
ಇಂದಿನ ಸ್ಪರ್ಧಾತ್ಮಕ ಉದ್ಯೋಗ ಮಾರುಕಟ್ಟೆಯಲ್ಲಿ ಕೆಲಸ ಗಿಟ್ಟಿಸಿಕೊಳ್ಳುವುದು ಅಷ್ಟು ಸುಲಭದ ಮಾತಲ್ಲ. ವಿದ್ಯಾರ್ಹತೆ, ಅನುಭವ ಮತ್ತು ಕೌಶಲ್ಯಗಳಿದ್ದರೂ ಕೆಲವರಿಗೆ ನಿರೀಕ್ಷಿತ ಉದ್ಯೋಗ ಸಿಗುವುದಿಲ್ಲ. ಹಲವು ಕಂಪನಿಗಳಿಗೆ ಅರ್ಜಿ ಸಲ್ಲಿಸಿದರೂ ಸಂದರ್ಶನಕ್ಕೆ ಕರೆ ಬರುವುದಿಲ್ಲ. ಇದಕ್ಕೆ ಕೇವಲ ಉದ್ಯೋಗಾವಕಾಶಗಳ ಕೊರತೆಯೇ ಕಾರಣವಾಗಿರಬೇಕೆಂದಿಲ್ಲ. ನಿಮ್ಮ ರೆಸ್ಯೂಮ್ನಲ್ಲಿರುವ ಸಣ್ಣಪುಟ್ಟ ತಪ್ಪುಗಳೂ ಉದ್ಯೋಗ ಪಡೆಯುವ ಅವಕಾಶವನ್ನು ಕೈತಪ್ಪಿಸಬಹುದು.
ಉದ್ಯೋಗದಾತರು ಅಭ್ಯರ್ಥಿಯ ಬಗ್ಗೆ ಮೊದಲಿಗೆ ತಿಳಿದುಕೊಳ್ಳುವುದು ರೆಸ್ಯೂಮ್ ಮೂಲಕವೇ. ಹೀಗಾಗಿ ನಿಮ್ಮ ರೆಸ್ಯೂಮ್ ಆಕರ್ಷಕವಾಗಿರುವುದರ ಜೊತೆಗೆ ಸ್ಪಷ್ಟ, ಸರಳ ಮತ್ತು ವೃತ್ತಿಪರವಾಗಿಯೂ ಇರಬೇಕು. ಹಾಗಾದರೆ ರೆಸ್ಯೂಮ್ ಸಿದ್ಧಪಡಿಸುವಾಗ ಯಾವ ತಪ್ಪುಗಳನ್ನು ಮಾಡಬಾರದು? ಉದ್ಯೋಗ ಸಿಗುವ ಸಾಧ್ಯತೆಯನ್ನು ಹೆಚ್ಚಿಸಲು ಯಾವ ಅಂಶಗಳನ್ನು ಗಮನಿಸಬೇಕು ಎಂಬುದನ್ನು ಇಲ್ಲಿ ತಿಳಿದುಕೊಳ್ಳಿ.
