ಇಂದಿಗೂ ಬಾಡಿಗೆ ಮನೆಯಲ್ಲಿ ವಾಸಿಸುತ್ತಿರುವ ಖ್ಯಾತ ನಟಿ ವಿದ್ಯಾ ಬಾಲನ್; ಕಾರಣ ಏನು?

ನಟಿ ವಿದ್ಯಾ ಬಾಲನ್​ ಅವರು ಹಲವು ವರ್ಷಗಳಿಂದ ಚಿತ್ರರಂಗದಲ್ಲಿದ್ದಾರೆ. ಅನೇಕ ಗಮನಾರ್ಹ ಸಿನಿಮಾಗಳನ್ನೂ ಅವರು ನೀಡಿದ್ದಾರೆ. ಸಖತ್ ಬೇಡಿಕೆ ಹೊಂದಿರುವ ಅವರಿಗೆ ಕೈ ತುಂಬ ಸಂಭಾವನೆ ಸಿಗುತ್ತದೆ. ಕೆಲವು ಬ್ರ್ಯಾಂಡ್​ಗಳಿಗೆ ಪ್ರಚಾರ ರಾಯಭಾರಿ ಆಗಿರುವ ಅವರು ಆ ಮೂಲಕವೂ ಹಣ ಗಳಿಸುತ್ತಾರೆ. ವಿದ್ಯಾ ಬಾಲನ್​ ಅವರ ಪತಿ ಸಿದ್ದಾರ್ಥ್​ ರಾಯ್​ ಕಪೂರ್​ ಅವರು ನಿರ್ಮಾಪಕನಾಗಿ ಗುರುತಿಸಿಕೊಂಡಿದ್ದಾರೆ. ಈ ದಂಪತಿ ಈಗಲೂ ಬಾಡಿಗೆ ಮನೆಯಲ್ಲಿ ವಾಸ ಮಾಡುತ್ತಿದ್ದಾರೆ ಎಂಬುದು ಅಚ್ಚರಿಯ ಸಂಗತಿ. ಅದಕ್ಕೆ ಒಂದು ಪ್ರಮುಖ ಕಾರಣ ಕೂಡ ಇದೆ.

ವಿದ್ಯಾ ಬಾಲನ್​ ಅವರು ಬಾಡಿಗೆ ಮನೆಯಲ್ಲಿ ವಾಸವಾಗಿದ್ದಾರೆ ಎಂದರೆ ಅವರಿಗೆ ಹಣದ ಕೊರತೆ ಇದೆ ಎಂದೇನೂ ಅಲ್ಲ. ಸ್ವಂತ ಮನೆ ಖರೀದಿಸಲು ಸಾಧ್ಯವಾಗದಷ್ಟು ಬಡತನ ಅವರಿಗೆ ಇಲ್ಲ. ಹಾಗಿದ್ದರೂ ಕೂಡ ಅವರು ಬಾಡಿಗೆ ಮನೆಯಲ್ಲಿ ವಾಸ ಮಾಡುತ್ತಿದ್ದಾರೆ. ತಮ್ಮ ಈ ನಿರ್ಧಾರಕ್ಕೆ ಕಾರಣ ಏನು ಎಂಬುದನ್ನು ವಿದ್ಯಾ ಬಾಲನ್​ ಅವರು ಇತ್ತೀಚಿನ ಕಾರ್ಯಕ್ರಮವೊಂದರಲ್ಲಿ ವಿವರಿಸಿದ್ದಾರೆ.

ಮದುವೆ ಆದ ಬಳಿಕ ಹೊಸ ಮನೆ ಖರೀದಿಸಲು ವಿದ್ಯಾ ಬಾಲನ್​ ಮುಂದಾದರು. ಹಲವು ಮನೆಗಳನ್ನು ನೋಡಿದರೂ ಕೂಡ ಅವರಿಗೆ ಇಷ್ಟ ಆಗುವಂತಹ ಮನೆ ಸಿಗಲಿಲ್ಲ. ಅಂತಿಮವಾಗಿ ಒಂದು ಮನೆ ಅವರಿಗೆ ಇಷ್ಟ ಆಯಿತು. ಆದರೆ ಆ ಮನೆಯನ್ನು ಮಾರಲು ಅದರ ಮಾಲಿಕರು ರೆಡಿ ಇರಲಿಲ್ಲ. ಹಾಗಾಗಿ ಆ ಮನೆಯನ್ನು ಬಾಡಿಗೆಗೆ ಪಡೆಯುವುದು ವಿದ್ಯಾ ಬಾಲನ್​ ಅವರಿಗೆ ಅನಿವಾರ್ಯ ಆಯಿತು. ಸಮುದ್ರ ಕಡೆಗೆ ಮುಖ ಮಾಡಿರುವ ಈ ಮನೆಯಲ್ಲಿ ಸುಂದರವಾದ ಗಾರ್ಡನ್​ ಇದೆ. ಅದು ವಿದ್ಯಾ ಬಾಲನ್​ ಅವರಿಗೆ ತುಂಬ ಇಷ್ಟವಾಯಿತು. ಆ ಕಾರಣದಿಂದಲೇ ಅವರು ಆ ಮನೆಯನ್ನು ಬಾಡಿಗೆಗೆ ಪಡೆದರು.

ಇದನ್ನೂ ಓದಿ: ವಿದ್ಯಾ ಬಾಲನ್ ಜೊತೆ ನಟಿಸೋಕೆ ಹೀರೋಗಳಿಗೆ ಇಷ್ಟವೇ ಇಲ್ಲ; ಸತ್ಯ ಹೇಳಿದ ನಟಿ

ಬೆಂಗಾಲಿ, ಹಿಂದಿ, ಮಲಯಾಳಂ, ತಮಿಳು, ತೆಲುಗಿನ ಸಿನಿಮಾಗಳಲ್ಲಿ ವಿದ್ಯಾ ಬಾಲನ್ ಅವರು ನಟಿಸಿದ್ದಾರೆ. ‘ಪರಿಣೀತ’, ‘ಲಗೇ ರಹೋ ಮುನ್ನ ಭಾಯ್’, ‘ಭೂಲ್​ ಭುಲಯ್ಯ’ ಮುಂತಾದ ಸಿನಿಮಾಗಳಿಂದ ಅವರಿಗೆ ದೊಡ್ಡ ಮಟ್ಟದ ಖ್ಯಾತಿ ಸಿಕ್ಕಿತು. ಬಿಡುಗಡೆಗೆ ಸಿದ್ಧವಾಗಿರುವ ‘ಭೂಲ್​ ಭುಲಯ್ಯ 3’ ಸಿನಿಮಾದಲ್ಲೂ ವಿದ್ಯಾ ಬಾಲನ್​ ಅಭಿನಯಿಸಿದ್ದಾರೆ. ಈ ಸಿನಿಮಾದ ಟೀಸರ್​ ಬಿಡುಗಡೆಯಾಗಿ ಸದ್ದು ಮಾಡುತ್ತಿದೆ. ದೀಪಾವಳಿ ಹಬ್ಬದ ಸಮಯದಲ್ಲಿ ಈ ಸಿನಿಮಾ ರಿಲೀಸ್​ ಆಗಲಿದೆ. ಆ ಬಳಿಕ ವಿದ್ಯಾ ಬಾಲನ್ ಅವರ ಬೇಡಿಕೆ ಇನ್ನಷ್ಟು ಹೆಚ್ಚಾಗಲಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.