ಭಾರತಕ್ಕೆ ಹೆಮ್ಮೆ ತಂದಿತ್ತ ‘ನಾಟಿ ಬಾಯ್’; ಈ ಜಿಎಸ್​ಎಲ್​ವಿ ರಾಕೆಟ್​ನ ಯಶಸ್ವಿ ಉಡ್ಡಯನಕ್ಕೆ ಇಸ್ರೋ ಇಷ್ಟು ಗರ್ವ ಪಡುತ್ತಿರುವುದು ಯಾಕೆ?

ಶ್ರೀಹರಿಕೋಟ, ಸೆಪ್ಟೆಂಬರ್ 4: ಇಸ್ರೋ ಇಂದು ಶುಕ್ರವಾರ ಭೂ ಪರಿವೀಕ್ಷಣಾ ಉಪಗ್ರಹ ಹೊತ್ತ ಜಿಎಸ್​ಎಲ್​ವಿ ರಾಕೆಟ್ (GSLV-F17) ಅನ್ನು ಉಡಾವಣೆ ಮಾಡಿ ಜಗತ್ತಿನ ಗಮನ ಸೆಳೆದಿದೆ. ನಾಟಿ ಬಾಯ್ (Naughty Boy) ಎಂದೇ ಖ್ಯಾತವಾಗಿರುವ ಈ ರಾಕೆಟ್ ಉಡಾವಣೆ ಯಶಸ್ವಿಯಾಗಿರುವುದಕ್ಕೆ ಇಸ್ರೋ ಗರ್ವ ಪಟ್ಟುಕೊಂಡಿದೆ. ಈ ರಾಕೆಟ್​ನ ಯಶಸ್ವಿ ಉಡಾವಣೆಯಲ್ಲಿ ಗರ್ವ ಪಟ್ಟುಕೊಳ್ಳುವಂಥದ್ದು ಏನಿದೆ? ನಾಟಿ ಬಾಯ್ ಅದರ ಕೆಲಸವನ್ನು ಅಚ್ಚುಕಟ್ಟಾಗಿ ನಿಭಾಯಿಸಿರುವ ಘಟನೆ ಸಾಮಾನ್ಯವಲ್ಲ. ಭಾರತಕ್ಕೆ ತಂದಿತ್ತಿರುವ ದೊಡ್ಡ ಗೆಲುವು ಅದು.

ಇಸ್ರೋ ಸಂಸ್ಥೆ ಪಿಎಸ್​ಎಲ್​ವಿ ಮತ್ತು ಜಿಎಸ್​ಎಲ್​ವಿ ಎಂಬ ಎರಡು ಸರಣಿಯ ರಾಕೆಟ್​ಗಳನ್ನು ತಯಾರಿಸುತ್ತದೆ. ಪಿಎಸ್​ಎಲ್​ವಿ ಸಣ್ಣ ತೂಕವನ್ನು ಹೊತ್ತೊಯ್ಯಬಲ್ಲ ರಾಕೆಟ್​ಗಳು. ಜಿಎಸ್​ಎಲ್​ವಿ ರಾಕೆಟ್​ಗಳು ದೊಡ್ಡ ತೂಕದ ಸೆಟಿಲೈಟ್​ಗಳನ್ನು ಹೊತ್ತೊಯ್ಯಬಲ್ಲುವು. ಪಿಎಸ್​ಎಲ್​ವಿ ರಾಕೆಟ್​ಗಳು ಶೇ. 95ಕ್ಕಿಂತ ಹೆಚ್ಚು ಸಕ್ಸಸ್ ರೇಟ್ ಅಥವಾ ಯಶಸ್ಸಿನ ಪ್ರಮಾಣ ಹೊಂದಿವೆ. ಅಂದರೆ, ಉಡಾವಣೆಗೊಂಡ ನೂರು ರಾಕೆಟ್​ಗಳಲ್ಲಿ 95 ಯಶಸ್ವಿಯಾಗಿವೆ. ಆದರೆ, ಇಷ್ಟು ವಿಶ್ವಾಸಾರ್ಹವೆನಿಸಿದ್ದ ಪಿಎಸ್​ಎಲ್​ವಿ ರಾಕೆಟ್​ಗಳ ಉಡಾವಣೆ 2025 ಮತ್ತು 2026ರಲ್ಲಿ ಸತತ ವೈಫಲ್ಯ ಕಂಡವು. ಇದು ಇಸ್ರೋದ ಕ್ಷಮತೆಗೆ ತಂದ ಕಳಂಕವಾಗಿತ್ತು. ಈಗ ಜಿಎಸ್​ಎಲ್​ವಿ ರಾಕೆಟ್​ನ ಯಶಸ್ವಿ ಉಡಾವಣೆಯು ಇಸ್ರೋದ ಆ ಕಳಂಕ ನೀಗಿಸಿರಬಹುದು.