ಅನೇಕ ಉದ್ಯೋಗಾಕಾಂಕ್ಷಿಗಳು ತಾವು ಸಿದ್ಧಪಡಿಸಿರುವ ಒಂದೇ ರೆಸ್ಯೂಮ್ ಅನ್ನು ಎಲ್ಲಾ ಕಂಪನಿಗಳಿಗೂ ಕಳುಹಿಸುತ್ತಾರೆ. ಆದರೆ ಇದು ಸರಿಯಾದ ವಿಧಾನವಲ್ಲ. ಪ್ರತಿಯೊಂದು ಉದ್ಯೋಗಕ್ಕೂ ವಿಭಿನ್ನ ಕೌಶಲ್ಯ ಮತ್ತು ಅರ್ಹತೆಗಳ ಅಗತ್ಯವಿರುತ್ತದೆ. ಉದಾಹರಣೆಗೆ, ಮಾರ್ಕೆಟಿಂಗ್ ಹುದ್ದೆಗೆ ಅರ್ಜಿ ಸಲ್ಲಿಸುವಾಗ ಸಂವಹನ ಕೌಶಲ್ಯ ಮತ್ತು ಮಾರ್ಕೆಟಿಂಗ್ ಅನುಭವಕ್ಕೆ ಆದ್ಯತೆ ನೀಡಬೇಕು. ಅದೇ ರೀತಿ ತಾಂತ್ರಿಕ ಹುದ್ದೆಗೆ ಅರ್ಜಿ ಸಲ್ಲಿಸುವಾಗ ತಾಂತ್ರಿಕ ಕೌಶಲ್ಯಗಳನ್ನು ಪ್ರಮುಖವಾಗಿ ಉಲ್ಲೇಖಿಸಬೇಕು. ಹೀಗಾಗಿ ಅರ್ಜಿ ಸಲ್ಲಿಸುವ ಹುದ್ದೆಗೆ ಅನುಗುಣವಾಗಿ ರೆಸ್ಯೂಮ್ನಲ್ಲಿ ಅಗತ್ಯ ಬದಲಾವಣೆ ಮಾಡಿಕೊಳ್ಳಿ.
ರೆಸ್ಯೂಮ್ನಲ್ಲಿ ಸಣ್ಣ ಕಾಗುಣಿತ ಅಥವಾ ವ್ಯಾಕರಣದ ತಪ್ಪುಗಳಿದ್ದರೂ ಅದು ನಿಮ್ಮ ವೃತ್ತಿಪರತೆಯ ಬಗ್ಗೆ ನಕಾರಾತ್ಮಕ ಅಭಿಪ್ರಾಯ ಮೂಡಿಸಬಹುದು. ಉದ್ಯೋಗದಾತರು ಅಭ್ಯರ್ಥಿಯ ಕೆಲಸದ ಬಗ್ಗೆ ಎಷ್ಟು ಗಂಭೀರವಾಗಿದ್ದಾರೆ ಎಂಬುದನ್ನು ಗಮನಿಸುತ್ತಾರೆ. ಹೀಗಾಗಿ ರೆಸ್ಯೂಮ್ ಸಿದ್ಧಪಡಿಸಿದ ಬಳಿಕ ಕನಿಷ್ಠ ಎರಡು ಬಾರಿ ಓದಿ ಪರಿಶೀಲಿಸಿ. ಅಗತ್ಯವಿದ್ದರೆ ಇಂಗ್ಲಿಷ್ ವ್ಯಾಕರಣ ಪರಿಶೀಲನಾ ಸಾಧನಗಳ ಸಹಾಯವನ್ನೂ ಪಡೆಯಬಹುದು.
ರೆಸ್ಯೂಮ್ನಲ್ಲಿ ನಿಮ್ಮ ಹೆಸರು, ಸಂಪರ್ಕ ಸಂಖ್ಯೆ, ಇಮೇಲ್ ವಿಳಾಸ, ವಿದ್ಯಾರ್ಹತೆ ಮತ್ತು ಕೆಲಸದ ಅನುಭವದಂತಹ ಅಗತ್ಯ ಮಾಹಿತಿಗಳಿರಬೇಕು. ಆದರೆ ಕೆಲವು ಅಭ್ಯರ್ಥಿಗಳು ತಮ್ಮ ಕುಟುಂಬದ ವಿವರಗಳು, ಧರ್ಮ, ಜಾತಿ, ವೈವಾಹಿಕ ಸ್ಥಿತಿ ಸೇರಿದಂತೆ ಉದ್ಯೋಗಕ್ಕೆ ಸಂಬಂಧಿಸದ ಅನೇಕ ವೈಯಕ್ತಿಕ ಮಾಹಿತಿಗಳನ್ನು ಸೇರಿಸುತ್ತಾರೆ. ಇಂತಹ ಮಾಹಿತಿಗಳು ಸಾಮಾನ್ಯವಾಗಿ ಅಗತ್ಯವಿರುವುದಿಲ್ಲ. ಆದ್ದರಿಂದ ಹುದ್ದೆಗೆ ಸಂಬಂಧಿಸಿದ ಮಾಹಿತಿಗೆ ಮಾತ್ರ ಆದ್ಯತೆ ನೀಡಿ.
