ಸ್ಟಾರ್ಲಿಂಕ್ ಇಂಟರ್ನೆಟ್ ಬೇಕೆಂದರೆ ತಿಂಗಳಿಗೆ 5,000 ರೂ ನೀಡಬೇಕಾ? ಉಪಕರಣ ವೆಚ್ಚ ಇನ್ನೂ ದುಬಾರಿ
Approximate cost of Starlink Internet service in India: ಇಲಾನ್ ಮಸ್ಕ್ ಮಾಲಕತ್ವದ ಸ್ಟಾರ್ಲಿಂಕ್ ಸೆಟಿಲೈಟ್ ಇಂಟರ್ನೆಟ್ ಸೇವೆ ಭಾರತಕ್ಕೆ ಬರುವುದು ಸನ್ನಿಹಿತವಾಗುತ್ತಿದೆ. ಯಾವುದೋ ಕುಗ್ರಾಮದ ಮೂಲೆಗೆ ಹೋದರೂ ಇದರ ಇಂಟರ್ನೆಟ್ ಸಿಗುತ್ತದೆ. ಆದರೆ, ಸ್ಟಾರ್ಲಿಂಕ್ ಇಂಟರ್ನೆಟ್ ಬೆಲೆ ಎಷ್ಟಾಗಬಹುದು? ಸದ್ಯ ಭಾರತಕ್ಕೆ ಇದರ ಸಬ್ಸ್ಕ್ರಿಪ್ಷನ್ ದರ ನಿಗದಿ ಮಾಡಲಾಗಿಲ್ಲ. ಭೂತಾನ್ನಲ್ಲಿರಿರುವ ದರ ಗಮನಿಸಿದರೆ ಭಾರತದಲ್ಲಿ ಇದರ ಮಾಸಿಕ ಸಬ್ಸ್ಕ್ರಿಪ್ಷನ್ 5,000 ರೂನಿಂದ ಆರಂಭವಾಗಬಹುದು ಎನ್ನಲಾಗುತ್ತಿದೆ.
Updated on: Mar 13, 2025 | 12:43 PM
ನವದೆಹಲಿ, ಮಾರ್ಚ್ 13: ಸ್ಪೇಸ್ಎಕ್ಸ್ ಸಂಸ್ಥೆಯ ಸ್ಟಾರ್ಲಿಂಕ್ ಸೆಟಿಲೈಟ್ ಇಂಟರ್ನೆಟ್ ಸರ್ವಿಸ್ ಭಾರತದಲ್ಲಿ ಲಭ್ಯವಾಗುತ್ತಿದೆ. ಸ್ವತಂತ್ರವಾಗಿ ಅದು ಸರ್ವಿಸ್ ನೀಡುತ್ತಿದೆ. ಜೊತೆಗೆ, ಏರ್ಟೆಲ್ ಮತ್ತು ರಿಲಾಯನ್ಸ್ ಜಿಯೋ ಜೊತೆಗೂ ಸ್ಟಾರ್ಲಿಂಕ್ ಒಪ್ಪಂದ ಮಾಡಿಕೊಂಡಿದೆ. ಸ್ಟಾರ್ಲಿಂಕ್ ಇಂಟರ್ನೆಟ್ ಬಂದರೆ ಭಾರತದ ಜಿಯೋ, ಏರ್ಟೆಲ್ ಪ್ರಾಬಲ್ಯ ನಶಿಸಿದಂತೆ ಎಂದು ಭಯ ಪಟ್ಟವರುಂಟು. ಅದರ ಇಂಟರ್ನೆಟ್ ದರ ಅಷ್ಟೊಂದು ಕಡಿಮೆ ಇರುತ್ತದಾ? ಸ್ಟಾರ್ಲಿಂಕ್ ಈಗಾಗಲೇ 30ಕ್ಕೂ ಹೆಚ್ಚು ದೇಶಗಳಲ್ಲಿ ಲಭ್ಯ ಇದೆ. ಅಲ್ಲಿರುವ ದರ ಗಮನಿಸಿದರೆ ಸ್ಟಾರ್ಲಿಂಕ್ ಅಗ್ಗದ ಬೆಲೆಗಂತೂ ಸಿಕ್ಕೋದಿಲ್ಲ. ವರ್ಷಗಳಿಂದ ಇರುವ ಇಂಟರ್ನೆಟ್ಗಿಂತ ಸ್ಟಾರ್ಲಿಂಕ್ನದ್ದು ದುಬಾರಿ ಬೆಲೆ ಎನ್ನಲಾಗುತ್ತಿದೆ.
