Currency Monitoring List: ಅಮೆರಿಕದ ಕರೆನ್ಸಿ ಮೇಲ್ವಿಚಾರಣೆ ಪಟ್ಟಿಯಿಂದ ಭಾರತ ಹೊರಕ್ಕೆ; ಕಾರಣ ಇಲ್ಲಿದೆ

ನವದೆಹಲಿ: ಅಮೆರಿಕದ (United States) ಕರೆನ್ಸಿ ಮೇಲ್ವಿಚಾರಣೆ ಪಟ್ಟಿ ಅಥವಾ ಕರೆನ್ಸಿ ಮಾನಿಟರಿಂಗ್ ಲಿಸ್ಟ್​ನಿಂದ​ (Currency Monitoring List) ಭಾರತ (India) ಸೇರಿದಂತೆ ಐದು ದೇಶಗಳನ್ನು ಹೊರಗಿಡಲಾಗಿದೆ. ಇಟಲಿ, ಮೆಕ್ಸಿಕೊ, ಥಾಯ್ಲೆಂಡ್ ಮತ್ತು ವಿಯೆಟ್ನಾಂ ಕೂಡ ಪಟ್ಟಿಯಿಂದ ಅಮೆರಿಕ ಕೈಬಿಟ್ಟ ದೇಶಗಳಲ್ಲಿ ಸೇರಿವೆ. ಈ ಕುರಿತು ಅಮೆರಿಕದ ಖಜಾನೆ ಇಲಾಖೆ ಶುಕ್ರವಾರ ಮಾಹಿತಿ ನೀಡಿದೆ. ಈ ಪಟ್ಟಿಯು ಕರೆನ್ಸಿ ಅಭ್ಯಾಸಗಳು ಮತ್ತು ಸ್ಥೂಲ ಆರ್ಥಿಕ ನೀತಿಗಳಿಗೆ ವ್ಯಾಪಾರ ಪಾಲುದಾರರು ಹೆಚ್ಚು ಗಮನ ಹರಿಸುವಂತೆ ಮಾಡುವುದಕ್ಕೆ ಸಂಬಂಧಿಸಿದ್ದಾಗಿದೆ. ಅಮೆರಿಕದ ಖಜಾನೆ ಇಲಾಖೆಯೆ ಸಚಿವೆ ಜಾನೆಟ್ ಯೆಲೆನ್ ಅವರು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರನ್ನು ಶುಕ್ರವಾರ ಭೇಟಿ ಮಾಡಿ ಮಾತುಕತೆ ನಡೆಸಿದ್ದರು. ಇದರ ಬೆನ್ನಲ್ಲೇ ಪಟ್ಟಿಯಿಂದ ಭಾರತವನ್ನು ತೆರವು ಮಾಡಲಾಗಿದೆ.

ಸದ್ಯ ಚೀನಾ, ಜಪಾನ್, ಕೊರಿಯಾ, ಜರ್ಮನಿ, ಮಲೇಷ್ಯಾ, ಸಿಂಗಾಪುರ ಹಾಗೂ ತೈವಾನ್ ಅಮೆರಿಕದ ಕರೆನ್ಸಿ ಮೇಲ್ವಿಚಾರಣೆ ಪಟ್ಟಿಯಲ್ಲಿ ಇವೆ. ಭಾರತ ಕಳೆದ ಎರಡು ವರ್ಷಗಳಿಂದ ಪಟ್ಟಿಯಲ್ಲಿ ಸ್ಥಾನ ಪಡೆದಿತ್ತು.

ಕಾರಣವೇನು?

ಪಟ್ಟಿಯಲ್ಲಿ ಸ್ಥಾನ ನೀಡುವುದಕ್ಕಾಗಿ ಅಮೆರಿಕ ಮೂರು ಮಾನದಂಡಗಳನ್ನು ನಿಗದಿಪಡಿಸಿದೆ. ಇವುಗಳ ಪೈಕಿ ಭಾರತ ಮತ್ತು ತೆರವಾಗಿರುವ ಇತರ ದೇಶಗಳು ಒಂದನ್ನು ಮಾತ್ರವೇ ಪೂರೈಸಲು ಶಕ್ತವಾಗಿವೆ. ಪಟ್ಟಿಯ ಎರಡು ವರದಿಗಳನ್ನು ಪ್ರಕಟಿಸುವ ಸಂದರ್ಭದಲ್ಲಿಯೂ ಈ ದೇಶಗಳು ಒಂದು ಮಾನದಂಡವನ್ನು ಮಾತ್ರ ಪೂರೈಸಿವೆ. ಸ್ವಿಜರ್​ಲ್ಯಾಂಡ್ ಮೂರು ಮಾನಂದಡಗಳನ್ನು ಪೂರೈಸುವಲ್ಲಿ ವಿಫಲವಾಗಿದೆ ಎಂದು ಅಮೆರಿಕದ ಖಜಾನೆ ಇಲಾಖೆ ತಿಳಿಸಿದೆ.

ಈ ವರದಿಯನ್ನು ಸಿದ್ಧಪಡಿಸುವುದಕ್ಕಾಗಿ ಜೂನ್ 2022 ರವರೆಗಿನ ನಾಲ್ಕು ತ್ರೈಮಾಸಿಕಗಳಲ್ಲಿ ಅಮೆರಿಕದ ಅಂತರರಾಷ್ಟ್ರೀಯ ಮಟ್ಟದ ಸರಕು ಮತ್ತು ಸೇವೆಗಳ ಸರಿಸುಮಾರು ಶೇಕಡಾ 80 ರಷ್ಟನ್ನು ಖಜಾನೆ ಇಲಾಖೆ ಪರೀಕ್ಷಿಸಿದೆ ಮತ್ತು ಮೌಲ್ಯಮಾಪನ ಮಾಡಿದೆ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.

ಜಾಗತಿಕ ಆರ್ಥಿಕತೆಯು ಈಗಾಗಲೇ ಬೇಡಿಕೆ ಮತ್ತು ಪೂರೈಕೆ ನಡುವಣ ಅಸಮತೋಲನವನ್ನು ನಿರ್ವಹಿಸಲು ಹೆಣಗಾಡುತ್ತಿದೆ. ಕೋವಿಡ್ ಸಾಂಕ್ರಾಮಿಕ, ರಷ್ಯಾ-ಉಕ್ರೇನ್ ಯುದ್ಧದ ಪರಿಣಾಮವಾಗಿ ಆಹಾರ, ರಸಗೊಬ್ಬರ ಹಾಗೂ ಇಂಧನ ದರ ಏರಿಕೆಯಾಗಿದೆ. ಜಾಗತಿಕ ಹಣದುಬ್ಬರ ಏರಿಕೆಯಾಗಿದೆ. ಇದರಿಂದಾಗಿ ಆಹಾರ ಅಭದ್ರತೆ ಎದುರಾಗಿದೆ ಎಂದು ಜಾನೆಟ್ ಯೆಲೆನ್ ಹೇಳಿದ್ದಾರೆ.

ಅನೇಕ ಒತ್ತಡಗಳನ್ನು ಎದುರಿಸುತ್ತಿರುವ ಪ್ರಮುಖ ಆರ್ಥಿಕತೆಗಳು ಅದಕ್ಕನುಗುಣವಾಗಿ ಪ್ರತ್ಯೇಕ ನೀತಿಗಳನ್ನು ಅನುಸರಿಸಬಹುದು. ಇದು ಕರೆನ್ಸಿ ಚಲಾವಣೆ ಮೇಲೆ ಪರಿಣಾಮ ಬೀರುತ್ತದೆ ಎಂದು ಅವರು ಹೇಳಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