ಹಿಂದೆ ಕೆಲಸ ಮಾಡಿರುವ ಅಭ್ಯರ್ಥಿಗಳು ತಮ್ಮ ಅನುಭವವನ್ನು ರೆಸ್ಯೂಮ್ನಲ್ಲಿ ಸರಿಯಾಗಿ ವಿವರಿಸಬೇಕು. ಕೇವಲ ಕಂಪನಿಯ ಹೆಸರು ಮತ್ತು ಕೆಲಸ ಮಾಡಿದ ಅವಧಿಯನ್ನು ನಮೂದಿಸಿದರೆ ಸಾಲದು. ಅಲ್ಲಿ ನೀವು ನಿರ್ವಹಿಸಿದ ಜವಾಬ್ದಾರಿಗಳು, ಸಾಧನೆಗಳು ಮತ್ತು ಕಲಿತ ಕೌಶಲ್ಯಗಳ ಬಗ್ಗೆಯೂ ತಿಳಿಸಬೇಕು.
ರೆಸ್ಯೂಮ್ ಆಕರ್ಷಕವಾಗಿ ಕಾಣಬೇಕು ಎಂಬ ಉದ್ದೇಶದಿಂದ ಕೆಲವರು ಹೆಚ್ಚು ಬಣ್ಣಗಳು, ವಿಭಿನ್ನ ಫಾಂಟ್ಗಳು, ಅನಗತ್ಯ ಚಿತ್ರಗಳು ಮತ್ತು ವಿನ್ಯಾಸಗಳನ್ನು ಬಳಸುತ್ತಾರೆ. ಆದರೆ ಇಂತಹ ರೆಸ್ಯೂಮ್ ಓದಲು ಕಷ್ಟವಾಗಬಹುದು. ವಿಶೇಷವಾಗಿ ಕೆಲವು ಕಂಪನಿಗಳು ಬಳಸುವ ATS (Applicant Tracking System) ಸಾಫ್ಟ್ವೇರ್ಗಳು ಇಂತಹ ಸಂಕೀರ್ಣ ವಿನ್ಯಾಸದ ರೆಸ್ಯೂಮ್ಗಳಲ್ಲಿನ ಮಾಹಿತಿಯನ್ನು ಸರಿಯಾಗಿ ಓದಲು ಸಾಧ್ಯವಾಗದಿರಬಹುದು. ಆದ್ದರಿಂದ ಸರಳವಾದ ವಿನ್ಯಾಸ, ಓದಲು ಸುಲಭವಾದ ಫಾಂಟ್ ಮತ್ತು ಸ್ಪಷ್ಟವಾದ ವಿಭಾಗಗಳನ್ನು ಆಯ್ಕೆ ಮಾಡಿಕೊಳ್ಳಿ.
