ಪುರೋಹಿತರಿಲ್ಲದೆ ಮದುವೆಯಾದ ಅನಿರುದ್ಧ್ – ಕಾವ್ಯಾ; ಏನಿದು ಸ್ವಾಭಿಮಾನಿ ವಿವಾಹ?

ಖ್ಯಾತ ಸಂಗೀತ ನಿರ್ದೇಶಕ ಅನಿರುದ್ಧ್ ರವಿಚಂದರ್ ಮತ್ತು ಉದ್ಯಮಿ ಕಾವ್ಯಾ ಮಾರನ್ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ. ನವೆಂಬರ್ 11 ರಂದು ಗ್ರೀಸ್ ದೇಶದಲ್ಲಿ ಇವರ ವಿವಾಹ ನೆರವೇರಿತು. ಸಾಂಪ್ರದಾಯಿಕ ಧಾರ್ಮಿಕ ಆಚರಣೆಗಳನ್ನು ಬದಿಗಿಟ್ಟು ಈ ಜೋಡಿ ಸ್ವಾಭಿಮಾನಿ ಮದುವೆಯ ಮೊರೆ ಹೋಗಿದೆ. ಸಮಾನತೆ ಮತ್ತು ಪರಸ್ಪರ ಗೌರವದ ಸಂಕೇತವಾಗಿ ಇಬ್ಬರೂ ಮಾಲೆ ಬದಲಾಯಿಸಿಕೊಂಡು ಸರಳವಾಗಿ ಹೊಸ ಬಾಳಿಗೆ ಹೆಜ್ಜೆ ಇಟ್ಟಿದ್ದಾರೆ.

ಮದುವೆ ಫೋಟೋಗಳಲ್ಲಿ ಅನಿರುದ್ಧ್ ಮತ್ತು ಕಾವ್ಯಾ ಚೈನ್ ಬದಲಾಯಿಸಿಕೊಳ್ಳುತ್ತಿರುವ ದೃಶ್ಯ ಎಲ್ಲರ ಗಮನ ಸೆಳೆದಿತ್ತು. ಈ ಬಗ್ಗೆ ಡಿಎಂಕೆ ಐಟಿ ವಿಭಾಗದ ಕಾರ್ಯದರ್ಶಿ ಡಾ. ಟಿ.ಆರ್.ಬಿ. ರಾಜಾ ಸ್ಪಷ್ಟನೆ ನೀಡಿದ್ದಾರೆ. ಕುಟುಂಬಸ್ಥರು ಮತ್ತು ಆಪ್ತರ ಸಮ್ಮುಖದಲ್ಲಿ ಹಾರ ಹಾಗೂ ಸರ ಬದಲಾಯಿಸಿಕೊಂಡು ಇವರು ಸ್ವಾಭಿಮಾನಿ ವಿವಾಹವಾಗಿದ್ದಾರೆ ಎಂದು ಅವರು ಎಕ್ಸ್ ಖಾತೆಯಲ್ಲಿ ತಿಳಿಸಿದ್ದಾರೆ. ನವೆಂಬರ್ 10 ರಂದು ನಿಶ್ಚಿತಾರ್ಥ ನಡೆದಿದ್ದು ಮರುದಿನ ಮದುವೆ ಜರುಗಿದೆ.