ಭಾರತದಲ್ಲಿ ಸ್ಟಾರ್ಲಿಂಕ್ ಇನ್ನೂ ಸೇವೆ ಆರಂಭಿಸಿಲ್ಲ. ಭಾರತ ಸರ್ಕಾರದಿಂದ ಅನುಮತಿ ಪಡೆಯುವುದು ಬಾಕಿ ಇದೆ. ಅನುಮತಿ ಸಿಗುವುದು ಬಹುತೇಕ ಖಚಿತ. ಭಾರತದಲ್ಲಿ ಇದರ ಸಬ್ಸ್ಕ್ರಿಪ್ಷನ್ ದರ ಎಷ್ಟಿರಬಹುದು ಎಂಬುದು ಇನ್ನೂ ಬಹಿರಂಗವಾಗಿಲ್ಲ. ಆದರೆ, ಈಗಾಗಲೇ ಇದರ ಸರ್ವಿಸ್ ಲಭ್ಯ ಇರುವ 30ಕ್ಕೂ ಹೆಚ್ಚು ದೇಶಗಳಲ್ಲಿರುವ ದರಗಳನ್ನು ಗಮನಿಸಿ ಅಂದಾಜು ಮಾಡಬಹುದು. ಈ ಮೂವತ್ತು ದೇಶಗಳಲ್ಲಿ ಭಾರತದ ನೆರೆಯ ಭೂತಾನ್ ದೇಶವೂ ಇದೆ. ಹೀಗಾಗಿ, ಭೂತಾನ್ನಲ್ಲಿರುವ ಸ್ಟಾರ್ಲಿಂಕ್ ಸರ್ವಿಸ್ನ ದರವನ್ನು ಗಮನಿಸಿದರೆ, ಭಾರತದಲ್ಲಿ ಅದು ಯಾವ ದರದಲ್ಲಿ ಸಬ್ಸ್ಕ್ರಿಪ್ಷನ್ ನೀಡಬಹುದು ಎಂದು ಅಂದಾಜಿಸಲು ಸಾಧ್ಯವಾಗಬಹುದು.
ಭೂತಾನ್ನಲ್ಲಿ ಸ್ಟಾರ್ಲಿಂಕ್ ದರ ತಿಂಗಳಿಗೆ 3,000 ರೂನಿಂದ 4,200 ರೂ
ಭೂತಾನ್ನಲ್ಲಿ ಸ್ಟಾರ್ಲಿಂಕ್ ಎರಡು ರೀತಿಯ ಸಬ್ಸ್ಕ್ರಿಪ್ಷನ್ ಆಯ್ಕೆ ನೀಡುತ್ತದೆ. ಸ್ಟಾರ್ಲಿಂಕ್ ರೆಸಿಡೆನ್ಷಿಯಲ್ ಮತ್ತು ಸ್ಟಾರ್ಲಿಂಕ್ ರೆಸಿಡೆನ್ಷಿಯಲ್ ಲೈಟ್ ಎನ್ನುವ ಆಯ್ಕೆಗಳಿವೆ. ರೆಸಿಡೆನ್ಷಿಯಲ್ ಆಯ್ಕೆಯಲ್ಲಿ ಅನ್ಲಿಮಿಟೆಡ್ ಡಾಟಾ ಮತ್ತು ಗರಿಷ್ಠ ಇಂಟರ್ನೆಟ್ ಸಿಗುತ್ತದೆ. ಲೈಟ್ನಲ್ಲಿ ಸೀಮಿತ ಡಾಟಾ ಮತ್ತು ಇಂಟರ್ನೆಟ್ ಸ್ಪೀಡ್ ಸಿಗುತ್ತದೆ.
- ಸ್ಟಾರ್ಲಿಂಕ್ ರೆಸಿಡೆನ್ಷಿಯಲ್ ಪ್ಲಾನ್ನ ಬೆಲೆ ತಿಂಗಳಿಗೆ 4,200 ಬಿಟಿಎನ್.
- ಸ್ಟಾರ್ಲಿಂಕ್ ರೆಸಿಡೆನ್ಷಿಯಲ್ ಲೈಟ್ ಪ್ಲಾನ್ನ ಬೆಲೆ ತಿಂಗಳಿಗೆ 3,000 ಬಿಟಿಎನ್.
ಇದನ್ನೂ ಓದಿ: ಏರ್ಟೆಲ್ ಆಯ್ತು, ಈಗ ಜಿಯೋ ಕೂಡ ಸ್ಟಾರ್ಲಿಂಕ್ ಜೊತೆ ಒಪ್ಪಂದ; ಏನಿದು ಸ್ಟಾರ್ಲಿಂಕ್ ಇಂಟರ್ನೆಟ್?
