Bhumi Pednekar Birthday: ಭಿನ್ನ ಪಾತ್ರಗಳಿಂದ ಗಮನ ಸೆಳೆದ ನಟಿ ಭೂಮಿ ಪೆಡ್ನೇಕರ್​ಗೆ ಹ್ಯಾಪಿ ಬರ್ತ್​ಡೇ

ಚಿತ್ರರಂಗದಲ್ಲಿ ಒಬ್ಬೊಬ್ಬರ ಆಯ್ಕೆ ಒಂದೊಂದು ರೀತಿ ಇರುತ್ತದೆ. ಕೆಲವು ನಟಿಯರು ಗ್ಲಾಮರ್​ ಬಲದಿಂದ ಯಶಸ್ಸು ಸಾಧಿಸುತ್ತಾರೆ. ಇನ್ನೂ ಕೆಲವರು ಸ್ಟಾರ್​ ಹೀರೋಗಳ ಸಿನಿಮಾಗಳಲ್ಲಿ ಕಾಣಿಸಿಕೊಂಡು ಗೆಲುವು ಪಡೆಯುತ್ತಾರೆ. ಕೆಲವು ನಟಿಯರು ಭಿನ್ನ ಪಾತ್ರಗಳ ಮೂಲಕ ಗಮನ ಸೆಳೆಯುತ್ತಾರೆ. ನಟಿ ಭೂಮಿ ಪೆಡ್ನೇಕರ್ (Bhumi Pednekar)  ಅವರು ಮೂರನೇ ಪ್ರಕಾರಕ್ಕೆ ಸೇರುವವರು. ನಟಿಯಾಗಿ ಅವರು ಚಿತ್ರರಂಗಕ್ಕೆ ಕಾಲಿಟ್ಟು 7 ವರ್ಷಗಳು ಕಳೆದಿವೆ. ಇಷ್ಟು ವರ್ಷಗಳಲ್ಲಿ ಅವರು 10ಕ್ಕೂ ಅಧಿಕ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಬಾಲಿವುಡ್​ (Bollywood) ಹೀರೋಯಿನ್​ಗಳ ಪೈಕಿ ಭೂಮಿ ಪೆಡ್ನೇಕರ್​ ಅವರು ಭಿನ್ನವಾಗಿ ಗುರುತಿಸಿಕೊಂಡಿದ್ದಾರೆ. ಇಂದು (ಜುಲೈ 18) ಅವರಿಗೆ ಜನ್ಮದಿನದ (Bhumi Pednekar Birthday) ಸಡಗರ. ಆ ಪ್ರಯುಕ್ತ ಎಲ್ಲರೂ ಶುಭಾಶಯ ತಿಳಿಸುತ್ತಿದ್ದಾರೆ. ಭೂಮಿ ಪೆಡ್ನೇಕರ್​ ಸಾಗಿ ಬಂದ ಹಾದಿಯನ್ನು ಫ್ಯಾನ್ಸ್​ ಮೆಲುಕು ಹಾಕುತ್ತಿದ್ದಾರೆ.

ಬಹುತೇಕ ನಟಿಯರು ನೇರವಾಗಿ ಬಂದು ಕ್ಯಾಮೆರಾ ಮುಂದೆ ನಿಲ್ಲುತ್ತಾರೆ. ಆದರೆ ಭೂಮಿ ಪೆಡ್ನೇಕರ್​ ಆ ರೀತಿ ಅಲ್ಲ. ನಟಿ ಆಗುವುದಕ್ಕೂ ಮುನ್ನ ಪ್ರತಿಷ್ಠಿತ ಯಶ್​ ರಾಜ್​ ಫಿಲ್ಮ್ಸ್ ಸಂಸ್ಥೆಯಲ್ಲಿ ಅವರು ಸಹಾಯಕ ಕಾಸ್ಟಿಂಗ್​ ಡೈರೆಕ್ಟರ್​ ಆಗಿ 6 ವರ್ಷ ಕೆಲಸ ಮಾಡಿದ್ದರು. ನಂತರ ‘ದಮ್​ ಲಗಾಗೆ ಹೈಷಾ’ ಚಿತ್ರದ ಮೂಲಕ ಚೊಚ್ಚಲ ಬಾರಿಗೆ ಹೀರೋಯಿನ್​ ಆಗಿ ಪರಿಚಿತರಾದರು.

