Yashasvi Jaiswal: ಟೆಂಟ್ನಲ್ಲಿ ವಾಸಿಸುತ್ತಿದ್ದ ಕ್ರಿಕೆಟ್ ಸ್ಟಾರ್ ಯಶಸ್ವಿ ಜೈಸ್ವಾಲ್ರಿಂದ ಐಷಾರಾಮಿ ಮನೆ ಖರೀದಿ; ಪ್ರತಿಷ್ಠಿತ ಏರಿಯಾದಲ್ಲಿದೆ ಈ ಅಪಾರ್ಟ್ಮೆಂಟ್
Rag to Rich Story of Yashasvi Jaiswal: ಯಶಸ್ವಿ ಜೈಸ್ವಾಲ್ ಮುಂಬೈನ ಪ್ರತಿಷ್ಠಿತ ಬಾಂದ್ರಾ ಈಸ್ಟ್ ಏರಿಯಾದಲ್ಲಿ ಅದಾನಿ ಕಂಪನಿ ನಿರ್ಮಿತ ಲಕ್ಷುರಿ ಅಪಾರ್ಟ್ಮೆಂಟ್ ಖರೀದಿಸಿದ್ದಾರೆ. 1,110 ಚದರಡಿ ವಿಸ್ತೀರ್ಣದ ಈ ಮನೆಯ ಬೆಲೆ ಐದು ಕೋಟಿ ರೂಗೂ ಹೆಚ್ಚು ಎನ್ನಲಾಗಿದೆ. ಒಂದು ಕಾಲದಲ್ಲಿ ಮುಂಬೈನಲ್ಲಿ ವಾಸಿಸಲು ಹಣ ಇಲ್ಲದೇ ಟೆಂಟ್ಗಳಲ್ಲಿ ಇದ್ದು ಪಾನಿ ಪುರಿ ಮಾರಿಕೊಂಡು ಕಲಿಯುತ್ತಿದ್ದವರು ಜೈಸ್ವಾಲ್.
Updated on: Feb 21, 2024 | 5:46 PM
ಯಶಸ್ವಿ ಜೈಸ್ವಾಲ್ (Yashasvi Jaiswal) ಈಗ ಭಾರತ ಕ್ರಿಕೆಟ್ ಲೋಕದ ಹೊಸ ಸ್ಟಾರ್ ಆಗಿದ್ದಾರೆ. ದಾಖಲೆಗಳ ಮೇಲೆ ದಾಖಲೆ ಬರೆಯುತ್ತಿದ್ದಾರೆ. ಆರು ಅಡಿ ಎತ್ತರದ ಈ 22 ವರ್ಷದ ಯುವ ಕ್ರಿಕೆಟಿಗನನ್ನು ನೋಡಿದರೆ ಮುಂಬೈನ ಮೇಲ್ಮಧ್ಯಮ ವರ್ಗದ ಕುಟುಂಬದಿಂದ ಬಂದವರು ಎಂದನಿಸಬಹುದು. ಆದರೆ, ವಾಸ್ತವ ಬೇರೆ. ಈಗ ಸುದ್ದಿ ಏನೆಂದರೆ, ಯಶಸ್ವಿ ಜೈಸ್ವಾಲ್ ಮುಂಬೈನಲ್ಲಿ ಬಹಳ ಸುಂದರವಾದ ಒಂದು ಅಪಾರ್ಟ್ಮೆಂಟ್ ಖರೀದಿಸಿದ್ದಾರೆ. ಮನಿಕಂಟ್ರೋಲ್ನಲ್ಲಿ ಬಂದಿರುವ ವರದಿ ಪ್ರಕಾರ 1,110 ಚದರಡಿ ವಿಸ್ತೀರ್ಣದ ಅಪಾರ್ಟ್ಮೆಂಟ್ ಅನ್ನು 5.38 ಕೋಟಿ ರೂಗೆ ಅವರು ಕೊಂಡುಕೊಂಡಿದ್ದಾರೆ. ಅದಾನಿ ರಿಯಾಲ್ಟಿ ಸಂಸ್ಥೆಯ ಟೆನ್ ಬಿಕೆಸಿ ಪ್ರಾಜೆಕ್ಟ್ ಅಡಿಯಲ್ಲಿ ಈ ಅಪಾರ್ಟ್ಮೆಂಟ್ ಇನ್ನೂ ನಿರ್ಮಾಣ ಹಂತದಲ್ಲಿದೆ. ಮುಂಬೈನ ಅತ್ಯಂತ ಪ್ರತಿಷ್ಠಿತ ಪ್ರದೇಶಗಳಲ್ಲಿ ಒಂದೆನಿಸಿದ ಬಾಂದ್ರಾ ಈಸ್ಟ್ನಲ್ಲಿ (Bandra East) ಈ ಅಪಾರ್ಟ್ಮೆಂಟ್ ಇದೆ. ಈ ವರ್ಷವೇ ಜೈಸ್ವಾಲ್ ಈ ಅಪಾರ್ಟ್ಮೆಂಟ್ಗೆ ಕಾಲಿಡಬಹುದು ಎನ್ನಲಾಗಿದೆ.