ನಿಮ್ಮ ರೆಸ್ಯೂಮ್ನಲ್ಲಿರುವ ಇಮೇಲ್ ವಿಳಾಸವೂ ನಿಮ್ಮ ವೃತ್ತಿಪರ ವ್ಯಕ್ತಿತ್ವವನ್ನು ಪ್ರತಿಬಿಂಬಿಸುತ್ತದೆ. ಕೆಲವರು ತಮಾಷೆಯ ಹೆಸರುಗಳು ಅಥವಾ ವಿಚಿತ್ರ ಪದಗಳನ್ನು ಹೊಂದಿರುವ ಇಮೇಲ್ ಐಡಿಗಳನ್ನು ಬಳಸುತ್ತಾರೆ. ಇದು ಉದ್ಯೋಗದಾತರ ಮೇಲೆ ಉತ್ತಮ ಪ್ರಭಾವ ಬೀರುವುದಿಲ್ಲ. ಹೀಗಾಗಿ ನಿಮ್ಮ ಹೆಸರು ಅಥವಾ ಹೆಸರಿನ ಸಂಕ್ಷಿಪ್ತ ರೂಪವನ್ನು ಹೊಂದಿರುವ ಸರಳವಾದ ಇಮೇಲ್ ವಿಳಾಸವನ್ನು ಬಳಸಿ. ಜೊತೆಗೆ ಆಗಾಗ ಪರಿಶೀಲಿಸುವ ಸಕ್ರಿಯ ಇಮೇಲ್ ವಿಳಾಸವನ್ನೇ ನಮೂದಿಸಿ.
ಕೆಲಸ ಸಿಗಬೇಕು ಎಂಬ ಕಾರಣಕ್ಕೆ ಕೆಲವು ಅಭ್ಯರ್ಥಿಗಳು ತಮ್ಮ ಅನುಭವ, ವಿದ್ಯಾರ್ಹತೆ ಅಥವಾ ಕೌಶಲ್ಯಗಳ ಬಗ್ಗೆ ಸುಳ್ಳು ಮಾಹಿತಿಯನ್ನು ನೀಡುತ್ತಾರೆ. ಆದರೆ ಇದು ಮುಂದೆ ಸಮಸ್ಯೆಗಳಿಗೆ ಕಾರಣವಾಗಬಹುದು. ಕಂಪನಿಗಳು ಹಿನ್ನೆಲೆ ಪರಿಶೀಲನೆ ನಡೆಸುವ ಸಂದರ್ಭದಲ್ಲಿ ನಿಮ್ಮ ಮಾಹಿತಿ ತಪ್ಪು ಎಂದು ತಿಳಿದುಬಂದರೆ ಉದ್ಯೋಗಾವಕಾಶ ಕೈತಪ್ಪಬಹುದು. ಹೀಗಾಗಿ ನಿಮ್ಮ ನಿಜವಾದ ಅರ್ಹತೆ ಮತ್ತು ಅನುಭವವನ್ನೇ ನಮೂದಿಸಿ.
ಇದನ್ನೂ ಓದಿ: ಮೊದಲ ಉದ್ಯೋಗ ಪಡೆಯುವುದು ಹೇಗೆ? ಫ್ರೆಶರ್ಗಳು ತಿಳಿದುಕೊಳ್ಳಬೇಕಾದ ಪ್ರಮುಖ ವಿಚಾರಗಳಿವು
ನಿಮ್ಮ ಸಂಪೂರ್ಣ ಶೈಕ್ಷಣಿಕ ಮತ್ತು ವೃತ್ತಿಪರ ಜೀವನದ ಪ್ರತಿಯೊಂದು ಮಾಹಿತಿಯನ್ನೂ ರೆಸ್ಯೂಮ್ನಲ್ಲಿ ಸೇರಿಸುವ ಅಗತ್ಯವಿಲ್ಲ. ಉದ್ಯೋಗದಾತರಿಗೆ ಮುಖ್ಯವಾಗಿ ಬೇಕಾಗಿರುವುದು ನಿಮ್ಮ ಅರ್ಹತೆ, ಅನುಭವ ಮತ್ತು ಹುದ್ದೆಗೆ ಸಂಬಂಧಿಸಿದ ಕೌಶಲ್ಯಗಳು. ಅನಗತ್ಯ ಮಾಹಿತಿಗಳನ್ನು ಸೇರಿಸಿ ರೆಸ್ಯೂಮ್ ಅನ್ನು ತುಂಬಾ ಉದ್ದವಾಗಿಸಬೇಡಿ. ಹೊಸದಾಗಿ ಉದ್ಯೋಗ ಹುಡುಕುತ್ತಿರುವವರು ಸಾಮಾನ್ಯವಾಗಿ ಒಂದು ಪುಟದ ರೆಸ್ಯೂಮ್ ಸಿದ್ಧಪಡಿಸಬಹುದು. ಅನುಭವಿಗಳಿಗೆ ಅಗತ್ಯಕ್ಕೆ ಅನುಗುಣವಾಗಿ ಎರಡು ಪುಟಗಳವರೆಗೆ ಇರಬಹುದು.