ಇಲ್ಲಿ ಬಿಟಿಎನ್ ಎನ್ನುವುದು ಭೂತಾನ್ ಕರೆನ್ಸಿ ಭೂತಾನೀಸ್ ನಗುಲ್ಟ್ರುಮ್. ಭಾರತದ ರುಪಾಯಿಗೂ ಈ ಬಿಟಿಎನ್ಗೂ ಮೌಲ್ಯದಲ್ಲಿ ಹೆಚ್ಚಿನ ವ್ಯತ್ಯಾಸ ಇಲ್ಲ. ಹೀಗಾಗಿ, ರೆಸಿಡೆನ್ಷಿಯಲ್ ಪ್ಲಾನ್ ಬೆಲೆ ತಿಂಗಳಿಗೆ 4,200 ರೂ, ಹಾಗೂ ರೆಸಿಡೆನ್ಷಿಯಲ್ ಲೈಟ್ ಪ್ಲಾನ್ ಬೆಲೆ 3,000 ರೂ ಆಗುತ್ತದೆ.
ಸ್ಟಾರ್ಲಿಂಕ್ ಹಾರ್ಡ್ವೇರ್ ಬಲು ದುಬಾರಿ
ಸ್ಟಾರ್ಲಿಂಕ್ನ ಸೆಟಿಲೈಟ್ ಇಂಟರ್ನೆಟ್ ಸೇವೆ ಪಡೆಯಲು ವಿಶೇಷ ಉಪಕರಣ ಖರೀದಿಸಬೇಕು. ಎರಡು ರೀತಿಯ ಹಾರ್ಡ್ವೇರ್ ಲಭ್ಯ ಇವೆ. ಸ್ಟಾರ್ಲಿಂಕ್ ಮಿನಿ ಮತ್ತು ಸ್ಟಾರ್ಲಿಂಕ್ ಸ್ಟ್ಯಾಂಡರ್ಡ್. ಸ್ಟಾರ್ಲಿಂಕ್ ಮಿನಿ ಉಪಕರಣದ ಬೆಲೆ ಅಂದಾಜು 17,000 ರೂ ಆಗುತ್ತದೆ. ಸ್ಟಾರ್ಲಿಂಕ್ ಸ್ಟ್ಯಾಂಡರ್ಡ್ ಉಪಕರಣದ ಬೆಲೆ ಸುಮಾರು 33,000 ರೂ ಆಗಬಹುದು.
ಇದನ್ನೂ ಓದಿ: ನಿನ್ನೆ ಪ್ರಪಾತಕ್ಕೆ ಬಿದ್ದಿದ್ದ ಇಂಡಸ್ಇಂಡ್ ಬ್ಯಾಂಕ್ ಷೇರುಬೆಲೆ ಇವತ್ತು ಸಖತ್ ಏರಿಕೆ; ಬಿದ್ದಿದ್ಯಾಕೆ, ಏಳುತ್ತಿರುವುದ್ಯಾಕೆ?
ಭಾರತದಲ್ಲಿ 5,000ರಿಂದ 7,000 ರೂ ಸಬ್ಸ್ಕ್ರಿಪ್ಷನ್?
ಈ ಮೇಲಿನವು ಭೂತಾನ್ನಲ್ಲಿ ಇರುವ ಸ್ಟಾರ್ಲಿಂಕ್ ಇಂಟರ್ನೆಟ್ ಸೇವೆಯ ದರವಾಗಿದೆ. ಬೇರೆ ಕೆಲ ಪಶ್ಚಿಮ ದೇಶಗಳಲ್ಲಿ ಇದರ ಬೆಲೆ ಇನ್ನೂ ಹೆಚ್ಚಿದೆ. ಭಾರತದಲ್ಲಿ ಸ್ಟಾರ್ಲಿಂಕ್ ಬಂದಲ್ಲಿ ಭೂತಾನ್ನಲ್ಲಿರುವುದಕ್ಕಿಂತ ತುಸು ಹೆಚ್ಚಿನ ಬೆಲೆ ಇರುವ ಸಾಧ್ಯತೆ ಇದೆ ಎಂದು ಕೆಲ ವರದಿಗಳು ಹೇಳುತ್ತಿವೆ.
ಈ ವರದಿಗಳ ಪ್ರಕಾರ, ಭಾರತದಲ್ಲಿ ಸ್ಟಾರ್ಲಿಂಕ್ ಇಂಟರ್ನೆಟ್ ಸರ್ವಿಸ್ನ ಸಬ್ಸ್ಕ್ರಿಪ್ಷನ್ ತಿಂಗಳಿಗೆ 5,000 ರೂನಿಂದ 7,000 ರೂಗೆ ಲಭ್ಯ ಇರಬಹುದು. ಇದರ ಹಾರ್ಡ್ವೇರ್ ಬೆಲೆ 20,000 ರೂ ಮತ್ತು 38,000 ರೂ ಇರಬಹುದು ಎಂದು ಹೇಳಲಾಗುತ್ತಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
