Stock Market: ರಷ್ಯಾ- ಉಕ್ರೇನ್ ಬಿಕ್ಕಟ್ಟಿನ ಮಧ್ಯೆ ತತ್ತರಿಸಿದ ಷೇರುಪೇಟೆ; ಸೆನ್ಸೆಕ್ಸ್ 1000ಕ್ಕೂ ಹೆಚ್ಚು ಪಾಯಿಂಟ್ಸ್ ಕುಸಿತ
ರಷ್ಯಾ- ಉಕ್ರೇನ್ ಬಿಕ್ಕಟ್ಟಿನ ಮಧ್ಯೆ ಮಾರ್ಚ್ 4ನೇ ತಾರೀಕಿನ ಶುಕ್ರವಾರದ ಆರಂಭ ಸೆಷನ್ನಲ್ಲಿ ಸೆನ್ಸೆಕ್ಸ್ 1000ಕ್ಕೂ ಹೆಚ್ಚು ಪಾಯಿಂಟ್ಸ್, ನಿಫ್ಟಿ 313 ಪಾಯಿಂಟ್ಸ್ ಕುಸಿತ ಕಂಡಿದೆ.
Updated on:Mar 04, 2022 | 10:56 AM
ರಷ್ಯಾ- ಉಕ್ರೇನ್ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಭಾರತದ ಷೇರುಪೇಟೆಯು (Stock Market) ಮಾರ್ಚ್ 4ನೇ ತಾರೀಕಿನ ಶುಕ್ರವಾರದಂದು ಬೆಳಗ್ಗೆ ವಹಿವಾಟು ಭಾರೀ ಮಟ್ಟದಲ್ಲಿ ತತ್ತರಿಸಿತು. ಬೆಳಗ್ಗೆ 10 ಗಂಟೆಯ ಹೊತ್ತಿಗೆ ಸೆನ್ಸೆಕ್ಸ್ 790.27 ಪಾಯಿಂಟ್ಸ್ ಅಥವಾ ಶೇ 1.43ರಷ್ಟು ಕುಸಿದು 54,312.41 ಪಾಯಿಂಟ್ಸ್ ಮುಟ್ಟಿದರೆ, ನಿಫ್ಟಿ 229.80 ಪಾಯಿಂಟ್ಸ್ ಅಥವಾ ಶೇ 1.39ರಷ್ಟು ನೆಲ ಕಚ್ಚಿ, 16,268.20 ಪಾಯಿಂಟ್ಸ್ ಮಟ್ಟವನ್ನು ಮುಟ್ಟಿತು. 1048 ಕಂಪೆನಿಗಳ ಷೇರು ಏರಿಕೆಯನ್ನು ದಾಖಲಿಸಿದರೆ, 1726 ಕಂಪೆನಿಗಳ ಷೇರು ಇಳಿಕೆ ಕಂಡವು. ಇನ್ನು 108 ಕಂಪೆನಿಗಳ ಷೇರುಗಳ ಬೆಲೆಯಲ್ಲಿ ಯಾವುದೇ ಬದಲಾವಣೆ ಕಂಡುಬಂದಿರಲಿಲ್ಲ. ವಲಯವಾರು ಗಮನಿಸುವುದಾದರೆ ಬಿಎಸ್ಇ ಲೋಹದ ಸೂಚ್ಯಂಕ ಒಂದನ್ನು ಹೊರತುಪಡಿಸಿ, ಉಳಿದ ಎಲ್ಲವೂ ಇಳಿಕೆಯನ್ನು ದಾಖಲಿಸಿತ್ತು. ವಾಹನ ಸೂಚ್ಯಂಕ ಅತಿ ದೊಡ್ಡ ನಷ್ಟ ಕಂಡು, ಶೇ 2.82ರಷ್ಟು ಕುಸಿತ ಕಂಡಿತು.
ಆ ನಂತರ ಬಿಎಸ್ಇ ರಿಯಾಲ್ಟಿ ಶೇ 2.01, ಬಿಎಸ್ಇ ಐಟಿ ಶೇ 1.36ರಷ್ಟು ಇಳಿಕೆ ಕಂಡಿತು. ಬಿಎಸ್ಇ ಮಿಡ್ಕ್ಯಾಪ್ ಮತ್ತು ಸ್ಮಾಲ್ಕ್ಯಾಪ್ ಕ್ರಮವಾಗಿ ಶೇ 1.36 ಮತ್ತು 0.87ರಷ್ಟು ಕುಸಿತವನ್ನು ಕಂಡಿತ್ತು. ತೈಲ ಮತ್ತು ಅನಿಲ ಸೂಚ್ಯಂಕ ಶೇ 0.64ರಷ್ಟು ಇಳಿಕೆ ಕಂಡವು. ಇನ್ನು ಅಮೆರಿಕದ ಡಾಲರ್ ವಿರುದ್ಧ ರುಪಾಯಿ ಮೌಲ್ಯ 15 ಪೈಸೆ ಇಳಿಕೆಯೊಂದಿಗೆ 76.06ರಲ್ಲಿ ಆರಂಭಗೊಂಡಿತು. ಈ ಹಿಂದಿನ ದಿನ 75.91ರಲ್ಲಿ ಕೊನೆಗೊಂಡಿತ್ತು.
ಈ ವರದಿ ಸಿದ್ಧವಾಗುವ ಹೊತ್ತಿಗೆ ಸೆನ್ಸೆಕ್ಸ್ 1000ಕ್ಕೂ ಹೆಚ್ಚು ಪಾಯಿಂಟ್ಸ್ ಮತ್ತು ನಿಫ್ಟಿ 313 ಪಾಯಿಂಟ್ಸ್ ಕುಸಿತವಾಗಿತ್ತು.
ನಿಫ್ಟಿಯಲ್ಲಿ ಏರಿಕೆ ಕಂಡ ಪ್ರಮುಖ ಷೇರುಗಳು ಮತ್ತು ಶೇಕಡಾವಾರು ಪ್ರಮಾಣ ಯುಪಿಎಲ್ ಶೇ 2.04 ಐಟಿಸಿ ಶೇ 0.62 ಟಾಟಾ ಸ್ಟೀಲ್ ಶೇ 0.12
ನಿಫ್ಟಿಯಲ್ಲಿ ಇಳಿಕೆ ಕಂಡ ಪ್ರಮುಖ ಷೇರುಗಳು ಮತ್ತು ಶೇಕಡಾವಾರು ಪ್ರಮಾಣ ಏಷ್ಯನ್ ಪೇಂಟ್ಸ್ ಶೇ -7.22 ಮಾರುತಿ ಸುಜುಕಿ ಶೇ -5.09 ಹೀರೋ ಮೋಟೋಕಾರ್ಪ್ ಶೇ -4.52 ಹಿಂದೂಸ್ತಾನ್ ಯುನಿಲಿವರ್ ಶೇ -4.35 ಐಷರ್ ಮೋಟಾರ್ಸ್ ಶೇ -4.33
ಇದನ್ನೂ ಓದಿ: Russia Ukraine War: ರಷ್ಯಾ- ಉಕ್ರೇನ್ ಕದನ; ಉಕ್ರೇನಿಯನ್ನರ ಪ್ರಸ್ತುತ ಸ್ಥಿತಿಯನ್ನು ವಿವರಿಸುತ್ತಿವೆ ಈ ಫೋಟೋಗಳು
Published On - 10:54 am, Fri, 4 March 22