ಸ್ವಾಭಿಮಾನಿ ವಿವಾಹವನ್ನು ತಮಿಳಿನಲ್ಲಿ ಸುಯಮರಿಯಾದೈ ತಿರುಮಣಂ ಎಂದು ಕರೆಯಲಾಗುತ್ತದೆ. ಸಮಾಜ ಸುಧಾರಕ ಪೆರಿಯಾರ್ ಇ.ವಿ. ರಾಮಸಾಮಿ ಅವರು ತಮಿಳುನಾಡಿನಲ್ಲಿ ಆರಂಭಿಸಿದ ಚಳವಳಿಯಿಂದ ಇದು ಹುಟ್ಟಿಕೊಂಡಿದೆ. ಜಾತಿ ತಾರತಮ್ಯ ಮತ್ತು ಪುರುಷ ಪ್ರಧಾನ ಪದ್ಧತಿಗಳನ್ನು ವಿರೋಧಿಸಿ ಸಮಾನತೆ ಸಾರುವುದು ಇದರ ಮುಖ್ಯ ಉದ್ದೇಶವಾಗಿದೆ. 1967 ರಲ್ಲಿ ಹಿಂದೂ ವಿವಾಹ ಕಾಯ್ದೆಗೆ ತಿದ್ದುಪಡಿ ತರುವ ಮೂಲಕ ತಮಿಳುನಾಡಿನಲ್ಲಿ ಈ ಪದ್ಧತಿಗೆ ಕಾನೂನು ಮಾನ್ಯತೆ ನೀಡಲಾಯಿತು.

ಸಾಂಪ್ರದಾಯಿಕ ಹಿಂದೂ ಮದುವೆಗಳಂತೆ ಇಲ್ಲಿ ಪುರೋಹಿತರು ಅಥವಾ ಹೋಮ ಹವನಗಳ ಅಗತ್ಯವಿರುವುದಿಲ್ಲ. ಬಂಧು ಮಿತ್ರರು ಹಾಗೂ ಸಾಕ್ಷಿಗಳ ಸಮ್ಮುಖದಲ್ಲಿ ವಧು ವರರು ಪರಸ್ಪರ ಒಪ್ಪಿಗೆ ಸೂಚಿಸಿ ಹಾರ ಅಥವಾ ಉಂಗುರ ಬದಲಾಯಿಸಿಕೊಳ್ಳುತ್ತಾರೆ. ಇಲ್ಲಿ ಧಾರ್ಮಿಕ ವಿಧಿವಿಧಾನಗಳಿಗಿಂತ ಇಬ್ಬರು ವ್ಯಕ್ತಿಗಳ ಸಮಾನತೆ ಮತ್ತು ಒಪ್ಪಿಗೆಗೆ ಹೆಚ್ಚಿನ ಮಹತ್ವ ನೀಡಲಾಗುತ್ತದೆ. ಸೆಕ್ಷನ್ 7-ಎ ಅಡಿಯಲ್ಲಿ ಇಂತಹ ವಿವಾಹಗಳು ಕಾನೂನುಬದ್ಧವಾಗಿವೆ.

ಇದನ್ನೂ ಓದಿ: ಮದುವೆಯ ಫೋಟೋ ಹಂಚಿಕೊಂಡ ಅನಿರುದ್ಧ್ ರವಿಚಂದರ್, ಕಾವ್ಯಾ ಮಾರನ್

ಗ್ರೀಸ್‌ನಲ್ಲಿ ನಡೆದ ಈ ಸಂಭ್ರಮದಲ್ಲಿ ಸೂಪರ್ ಸ್ಟಾರ್ ರಜನಿಕಾಂತ್ ಮತ್ತು ಅವರ ಕುಟುಂಬಸ್ಥರು ಭಾಗಿಯಾಗಿದ್ದರು. ತಮಿಳುನಾಡು ಮಾಜಿ ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ ಹಾಗೂ ಉದಯನಿಧಿ ಸ್ಟಾಲಿನ್ ಕೂಡ ಪಾಲ್ಗೊಂಡು ನವಜೋಡಿಗೆ ಶುಭ ಹಾರೈಸಿದರು. ಅನಿರುದ್ಧ್ ತಮ್ಮ ಪತ್ನಿಯೊಂದಿಗಿನ ಮೊದಲ ಅಧಿಕೃತ ಫೋಟೋವನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿದ್ದಾರೆ. ಜೀವನದಲ್ಲಿ ಒಮ್ಮೆ ಸಿಗುವ ಈ ಸುಂದರ ಕ್ಷಣ ಜೀವನಪೂರ್ತಿ ಜೊತೆಯಾಗಿರಲಿ ಎಂದು ಅವರು ಸುಂದರವಾಗಿ ಬರೆದುಕೊಂಡಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.