Anupam Kher: ಬೋಳು ತಲೆಯವರಿಗೆ ವಿಡಿಯೋ ಅರ್ಪಿಸಿದ ಅನುಪಮ್​ ಖೇರ್​; ಕೂದಲು ಇರುವವರಿಗೆ ಸವಾಲು

ಖ್ಯಾತ ನಟ ಅನುಪಮ್​ ಖೇರ್ (Anupam Kher)​ ಅವರು ಈವರೆಗೂ 500ಕ್ಕೂ ಅಧಿಕ ಸಿನಿಮಾಗಳನ್ನು ಮಾಡಿದ್ದಾರೆ. ಕೆಲವೇ ದಿನಗಳ ಹಿಂದೆ ಅವರು 538ನೇ ಸಿನಿಮಾ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದರು. ಈಗ ಅವರು ಹೊಸ ಅವತಾರದಲ್ಲಿ ಜನರ ಎದುರು ಬಂದಿದ್ದಾರೆ. ಬೋಳು ತಲೆಯಿಂದಲೇ ಫೇಮಸ್​ ಆದವರು ಅನುಪಮ್​ ಖೇರ್​. ತಲೆಯಲ್ಲಿ ಕೂದಲು ಇರುವ ಎಲ್ಲರಿಗೂ ಅವರು ಸವಾಲು ಹಾಕಿದ್ದಾರೆ. ಬೋಳು ತಲೆಯ (Bald Head) ಮೇಲೆ ವಿಚಿತ್ರ ವಿನ್ಯಾಸದ ಟ್ಯಾಟೂ ಹಾಕಿಸಿಕೊಂಡು ಅವರು ಪೋಸ್​ ನೀಡಿದ್ದಾರೆ. ತಲೆಯಲ್ಲಿ ಕೂದಲು ಇರುವವರು ಇದನ್ನು ಮಾಡಲು ಸಾಧ್ಯವೇ ಎಂದು ಅನುಪಮ್​ ಖೇರ್​ ಪ್ರಶ್ನಿಸಿದ್ದಾರೆ. ಸೋಶಿಯಲ್​ ಮೀಡಿಯಾದಲ್ಲಿ ಈ ವಿಡಿಯೋ (Anupam Kher Viral Video) ವೈರಲ್​ ಆಗಿದೆ. ನೆಟ್ಟಿಗರು ಬಗೆಬಗೆಯಲ್ಲಿ ಕಮೆಂಟ್​ ಮಾಡುತ್ತಿದ್ದಾರೆ.

ಅನುಪಮ್​ ಖೇರ್​ ಅವರು ಸೋಶಿಯಲ್​ ಮೀಡಿಯಾದಲ್ಲಿ ಆ್ಯಕ್ಟೀವ್​ ಆಗಿದ್ದಾರೆ. ಆಗಾಗ ಅವರು ಹೊಸ ಹೊಸ ಪೋಸ್ಟ್​ ಹಂಚಿಕೊಳ್ಳುತ್ತಾ ಇರುತ್ತಾರೆ. ಈಗ ಅವರು ಪೋಸ್ಟ್​ ಮಾಡಿರುವ ಈ ವಿಡಿಯೋ ಎಲ್ಲರ ಗಮನ ಸೆಳೆಯುತ್ತಿದೆ. ಬೋಳು ತಲೆಯ ಜನರಿಗಾಗಿ ಅವರು ಈ ವಿಡಿಯೋವನ್ನು ಡೆಡಿಕೇಟ್​ ಮಾಡಿದ್ದಾರೆ. ಸಾವಿರಾರು ಮಂದಿ ಇದಕ್ಕೆ ಲೈಕ್​ ಮಾಡಿದ್ದು, ಹಲವಾರು ಕಮೆಂಟ್​ಗಳು ಬಂದಿವೆ. ಲಕ್ಷಾಂತರ ಬಾರಿ ಈ ವಿಡಿಯೋ ವೀಕ್ಷಣೆ ಕಂಡಿದೆ.

View this post on Instagram

A post shared by Anupam Kher (@anupampkher)

‘ಜಗತ್ತಿನಲ್ಲಿ ಇರುವ ಬೋಳು ತಲೆಯವರಿಗಾಗಿ ಈ ಪೋಸ್ಟ್​ ಅರ್ಪಣೆ. ತಾವು ಏನು ಬೇಕಾದರೂ ಮಾಡಬಹುದು ಅಂತ ಕೂದಲು ಇದ್ದವರು ಜಂಬಪಡುತ್ತಾರೆ. ಆದರೆ ಅವರು ಇದನ್ನು ಮಾಡಲು ಸಾಧ್ಯವೇ? ಖಂಡಿತಾ ಇಲ್ಲ’ ಎಂದು ಅನುಪಮ್​ ಖೇರ್ ಅವರು ಬರೆದುಕೊಂಡಿದ್ದಾರೆ. ಬಹಳ ವರ್ಷಗಳಿಂದ ಅವರು ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದಾರೆ. ತಲೆಯಲ್ಲಿ ಕೂದಲು ಇಲ್ಲದ ವ್ಯಕ್ತಿಯೊಬ್ಬ ನಟ ಆಗುವುದು ಕಷ್ಟ ಇದ್ದಂತಹ ದಿನಗಳಲ್ಲಿ ಅನುಪಮ್​ ಖೇರ್​ ಅವರು ತಮ್ಮ ಬೋಳುತಲೆಯನ್ನೇ ಒಂದು ಐಡೆಂಟಿಟಿ ಆಗಿಸಿಕೊಂಡು ಹಲವು ಪಾತ್ರಗಳನ್ನು ಮಾಡಿದ್ದರು.

ಇದನ್ನೂ ಓದಿ: Vijay 69: ಅನುಪಮ್​ ಖೇರ್​ ಹೊಸ ಚಿತ್ರಕ್ಕೆ ‘ವಿಜಯ್​ 69’ ಶೀರ್ಷಿಕೆ; ಇಂಥ ಟೈಟಲ್​ ಇಟ್ಟಿದ್ದಕ್ಕೆ ಇದೆ ಒಂದು ಕಾರಣ

ವಿವೇಕ್​ ಅಗ್ನಿಹೋತ್ರಿ ನಿರ್ದೇಶನ ಮಾಡಿದ ‘ದಿ ಕಾಶ್ಮೀರ್​ ಫೈಲ್ಸ್​’ ಸಿನಿಮಾದಲ್ಲಿ ಅನುಪಮ್​ ಖೇರ್​ ಅವರು ಒಂದು ಪ್ರಮುಖ ಪಾತ್ರ ಮಾಡಿದ್ದರು. ಆ ಸಿನಿಮಾದಿಂದ ಅವರ ಜನಪ್ರಿಯತೆ ಇನ್ನಷ್ಟು ಹೆಚ್ಚಾಗಿದೆ. ಈಗ ಅವರಿಗೆ ಹೊಸ ಹೊಸ ಅವಕಾಶಗಳು ಹರಿದುಬರುತ್ತಿವೆ. 538ನೇ ಸಿನಿಮಾದಲ್ಲಿ ಅವರು ರವೀಂದ್ರನಾಥ್​ ಟ್ಯಾಗೋರ್​ ಪಾತ್ರವನ್ನು ಮಾಡಲಿದ್ದಾರೆ. ಆ ಸಿನಿಮಾ ಬಗ್ಗೆ ಹೆಚ್ಚಿನ ಮಾಹಿತಿ ಇನ್ನಷ್ಟೇ ಸಿಗಬೇಕಿದೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.