ಟೆಂಟ್ನಲ್ಲಿ ವಾಸಿಸುತ್ತಿದ್ದ ಹುಡುಗನ ದೆಸೆ ಹೇಗೆ ಬದಲಾಗಿದೆ ನೋಡಿ…
ಉತ್ತರಪ್ರದೇಶದ ಸಂತ್ ರವಿದಾಸ್ ನಗರ್ ಜಿಲ್ಲೆಯವರಾದ ಯಶಸ್ವಿ ಜೈಸ್ವಾಲ್ ಸಾಧಾರಣ ಮಧ್ಯಮವರ್ಗದ ಕುಟುಂಬದವರು. 10ನೇ ವಯಸ್ಸಿನಲ್ಲಿ ಕ್ರಿಕೆಟ್ ತರಬೇತಿಗೆಂದು 2010ರಲ್ಲಿ ಮುಂಬೈಗೆ ಬಂದವರು. ಡೈರಿ ಶಾಪ್ವೊಂದರಲ್ಲಿ ಕೆಲಸ ಮಾಡಿಕೊಂಡು ಅಲ್ಲಿಯೇ ಉಳಿದುಕೊಂಡು ಕ್ರಿಕೆಟ್ ಅನ್ನೂ ಪ್ರಾಕ್ಟೀಸ್ ಮಾಡುತ್ತಿದ್ದರು. ಆದರೆ, ಕೆಲಸ ಮಾಡಲು ಸರಿಯಾಗಿ ಸಮಯ ಸಿಗದಿದ್ದರಿಂದ ಶಾಪ್ ಮಾಲೀಕ ಈ ಜೈಸ್ವಾಲ್ರನ್ನು ಹೊರಕಳುಹಿಸಿದರು.
ಆಜಾದ್ ಮೈದಾನದ ಸಾಂದರ್ಭಿಕ ಚಿತ್ರ
ಆಗ ಯಶಸ್ವಿ ಜೈಸ್ವಾಲ್ ಕ್ರಿಕೆಟ್ ತರಬೇತಿ ಪಡೆಯುತ್ತಿದ್ದುದು ಆಜಾದ್ ಮೈದಾನ್ ಗ್ರೌಂಡ್ನಲ್ಲಿ. ವಸತಿಗೆ ಜಾಗ ಇರಲಿಲ್ಲ. ಲಾಡ್ಜ್, ಹೋಟೆಲ್ಗಳಲ್ಲಿ ಉಳಿದುಕೊಳ್ಳಲು ದುಡ್ಡು ಇರಲಿಲ್ಲ. ಅವರು ಅನಿವಾರ್ಯವಾಗಿ ಆಜಾದ್ ಮೈದಾನ್ನ ಗ್ರೌಂಡ್ಸ್ಮನ್ಗಳ ಜೊತೆ ಟೆಂಟ್ನಲ್ಲಿ ವಾಸಿಸುತ್ತಿದ್ದರು. ಹಣಕ್ಕಾಗಿ ಅವರು ಪಾನಿಪುರಿ ಕೂಡ ಮಾರುತ್ತಿದ್ದರು.