ಕೇಂದ್ರ ಸಚಿವ ಜಿತೇಂದರ್ ಸಿಂಗ್ ಅವರ ಎಕ್ಸ್ ಪೋಸ್ಟ್

‘ನಾಟಿ ಬಾಯ್’ ರಾಕೆಟ್ ಅಂತ ಕರೆಯುವುದ್ಯಾಕೆ?

ಜಿಎಸ್​ಎಲ್​ವಿ ರಾಕೆಟ್​ಗಳು ಮೊದಲಿಂದಲೂ ಯಶಸ್ಸಿನ ಜೊತೆಗೆ ವೈಫಲ್​ಯಗಳನ್ನೂ ಅನುಭವಿಸುತ್ತಾ ಬಂದಂಥವು. ಪಿಎಸ್​ಎಲ್​ವಿ ರಾಕೆಟ್​ನ 19 ಉಡ್ಡಯನದಲ್ಲಿ ಆರು ವಿಫಲವಾಗಿವೆ. ಸಂಕೀರ್ಣವಾದ ಕ್ರಯೋಜೆನಿಕ್ (Cryogenic Stage) ತಂತ್ರಜ್ಞಾನವನ್ನು ಬಳಸುವ ಈ ರಾಕೆಟ್ ಅತ್ಯಂತ ಪ್ರಭಾವಶಾಲಿಯಾಗಿದ್ದರೂ, ನಿರೀಕ್ಷಿತ ಫಲಿತಾಂಶ ನೀಡುವುದು ಸವಾಲಾಗಿತ್ತು. ಹೀಗಾಗಿ ಬಾಹ್ಯಾಕಾಶ ವಿಜ್ಞಾನಿಗಳು ಇದನ್ನು ‘ನಾಟಿ ಬಾಯ್’ ಎಂದು ತಮಾಷೆಯಾಗಿ ಕರೆಯುತ್ತಿದ್ದರು. ಆದರೆ ಈ ಉಡ್ಡಯನದ ಯಶಸ್ಸಿನೊಂದಿಗೆ GSLV ತನ್ನ ವಿಶ್ವಾಸಾರ್ಹತೆಯನ್ನು ಸಂಪೂರ್ಣವಾಗಿ ಸಾಬೀತುಪಡಿಸಿದೆ.

ಇದನ್ನೂ ಓದಿ: ಬಿರುಗಾಳಿ, ಮಳೆಯ ನಡುವೆ ಬಾಹ್ಯಾಕಾಶಕ್ಕೆ ಜಿಗಿದ ಜಿಎಸ್‌ಎಲ್‌ವಿ ರಾಕೆಟ್,26 ಸಾವಿರ ಕಿ.ಮೀ ಎತ್ತರದಿಂದ ಭಾರತದ ಮೇಲೆ ನಿರಂತರ ಹದ್ದಿನ ಕಣ್ಣು

ಭಾರತಕ್ಕೆ ಈ ಜಿಎಸ್​ಎಲ್​ವಿ ಎಫ್-17 ರಾಕೆಟ್ ಉಡಾವಣೆಯ ಮಹತ್ವವೇನು?

