ನನ್ನ ನಟನೆಗೆ ಪ್ರಶಸ್ತಿ ಸಿಕ್ಕರೆ ಖುಷಿಯಾಗುತ್ತಿತ್ತು: ಬೇಸರ ಹೊರಹಾಕಿದ ಅನುಪಮ್ ಖೇರ್

69ನೇ ರಾಷ್ಟ್ರೀಯ ಚಲನಚಿತ್ರ (National Film Award) ಪ್ರಶಸ್ತಿ ನಿನ್ನೆ (ಆಗಸ್ಟ್ 25) ಘೋಷಣೆಯಾಗಿದೆ. ತಮಿಳಿನ ‘ರಾಕೆಟ್ರಿ: ದಿ ನಂಬಿ ಎಫೆಕ್ಟ್’ ಸಿನಿಮಾಕ್ಕೆ ಅತ್ಯುತ್ತಮ ಸಿನಿಮಾ ಪ್ರಶಸ್ತಿ ಬಂದಿದೆ. ಅತ್ಯುತ್ತಮ ನಟ ಪ್ರಶಸ್ತಿ ‘ಪುಷ್ಪ’ ಸಿನಿಮಾದ ನಾಯಕ ಅಲ್ಲು ಅರ್ಜುನ್​ (Allu Arjun) ಪಾಲಾಗಿದೆ. ಅತ್ಯುತ್ತಮ ನಟಿ ಪ್ರಶಸ್ತಿ, ಆಲಿಯಾ ಭಟ್ ಹಾಗೂ ಕೃತಿ ಸೆನನ್ ಹಂಚಿಕೊಂಡಿದ್ದಾರೆ. ನಿರೀಕ್ಷೆ ಹುಟ್ಟಿಸಿದ್ದ ಹಲವು ಸಿನಿಮಾಗಳಿಗೆ, ನಟರಿಗೆ ಪ್ರಶಸ್ತಿ ಕೈತಪ್ಪಿದೆ. ಅಂಥಹವರಲ್ಲಿ ಬಾಲಿವುಡ್​ನ ಹಿರಿಯ ನಟ ಅನುಪಮ್ ಖೇರ್ ಸಹ ಒಬ್ಬರು.

ಅನುಪಮ್ ಖೇರ್ ನಟಸಿರುವ ‘ದಿ ಕಾಶ್ಮೀರ್ ಫೈಲ್ಸ್’ ಸಿನಿಮಾ ಪ್ರಶಸ್ತಿ ರೇಸಿನಲ್ಲಿತ್ತು. ‘ದಿ ಕಾಶ್ಮೀರ್ ಫೈಲ್ಸ್’ ಸಿನಿಮಾಕ್ಕೆ ನರ್ಗಿಸ್ ದತ್ ನ್ಯಾಷನಲ್ ಇಂಟಿಗ್ರೇಷನ್ ವಿಭಾಗದ ಪ್ರಶಸ್ತಿ ದೊರಕಿದೆ. ಅದರ ಹೊರತಾಗಿ ಇನ್ಯಾವುದೇ ಪ್ರಶಸ್ತಿ ಈ ಸಿನಿಮಾಕ್ಕೆ ಸಿಕ್ಕಿಲ್ಲ. ಈ ಸಿನಿಮಾದಲ್ಲಿ ಅನುಪಮ್ ಖೇರ್ ಅದ್ಭುತವಾಗಿ ನಟಿಸಿದ್ದರು. ಆದರೆ ಅವರಿಗೆ ಯಾವುದೇ ಪ್ರಶಸ್ತಿ ಲಭ್ಯವಾಗಿಲ್ಲ. ನಿರ್ದೇಶಕ ವಿವೇಕ್ ಅಗ್ನಿಹೋತ್ರಿಗೂ ಯಾವುದೇ ವಿಭಾಗದಲ್ಲಿ ಪ್ರಶಸ್ತಿ ಲಭ್ಯವಾಗಿಲ್ಲ.

ಈ ಬಗ್ಗೆ ಟ್ವೀಟ್ ಮಾಡಿ ಸಣ್ಣ ಬೇಸರ ಹೊರಹಾಕಿರುವ ಅನುಪಮ್ ಖೇರ್, ”ದಿ ಕಾಶ್ಮೀರ್ ಫೈಲ್ಸ್’ ಸಿನಿಮಾಕ್ಕೆ ಬಹಳ ಪ್ರಮುಖವಾದ, ಗೌರವವುಳ್ಳ ನರ್ಗಿಸ್ ದತ್ ನ್ಯಾಷನಲ್ ಇಂಟಿಗ್ರೇಷನ್ ಪ್ರಶಸ್ತಿ ಬಂದಿರುವುದು ಬಹಳ ಖುಷಿ ಹಾಗೂ ಹೆಮ್ಮೆ ತಂದಿದೆ. ಸಿನಿಮಾದಲ್ಲಿ ನಟಿಸಿರುವ ಜೊತೆಗೆ ಸಿನಿಮಾದ ಸಹ ನಿರ್ಮಾಪಕನೂ ಆಗಿರುವ ಕಾರಣ ನಮ್ಮ ಸಿನಿಮಾಕ್ಕೆ ಈ ಪ್ರಮುಖ ಪ್ರಶಸ್ತಿ ಬಂದಿರುವುದು ಬಹಳ ಸಂತಸ ತಂದಿದೆ” ಎಂದಿದ್ದಾರೆ.