ಇದನ್ನೂ ಓದಿ: ವಿರುಷ್ಕಾ ದಂಪತಿಗಳಿಗೆ ಗಂಡು ಮಗು ಜನನ; ಪಾಕಿಸ್ತಾನದಲ್ಲಿ ಮುಗಿಲು ಮುಟ್ಟಿದ ಸಂಭ್ರಮಾಚರಣೆ! ವಿಡಿಯೋ ವೈರಲ್
ಮೂರು ವರ್ಷ ಕಾಲ ಇದೇ ರೀತಿ ಟೆಂಟ್ನಲ್ಲಿ ವಾಸಿಸುತ್ತಿದ್ದ ಯಶಸ್ವಿ ಜೈಸ್ವಾಲ್ ಅವರ ಲಕ್ ಬದಲಾಗಿದ್ದು ಜ್ವಾಲಾ ಸಿಂಗ್ ಅವರ ಕಣ್ಣಿಗೆ ಬಿದ್ದ ಮೇಲೆ. ಜೈಸ್ವಾಲ್ ಕ್ರಿಕೆಟ್ ಪ್ರತಿಭೆಯನ್ನು ಸಿಂಗ್ ಗುರುತಿಸಿದ್ದರು. ಸಾಂಟಾಕ್ರುಜ್ನಲ್ಲಿ ಕ್ರಿಕೆಟ್ ಅಕಾಡೆಮಿ ನಡೆಸುತ್ತಿದ್ದ ಅವರು ಯಶಸ್ವಿ ಜೈಸ್ವಾಲ್ಗೆ ಉಳಿದುಕೊಳ್ಳಲು ವ್ಯವಸ್ಥೆ ಮಾಡಿದರು. ಅವರಿಗೆ ಗಾಡ್ ಫಾದರ್ ರೀತಿಯೇ ಆದರು.
ಯಶಸ್ವಿ ಜೈಸ್ವಾಲ್ ಪಾನಿಪುರಿ ಮಾರುತ್ತಿದ್ದ ದಿನಗಳು
ಅಲ್ಲಿಂದ ಜೈಸ್ವಾಲ್ ಅವರ ಗಮನ ಸಂಪೂರ್ಣ ಕ್ರಿಕೆಟ್ ಕಡೆಗೇ ಹೋಯಿತು. ಮುಂಬೈ ಕಿರಿಯರ ತಂಡಗಳಿಗೆ ಸೇರಿದರು. ಭಾರತದ ಅಂಡರ್ 19 ಟೀಮ್ಗೆ ಆಯ್ಕೆಯಾಗಿ ಅಲ್ಲಿಯೂ ಮಿಂಚಿದರು. 2018ರಲ್ಲಿ ಮುಂಬೈ ಪರ ರಣಜಿ ಟ್ರೋಫಿಗೆ ಪದಾರ್ಪಣೆ ಮಾಡಿದರು. ವಿಜಯ್ ಹಜರೆ ಟ್ರೋಫಿಯಲ್ಲಿ 18ನೇ ವಯಸ್ಸಿನಲ್ಲಿ ಡಬಲ್ ಸೆಂಚುರಿ ಭಾರಿಸಿದರು. ಈ ದಾಖಲೆ ಮಾಡಿದ ಅತಿ ಕಿರಿಯ ಬ್ಯಾಟರ್ ಎನಿಸಿದ್ದಾರೆ.
ಇದನ್ನೂ ಓದಿ: ಕೆಲಸಗಾರರಿಗೆ ಮಾಲೀಕತ್ವ ಕೊಟ್ಟು ಮೃತರಾದ ಶ್ರೀಮಂತ; ಕಂಪನಿಯ ಎಲ್ಲಾ 700 ಉದ್ಯೋಗಿಗಳೂ ಈಗ ಮಾಲೀಕರು
ನಂತರ ಐಪಿಎಲ್ನಲ್ಲೂ ಅವರು ಮಿಂಚಿ, ಬಳಿಕ ಈಗ ಟೀಮ್ ಇಂಡಿಯಾದಲ್ಲಿ ಸ್ಟಾರ್ ಬ್ಯಾಟರ್ ಎನಿಸಿದ್ದಾರೆ. ಕಿರಿಯ ವಯಸ್ಸಿನಲ್ಲಿ ಎರಡು ದ್ವಿಶತಕ ಭಾರಿಸಿದ ಆಟಗಾರರ ಸಾಲಿಗೆ ಸೇರಿದ್ದಾರೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