• ಸ್ವದೇಶಿ ಕ್ರಯೋಜೆನಿಕ್ ತಂತ್ರಜ್ಞಾನದ ಪ್ರಾಬಲ್ಯ: ಕ್ರಯೋಜೆನಿಕ್ ಎಂಜಿನ್ ತಂತ್ರಜ್ಞಾನವು ಅತ್ಯಂತ ಸಂಕೀರ್ಣವಾದದ್ದಾಗಿದ್ದು, ವಿಶ್ವದ ಕೆಲವು ದೇಶಗಳಲ್ಲಿ ಮಾತ್ರ ಲಭ್ಯವಿದೆ. ಈ ಯಶಸ್ಸು ಭಾರತದ ಸ್ವದೇಶಿ ತಂತ್ರಜ್ಞಾನ ಮತ್ತು ವಿಜ್ಞಾನಿಗಳ ಸಾಮರ್ಥ್ಯವನ್ನು ಜಾಗತಿಕ ಮಟ್ಟದಲ್ಲಿ ಎತ್ತಿಹಿಡಿದಿದೆ.
• ಹವಾಮಾನ ಹಾಗೂ ವಿಪತ್ತು ನಿರ್ವಹಣೆ ಸುಧಾರಣೆ: ಈ ರಾಕೆಟ್ ಮೂಲಕ ಕಕ್ಷೆಗೆ ಸೇರಿಸಲಾದ ಸುಧಾರಿತ ಉಪಗ್ರಹವು ಭಾರತದ ಹವಾಮಾನ ಮುನ್ಸೂಚನೆ, ಚಂಡಮಾರುತ, ಪ್ರವಾಹ ಹಾಗೂ ವಿಕೋಪಗಳ ನಿಖರ ಮುನ್ಸೂಚನೆ ನೀಡಲು ಸಹಕಾರಿಯಾಗಲಿದೆ. ಇದರಿಂದ ಕರಾವಳಿ ಮತ್ತು ಕೃಷಿ ವಲಯಕ್ಕೆ ಹೆಚ್ಚಿನ ಅನುಕೂಲವಾಗಲಿದೆ.
• ಭಾರೀ ತೂಕದ ಉಪಗ್ರಹ ಉಡ್ಡಯನ ಸಾಮರ್ಥ್ಯ: ಭಾರೀ ತೂಕದ ಉಪಗ್ರಹಗಳನ್ನು ಬಾಹ್ಯಾಕಾಶಕ್ಕೆ ಕಳುಹಿಸಲು ಭಾರತವು ಹಿಂದೆ ವಿದೇಶಿ ಏಜೆನ್ಸಿಗಳ ಮೇಲೆ ಅವಲಂಬಿತವಾಗಿರಬೇಕಿತ್ತು. GSLV ಯಶಸ್ಸಿನಿಂದಾಗಿ ಈಗ ಭಾರತವೇ ಸ್ವತಂತ್ರವಾಗಿ 2 ಟನ್‌ಗಿಂತಲೂ ಹೆಚ್ಚು ತೂಕದ ಉಪಗ್ರಹಗಳನ್ನು ಭೂಸ್ಥಿರ ಕಕ್ಷೆಗೆ (Geostationary Orbit) ತಲುಪಿಸಬಲ್ಲದು.
• ಕಮರ್ಷಿಯಲ್ ಮಾರುಕಟ್ಟೆಯಲ್ಲಿ ಭಾರತದ ಹವಾ: ಜಾಗತಿಕ ಬಾಹ್ಯಾಕಾಶ ಮಾರುಕಟ್ಟೆಯಲ್ಲಿ ಕನಿಷ್ಠ ವೆಚ್ಚದಲ್ಲಿ ಉಪಗ್ರಹಗಳನ್ನು ಉಡ್ಡಯನ ಮಾಡುವಲ್ಲಿ ಇಸ್ರೋ ಹೆಸರುವಾಸಿಯಾಗಿದೆ. GSLV ಯಶಸ್ಸಿನಿಂದ ವಿದೇಶಿ ಉಪಗ್ರಹಗಳನ್ನು ಭಾರತೀಯ ನೆಲದಿಂದಲೇ ಉಡ್ಡಯನ ಮಾಡುವ ವಾಣಿಜ್ಯ ಅವಕಾಶಗಳು ಮತ್ತಷ್ಟು ಹೆಚ್ಚಲಿವೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