ಬ್ರಿಟನ್​​ನ ಅತಿದೊಡ್ಡ ಬ್ಯಾಟರಿ ಫ್ಯಾಕ್ಟರಿ ನಿರ್ಮಿಸಲಿರುವ ಭಾರತೀಯ ಕಂಪನಿ; ಟಾಟಾ ಸನ್ಸ್​​ಗೆ 750 ಮಿಲಿಯನ್ ಪೌಂಡ್ ಸಾಲ ಸೌಲಭ್ಯ

ಲಂಡನ್, ಏಪ್ರಿಲ್ 17: ಟಾಟಾ ಗ್ರೂಪ್​​ಗೆ ಸೇರಿದ ಆಗ್ರಟಾಸ್ ಎನರ್ಜಿ ಸ್ಟೋರೇಜ್ ಸಲ್ಯೂಶನ್ಸ್ ಸಂಸ್ಥೆ (Tata Sons’ subsidiary company) ಬ್ರಿಟನ್​ನಲ್ಲಿ ಬೃಹತ್ ಬ್ಯಾಟರಿ ಮ್ಯಾನುಫ್ಯಾಕ್ಚರಿಂಗ್ ಯೂನಿಟ್ ಆರಂಭಿಸುತ್ತಿದೆ. ಇದಕ್ಕಾಗಿ ವಿವಿಧ ಬ್ಯಾಂಕುಗಳಿಂದ ಒಟ್ಟು 750 ಮಿಲಿಯನ್ ಪೌಂಡ್ (ಸುಮಾರು 8,500 ಕೋಟಿ ರೂ) ಸಾಲ ಪಡೆಯುತ್ತಿದೆ. ಸಾಲ ನೀಡಲು 15 ಬ್ಯಾಂಕುಗಳು ಸಹಿ ಹಾಕಿವೆ. ಹೀಗೆಂದು ಎಕನಾಮಿಕ್ ಟೈಮ್ಸ್ ಪತ್ರಿಕೆಯಲ್ಲಿ ವರದಿಯಾಗಿದೆ. ಈ ಬಗ್ಗೆ ಅಧಿಕೃತ ಹೇಳಿಕೆ ಅಥವಾ ಮಾಹಿತಿ ತಿಳಿದುಬಂದಿಲ್ಲ.

ಎರಡು ವರ್ಷದ ಅವಧಿಗೆ ನೀಡಲಾಗುತ್ತಿರುವ ಈ ಸಾಲಕ್ಕೆ ಬಡ್ಡಿದರ ಎಷ್ಟೆಂಬುದು ಸ್ಪಷ್ಟವಿಲ್ಲ. ಆದರೆ, ವರದಿ ಪ್ರಕಾರ ಸ್ಟರ್ಲಿಂಗ್ ಓವರ್​​ನೈಟ್ ಇಂಡೆಕ್ಸ್ ಆ್ಯವರೇಜ್ (SONA) ಪ್ರಕಾರ ಸಾಲ ವಿತರಣೆ ಆಗುತ್ತಿದೆ. ಸದ್ಯ ಈ ಸರಾಸರಿಯು ಶೇ. 4.46 ಇದೆ. ಟಾಟಾ ಸನ್ಸ್​​ಗೆ ಸಿಗುವ ಸಾಲಕ್ಕೆ ಬಡ್ಡಿಯನ್ನು ಇದೇ ಬೆಂಚ್​​ಮಾರ್ಕ್ ಪ್ರಕಾರ ವಿಧಿಸಬಹುದು ಎನ್ನಲಾಗಿದೆ.

ಟಾಟಾ ಸನ್ಸ್​​ಗೆ ಸಿಕ್ಕಿರುವ ಈ ಸಾಲದ ಹಣವು ಸ್ಟರ್ಲಿಂಗ್ ಪೌಂಡ್ ಕರೆನ್ಸಿಯದ್ದೇ ಇರಲಿದೆ. ಭಾರತೀಯ ಕಂಪನಿಗಳು ಪಡೆದ ಮೂರು ಅತಿದೊಡ್ಡ ಫಾರೀನ್ ಕರೆನ್ಸಿ ಲೋನ್​​ಗಳಲ್ಲಿ ಟಾಟಾ ಸನ್ಸ್​ದೂ ಒಂದು ಎಂದು ಹೇಳಲಾಗಿದೆ. 15 ಬ್ಯಾಂಕುಗಳಿಂದ ಸಿಗುತ್ತಿರುವ 750 ಮಿಲಿಯನ್ ಪೌಂಡ್ ಸಾಲದ ಹಣ ಸ್ಯಾಂಕ್ಷನ್ ಆಗಿದ್ದು, ಹಂತ ಹಂತವಾಗಿ ವಿತರಣೆ ಆಗಬಹುದು.

ಇದನ್ನೂ ಓದಿ: ಭಾರತಕ್ಕೆ ಐಫೋನ್ ಸಕ್ಸಸ್ ಸ್ಟೋರಿ ಆಯ್ತು, ಈಗ ಮಿಸೈಲ್, ಯುದ್ಧನೌಕೆ, ಹೆಲಿಕಾಪ್ಟರ್​ಗಳ ಸರದಿ

ಟಾಟಾ ಸನ್ಸ್​​ಗೆ ಸೇರಿದ ಆಗ್ರಟಾಸ್ ಕಂಪನಿ ಬ್ಯಾಟರಿ ಸೆಲ್​​ಗಳನ್ನು ತಯಾರಿಸುತ್ತದೆ. ಭಾರತ ಹಾಗೂ ಬ್ರಿಟನ್ ದೇಶದಲ್ಲಿ ಫ್ಯಾಕ್ಟರಿಗಳನ್ನು ಹೊಂದಿದೆ. ಬ್ರಿಟನ್​​ನಲ್ಲಿ ನಿರ್ಮಿಸಲಾಗುವ ಅದರ ಬ್ಯಾಟರಿ ಫ್ಯಾಕ್ಟರಿಯು ಬಹಳ ದೊಡ್ಡದಿರಲಿದೆ. ಆ ದೇಶದ ಅತಿದೊಡ್ಡ ಬ್ಯಾಟರಿ ಫ್ಯಾಕ್ಟರಿ ಎನಿಸಲಿದೆ. ಬ್ರಿಟನ್​​ನ ವಾಹನ ಕ್ಷೇತ್ರಕ್ಕೆ ಅವಶ್ಯಕತೆ ಇರುವ ಶೇ. 50 ಬ್ಯಾಟರಿ ಶಕ್ತಿಯನ್ನು ಈ ಘಟಕವು ಪೂರೈಸುವ ಸಾಮರ್ಥ್ಯ ಹೊಂದಬಹುದು ಎನ್ನುವ ಮಾತುಗಳು ಕೇಳಿಬರುತ್ತಿವೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