ಮೊದಲ ಸಿನಿಮಾದಲ್ಲಿ ಬಳುಕುವ ಬಳ್ಳಿಯಂತೆ ಕಾಣಿಸಿಕೊಂಡು ಜನರನ್ನು ರಂಜಿಸಬೇಕು ಎಂಬ ಆಸೆ ಅನೇಕರಿಗೆ ಇರುತ್ತದೆ. ಆದರೆ ಭೂಮಿ ಪೆಡ್ನೇಕರ್​ ಆಯ್ಕೆ ಮಾಡಿಕೊಂಡಿದ್ದ ಪಾತ್ರ ಭಿನ್ನವಾಗಿತ್ತು. ‘ದಮ್​ ಲಗಾ ಕೆ ಹೈಷಾ’ ಚಿತ್ರದಲ್ಲಿ ಅವರು ಧಡೂತಿ ದೇಹ ಹೊಂದಿರುವ ಯುವತಿಯಾಗಿ ಕಾಣಿಸಿಕೊಂಡರು. ಆ ಪಾತ್ರಕ್ಕಾಗಿ ನಿಜವಾಗಿಯೂ ದೇಹದ ತೂಕ ಹೆಚ್ಚಿಸಿಕೊಂಡಿದ್ದರು.

2019ರಲ್ಲಿ ತೆರೆಕಂಡ ‘ಬಾಲಾ’ ಸಿನಿಮಾದಲ್ಲಿ ಭೂಮಿ ಪೆಡ್ನೇಕರ್​ ಅವರು ಕಪ್ಪು ಮೈಬಣ್ಣದ ಹುಡುಗಿಯ ಪಾತ್ರ ಮಾಡಿದರು. ಆ ಸಿನಿಮಾ ಕೂಡ ಯಶಸ್ವಿ ಆಯಿತು. ಭೂಮಿ ಪೆಡ್ನೇಕರ್​ ಅಭಿನಯಕ್ಕೆ ಪ್ರೇಕ್ಷಕರು ಫಿದಾ ಆದರು. ಪ್ರತಿ ಪಾತ್ರದ ಮೂಲಕವೂ ಜನರಿಗೆ ಒಂದು ಮೆಸೇಜ್​ ನೀಡಲು ಭೂಮಿ ಪ್ರಯತ್ನಿಸುತ್ತಾರೆ. ಆ ಕಾರಣಕ್ಕಾಗಿ ಅವರು ಅಭಿಮಾನಿಗಳಿಗೆ ಸಖತ್​ ಇಷ್ಟ ಆಗುತ್ತಾರೆ.

2022ರ ಆರಂಭದಲ್ಲಿ ‘ಬದಾಯಿ ದೋ’ ಸಿನಿಮಾ ತೆರೆಕಂಡಿತು. ಆ ಚಿತ್ರದಲ್ಲಿ ಲೆಸ್ಬಿಯನ್​ (ಸಲಿಂಗಕಾಮಿ) ಯುವತಿಯ ಪಾತ್ರವನ್ನು ಭೂಮಿ ಪೆಡ್ನೇಕರ್​ ಆಯ್ಕೆ ಮಾಡಿಕೊಂಡರು. ಅಂಥ ಬೋಲ್ಡ್​ ಪಾತ್ರ ಮಾಡುವಲ್ಲಿ ಅವರು ಯಾವುದೇ ಹಿಂಜರಿಕೆ ತೋರಲಿಲ್ಲ. ಈಗ ಅವರ ಕೈಯಲ್ಲಿ ಅನೇಕ ಆಫರ್​ಗಳಿವೆ. ನಟನೆಯ ಸಾಮರ್ಥ್ಯದಿಂದ ಬಾಲಿವುಡ್​ನಲ್ಲಿ ಅವರು ತಮ್ಮ ಸ್ಥಾನ ಭದ್ರಪಡಿಸಿಕೊಂಡಿದ್ದಾರೆ.