ಇದನ್ನೂ ಓದಿ:69th National Film Awards 2023: 69ನೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ ಪ್ರಕಟ; ಇಲ್ಲಿದೆ ಪಟ್ಟಿ

ಮುಂದುವರೆದು, ”ಸಿನಿಮಾದಲ್ಲಿನ ನನ್ನ ನಟನೆಗೂ ಪ್ರಶಸ್ತಿ ಬಂದಿದ್ದರೆ ಇನ್ನಷ್ಟು ಖುಷಿ ಆಗಿರುತ್ತಿತ್ತು. ಆದರೆ ಎಲ್ಲ ಆಸೆಗಳು ಒಮ್ಮೆಲೆ ಈಡೇರಿಬಿಟ್ಟರೆ ಮುಂದೆ ಕೆಲಸ ಮಾಡಲು ಉತ್ಸಾಹ, ಬಯಕೆ ಹೇಗೆ ಉಳಿಯಲು ಸಾಧ್ಯ. ಇರಲಿ ಬಿಡಿ, ಮುಂದಿನ ಬಾರಿ ನೋಡೋಣ. ಪ್ರಶಸ್ತಿ ಗೆದ್ದ ಎಲ್ಲರಿಗೂ ನನ್ನ ಹೃದಯಪೂರ್ವಕ ಧನ್ಯವಾದಗಳು. ಜೈ ಹೋ” ಎಂದು ಅನುಪಮ್ ಬರೆದುಕೊಂಡಿದ್ದಾರೆ.

‘ದಿ ಕಾಶ್ಮೀರ್ ಫೈಲ್ಸ್’ ಸಿನಿಮಾದಲ್ಲಿ ಅನುಪಮ್ ಖೇರ್, ಪುಷ್ಕರ್ ನಾಥ್ ಪಂಡಿತ್ ಹೆಸರಿನ ಪಾತ್ರದಲ್ಲಿ ನಟಿಸಿದ್ದಾರೆ. ಮುಖಕ್ಕೆ ನೀಲಿ ಬಣ್ಣ ಬಳಿದುಕೊಂಡು ಅವರು ಮಾಡಿರುವ ನಟನೆ ಸಿನಿಮಾ ನೋಡಿದವರ ಮನದಲ್ಲಿ ಉಳಿದಿತ್ತು. ಅವರಿಗೆ ಅತ್ಯುತ್ತಮ ನಟ ಅಥವಾ ಅತ್ಯುತ್ತಮ ಪೋಷಕ ನಟ ಪ್ರಶಸ್ತಿ ಸಿಗುವ ನಿರೀಕ್ಷೆಯನ್ನು ಹಲವರು ಇರಿಸಿಕೊಂಡಿದ್ದರು. ಆದರೆ ಅವರಿಗೆ ಯಾವುದೇ ಪ್ರಶಸ್ತಿ ಲಭಿಸಿಲ್ಲ. ಬದಲಿಗೆ ಅತ್ಯುತ್ತಮ ನಟ ಪ್ರಶಸ್ತಿ ಅಲ್ಲು ಅರ್ಜುನ್​ಗೂ, ಅತ್ಯುತ್ತಮ ಪೋಷಕ ನಟ ಪ್ರಶಸ್ತಿ ಹಿಂದಿಯ ಪಂಕಜ್ ತ್ರಿಪಾಠಿಗೂ ಲಭಿಸಿದೆ.

ಅನುಪಮ್ ಖೇರ್​ಗೆ ಎರಡು ಬಾರಿ ರಾಷ್ಟ್ರೀಯ ಪ್ರಶಸ್ತಿ ಲಭಿಸಿದೆ. ಎರಡೂ ಬಾರಿ ತೀರ್ಪುಗಾರರ ವಿಶೇಷ ಮೆಚ್ಚುಗೆ ಮಾತ್ರವೇ ದೊರಕಿದೆ. ಅದರ ಹೊರತಾಗಿ ಎಂಟು ಫಿಲಂಫೇರ್ ಪ್ರಶಸ್ತಿಗಳು ಸಹ ಅನುಪಮ್ ಖೇರ್​ಗೆ ಲಭಿಸಿದೆ. ಇವುಗಳ ಹೊರತಾಗಿ ಪದ್ಮಶ್ರೀ ಮತ್ತು ಪದ್ಮಭೂಷಣ ಪ್ರಶಸ್ತಿಗಳು ಖೇರ್​ಗೆ ಲಭಿಸಿವೆ. ಭಾರತದ ಅತ್ಯುತ್ತಮ ಹಿರಿಯ ಪೋಷಕ ನಟರುಗಳಲ್ಲಿ ಅನುಪಮ್ ಖೇರ್ ಪ್ರಮುಖರಲ್ಲಿ ಒಬ್ಬರು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