ಒಂದು ಉತ್ತಮ ರೆಸ್ಯೂಮ್ ಎಂದರೆ ಕೇವಲ ನಿಮ್ಮ ವಿದ್ಯಾರ್ಹತೆ ಮತ್ತು ಅನುಭವಗಳ ಪಟ್ಟಿ ಅಲ್ಲ. ಅದು ನಿಮ್ಮ ಸಾಮರ್ಥ್ಯ, ಕೌಶಲ್ಯ ಮತ್ತು ವೃತ್ತಿಪರ ವ್ಯಕ್ತಿತ್ವವನ್ನು ಪರಿಚಯಿಸುವ ಪ್ರಮುಖ ದಾಖಲೆಯಾಗಿದೆ. ಹೀಗಾಗಿ ರೆಸ್ಯೂಮ್ ಸಿದ್ಧಪಡಿಸುವಾಗ ಸರಳತೆ, ಸ್ಪಷ್ಟತೆ ಮತ್ತು ನಿಖರತೆಗೆ ಆದ್ಯತೆ ನೀಡಿ. ಅರ್ಜಿ ಸಲ್ಲಿಸುವ ಪ್ರತಿಯೊಂದು ಹುದ್ದೆಗೂ ಅನುಗುಣವಾಗಿ ರೆಸ್ಯೂಮ್ನಲ್ಲಿ ಬದಲಾವಣೆ ಮಾಡಿಕೊಳ್ಳಿ. ನಿಮ್ಮ ಸಾಧನೆಗಳನ್ನು ಸಾಧ್ಯವಾದಷ್ಟು ಅಂಕಿಅಂಶಗಳ ಮೂಲಕ ವಿವರಿಸಿ. ಕಳುಹಿಸುವ ಮೊದಲು ಕಾಗುಣಿತ, ವ್ಯಾಕರಣ ಮತ್ತು ಸಂಪರ್ಕ ಮಾಹಿತಿಯನ್ನು ಪರಿಶೀಲಿಸಿ.
ನೆನಪಿಡಿ: ಉತ್ತಮ ರೆಸ್ಯೂಮ್ ನಿಮಗೆ ಉದ್ಯೋಗವನ್ನು ಖಚಿತಪಡಿಸುವುದಿಲ್ಲ. ಆದರೆ ಸಂದರ್ಶನದವರೆಗೆ ತಲುಪುವ ಅವಕಾಶವನ್ನು ಹೆಚ್ಚಿಸಬಹುದು. ಆದ್ದರಿಂದ ಉದ್ಯೋಗಕ್ಕಾಗಿ ಅರ್ಜಿ ಸಲ್ಲಿಸುವ ಮೊದಲು ನಿಮ್ಮ ರೆಸ್ಯೂಮ್ಗೆ ಒಮ್ಮೆ ಗಮನ ಕೊಡಿ. ನಿಮ್ಮಲ್ಲಿರುವ ಸಾಮರ್ಥ್ಯವನ್ನು ಸರಿಯಾಗಿ ಪರಿಚಯಿಸುವುದೇ ಉದ್ಯೋಗದತ್ತ ಇಡುವ ಮೊದಲ ಹೆಜ್ಜೆ!
ಉದ್ಯೋಗಕ್ಕೆ ಸಂಬಂಧಿಸಿದ ಇನ್ನಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