳ ಬಳಿಕ ಮೊದಲ ಬಾರಿಗೆ ಈ ತಾಳಿಕೆ ಶ್ರೇಣಿಯಿಂದ ಹಣದುಬ್ಬರ ಹೊರಗಿದೆ.
ಸೆಪ್ಟೆಂಬರ್ನಲ್ಲಿ ಹಣದುಬ್ಬರ ಗಣನೀಯವಾಗಿ ಕಡಿಮೆ ಆಗಲು ಪ್ರಮುಖ ಕಾರಣ ಎಂದರೆ ಆಹಾರವಸ್ತುಗಳ ಬೆಲೆ ಇಳಿಕೆ. ರೀಟೇಲ್ ಹಣದುಬ್ಬರದ ಲೆಕ್ಕಾಚಾರದಲ್ಲಿ ಆಹಾರವಸ್ತುಗಳ ಬೆಲೆಗೆ ಅರ್ಧದಷ್ಟು ತೂಕ ಇರುತ್ತದೆ. ಈ ಆಯ್ದ ಆಹಾರವಸ್ತುಗಳ ಸರಾಸರಿ ಬೆಲೆ ಸೆಪ್ಟೆಂಬರ್ನಲ್ಲಿ ಮೈನಸ್ 2.28 ಇತ್ತು. ಅಂದರೆ, ಹಿಂದಿನ ವರ್ಷದಕ್ಕೆ ಹೋಲಿಸಿದರೆ ಇವುಗಳ ಬೆಲೆ ಕಡಿಮೆ ಆಗಿದೆ.
ಇದನ್ನೂ ಓದಿ: ಜಿಡಿಪಿ ಸಾಲ ಅನುಪಾತ 10 ವರ್ಷದಲ್ಲಿ ಶೇ. 81ರಿಂದ 71ಕ್ಕೆ ಇಳಿಕೆ: ಕೇರ್ಎಡ್ಜ್ ರೇಟಿಂಗ್ಸ್ ವರದಿ
ಆಹಾರ ವಸ್ತುಗಳ ಪೈಕಿ ತರಕಾರಿ ಬೆಲೆ ಸೆಪ್ಟೆಂಬರ್ ತಿಂಗಳಲ್ಲಿ ಶೇ. 21.38ರಷ್ಟು ಕಡಿಮೆ ಆಗಿದೆ. ಹಿಂದಿನ ತಿಂಗಳಾದ ಆಗಸ್ಟ್ನಲ್ಲಿ ಇದರ ಬೆಲೆ ಶೇ. 15.92ರಷ್ಟು ತಗ್ಗಿತ್ತು. ಎರಡು ತಿಂಗಳಲ್ಲಿ ಶೇ. 37ರಷ್ಟು ಬೆಲೆ ಕಡಿಮೆ ಆಗಿರುವುದು ಒಟ್ಟಾರೆ ಹಣದುಬ್ಬರ ಕುಸಿತಕ್ಕೆ ಕಾರಣವಾಗಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
